Бүгіні және келешегі
Өзгелермен терезесі тең тәуелсіз ел болу ата-бабаларымыздың сан ғасырлардан бері жалғасып келе жатқан қасиетті де асыл арманы еді. Бұл арманды жүзеге асыру жолында халқымыздың басынан қаншама аласапыран уақиғалар өтті, қаншама ұлтжанды арыстар өз өмірлерін құрбан етті. Міне, енді жиырмасыншы ғасырдың соңғы сәтінде қазақ халқы өзінің осы аңсаған арманына жетті. Ежелгі қазақ елінің көгінде Тәуелсіздіктің көк туы желбіреді, бостандықтың арайлы алтын таңы атты. Бүкіл әлемдік қауымдастықтың төріне жер жүзі түгел мойындаған ұлы қайраткер Нұрсұлтан Назарбаев көтерілді. Сөйтіп, өткен тарихы аса бай, мекендейтін жері ұшан-теңіз кең, бірақ бодандықтың салдарынан осыған дейін өзінің ұлттық ерекшелігі мен қадір-қасиетін ешкімге көрсете алмай келе жатқан қазақ халқы аңыз-жырлардағы ұзақ ұйқыдан оянған алып батырлардай дүр сілкіне тұрып, ілезде бүкіл әлемге танымал болды. Дегенмен, тәуелсіздікті жаңадан алған кез-келген жас мемлекеттің болашақ тағдыры, келешек өсіп-өркендеуі тек халықаралық аренадағы жеңістері мен жетістіктеріне ғана байланысты емес екендігі де ежелден белгілі. Бұл ретте елдің ішкі саяси жағдайы мен экономикалық өсу көрсеткіші, халқының тұрмыс деңгейі көп мәселеге өз ықпалын жасайтыны анық. Міне, осындай жағдайда жас Қазақстан Республикасы тәуелсіздік алған күннен бастап өзінің басқаларға ұқсамайтын ерекше жолын таңдай білді. Яғни, біздің еліміз халқының барынша көп ұлтты, жерінің өте ұшан-теңіз кең екендігіне қарамастан, қысылтаяң кезден барынша бейбіт жағдайда аман-есен өтті. Осыған орай қазақ елінің сол бір қиын кезеңнен көшкен жүгін аударып алмай өтуі ең алдымен Елбасының ерен еңбегі екендігін осындайда тағы бір қайталап айту біздің азаматтық парызымыз. Міне, осының нәтижесінде Қазақстан республикасы тәуелсіздіктен кейінгі соқтықпалы соқпақсыз қиын жолдан аман-есен өтіп қана қойған жоқ, сонымен бірге тарих үшін қас-қағымдай болып есептелінетін жиырма жылда экономикасы дамыған алдыңғы қатарлы танымал мемлекеттердің біріне айналды. Бірақ сонымен бірге кез-келген елдің даму дәрежесі оның экономикалық-әлеуметтік деңгейімен ғана емес, мәдени-рухани саладағы жетістіктерімен де өлшенетінін ешқашан да ұмытпаған жөн. Ал бұл саланың ең бастыларының бірі – театр өнері. Өркениетті елдердің бәрі өздерінің мәдени-рухани саладағы жетістіктерін ең алдымен ұлттық театрының шыққан биігі мен көтерілген деңгейі арқылы өлшейді. Осы тұрғыдан келгенде, қазақ елінің де бүгінгі таңға дейін қол жеткізген жетістігі баршылық. Бұл ретте, өткен ғасырдың сонау отызыншы жылдарының алмағайып, ең қиын күндерінің өзінде Темірбек Жүргенов, Жұмат Шанин сияқты ұлттық өнердің шынайы жанашырлары іргесін қалап, шаңырағын көтерген қазақ театр өнерінің өзіндік мектебі бар екендігін атап айтқан жөн. Міне, сол асыл азаматтардың өлшеусіз еңбегінің нәтижесінде қазақ театрының сахнасынан Қалибек Қуанышбаев, Құрманбек Жандарбеков бастаған қаншама өнер жұлдыздары жарқырап көрінді. Әзірбайжан Мәмбетов сынды ұлттық режиссерлеріміз өз кезеңінде бүкіл Кеңес Одағына