«Зейнетақымен қамтамасыз ету туралы» Қазақстан Республикасы Заңының 2-бабы, 1-тармағына сәйкес Қазақстан Республикасы азаматтары заңнамамен бекітілген тәртіппен зейнетақымен қамтамасыз етілуге құқылы.
Аталған Заңның 22-4-бабы, 2-тармағы бойынша міндетті зейнетақы жарнасын (бұдан әрі – МЗЖ) толық және уақтылы аудармаған жағдайда, салық органдары пайда болған қарыз шегінде агенттің банктегі шоттарынан өндіріп алуға құқылы. МЗЖ бойынша қарызды өндіру «жинақтаушы зейнетақы қорларына аударылуға тиіс МЗЖ сомасы туралы» хабарлама негізінде жүзеге асады.
Агент хабарламаны алғаннан кейін бес күн ішінде салық органына ӘЖК, СТН, аты-жөні, туған күні және сомасы көрсетілген салымшылардың тізімін жолдауға міндетті.
«Зейнетақымен қамтамасыз ету туралы» Заңның 22-бабы, 3-тармағына сәйкес МЗЖ төлеуден келесі тұлғалар босатылады: зейнет жасына толғандар, мүгедектігі мерзімсіз берілген І және ІІ топтағы мүгедектер, әскери қызметкерлер, ішкі істер органының және Әділет министрлігінің Қылмыстық-атқару жүйесі комитетінің қызметкерлері, қаржы полициясы органының және арнайы дәрежесі бар мемлекеттік өртке қарсы қызметінің қызметкерлері.
Салымшылар тізімі тапсырылған жағдайда агенттің банктегі шоттарынан өндіру салық органының инкассалық өкімі негізінде жүзеге асады.
Агент салымшылардың тізімін тапсырмаған жағдайда, салық органының өкімі негізінде банктер және банк қызметін атқарушы мекемелер МЗЖ, міндетті әлеуметтік төлемдер және салықты өтеуден басқа барлық шығыс операцияларды тоқтатуға міндетті. Банктегі шығыс операцияларын тоқтату туралы салық органының өкімін тек сол салық органы заң бұзушылық жойылған соң бір жұмыс күнінен кешіктірмей қайтарып алады.
Агенттің банктегі шоттарында ақша жеткіліксіз болған жағдайда салық органы касса бойынша шығыс операцияларын тоқтатады.
«Зейнетақымен қамтамасыз ету туралы» Қазақстан Республикасының Заңы орындалмаған жағдайда жеке тұлға, жеке кәсіпкер, нотариус, адвокат, заңды тұлға немесе оның лауазымды тұлғасы «Әкімшілік құқық бұзушылық туралы» Қазақстан Республикасы Кодексінің 88-бабы, 3-тармағы бойынша әкімшілік жауапкершілікке тартылады.
Сонымен қатар, салық органдары жыл сайын бұқаралық ақпарат құралдарына МЗЖ бойынша алты айдан артық мерзімде өтемеген агенттердің тізімін жариялайды.
Мемлекеттік саясаттың негізгі бағыттарының бірі ретінде анықталған сыбайлас жемқорлыққа қарсы күрес – салық органдарының да басты бағыттарының бірі болып табылады. Сыбайлас жемқорлық әлеуметтік құбылыс ретінде салық органы қызметінің имиджіне кері әсерін тигізеді, салық төлеушілердің сенімін азайтады, сонымен қатар, мемлекеттің нарықтық экономикалық дамуын шектеп, еліміздің экономикалық және ұлттық қауіпсіздігіне қауіп төндіреді.
Қазақстан Республикасы Қаржы министрлігі Салық комитеті төрағасының 2007 жылғы 26 қыркүйегіндегі бұйрығымен бекітілген салық органдары қызметіндегі сыбайлас жемқорлыққа қарсы күрес стратегиясын жүзеге асыру бағытында біздің қызметкерлер арасында жемқорлық фактілерінің орын алмауы бағытында қатаң шаралар қолданылуда.
Астана қаласы салық департаментінің Алматы ауданы бойынша салық басқармасында сыбайлас жемқорлыққа қарсы күреске ерекше көңіл аударылады, ескерту және алдын алу шаралары қолданылады, сондай-ақ басқарма қызметкерлері арасында жемқорлыққа төзбеуді тәрбиелеу бойынша жұмыстар жүргізіледі.
Қызметкерлердің моральды келбетін көтеру үшін өткізіліп жатқан – қаржы полициясы органының қызметкерлерімен сұхбат, жемқорлық фактілері бойынша бейне материалдар, жемқорлық заңнаманы түсіндіру бойынша профилактикалық жұмыстар жасалады.
Сондай-ақ, қызметкерлердің еңбек және жемқорлыққа қарсы заңнамаларды дұрыс орындауын бақылау үшін салық басқармасы ғимаратының барлық жерінде бейне камералар және шағымдар мен ұсыныстарға арнап жәшіктер мен кітаптар орнатылған.
Атап айтарлығы, салық органдары алғашқылардың қатарында болып салық төлеушілермен электронды байланыс орнатты, бұл жағдай әлбетте, жемқорлық фактілерінің алдын алуда үлкен рөл атқарады.
Бүгінгі таңда біз салық есебін өткізудің электронды түрін насихаттап және енгізіп жүрміз, себебі бұл салық төлеушінің уақытын айтарлықтай үнемдейді және инспектор мен оның дүниеқорлық мақсаттарын іске асыруының алдын алады.
Салық органдары қолданып жатқан шаралар, еліміз үшін қауіпті болған жемқорлық сияқты құбылыстармен күресте өз жемістерін көрсетіп жатыр, бірақ жемқорлықты түбімен жою үшін салық төлеушілердің қолдауы қажет. Біз бірге жұмыла осы жағымсыз құбылысты жеңіп, еліміздің гүлденуі үшін баға жетпес үлес қосамыз.
Аймахан ЕНБАЕВ, Астана қаласы салық департаментінің Алматы ауданы бойынша салық басқармасы мәжбүрлі өндіріп алу бөлімінің жетекші маманы.