Кеше Тәуелсіздік сарайында Мемлекеттік хатшы Қанат Саудабаевтың қатысуымен Қазақстан халқы Ассамблеясы Кеңесінің отырысы болып өтті. Отырыста Ассамблеяның еліміз Тәуелсіздігі мен бірлігін нығайтудағы рөлі қаралып, осы ұйымның парламенттік өкілдігінің қызмет тәжірибесінің қорытындылары шығарылды.
Кеңес жұмысына ҚХА мүшелері, Сенат депутаттары, министрліктер мен ведомстволар басшылары, республикалық және аймақтық этномәдени бірлестіктердің өкілдері, ЕҚЫҰ/ДИАҚБ және ТМД байқаушылары мен бұқаралық ақпарат құралдарының өкілдері қатысты. Алдымен сөз алған Қ.Саудабаев былай деді: «Ұлт Көшбасшысы Нұрсұлтан Әбішұлы Назарбаевтың кемеңгер басшылығының арқасында Қазақстан бұрынғы Кеңес Одағы республикалары ішінде посткеңестік кеңістіктегі неғұрлым жемісті және екпінді дамуға қол жеткізген мемлекеттің біріне және халықаралық қоғамдастықтың құрметті әріптесіне айналды».
Мемлекет басшысының жаңа Қазақстанды құру жолындағы стратегиялық және жасампаз қызметі бүгінде әлемде «Қазақстан жолы» деген атпен танымал болып келеді. Бұл демократиялық реформаларды жүргізуге, тиімді нарықтық экономиканы құруға және қазақстандықтардың өмір сүру деңгейі мен сапасын арттыруға мүмкіндік береді. «Осындай толымды жетістіктердің негізінде Нұрсұлтан Назарбаевтың этносаралық толеранттылық пен қоғамдық келісім үлгісі тұр. Бұл үлгі бүгінде БҰҰ мен ЕҚЫҰ-да кеңінен мойындалып, бүкіл әлемде көшбасшылардың, қоғамдық-саяси қайраткерлердің, ғалымдар мен сарапшылардың қызығушылығын тудырып, жоғары бағасына ие болуда», деді Қанат Бекмырзаұлы.
Төртінші шақырылған Парламент Мәжілісінде Ассамблеядан сайланған 9 депутаттың жұмыс тәжірибесі де назардан тыс қалған жоқ. Мемлекеттік хатшы сол сайланған депутаттар көптеген бастамаларға негіз болғандығын тілге тиек ете кетті. Атап айтқанда, «Қазақстан халқы Ассамблеясы туралы» заң әзірленіп, қабылданғаны белгілі. Бұдан басқа ассамблеялық депутаттар тағы 4 заңдық құжаттың әзірленуіне бастамашы болды. Сондай-ақ, олар 185 депутаттық сауал жолдап, аймақтарда 60 мыңнан астам адамды қамтыған 900-ден аса кездесулер өткізген. 2000-ға жуық азаматты қабылдағаны тағы бар.
Премьер-Министр мен Үкімет мүшелерінің атына 884 хат бағыттаса, соның барысында бірқатар маңызды мәселелер шешімін тапқан. Бұл Қазақстан халқы Ассамблеясының саяси тиімділігін айқын дәлелдейді. Осы ретте Ассамблея Кеңесі отырысын модератор ретінде ҚХА Төрағасының орынбасары – Хатшылық меңгерушісі Ералы Тоғжанов жүргізіп отырғандығын айта кеткен жөн. Кеңесте, сонымен қатар, ҚХА Төрағасының орынбасары – Қазақстан ұйғырларының республикалық мәдени орталығының төрағасы Ахмеджан Шардинов пен IV шақырылған Парламент Мәжілісінің депутаты Розақұл Халмұрадов баяндама жасады.
Оның барысында Жаңаөзендегі жағдайды тұрақтандыруға қатысты шаралар Ассамблея тарапынан қолдауға ие болғандығы ерекше аталды. Елбасы тапсырмасына орай Ассамблея әлеуметтік жауапкершілік форумын өткізсе, онда 109 жоба көпшілік назарына ұсынылған болатын. Аталған шара аясында Ассамблея кәсіпкерлерінің ассоциациясы құрылғаны да белгілі. Түрік қауымдастығы тарапынан 480 орындық қазақ-түрік лицейі де салынғаны аталып кетті. Солтүстік Қазақстан облысының Айыртау ауданы аумағында этноауыл өмірге келгені және өзге де жобалар Ассамблея жұмысында оң қорытындылар болғанын көрсетеді.
Жалпы, Ассамблеяның мерейтойына арналған 471 шараның жер-жерде өтетіні белгілі болды. Қазақстан халқы Ассамблеясының тәжірибесімен терең танысу үшін 15 елдің журналистері мен ғалымдары ұсыныспен шыққандығы да назардан тыс қалған жоқ.
Е.Тоғжанов Ассамблея атынан депутаттыққа кандидаттардың тізімін Кеңес отырысына ұсынды. Ол бойынша «Тұрақты Қазақстан» қорының басшысы Жұматай Әлиев, төртінші шақырылымдағы Парламент Мәжілісінің депутаты, республикалық ұйғырлар орталығының басқарма мүшесі Мұрат Ахмадиев, сол шақырылым депутаты, Қазақстан немістерінің «Возрождение» ұйымы кеңесінің мүшесі Егор Каппель, Қазақстан корейлері ассоциациясының жетекшісі Роман Ким, «Вайнах» чешен-ингуш халықтары мәдениетін дамыту ассоциациясы» ЗТБ тең төрағасы Ахмед Мұрадов, ҚХА Төрағасының Жамбыл облысы бойынша орынбасары Надежда Нестерева, «Таң» татар-башқұрт этномәдени бірлестігінің төрайымы Зухра Саялова, ҚХА Төрағасының орынбасары, Қазақстан украиндарының «Рада» одағының төрағасы Юрий Тимошенко және төртінші шақырылымдағы Парламент Мәжілісінің депутаты Розақұл Халмұрадов тізімге енген. Хатшылық меңгерушісі Ералы Тоғжанов жұмыс тобы өңірлердің қамтылуы мен гендерлік теңдіктің сақталуына, депутаттық және ірі этностық топтардың өкілеттігін қалдыра отырып, тізімнің жан-жақты пысықталғандығымен бөлісті. Енді ҚХА-ның сайлауға байланысты кезектен тыс отырысы 16 қаңтарда өтеді деп күтілуде.
Отырыста, сонымен қатар, Мемлекет басшысы Нұрсұлтан Назарбаевтың атына жыл бойы еліміз Тәуелсіздігінің 20 жылдық мерейтойымен 9536 құттықтау келіп түскендігі белгілі болды. Бұл хаттар Мемлекет басшысына тапсырылып, Ассамблеяның «Біз – Қазақстан халқымыз!» атты кітабына енгізілмек. Отырыс барысында Қазақстан халқы Ассамблеясының арнайы естелік белгілері таныстырылды.
Асқар ТҰРАПБАЙҰЛЫ.