Аустрия президенті Александр Ван дер Беллен, БҰҰ-ның сегізінші Бас хатшысы Пан Ги Мун, Аустрияның бұрынғы президенті Хайнц Фишер, Сербияның премьер-министрі Александр Вучич және тағы басқа да саясат саңлақтарын бір арнада тоғыстырған басқосуда ғаламдық тектоникалық саяси-экономикалық өзгерістер контексіндегі елеулі мәселелер сараланды.
Өзекті форумға еліміздің жетекші оқу орындарының бірі – әл-Фараби атындағы ҚазҰУ және таяуда университет жанында құрылған Пан Ги Мун атындағы тұрақты даму институты БҰҰ-ның жаһандық азаматтық және тұрақты даму бағытындағы бастамаларын жүзеге асыру бойынша ынтымақтастықтың перспективаларын талқылау мақсатында шақырылған болатын.
Еске салсақ, ҚазҰУ «БҰҰ-ның «Академиялық ықпал» жаһандық хабын 2014 жылдан бері басқарып келеді. Аз уақыт ішіндегі нәтиже де жаман емес. Бағдарламаның маңызды қағидаларын іске асыруда халықаралық деңгейде көшбасшы болған университетті әлемнің озық елдері көшбасшы ретінде жоғары бағалап отыр.
ҚазҰУ ректоры, академик Ғалым Мұтановтың «Университет 4.0 – жоғары білім берудегі жаңа кезең» атты баяндамасы форумға қатысушылардың ерекше қызығушылығын тудырды. Аталған бастама бұған дейін БҰҰ-ның Нью-Йорктегі штаб-пәтерінде мамыр айында өткізілген конференция барысында алғаш рет ұсынылған еді. Осы қызметтегі айқын бағыт мемлекеттік бағдарлама – «Болашаққа бағдар: қоғамдық сананы жаңғырту» идеясынан бастау алады.
Жаңа университет моделінің басты мақсаты – өскелең ұрпақты бойында әлемдік жоғары рухани-адамгершілік қасиеттері мен белсенді азаматтық ұстанымы бар ізгі азамат ретінде қалыптастыру. Форумға қатысушылар атап өткендей, «Университет 4.0» жаңа моделі жаһандану жағдайында, сондай-ақ жаңа технологиялардың қарқынды дамуы кезеңінде әлем үшін маңызды.
Қазақстандық жоғары оқу орнының форумға қатысуының басты нәтижесі Ғаламдық азаматтық орталығы (Аустрия), Тұрақты даму институты (Оңтүстік Корея) және әл-Фараби атындағы ҚазҰУ арасында Стратегиялық серіктестік туралы келісімге қол қою болды. Құжатты Аустрияның экс-президенті Хайнц Фишер, БҰҰ-ның сегізінші Бас хатшысы Пан Ги Мун және ҚазҰУ ректоры Ғалым Мұтанов (Қазақстан) қол қойып бекітті. Келісім адамзаттың жаһандық мәселелері мен қазіргі заманның сын-тегеуріндерін шешуде тараптардың күш-жігерін біріктіруге мүмкіндік бермек.
Форумға қатысқан айтулы ғалымдар мен әлемдік деңгейдегі сарапшылар еліміздің ғаламдық ынтымақтастыққа қосып келе жатқан үлесін ерекше бағалап, алғыс білдірді.
Арман ОКТЯБРЬ,
«Егемен Қазақстан»
АЛМАТЫ
