Өмір бойы Қаратөбе өңірінің тарихын қағазға түсіріп, 100-ден аса кітап шығарған Қайыржан Хасанов 1942 жылы дәл осы ауылда дүниеге келген. Ауылдағы Жақсыбай орта мектебінде 1926-1938 жылдары Қайыржан Хасановтың немере ағасы Төлеген Иманғазиев мұғалім болып қызмет еткен. Қазақтың жоғары білімді алғашқы мұғалімдерінің бірі болған Төлеген Иманғазиев Қаратөбеде 1918 жылы ақпанда өткен Батыс Алашорданың І съезіне қатысқаны үшін «халық жауы» атанып, 1938 жылы Орал түрмесінде атылған екен. Сондықтан Хасановтар отбасы Сәуле ауылын ежелден кіндікжұрт санап, ерекше қамқорына алып жүреді.
– Сәуле ауылына шексіз құрметіміз әкемізден жұққан. 2013 жылы әкеміздің ұсынысымен жергілікті ресми орындардың рұқсатын алып, мектеп қабырғасына Төлеген Иманғазиевке ескерткіш тақта орнаттық, – дейді бүгінде италиялық «Eni» мұнай-газ компаниясының Ирақ бөлімшесінде қызмет етіп жүрген Нұржан Қайыржанұлы.
Жақында Нұржан Хасанов 1,6 млн теңге қаржы жұмсап, Сәуле ауылына балалар ойнайтын алаңқай салдыртты. Сырғанағы, әткеншегі, тағы басқа бөліктері бар ойын алаңқайы – белгілі «КСИЛ» фирмасының өнімі. Қазақстан бойынша ресми өкілдерінен алдын ала тапсырыс арқылы алынған ойын жарақтарын фирманың Ақтөбе қаласындағы мамандары арнайы келіп, мектеп пен балабақша ауласына орнатып кеткен.
– Балалар ғана емес, бұл оқиғаға Сәуле ауылының барша тұрғыны балаша қуаныпты. Ауыл азаматтары ақтөбелік жұмысшыларға көмектесіп, «Біздің ауыл үшін, балаларымыз үшін жасалып жатқан нәрсе, бізден қандай жәрдем керек» деп айналшықтай беріпті. Жұмыс барысында күннің ыстығында шөлін бассын деп бірі көже, бірі салқын суын әкеліп тұрыпты. Тіпті мал сойып, қонақасы бергендер бар екен. Ақтөбеден келген мамандар Сәуле ауылы тұрғындарының ұйымшылдығына тәнті болыпты, – деп күледі Нұржан Қайыржанұлы.
Қаладан қалыспайтын ойын алаңы бар Сәуле ауылының балалары жаңа жабдықтарын қызғыштай қорып, ұқыпты пайдаланып жүр.
Осы ойын алаңының ашылуына Орал қаласынан Қайыржан Хасановтың жары Рысты Кәкімқызы, балалары Сәбит, Сәтжан, Нұржан отбасыларымен арнайы қатысты. Сол күні сәулеліктер белгілі өлкетанушы, құрметті журналист, Қаратөбе ауданының құрметті азаматы, ақын Қайыржан Хасановтың Қаратөбе ауданының 90 жылдық мерейтойына арнап жазған «Рухани жаңарған Қаратөбе» атты кітабының тұсаукесеріне куә болды. Қайыржан ағамыздың өмірден өтер алдында дайындап кеткен соңғы кітабында өңір тарихына қатысты көптеген тың мәлімет бар.
Өлкетанушының ұрпақтары 2018-2019 жаңа оқу жылы қарсаңында, «Мектепке жол» бағдарламасы аясында «Бірінші сыныпқа сыйлық» науқанын қолдап, Жақсыбай негізгі орта мектебіне биыл бірінші сыныпқа баратын оқушыларға 20 түрлі кеңсе заты мен оқу-құралы салынған рюкзакты сыйға тартты. Әр оқушыға құны 8 500 теңге құрайтын оқу-құрал Орал қаласынан әкелінді.
Елбасының «Болашаққа бағдар: рухани жаңғыру» бағдарламасы аясында меценаттардың туған жеріне көмектесу бастамасын қолдаған Нұржан Хасанов мұндай қайырымдылық іс болашақта да жалғасатынын айтып отыр.
Қайыржан ағамыз өмірден ерте кеткенімен, соңында салиқалы ұрпақ қалды. Бір ұлы Ғабит Хасанов – филология ғылымдарының докторы, Махамбет Өтемісұлы атындағы БҚМУ-да шәкірт тәрбиелеп жүр. Тағы бір ұлы Ержан жақында Қаратөбе ауданының 90 жылдық тойына орай аудан шекарасына кіреберіске құны 3 млн 200 мың теңгені құрайтын үлкен қақпа орнатып, елге тарту жасады. Жақсылық жолында қызмет жасаған жайсаң жігіттер әке алақаны мен ана сүтімен дарыған тектілік тамырын үзбеуге тырысып жүр.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы