Ұлттық валюта – мемлекеттіліктің басты нышандарының бірі. Осындай жоғары мәртебеге ие төл теңгеміздің егемен елдің дербес ақша-кредиттік саясатын жүргізуші құралына айналып, Тәуелсіздік жылнамасына алтын әріптермен жазылғанына биыл 18 жыл толды. Елбасымыз Нұрсұлтан Назарбаевтың экономикалық реформаларын серпінді жүзеге асырудың мемлекеттік тұтқаларының бірі Қазақстан Республикасының Ұлттық Банкі ұлттық валютамыздың одан әрі тұғырлана түсуін қамтамасыз етіп келеді.
Биылғы жылдың айтулы оқиғасы – ел Тәуелсіздігінің 20 жылдығының кеңінен аталуы облыс банк жүйесінің 140 жылдығымен тұспа-тұс келіп отыр. Далалық өлкедегі тұңғыш банктің 1871 жылы Петропавл қаласында ашылуы кездейсоқ болмаса керек. Тоғыз жолдың торабы бойындағы шаһардың көрші Ресейдің Батыс Сібір аймағы мен Қазақстанның және Орта Азияның орталық өңірлерінің керуен жолдары қиылысында орналасуы сауда-саттық саласында маңызды орын алды. Бастапқыда Ресей империясының, кейін Кеңес елінің құрамында болған Қазақ елі өзінің дербес ақша саясатын жүргізе алмағаны белгілі. 1991 жылы желтоқсанда егемендігіміз жария етілгеннен кейін Қазақстан нарықтық экономика талаптарына жауап беретін банк жүйесін құруға кірісті. Еліміз алдында дербес ақша-кредиттік саясатын жүргізу және республика экономикасын одан әрі реформалау міндеті тұрды. Соған байланысты ұлттық валютамызды енгізу қажеттігі туды. Ресей ұсынған рубль аймағына ену шарты Қазақстан үшін қолайсыз болды. Айналымда қолма-қол ақшаның жетімсіздігі қиын жағдай қалыптастырды. Экономика тұрақсызданып, өндіріс құлдырады. Тауарлар мен қызметтер бағасы бұрын-соңды болмаған дәрежеде шарықтады. 1993 жылдың аяғында инфляция көрсеткіші 2297 пайызға жетті. 1993 жылы 13 сәуірде КСРО Мемлекеттік банкінен бөлініп шыққан Қазақ республикалық банкін Қазақстан Республикасының Ұлттық Банкі етіп құру жөнінде заң қабылданды. Осы жылы 15 қарашада айналымға төл теңгеміз енгізіліп, банк жүйесінің ұлттық нормативтік және құқықтық негіздерін реттеу үрдісі басталды. Бұл – Президенттің дер кезінде қабылдаған көрегенді байламы еді. Өйткені, осы кезеңде бірыңғай ақша жүйесін сақтап қалуға болмайтыны, соған орай өз валютамызды енгізу, дербес ақша-кредиттік саясат жүргізу ауадай қажет болатын. Жалпы қолданыстағы рубль Қазақстанның Тәуелсіздігін тежейтіні айдан анық еді. Мұндай тәуекелге бару ел мүддесін ойлаудан туған бірден-бір батыл шешім болатын.
Тәуелсіздіктің елең-алаң шақтарындағы сол бір қиын жылдар есімде ұмытылмастай жатталып қалыпты. Өзге жерлердегідей облыста да ақша айырбасы өте ұйымшылдықпен әрі қысқа мерзімде атқарылды. Айналымнан 1961-1962 жылғы үлгідегі 35,5 миллиард рубль банкноталары алынды. Олар өңделіп, 16 мың орамаға салынды. Сосын инкассаторлық қаптармен қоймаларға тапсырылды. Барлығы 770 қапқа 20 тонна ескі Кеңес ақшасы жинақталды. Қызылжар өңірі бойынша 362 мың адам ақша айырбастап, оның жалпы сомасы 19,6 миллиард ескі рубль болды. 1993 жылы 22 қарашадан бастап зейнетақылар мен іссапар ақылары ұлттық валютамызбен беріле бастады. Вокзалдарда, әуежайларда, орталық базарларда жедел түрде валюта айырбастау қосындары ашылды. Осылайша облыстың қаржылық жүйедегі жаңа өлшемдері Тәуелсіздік жылдарында уақыт сынынан сүрінбей өтті. Экономикаға салмақ түсірген мұнайдың әлемдік бағасының құлдырауы мен көтерілу кезеңдерін, екі бірдей әлемдік қаржы дағдарысын бастан өткерсе де, банк секторы тұрғындар сенімін ақтай білді.
Ұлттық қаржы жүйесінің негізгі даму кезеңдерін былайша сипаттауға болады. Теңгеміз айналымға енгеннен бастап 1995 жылға дейінгі аралықта Ұлттық Банктің басты міндеті гиперинфляцияны тежеу болды. Бар күш-жігер инфляцияны төмендетуге, ақша-кредит саясатын жетілдіруге, ұлттық валютаның ішкі-сыртқы тұрақтылығын қамтамасыз етуге бағытталды. Экономиканы несиелеу екінші деңгейдегі банктерге жүктелді. Нақты қолданылған шаралардың нәтижесінде инфляция 60 пайызға дейін төмендетілді. 1995 жылы «Ұлттық Банк туралы» Заң қабылданып, заңнамалық жағынан жетілдірілді. Ұйымдық, қаржылық тетіктер нақтыланды.