танымал болды. Еліміз өз алдына жеке шаңырақ көтергеннен кейін күн тәртібінде ұлттық сахна өнерінің осы биік деңгейін төмендетіп алмай, одан әрі дамыта беру міндеті тұрды. Бұл міндетке еліміз тәуелсіздік алған алғашқы күннен бастап айрықша көңіл бөлді. Бұл ретте, Кеңес Одағы тұсында қазақ театрлары, негізінен, республикамыздың қазақтар көп шоғырланған оңтүстік өңірлерінде шаңырақ көтергенін де айта кеткен жөн. Ал оның есесіне теріскей облыстарда қазақ театрлары мүлдем дерлік ашылмады. Тәуелсіздікке қол жеткізгеннен кейін осы кемшіліктерді түзету тез арада қолға алынды. Соның нәтижесінде бұдан бұрын қазақ театрлары мүлдем болмаған және болуы да мүмкін емес сияқты өңірлердің бәрінен ұлттық сахна өнерінің ұжымдары шаңырақ көтерді. Қазір есептеп отырсақ, тәуелсіздіктен кейін дүниеге келген мұндай театрлардың жалпы саны оннан асады. Оның ішінде жаңадан бой көтерген екі опера және балет театры да бар. Және мұның бәрі Елбасының ұлттық театр өнеріне деген шынайы жанашырлығының нәтижесі еді. Өйткені, ол уақытта еліміз өтпелі кезеңнің неше түрлі қиындығын бастан кешіріп жатқан. Міне, сондай жағдайда жаңа театрлар ашу ешқандай қисынға келмейтін іс сияқты болатын. Бірақ біртіндеп өтпелі кезең де артта қалды; қиындықтар да ұмытылды; ал оның есесіне республикамыздың көптеген өңірлерінде Тәуелсіздігіміздің салтанатты белгісіндей болып жаңадан ашылған қазақ театрлары бой түзеп тұр. Міне, осының нәтижесінде бүгін республикамыздағы қазақ театрларының саны 31-ге жетті. Мұның сыртында онға жуық қуыршақ театрлары жұмыс істейді. Сондай-ақ, бізде орыс театрларының ежелден қалыптасқан ерекшелігі, өзіндік мектебі бар. Қазір олардың саны – 16. Бұл орыс театрларының біразы республикамыздың өз ішінде ғана емес, сырт жерлерге де жақсы танымал. Ұйғыр халқының бүкіл дүниежүзі бойынша бірден бір жалғыз театры – біздің Қазақстанда. Корейлер мен немістердің де тарихи отанынан сырт жерлердегі театры – Алматы қаласында орналасқан. Оңтүстік Қазақстан облысынан ашылған өзбек театры туралы да осыны айтуға болады. Соңғы кезде жекеменшік театрлар да біртіндеп көбейе түсуде. Яғни, бүгінгі таңда еліміздегі театрлардың жалпы саны 60-тан асып кеткендігі анық. Бұл өте үлкен күш. Әрине, жаңа театрларды ашумен бар мәселе шешілмейді, бұдан кейін күн тәртібіне оларды бүгінгі заманға сай ғимараттармен, қажетті құрал-жабдықтармен, жеткілікті қаражатпен қамтамасыз ету міндеттері алға қойылады. Бұл жөнінде де Қазақстан Республикасы тәуелсіздіктен кейін өзгелерге үлгі боларлықтай жақсы шаруалар тындырды. Бұған дәлел ретінде соңғы жиырма жыл көлемінде театрларға арналып он төрт жаңа ғимарат салынып, пайдалануға берілгенін айтсақ та жеткілікті. Күрделі жөнделген театрлар да көз қуантады. Жақын арада Қостанай қаласындағы І.Омаров атындағы қазақ театрының жаңа ғимараты есігін айқара ашпақшы. Сондай-ақ, бізде театрларды қажетті мамандармен қамтамасыз ету де жүйелі түрде жолға қойылған. Бұл ретте Т.