Кеше Орталық сайлау комиссиясының төрағасы Қуандық Тұрғанқұловтың төрағалық етуімен Комиссияның отырысы өтті. Онда Орталық сайлау комиссиясының Қазақстан Республикасы Парламенті Мәжілісі депутаттарының кезектен тыс сайлауы жөніндегі саяси партиялар үшін дауыс беруге арналған сайлау бюллетенінің мәтінін бекіту туралы, Парламент Мәжілісі депутаттары мен мәслихаттары депутаттарының сайлауына шет мемлекеттер мен халықаралық ұйымдардың байқаушыларын аккредиттеу туралы және Жалпыұлттық социал-демократиялық партиясының сайлау комиссиялары құрамында кеңесші дауыс құқығы бар мүшесі болып табылатын саяси партиялардың өкілдеріне сайлау комиссияларының басқа мүшелерімен тең еңбекақы төлеу жөніндегі үндеуі туралы мәселелер талқыланды.
Бұл мәселелер бойынша Орталық сайлау комиссиясының хатшысы Бақыт Мелдешов, Орталық сайлау комиссиясының мүшесі Татьяна Охлопкова және Орталық сайлау комиссиясы төрағасының орынбасары Владимир Фоос хабарлама жасады. Бақыт Мелдешовтің атап өтуінше, Орталық сайлау комиссиясы Қазақстан Республикасындағы сайлаушылардың жалпы санының 1 пайызы резервін қоса дайындалуға және сайлау учаскелеріне жеткізілуге тиіс сайлау бюллетеньдерінің санын белгіледі. Осыған байланысты Парламент Мәжілісі депутаттарының кезектен тыс сайлауы жөнінде 9 398 154, ал барлық деңгейдегі мәслихаттар депутаттарының кезекті сайлауы жөнінде 17 423 313 сайлау бюллетені дайындалатын болады.
Екінші мәселе бойынша хабарлама жасаған Татьяна Охлопкованың хабардар еткеніндей, Орталық сайлау комиссиясы Парламент Мәжілісі депутаттары мен мәслихаттар депутаттарының сайлауына шет мемлекеттердің, халықаралық ұйымдардың тағы 14 байқаушысын аккредиттеді. Қазіргі уақытқа дейін Қазақстан Республикасы Сыртқы істер министрлігінің ұсынуымен барлығы 61 байқаушы аккредиттелген. Олардың 46-сы – ЕҚЫҰ/ДИАҚБ миссиясының, 11-і – ТМД байқаушылар миссиясының өкілдері, 4-уі – шет мемлекеттердің байқаушылары.
Ал үшінші мәселе жөнінде хабардар еткен Владимир Фоостың айтуынша, Орталық сайлау комиссиясы Жалпыұлттық социал-демократиялық партиясының үндеуін қарау нәтижесінде аумақтық сайлау комиссияларына қызметкерлері сайлау комиссиялары құрамында саяси партиялардың кеңесші дауыс құқығы бар өкілдері болып табылатын ұйымдарға сайлау науқанын әзірлеу мен өткізу кезеңінде олардың орташа айлық жалақыларын сақтау туралы хат жолдауды ұсыну жөнінде шешім қабылдады.
Отырыстан соң өткен брифингте Орталық сайлау комиссиясының төрағасы Қуандық Тұрғанқұлов БАҚ өкілдерін сайлау барысымен таныстырды. Төрағаның атап өткеніндей, Жаңаөзен қаласының аумағында Парламент Мәжілісі депутаттары мен мәслихаттар депутаттарын сайлау бұрын белгіленген мерзімде, яғни 2012 жылғы 15 қаңтарда өтеді. Өйткені, бұл аумақтық-әкімшілік бірлікте төтенше жағдай енгізу туралы Президенттің Жарлығында сайлауды өткізуге тыйым салынбаған. Осыған байланысты Орталық сайлау комиссиясы Жарлықпен белгіленген шектеулерді ескере отырып, кандидаттар мен сайлаушылардың құқықтарын қамтамасыз ету үшін барлық қажетті шараларды қабылдауда.
«Бұл адам құқығы саласындағы Қазақстан Республикасы қол қойған халықаралық құжаттарға қайшы келмейді, – деді Қуандық Тұрғанқұлов осы мәселе жөнінде. – Өйткені, ендігі шектеулер адамның Азаматтық және саяси құқықтар туралы халықаралық пакт бекіткен «абсолюттік» құқықтары мен бостандықтарын шектемейді, тек сайлауалды үгіт жүргізу тәсілдерінің аясын белгілі бір дәрежеде тарылтады. Және бұл ретте барлық саяси партиялар мен мәслихат депутаттығына кандидаттар тең. Дегенмен, үгіт жұмысын жүргізудің нысандары мен әдістерін таңдауда белгілі бір дәрежеде шектеулі жағдайда болады».