1996-1998 жылдар елде макроэкономикалық тұрақтылыққа қол жеткізуімен ерекшеленді. Инфляцияны тежеу одан әрі жалғасып, 60,3 пайыздан 1,9 пайызға төмендеді. Банк жүйесін реформалаудың бірінші бағдарламасы қабылданып, халықаралық стандарттарға сәйкестендірілді. Капитал жеткіліктігіне, активтер сапасына, менеджмент деңгейіне, бухгалтерлік есепке, телекоммуникациялық байланысқа баса назар аударылды. Капиталдандыру деңгейін көтеруге, басқа да нормативтерді енгізуге қатаң талаптар қойылды. Сөйтіп тұтастай банк жүйесінің сапалық дамуына жол ашылды. 1998-1999 жылдары Ресейдегі қаржы дағдарысы мен мұнайдың әлемдік бағасының құлдырауы ұлттық валютамыздың беріктігіне үлкен сын болды. Осы кезеңде төл теңгеміз қатаң девальвацияға ұшырап, инфляция 17,8 пайызға дейін көтерілді. Теңгенің тегеурінін қалпына келтіру мақсатымен еркін айырбас бағамы енгізілді. Мұның өзі қазақстандық тауар өндірушілердің бәсекелестік қарымын арттырумен қатар экономиканың қарыштап дамуына қозғау салды.
2000-2006 жылдар экономикамыздың қарышты дамуымен ерекшеленді. Инфляция тұрақты деңгейде (6,4-8,4 пайыз) сақталып,ішкі жалпы өнімнің жылдық өсімі 10,3 пайызды құрады. Баға тұрақтылығына қол жеткізу өндіріске оң әсерін тигізді. 2007 жылдың басында АҚШ-тың ипотекалық заемдар нарығында орын алған дағдарыс әлемдік қаржы нарығындағы жағдайды шиеленістіріп жіберді. Көптеген елдерде орын алған ақша тапшылығын қазақстандық банктер де бастан кешті. Астық өндіруші елдерде шығымның төмен болуына байланысты бидайдың, өсімдік майының бағалары шарықтап кетті. Мұның бәрі инфляцияның өсуін туғызды.Тек тиісті шаралардың қолданылуы арқасында ғана банк жүйесін біршама тұрақтандыру мүмкін болды. 2007 жылдың екінші жартысында Ұлттық Банктің ақша-кредит саясатына айтарлықтай өзгерістер енгізіліп, жаһандық дағдарысты еңсеру және болашақ сапалы экономикалық өрлеуді қамтамасыз ету міндеттері қойылды. Үкіметтің, Ұлттық Банктің және Қаржылық қадағалау жөніндегі агенттіктің бірлескен іс-қимыл бағдарламасы қабылданды. Экономиканы тұрақтандыру шаралары аясында мемлекет қазынасынан 19 миллиард доллар қаржы құйылды.
Ал айырбас бағамының бір сәттік өзгертілуі күтілген ақша құнсыздануын айтарлықтай төмендетуге, төлем балансы жағдайын жақсартуға, Ұлттық Банктің алтын-валюталық қорын сақтауға ықпал етті. 2008 жылдың соңында жеке тұлғалардың депозиттері бойынша кепілді қайтарым сомасы 700 мыңнан 5 миллион теңгеге дейін көбейтілді.
Дағдарыстан кейінгі даму кезеңі 2010 жылы басталып, макроэкономикалық индикаторлар оң ырғақтармен сипатталды. Ішкі жалпы өнім өсімі қарқын алып, 7 пайыздан асты. Былтыр Қазақстанның банктердегі депозиттер көлемі 74 триллион, экономиканы кредиттеу мөлшері 75 триллион теңгеге, елдің алтын-валюта қоры 58,7 АҚШ долларына жетті.
Қазақстан Республикасының Тәуелсіздігі – мемлекетіміздің зор жетістігі. Осынау аз ғана уақыт ішінде еліміз зор әлеуметтік-экономикалық табыстарға жетті. “Алдымен экономика, сосын саясат” қағидатын ұстанып, адамдардың тұрмысын жақсартуға баса көңіл бөлінді. Тұрғындардың жан басына шаққандағы ішкі жалпы өнім көлемі 9000 АҚШ долларынан асты. 1994 жылмен салыстырғанда 12 есе көп деген сөз. Бүгінде облыстың банк жүйесі ырғақты дамып келеді. Кредиттік салымдар –76,5 миллиард, шағын бизнеске берілген несиелер – 13 миллиард, тұрғындардың тұтыну несиелері – 9,5 миллиард, ипотекалық несиелер – 1,9 миллиард, депозиттік салымдар – 38,1 миллиард теңгені құрап отыр. Осы жылдар ішінде жалпы өңірлік өнім өндіру – 6,6 есе, өнеркәсіп тауарлары – 4 есе, негізгі капиталға инвестициялар тарту – 18 есе ұлғайды.
Экономикадағы өрелі өзгерістер банк секторы қызметімен тығыз байланысты екенін ешкім де жоққа шығармайды. 20 жылда Тәуелсіз Қазақстанның табысты банк жүйесі қалыптасты. Ұлттық валютамыз –теңгенің тегеуріні артып, өз тұғырына нық қонды. Осынау толайым табыстардың, жоғары жетістіктердің бастауында Мемлекет Басшысы Нұрсұлтан Назарбаевтың тұрғанын бәріміз мақтаныш етеміз.
Жомарт ҚАЖЫРАҚЫМОВ, ҚР Ұлттық Банкі Солтүстік Қазақстан облыстық филиалының директоры, экономика ғылымдарының кандидаты.
ПЕТРОПАВЛ.