Жүргенов атындағы Қазақ ұлттық өнер академиясы жемісті жұмыс істеп келеді. Соңғы кезде Астанадағы Өнер академиясы да бұл іске белсенді түрде атсалыса бастады. Бірақ сонымен бірге театр өнері үшін ең басты көрсеткіш материалдық, қаржылық жағдай емес, шығармашылық мәселе екендігін де айта кеткеніміз жөн. Бұл ретте, ең алдымен театрлардағы жаңа қойылымдардың сапасы қай деңгейде; көрермен қауымның оларға деген ынта-ықыласы қандай; режиссура саласында жақсы жаңалықтар көріне ме; актерлердің шеберлігі көңіл қуанта ма, ұлттық драматургиядан соны серпін сезіле ме деген сияқты сансыз сұрақтар бой көтереді. Осы тұрғыдан келгенде, көңілді алаңдататын біраз мәселелер бар. Жалпы, театр – үзбей ізденуді, тынбай еңбек етуді талап ететін өнер. Және ол еңбек пен ізденістің нәтижесі дер кезінде тәуелсіз сарапшылар мен маман сыншылардың талқысынан өтіп, нақты бағасын алып отыруы керек. Егер бұл шарт орындалмаса театр тоқырауға ұшырап, тығырыққа тіреледі. Өкінішке қарай, қазір Қазақстан театрларының басым көпшілігі шығармашылық салада осындай күрделі жағдайды бастан кешуде. Олардың басым көпшілігінің шығармашылық деңгейлері, жасырмай айтқанда – көрген кісіні ұялтып, төмен қаратады. Бұған нақты дәлел келтірейік. Бізде жыл сайын республикалық театр фестивалі өтеді. Міне, осы фестивальге келетін қойылымдардың басым көпшілігінің көркемдік сапасы өте төмен. Мысалы, жақында ғана осындай өнер байқауы Алматы қаласында өткізілді. Театр сыншылары фестивальге қатысқан қойылымдардың кемінде жартысының көркемдік сапасы кәсіби театр деген атаққа мүлдем сәйкес келмейтіндігін ашық айтты. Мұның алдында Тараз қаласында өткен театр фестивалінде де тура осындай сын айтылған еді. Қазір Қазақстанда 45 жасқа дейінгі көзге түсіп жүрген жас режиссерлер мен жас драматургтердің мүлдем жоқ екендігі осының айқын дәлелі. Яғни, еліміздегі театр өнері құлдырауға бет алып барады десек, бұл артық айтқандық болмайды. Ал сонда мұндай қиын жағдайдың орын алуының басты себебі неде? Бұл сұраққа жауап іздесек, негізгі мәселе театрлардың жұмысын ұйымдастырып, басшылық жасауға келіп тіреледі. Осыған орай мына жағдайды қадап айтқымыз келеді. Қазір Қазақстанда әлеуметтік-экономикалық және басқару жүйесінің барлық саласында түрлі жаңарту мен реформа қызу жүруде. Бұдан тек театрлар ғана шет қалған. Яғни, театр жұмысын басқару мен үйлестіруге реформа жасап, қайта құру мүлдем қолға алынған емес. Бұл сала баяғы 1990 жылдардағы қалпынан ешқандай өзгермеген. Кеңестік идеологияның үрдісімен келе жатқан театрларды басқару жүйесінің, яғни көркемдік жетекші, бас режиссер деген қызмет-лауазымдардың әлдеқашан уақыты өткен. Жанашырлықпен тереңірек ойлағанда, бұл жүйе шығармашылық ұжымның шынайы өнер жасауына үлкен кедергі келтіреді. Дәлеліміз төмендегідей. Әдетте, бұл лауазымдарға режиссерлер тағайындалады да, театрдағы эстетикалық, репертуарлық, ерікті актерлік ойын мен құлашты режиссураның дамуына тосқауыл қойылады, түптеп келгенде бүкіл бір театр сол режиссер-бастықтың жеке амбициясы мен өре-қарымының құрбаны болып қала береді. Себебі, олар тек өз қалауы бойынша репертуар таңдайды, өздеріне ұнаған актерлерге ғана рөлдер мен атақтар «бұйырып», талап-талғамы мен шығармашылық мүмкіндіктері әрқалай өнер иелерін әділетті басқаруға қолдары қысқалық етеді. Бастық өзі режиссер-қоюшы болғандықтан, қандай да бір тәуірлеу режиссерлік жұмыстың өзінен асып кетпеуіне бар «күшін» салады. Тіпті «көз қылып» сырттан режиссер шақырса да өзінен төмен суреткерді таңдайтыны аян. Рольдер де бастықтың төңірегіне жиналған жандайшаптау актерлерге тиеді. Осыдан барып, орташа спектакльдер, қызықсыз рольдер пайда болады. Сондай-ақ, бас режиссерге немесе көркемдік жетекшіге бағынышты режиссердің суреткерлік еркіндігінің аяқасты болып, құқығына қол сұғылуы бүгіндері барлық театрларда әдетке айналған. Бәрімізге белгілі, баспасөз беттерінде де, өнер адамдары арасында гу-гу әңгіме болған кейбір театрлардағы айтыс-тартыстардың төркіні де басқару тәсілінің осындай ескіргендігінен болып отыр. Мысалы, Ж.Аймауытов атындағы Павлодар облыстық қазақ театрындағы шығармашылық ұжымның 90 пайызы белгілі режиссер Ерсайын Тәпеновтің басқару стиліне, суреткерлік қарымының бірқалыптылығына, ұжымға жаңа леп, соны үрдіс, өзгеше режиссерлік қалып әкелудегі енжарлығына қарсылық еді десе де болады. Ал Е.Тәпенов мырза ұжым мүшелерінің шығармашылық «аштықтан» туындаған талап-тілектерін түсінгісі келмей, шамшылдық танытып, өзі арыз жазып, театрдан кетті. Мұндай жағдай республикалық Қ.Қожамияров атындағы ұйғыр театрында да кездескендігінен хабардармыз. Басқа театрларда да осындай мәселе ушығып тұрғаны хақ, көбінің үндемей тыныш жатуы – ол театрдағы шығармашылық ахуалдың жоғарғы деңгейде екендігінің көрінісі емес, керісінше «күл болмасаң, бүл бол» дейтін немкеттілік, немесе қазақы кеңқолтықтықтан туындайтын «бір мәнісі болар» деген ой. Театрлардағы мүлгіген тыныштықтан қорқу керек, тіпті содан сақтанған дұрыс шығар, өйткені сілтідей тыныштық тек қабірстанға жарасқан. Ал нағыз, ізденгіш шығармашыл ұжым дуылдап, биіктеп, аспандап, арғы-бергі фестивальдер мен бәйге-жарыстарға қосылып, жанартауша атқылап жатуға керек-ті. Осы тұрғыдан келгенде, қазақстандық театрлардың қайсысының шетелдік жарыстарға қатысып, жүлде алғанын көрдіңіздер?! Жоқ! Өзіміз мақтанып көпіргенмен, ондай жетістіктердің төбесі көрінбей тұр. Театрлардың жұмысын ұйымдастыру мен басқаруға реформа жасау керектігі де осыдан туындап отыр. Осыған орай, Елбасы театрлардың жұмысын жаңа заманға бейімдеу керек деген мәселені үнемі айтып келеді. Мысалы, Президент 2009 жылы Алматыда театр қайраткерлерімен арнайы кездесіп, сахна өнерін өркендету жөніндегі негізгі міндеттерді белгілеп берген болатын. Сондай-ақ Елбасы Қарағандыдағы қазақ театрының жаңа ғимаратын ашу салтанатында сөйлеген сөзінде де, Астана күніне орай бір топ зиялы қауым өкілдерімен кездескенде де бұл мәселеге нақты тоқталды. Өкінішке қарай, Президентіміздің бұл тапсырмаларының жүзеге асуы көңіл көншітпейді. Нақты дәлел келтірейік. Осыдан бірер жыл бұрын көрнекті жазушы-драматург Әкім Тарази баспасөз бетінде театр өнерін жандандыру керектігін айтып мәселе көтерді. Соған орай, Елбасы театрларды нарық заманына бейімдеу керек деп нақты тапсырма берді. Бұл жөнінде Мәдениет министрлігінің Мәдениет комитеті арнайы талқылау өткізіпті деп естиміз. Талқылауға қатысқан бірді-екілі «азулы» театрлардың әрі директор, әрі көркемдік жетекші, әрі бас режиссер ретінде үш бірдей тақта бір өздері отыратын басшылары театрларды нарықтық қатынастарға бейімдеуге үзілді-кесілді қарсы болған көрінеді. Сөйтіп бұл мәселе әлі күнге жабулы қазан жабулы күйінде қалып отыр. Әрине, екі-үш лауазымды қызметті қатар атқарып, театрды бір өзі билеп-төстеп басқаруға үйренген театр басшыларының бұл салаға өзгеріс жасауға ешқашан да ықыласты болмайтыны біз айтпасақ та түсінікті. Ал бірақ Мәдениет комитеті сияқты мемлекеттік мекемелердің бұл мәселеге соншама селсоқ қарауы өте таңқаларлық жағдай!.. Әрине, бүгінгідей әңгімеде театр өнерінде түк жоқ деп ауызды қу шөппен сүртуге де болмайды. Өйткені, бізде талантты режиссерлер, жүйрік актерлер, шүкір, баршылық. Мысалы, Тараздағы Қуандық Қасымов, Астанадағы Нұрқанат Жақыпбаев, Алматыдағы Болат Атабаев, Қостанайдағы Ерсайын Төлеубаев, Ақтаудағы Гүлсина Мерғалиева жаңа қалыптағы, ерекше эстетикалық өлшемдегі суреткерлер, алайда олардың көбі көркемдік жетекші басқаратын театрлардан азар да безер болған. Назар салып қарасақ, шынында да көркемдік жетекші немесе бас режиссер басқаратын театрларда көбіне басқаша ойлайтын, немесе жаңа келген жас режиссердің үні шықпайды, табаны тұрақтамайды, сондықтан да олар бір театрға бастық болып барып, ойларындағы өзге пайымды қойылымдарын жүзеге асырғысы келеді. Ал мұндай дәрежеге жеткенше олардың шығармашылығы шау тартып, үміті жіңішкеріп, қажыры қартайып қалатыны да шындық. Бұл ретте бір режиссердің екінші режиссерге бастық болып, қойылымды олай емес, былай қою керек деп, өз ойы мен талғамын таңуы – қай жағынан алсақ та, ақылға сыймайтын нәрсе. Суреткерлік деген оқшау әлем, оған өзгенің араласуы әдепсіздік, әрі кеткенде әпербақандық. Сондықтан, нарықтық қатынастарға көшудің тиімді жолдарының бірі – театрлардың жұмысын ұйымдастыру мен басқарудың жаңа ережесін жасау. Театр сияқты шығармашылық ұжымды басқару – ой-өресі биік, менмендіктен ада тұлғаларға ғана жарасады. Ал режиссер тек қана жеке суреткер ретінде бағаланып, реті келсе оған басшылықтың тізгінін бермеген абзал. Ол тек өз қойылымының ғана «бастығы» болғаны жөн. Оның өзімен мұраттас актерлермен бірігіп, қауымдасып, шынайы шығармашылық жұмыспен айналысуы үшін осы жүйе дұрыс. Сонда ғана режиссердің басқамен шаруасы болмай, тек қойылымының көркемдік сапасын ғана ойлайтын болады. Театрды кімнің қалай басқаратынын да ойластыру керек. Батыс елдеріндегі үрдісте, ондай басқарушыны «интендант» деп атайды, бізше театр төрағасы десе дұрыс болатын сияқты. Онда басқадай қосарланатын басшылық болмауы керек. Режиссерлікке «бас» деген тіркесті қосақтағаннан ол режиссердің таланты тасып кетпейді, талант пен суреткерлік қарым – я бар, я жоқ, ол болмаса, жай әншейін қанатсыз маман, шанаға жегілген жабы тектес ортақол орындаушы ғана. Ал, жүйріктің аты жүйрік, оған