Сөз барысында төраға оны да атай кетті. Яғни, қала аумағында негізінен сайлауалды үгітті бейбіт жиналыстар, митингтер, шерулер, пикеттер мен демонстрациялар өткізу арқылы жүргізу шектеледі. Алайда, бұқаралық ақпарат құралдарында үгіт науқаны толық көлемде өткізілетін болады. Осыған байланысты Орталық сайлау комиссиясы мәслихаттар депутаттығына кандидаттардың сайлаушылармен кездесулер өткізуіне бюджеттен бөлінген қаражатты бұқаралық ақпарат құралдарында қосымша үгіт материалдарын жариялау және баспа өнімдерін шығару үшін пайдалануына рұқсат береді. Ал Парламент Мәжілісі депутаттарын сайлауға қатысатын саяси партиялардың үгіт материалдары Жаңаөзен қаласы тұрғындарына республикалық және жергілікті теле-радио арналары мен баспа бұқаралық ақпарат құралдары арқылы жететін болады.
«Жаңаөзен қаласында республикалық «Еуразия», «Еларна», «Қазақстан», «Хабар», облыстық «Ақтау – Қазақстан» телеарналары мен Қазақ радиосы, сондай-ақ кабельді теледидар жұмыс істеп тұр, – деді әрі қарай Қуандық Тұрғанқұлов. – Қалалық мәслихат депутаттығына кандидаттар баспа өнімдерін әзірлеу үшін облыстық баспахананың қызметін пайдалана алады. Қалалық сайлау комиссиясы штаттық режімде жұмыс істеуде. Комиссияның қарамағында барлық қажетті әдістемелік материалдар мен құжаттар бар».
Орталық сайлау комиссиясының басшысы сайлау науқаны барысын байқауды ұйымдастыру жайына да тоқталып өтті. Оның атап өтуінше, байқаушылар мен сарапшыларға, соның ішінде шет мемлекеттер мен халықаралық ұйымдардың өкілдеріне бұл өңірге бару мүмкіндігі қамтамасыз етілетін болады. Сонымен қатар, олар сайлау барысы, сайлау органдарының жұмысы, барлық сайлау үдерісіне қатысушылардың қызметі туралы ақпараттармен де қамтамасыз етіледі. Сондай-ақ Қуандық Тұрғанқұлов сайлау туралы заңға сәйкес бұқаралық ақпарат құралдары кандидаттар мен саяси партиялардың сайлау науқанын объективті жариялауға міндетті екенін де ескертті. Бұл ретте кандидаттар мен саяси партиялардың ар-намысына, қадір-қасиетіне және іскерлік беделіне нұқсан келтіретін үгіт материалдары мен өзге де ақпаратты жариялаудан аулақ болу керек. Барлық кандидаттар мен партиялық тізімдерін ұсынған саяси партиялардың сайлауалды үгіт жүргізуі үшін бұқаралық ақпарат құралдарына тең жағдайда қол жеткізуі кепілдендірілуі тиіс.
Брифинг соңында Комиссия төрағасы 20 желтоқсанда аяқталған мәслихаттар депутаттығына кандидаттарды тіркеудің алдын ала қорытындыларымен де таныстырып өтті. Алдын ала мәліметтер бойынша, ұсынылған 10 мыңнан астам үміткердің 9 165-і мәслихаттар депутаттығына кандидат ретінде тіркелген. Соның ішінде облыстық, Астана мен Алматы қалалық мәслихаттарына – 1752, аудандық мәслихаттарға – 5523, қалалық мәслихаттарға 1890 кандидат бар.
Тіркелген кандидаттардың 3446-сы – «Нұр Отан» ХДП-ның, 264-і – Қазақстанның «Ақ жол» демократиялық партиясының, 99-ы – Қазақстанның Коммунистік халықтық партиясының, 50-і – Қазақстан социал-демократиялық «Ауыл» партиясының, 57-сі – «Әділет» демократиялық партиясының, 22-сі – «Руханият» партиясының, 11-і – Қазақстанның Патриоттары партиясының, 9-ы – Жалпыұлттық социал-демократиялық партиясының, 3-еуі – Қазақстанның «Азат» демократиялық партиясының, 1-еуі – Қазақстанның Коммунистік партиясының мүшелері. Барлық тіркелген кандидаттар 21 желтоқсаннан бастап сайлауалды үгіт жұмыстарына кірісе алады.
Әлисұлтан ҚҰЛАНБАЙ.