Аталған татуласу орталығы облыста тұңғыш рет ашылып отыр. Облыс бойынша кәсіби емес медиаторлар ауданда жетерлік. Олар «Медиация туралы» Заңның артықшылықтарын, бұл істің өте маңызды екендігін халыққа түсіндіруде. Атбасар аудандық сотының төрағасы Нұрлан Бекенов бітімгершілік рәсімдері тараптар арасында түсіністік орнату және екі жаққа да тиімді жол табу барша халық үшін қолайлы екендігін айтады.
Тіршілікте кейбір түсініспеушіліктердің болып тұруы заңды. Даудың ушығып кетпеуі үшін татуласу орталығы маңызды рөл атқарады. Медиаторлар да өмірлік тәжірибелері мол, қиыннан қисын таба алатын тәжірибелі адамдар. Олар әр дауды егжей-тегжейлі зерттеп, себептері мен салдарын анықтап, әділ шешімін шығармақ. Осылайша ел ішіндегі ынтымақ өрістеп, татулық нығая түседі.
Жаңа орталықтың ішінде медиация және оның артықшылықтары туралы материалдар жеткілікті. Жаңа жиһаздармен жабдықталған. Іші кірсе шыққысыз бөлмелерінен ізгіліктің ізетті лебі есіп тұрғандай. Алдағы уақытта бір-біріне өкпесі қара қазандай болып, қабағынан қар жауып келген адамдар өзара тіл табысып, шаруалары шешілген соң жадырап қайтатын болады.
Байқал БАЙӘДІЛ,
«Егемен Қазақстан»
Ақмола облысы