алтын алқа, немесе қарапайым кендір жүген сал, бәйгеден бәрібір бірінші келеді. Сондықтан театрда бас режиссердің емес, жүйрік режиссердің жұмысы құнды, бағалы болады. Ал көркемдік жетекші деген лауазым да ақылға салып бажайласақ, тіпті ерсі. Көркемдікке жетекші не үшін керек? Көркемдік дейтін өнер категориясына жетекшілік жасау ақылға қонбайтын нәрсе екенін мойындайтын уақыт жетті. Сондықтан жалпы басшылықты режиссерге емес, басқа кез-келген суреткер тұлғаға тапсырған ақыл. Ол актер бола ма, драматург бола ма, әлде мәдениеттанушы ма – бәрібір. Тек іске жаны ашитын, өнердің парқын терең түсінетін адам болса болды. Иә, театрдың төрағасы мемлекеттік құзырлы мекемемен келісім-шартқа отырып, ұжым өмірінің барлық саласына жауап беретін бірден-бір тұлға болуы тиіс. Оған ауқымды түрдегі басқару мүмкіндігін берген жағдайда одан мемлекеттік сұраныс пен талап та жоғары болады. Сонымен бірге, ең маңыздысы – театр режиссерлерін әлеуметтік жағынан қорғау керек, яғни авторлармен жұмыс жасауда, тақырып таңдауда, көркемдік өресі өзге, әрі ерекше спектакль қоюда шығармашылық еркіндігінен айырмай, өзінің қойылымының авторы ретінде бағалап, тиісті жалақысынан бөлек гонорар төлеуді заңдастырған абзал. Сонда оның шығармашылдық құқығы қорғалып, суреткерлік ынтасы ұлғая түседі. Бір театрда кем дегенде 3-4 тең құқылы режиссер келісім-шартпен жұмыс істеуі тиіс. Сонда ғана олар бір-бірімен шығармашылық бәсекеде болып, қайткенде де жоғарғы деңгейдегі қойылым қоюға тырысады. Мұндай жағдайда, ұжым артық адамдардан арылады, бос селтеңбайлық, орынсыз міндетсіну де сап тиылады. Сондай-ақ, актерлерге деген көзқарасты да түбегейлі өзгерткен жөн. Бүгінде актерге бәрі қожа – есік көзіндегі вахтердан бастап, төбедегі дөкей бастыққа дейін қожаңдап, қол шошайтатыны жасырын емес. Ал театрдың негізгі еңбекқоры, режиссердің ой-қиялының дұрысы мен бұрысының орындаушысы, оның көрермен алдындағы ұяткері мен жауапкері – бәрі-бәрі актер! Яғни, театрдың негізі актер! Сөйткен азапкер актер айына отыз рөл ойнаса да алатыны бір жалақы. Он емес-ау, анда-санда бір-екі рөлді зорға орындайтын маңғаз актердің да алатыны сол бір жалақы. Әділет қайда сонда, еңбегіңе қарай көретін зейнетің қайда? Сондықтан актерлерге еңбекақы төлеу үрдісін де түбегейлі өзгертетін кез жетті, яғни жалақы мөлшері еңбегіне, оның сапасы мен психологиялық салмағына сай бағаланып тағайындалуын заңдастыру қажет. Басқаша айтқанда, қойылымның көркемдік жүгін көтеріп тұратын басты немесе негізгі рөл атқардың ба, сол қызметіңе лайықты жалақы ал. Кішігірім эпизодтық рөлдерге жегілдің бе, театрдың ағымдағы репертуарының көбінен боссың ба, онда тұрақты белгіленген еңбекақыға риза бол. Бұл жерде кезінде жасаған еңбегің үшін берілген атақ-даңқтың буын ортаға салудың жөні жоқ. Қазіргі еңбегіңіздің сапасы мен нарқы қандай? Айына отыз рөл ойнап театрдың негізгі шығармашылық жүгін көтеріп жүрген жас актердің жазығы қайсы? Яғни, театрдағы жалақы төлеудің ит жылғы ескі түрі, бәрін бірдей теңгермешілдікке таңған атамзаманғы әділетсіздіктің тамырына балта шабатын уақыт әлдеқашан жетті! Иә, айта берсең, актер жайлы мұң мен жыр таусылмайды. Мысалы, қазіргі кезде Қазақстандағы театр актерлерінің орташа жалақысы жиырма бес-отыз мың теңге көлемінде ғана. Баспана мәселесінде де өте күрделі жағдай қалыптасқан. Мысалы, Астанадағы К.