(ЕЛБАСЫ САПАРЫНАН КЕЙІНГІ ТОЛҒАНЫС)
Біз мақала тақырыбына шығарып отырған бұл сөздер Елбасымыздың Жаңаөзен жұртшылығымен кездесуінде айтылды. «Сіздің алдыңызда бүгін бетіміз ұялғаннан, қалай қыларымызды білмегеннен сөйлеп тұрмыз. Кешір деп те айтуға батылымыз бармай тұр. Елдің атынан кешір деуге. Сізден ұят болды. Сіздің қамқорлықтан басқа, жақсылық қылғаннан басқа затыңыз жоқ. Бүгін сіз келдіңіз, сіз келгеннен кейін мынау Өзендегі түнерген күн қайта жап-жарық болғандай болып көрініп тұр маған. Адамдардың көңілі де сондай. Келгеніңізге қатты рахмет айтамын, өзім де қуанып тұрмын, халық та қуанып тұр» – оралмандар кеңесі төрағасының бұл сөзін барша маңғыстаулықтардың ортақ ойы деуге болады. Алдымен Маңғыстау жұртшылығы Елбасымыздың осындай қиын жағдай туындаған тұста арнайы келгеніне разылық білдірді. Нұрсұлтан Әбішұлының қазақы дәстүрімен әңгімені «Мен адамдары қайтыс болған отбасыларына көңіл айтуға келдім» деп бастауының өзі жүректерді елжіретіп жіберді. Елбасымыз талай күннен бері дүрбелеңге түскен халыққа басу айтты, жұртты сабырға шақырды. «Бостандық – басымыздағы бақыт. Сол бақытты ұстай білейік. Еліміз тыныш болса, жеріміз бүтін болса, балаларымыз бақытты болады. Енді-енді аяғымыздан тік тұрып келе жатқанда өз берекемізді өзіміз кетірсек, ұрпақтарымыздың болашағы бұлыңғыр болады», деді Нұрсұлтан Назарбаев. Ақтау мен Жаңаөзендегі кездесулерді телеарналар арқылы көрген облыс халқы, сол кездесулерге қатысқан жұртшылық өкілдері Президенттің бөлекше парасаттылығына тағы да көз жеткізе түсті. Осы арқылы Елбасы әр істе де сонау Тәурат заманынан келе жатқан «Ақиқат бел ортада жатады» деген даналықты басшылыққа алатынын танытып, кез келген құбылысқа диалектикалық қарама-қайшылық заңдылығы тұрғысынан талдау жасаудың үлгісін көрсетіп беріп отыр. Нұрсұлтан Әбішұлы Жаңаөзенде орын алған жаппай тәртіпсіздіктерді қатаң айыптай келіп, оларды заң бұзушылыққа арандатып салған арамзалардың әділ жазадан құтылмайтынын айтты. «Осының барлығына дирижерлік сырттан отырып жасалды. Қай жерде болса да, дүниенің қай түкпірінде болса да, іздеп табамыз оның бәрін. Биыл таппасақ, ендігі жылы табамыз. Шындықты шығартамыз. Сот болады, кінәлілер жауапқа тартылады», деді Президент. Сонымен бірге, Елбасы бұл басбұзарлыққа негізгі айыптылар мұнайшылар емес екендігін де басын ашып көрсетті. «Арандатуға түсіп, ешқандай қылмыс жасамаған адамдардың бәрі босатылады», деді. Олардың еңбек дауына қатысты мәселелердің дер кезінде қаралмауы, проблемаларды тұншықтырып ұстауға тырысу, ел басшылығына жалған ақпарат беру осы оқиғаның бір себебі екендігін ескертті. «Үкімет, «Самұрық-Қазына» қоры, «ҚазМұнайГаз» компаниясы менің еңбек дауын уақытында шешу жөніндегі тапсырмамды орындамады. Өкінішке орай, олар бұл мәселені шешуге қабілетсіз болып шықты. Ұлттық компания мен оның еншілес құрылымдарында кездейсоқ адамдар көп екендігін көріп отырмыз», деді Елбасы. Расында да, Президентке «Барлығы дұрыс болып жатыр. Бармай-ақ қойыңыз, мәселе шешіледі. Өздері тынышталады. Сөйтеміз, бүйтеміз» деп сөйлейтіндердің жауырды жаба тоқуы қандайлық қатерге алып келгенін қазір бүкіл ел көріп-біліп отыр. Президент Ақтауда, Жаңаөзенде сөйлеген сөздерінде мұнайшылардың мұңы тыңдалатынына, осы оқиғадан қорытынды шығарарда барлық факторлар ескерілетініне баса назар аударды. Жаңаөзендегі қордаланып қалған проблемаларды шешудің жолдарын, жұмыссыз қалғандарды жұмыспен қамтудың тетіктерін нақты көрсеткені Нұрсұлтан Әбішұлының экономиканың кілтін білетін қасиетін тамаша танытты. «Мынау «Өзенмұнайгаздың» төңірегінде қазір жаңа өндіріс ашылады. Жаңа мекеме ашамыз. Ол бұрғылау компаниясы болады. Оның құрылысы бір жылдың ішінде жүреді. Сол бір жылдың ішінде адамдарды бұрынғы жалақысымен жұмысқа аламыз», деген Елбасымыздың сөзіне жиналған жұртшылық дуылдата қол соқты. «Олардың бәріне айтыңдар. Ешкімнен қорықпасын. Мен қазір тапсырма беремін. Ешкім оларды қамамайды, ұстамайды, олар келіп, сөйлеспесе, жағдайды білмесек, біз оларды қалай орналастырамыз?», дегенді де айтты Нұрсұлтан Әбішұлы. Президенттің тәртіп сақшыларымен кездесуінде де біраз жайдың басы ашылды. Әуелде алаңға ешқандай қарусыз келген полицейлердің қаруды тек қорғаныс мақсатында қолдануға мәжбүрленгендері айтылды. Оның өзінде көпке дейін оқ аспанға, жерге атылған. Расында да, табельдік қарудағы әр оқ үшін өзі тікелей жауап беретін, орынсыз оқ атса қылмыстық жауапқа тартылатынын білетін тәртіп сақшыларының қару қолдануға тек басқа амалы қалмағанда ғана баратыны белгілі. Мәселені оңайлатып көрсетудің жөнсіздігін ескертті Президент. «Әрбір қайтыс болған адамның қалай опат болғанын тексертеміз. Жеке-жеке. Мән-мәнісін анықтаймыз. Қай жағдайда кімнің кінәлі екенін нақты анықтаймыз», деген Нұрсұлтан Әбішұлы ойын қазақы қара тілмен, қарапайым ұғыммен қайырып, елге сөз арнады. «Осымен мынандай сұмдықты тоқтатыңдар. Масқара болмайық. Солай болды екен деп мен Маңғыстау жұртына көңілімді өзгертпеймін. Қазақ елдің қай түкпірінде жүрсе де менің қазағым. Маңғыстау – 362 әулиенің жері, қасиетті жер. Солардың аруағына күл шашпаңдар. Олардың қаһарына қалмаңдар. Ұят болады» – бүкіл әлем алдында абыройлы Елбасымыздың бұл сөзіне түсініктеме қажет емес деп ойлаймыз. Жаңаөзендегі кездесуде сөз алған ақсақалдың: «Мына айтқаныңызға дән риза болып отырмын. Қайдағы жоқтың бәрін адамның есіне түсірдіңіз. Мұны естіген адамның тебіренбеске амалы жоқ», дегені де сондықтан. Президенттің бұл сапары Жаңаөзен жарасының жазылып, киелі Маңғыстауға мерейлі күндер көп ұзамай қайта келеріне халықтың сенімін арттыра түсті. Жоламан БОШАЛАҚ, «Егемен Қазақстан» – Ақтаудан.Ғұсман Қырғызбаев Олимпиаданың қола жүлдегері атанды
Спорт • Кеше
Париж Олимпиадасы: Эльмир Әлімжанов 1/8 финалға өтті
Спорт • Кеше
Автокөлік жүргізу кезінде өрт шықса, не істеу керек
Төтенше жағдай • Кеше
Астанада 5 баланың анасы биіктен секіріп кеткен
Суицид • Кеше