− Расында, бұл мәселе біраз адамды алаңдатты. Ол алаңдаушылық «Қазақстан Республикасында зейнетақымен қамсыздандыру туралы» заңының 25-бабы 4-бөлігіне ағымдағы жылдың шілде айында өзгерістер енгізілгеннен кейін пайда болды. Бірақ мұндағы негізгі мақсат, азаматтық-құқықтық шарт бойынша қызмет көрсетіп нәпақа тауып жүрген адамдарға олардың ай сайынғы кірістерінен Бірыңғай жинақтаушы зейнетақы қорына 10% зейнетақы жарнасын төлету еді. Әйтсе де негізінде халықтың мазасын қашырған бұл ақпарат емес еді. Өзгертілген редакциядағы 25-бапты оқығандар дүние-мүліктерін, мәселен пәтер, автокөлікті сатудан тапқан кірістен 10% зейнетақы жарнасын төлеуіміз керек пе деп алаңдады.
Мәселен, аталмыш заңның 25-баптың жаңа редакциясында:
«...азаматтық-құқықтық сипаттағы шарттар бойынша кірістер алатын жеке тұлғалар үшiн бірыңғай жинақтаушы зейнетақы қорына төлеуге жататын, әрбiр ай үшiн есептелетiн өз пайдасына мiндеттi зейнетақы жарналары алатын кірісінің 10 пайызы мөлшерiнде...» деп көрсетілген.
Байқасаңыз, бұл сөйлемде «азаматтық-құқықтық сипаттағы шарттар бойынша» кіріс алатын жеке тұлғалар деп келіп, «жұмыстар мен қызметтер» деген екі сөз көрсетілмей қалған. Сол себепті, бұл өзгерісті тікелей түсінер болсақ, азаматтар барлық азаматтық-құқықтық сипаттағы шарттар бойынша кірістерінің 10% зейнетақы жарнасы ретінде төлеулері тиіс болып көрінді. Мәселен, пәтеріңізді немесе автокөлігіңізді сатқыңыз келсе, сатып алушымен азаматтық-құқықтық сипаттағы шарт бойынша жүзеге асыруға мүмкіншілігіңіз бар. Дегенмен Еңбек және халықты әлеуметтік қорғау вице-министрі Светлана Жақыпова дүние-мүлікті сатудан түскен кірістен зейнетақы жарнасын төлеудің қажеті жоқ екендігін айтты. «Жеке тұлғалардың кірісі азаматтық-құқықтық шартқа сай жұмыстарды орындау немесе қызмет көрсету нәтижесінде алған табысы бойынша анықталады. Жеке мүлікті, депозиттерді, акцияларды немесе бағалы қағаздарды сатудан түскен кірістер зейнетақы жарналары бойынша міндетті болып саналмайды», деді вице-министр.
Дайындаған Александр ТАСБОЛАТ,
«Егемен Қазақстан»