Байсейітова атындағы опера және балет театрында 117 артист үйсіз жүр. Басқа театрлардың да жағдайы осыған ұқсас. Жоғарыда айтылғандардың тікелей әсерінен аймақтардағы театрларда кәсіби маман тапшылығы ушығып тұрғаны жасырын емес. Бәрінде дерлік өрелі режиссер, талантты актерлер, басқа да кәсіби мамандар жеткіліксіз. Өйткені, жоғары оқу орнын бітіргендер ол жаққа ат ізін салмайды, бәрі Алматы мен Астананы төңіректеп, той-томалақтарды жағалап жүр. Облыстық әкімдіктер театрды, әсіресе оның зәулім ғимаратын, режиссері немесе актерлерін тек өздерінің жиылыстары мен мәдени шараларын өткізу кезінде ғана қажетсінеді. Тіпті олар шығармашылық ұжымның репертуарында қандай пьесалар бар, олай қалай қойылып, оны қай актер қайтіп орындап жүр деген мәселелерге мүлдем бас ауыртпайды. Және ол мәселені айқындап, саралап бере алатын облыстық мәдениет департаментінде кәсіби мамандар ешқашан болған емес. Бүгіндері театрлардың бәрінде дерлік «Көркемдік кеңес» деген құрылым бар, ол, әрине, ақылдасу ретінде ғана құзырға ие. Алайда, кейбір театр басшыларына ол кеңес өздерінің шамшыл, жеке бастың тізелі шешімдерін өткізу үшін пайдаланылатын «жамылғы». Бұны да түбірімен өзгерту керек. Оның орнына ақылдастар алқасы не тәуелсіз сарапшылар тобы құрылғаны жөн. Сөз реті келгенде, Театр қайраткерлер одағының қазіргі жағдайы жөнінде де бір-екі ауыз сөз айта кеткеніміз жөн. Өйткені, театр өнерінің бүгіні мен болашағы белгілі бір дәрежеде осы Одақтың жұмысына да тығыз байланысты. Кезінде бұл Одақ республикамыздағы мүмкіндігі барынша мол, қаржылық-материалдық жағы ең мықты ұйымдардың бірі болған еді. Бірақ қазір ол күш-қуатының бәрінен дерлік айырылған. Бұған кімдер кінәлі – ол өз алдына жеке әңгіме. Біз әзірше тек шет жағасын ғана айтайық. Мысалы, кезінде Президентіміздің жеке ұйғарымымен Одаққа тегін берілген Алматының Желтоқсан көшесіндегі көп қабатты көрікті ғимарат қазір қолды болған. Бір кезде тәп-тәуір тірлік жасап, еліміздегі барлық дерлік театрлардың киім-кешегін, жасау-жабдығын пішіндеп-тігіп, оқа-түйме тағып, түгендеп отырған кішігірім тігін фабрикасы да ізім-қайым құрдымға кеткен. Біздер бірін біліп, бірін білмейтін нешеме меншіктер, гараждар, көліктер, жер телімдері де жоқ болған. Одан беріде Жібек жолы көшесінің бойынан бұйырған бұзылған моншаны паналаған Одақ бес-он жылдай бұйығы өмір кешкен екен. Қазір бұл шаңырақтың орнында үңірейген ор жатыр. Өзінің жеке ғимараты жоқ, бұрындары меншігінде болған барлық дүние-мүлкі ұстағанның қолында, тістегеннің аузында кетіп ысырап болған, бюджеттен бір тиынға да қаржыландырылмайтын, баспанасыз Қазақстан театр қайраткерлері одағының бүгінгі жайы, міне, осындай. Соған қарамастан, басқаға қол созып сұраншақтанып, байлардың есігін күзетіп жүріп, «Театр.kz» журналын шығарып, тұңғыш рет сценографтардың көрмесін ұйымдастырып, каталог дайындап, жыл сайын халықаралық Театр күні берілетін республикалық «Еңлікгүл» атты кәсіби сыйлық беруді жүзеге асырып жүрміз. Телефондық байланыстарымызға қаражат таппай қиналсақ та, орталық офисі Парижде орналасқан, мүшелігіне 100-ден аса мемлекеттер кіретін халықаралық Театр институтымен байланыс жасап, кеше ғана Қытайдың Чунцин қаласында құрылтайы өткен Азия Театрларының альянсына Қазақстанның абыройы үшін толық мүше болуға талпынып отырмыз. Қазақстан сынды қарқара елімізге, елдің маңдайына біткен әлемге әйгілі Елбасына сүйеніп, халықаралық Азия театрларының алғашқы фестивалін әсем елордамыз Астанада өткізейік деп те айтып қалдық. Әйтсе де екіұдайдамыз, өйткені Мәскеудегі ТМД елдерінің Театр одақтарының халықаралық конфедерациясына жетім мүше екеніміз елдің бәріне аян; өйткені жылына бір рет төленетін 700 еуро жарнаны төлей алмай, жерге қараймыз. Төл министрлігіміздің анда-санда өткізіп тұратын коллегия-жиылыстарының біріне де Театр Қайраткерлер одағы шақырылмайды; театр фестивалін бірігіп қолға алайық, әр аймақтардағы театрлардың басын қосып, форумдар өткізіп, мастер-кластар жасайық; актер, режиссер, суретші, жарықшы, тіпті жас драматургтерді жинап алып, алыс-жақын елдердегі сол өнердің озық үлгілерімен сусындататын, үйренетін әрекеттер жасайық деген ықыласты талпынысымыз әлі күнге еленбей келеді. Ізгі бастамаларымыз бен ниеттерімізге қолдау сұраған өтініш хаттарымыз ұшты-күйлі жауапсыз қалады немесе «бұған қаражат қарастырылмаған» деген салқын сөзбен ғана шектеледі. Дегенмен, бұған қарап болашақтан мүлдем түңіліп отырмыз деп және айта алмаймыз. Керісінше, алдағы уақыттан үлкен үміт күтеміз. Оның нақты жақсы себептері бар. Мысалы, жақында ғана Елбасының Мәдениет министрі Мұхтар Құл-Мұхаммедті қабылдап, министрлік зиялы қауыммен байланыс жасауды нығайтып, шығармашылық одақтармен бірлесіп жұмыс істеуді жетілдіруі керек деп тапсырма бергеніне теледидар арқылы куә болдық. Осыған орай, Театр қайраткерлері одағы Мәдениет министрлігімен, басқа да тиісті мемлекеттік ресми орындармен бірлесіп біраз жұмыстарды қолға алуды жоспарлап отыр. Сөзімізді қорытындылай келе айтарымыз, бүгінгі тәуелсіз Қазақстан экономикасы дамыған, халықаралық қауымдастықтағы абыройы биік мемлекеттердің бірі болып отыр. Осыған орай біздегі театр өнері де еліміздің осы биік деңгейіне, атақ-абыройына сай жоғары дәрежеде болуға тиіс. Және бұған толық мүмкіндік бар. Ендігі жерде осы мақсатқа жету үшін қажетті мәселелерді жүйелі түрде қолға алып, нақты іске кірісуіміз керек. Тұңғышбай әл-ТАРАЗИ (Жаманқұлов), Қазақстан Театр қайраткерлері одағының төрағасы, Қазақстанның халық әртісі, Мемлекеттік сыйлықтың лауреаты, профессор.Ғұсман Қырғызбаев Олимпиаданың қола жүлдегері атанды
Спорт • Кеше
Париж Олимпиадасы: Эльмир Әлімжанов 1/8 финалға өтті
Спорт • Кеше
Автокөлік жүргізу кезінде өрт шықса, не істеу керек
Төтенше жағдай • Кеше
Астанада 5 баланың анасы биіктен секіріп кеткен
Суицид • Кеше