БІРДЕ…
Жазушылар одағының шұғыл тапсырмасымен Қадыр Мырзалиев және Азат Сүлеев екеуі Ғабиден ақсақалды іздеп Қарғалыдағы қасиетті құттыханасына барса, ағамыз аула ішінде қой жетектеп жүр екен. Амандық-саулық сұрасып болғаннан кейін:
– Жақсы келдіңдер ғой тіпті. Қой соя білесіңдер ме өздерің? – дейді Ғабең.
– Білгенде қандай! – дейді Азат білегін сыбанып.
Сонымен қуырдаққа тойып, шайға қанып, тапсырмаларын орындап, екеуі Жазушылар одағына оралады. Арада бір жылдай уақыт өтеді, «Жұлдыз» журналының редакциялық алқасында кездесіп қалған Ғабең Қадырға:
– Неге хабарласпайсың? Осы сендер ағайынды сағынбайсыңдар ғой деймін! – дейді ренжи сөйлеп.
– Сағынғанда қандай, Ғабе?! Сағынамыз! Тек мазаңызды алудан қаймығамыз. Әйтпесе, қой жетектеген ағамыз түгіл, ағамыз жетектеген қойдың өзін аңсап жүрміз! – дейді Қадыр өткен жылғы дархан дастарқанды еске түсіріп.
– Ә-ә, қу бала, мұныңа енді сенем! – дейді Ғабеңнің өңіне жылу жүгіріп. – Ол қойды мен өзім де аңсап жүрмін бүгінде!
* * *
– Пәленшекең соңғы кезде айтпасты айтатын болыпты. Сірә, алжыған-ау деймін! – дейді бір тойда Әбділдә ақсақал өзінің ескі бір досы, құрдасы хақында.
– Әбеке, сіз қателесесіз! – дейді ақын ағасын құлақ қойып тыңдап отырған Қадыр Мырзалиев. – Ол кісінің алжуы тіптен мүмкін емес!
– Неге мүмкін емес?
– Алжу үшін адамда алдымен ақыл болу керек қой. Сол таусылған кезде ғана адам алжи бастайды. Ал сіздің құрдасыңызда, көңіліңізге келмесін, сол ақыл о баста болып жарытпаған-ау, сірә!..
* * *
Мәскеуде кеңес жазушыларының кезекті бір съезі өтіп жатса керек. Ертеңгі мәжіліске барарда буфетте тамақ ішіп отырып, Қалижан Бекхожин:
– Түнімен қақсап ауырып шыққан соң, таң атпай дәрігерге барып едім, екі тісімді жұлып тастады. Жұлғанымен қоймай, әрқайсысына үш сомнан ақша алды! – дейді.
– Қа-а-ап! – дейді сонда Қадыр Мырзалиев. – Азулы ақынымыздың әр тісін алтынға балап, бекерге алданып келіппіз-ау! Мұндай арзан екенін білгенде, өзіміз-ақ қағып тастайтын едік қой!
______________________
МЕН ЖАЗАМЫН ТАҚПАҚ…
Мен жазамын тақпақ,
Әкімдерді мақтап,
Бір жағымда – дағдарыс,
Бір жағымда – жанбағыс.
Дағдарыста қаңқ етем,
Жанбағыста саңқ етем,
Әкімдерді сынасам,
Көп ұзамай жалп етем.
Оны жақсы білемін,
Төрелердің алдында,
Жалбаңдаймын, күлемін.
Тағы жаздым тақпақ,
Әкімдерді жақтап,
Шенеунікке соқтықпай,
Жүрмін жанды сақтап.
Бір жағымда – нарығың,
Бір жағымда – халқым,
Нарығыңа былқ етем,
Халқыма күңк етем.
Оны жақсы білемін,
Ел алдында қалқайып,
Кісі болып жүремін.
* * *
ЖАСАСЫН ДАҒДАРЫС!
Япыр-ай,
Мына дағдарыстың келгені,
Бір есептен жақсы болды,
Мешіттен қуылған молдалар –
Мазар жағалаған бақсы болды.
Парамен ұсталған сотыңыз –
Бүгін кәсіпкер.
Прокурорың – әкім,
Әкімің жоғарылап өсіп кетті.
Мансаптан күдер үзгендер
Бір түнде шетел асып,
Сәмөлетпен көшіп кетті.
Рахат!
Кілең тоқты-торым,
Бақылдаған текелер қалдық.
Елдің қазынасын өз алдымызға
Жекелеп алдық.
Ендігі ойымыз –
Ел түсінбейтін қоғам құрсақ
дейміз.
Бүгін – мынаның,
Ертең – ананың ауызын
Жақсылап тұрып ұрсақ дейміз.
“Ұлтым” деп ұлығандардың
Езуін жырып жібереміз.
Тізгінге таласпаңыз,
Әйтпесе,
Сізді де ұрып жібереміз!
Қанат ЕСКЕНДІР.
Алматы.
__________________
Мәтіні майысқан мәтелдер
Енеге туған күн,
Келінге де туады.
* * *
Бастықты алтынмен аптасаң да,
Жырымдап жеуін қоймайды.
* * *
МАИ-дан қорыққан,
Мәшине мінбес.
* * *
Сұрамаған басшыға –
Пара бермейді.
* * *
Екі бастықтың құйрығы –
Бір креслоға сыймайды.
* * *
У ішкен бір өледі,
Арақ ішкен мың өледі.
* * *
МАИ-дан құтылсаң –
Алдыңнан кеден шығады.
* * *
Тақ – оттан да ыстық.
* * *
Екі тентек таласса –
Полицияға «жем» түсер.
* * *
Депутат дауыс жинарда шынығады,
Мәжіліс отырысында тынығады.
* * *
Парақорға бәлеқор жолығады.
Ермахан ШАЙХЫҰЛЫ. АЛМАТЫ.________________________
«ЖАМАНҒА СӘЛ ЖАЛ БІТСЕ…»
Пайдасын білген ақыл-ай,
Тұлпар мінген мақұл-ай.
"Джип" мініп жарлыға,
Жоламай кетті Жақыбай.
"Жаманға сәл жал бітсе,
Жанына торсық байлатпас".
Деген қайран қазақтың,
Айналайын, нақылы-ай!
* * *
«ҒАШЫҚТЫҚ»
Болды әніне шет елдің бала ғашық,
Әніне де, сәніне сана ғашық...
Қалмасақ жарар еді жұрдай болып,
Қазақылық ғұрыптан қара басып.
Шет елдің "шірігіне"бала ғашық,
Санаға кетті бәрі араласып...
Жан-дүниесін жаралап кетпесе екен,
Жазылмайтын жұқпалы "жара" басып!
Қазыбек ӘШІРБЕКҰЛЫ.
ҚЫЗЫЛОРДА.
___________________
АҚЫР-ТАҚЫР АҚЫЛ
Апақ-сапақта үйге жетіп келген інісіне Қилыбай: – Өңің өрт сөндіргендей, жайшылық па?! – деп жатыр. – Қайдан жәй болсын, баяғы келініңізбен барып-келіп... айтпағанымыз жоқ, ажырасып тынатын шығармыз, – деп, үйде ағасынан басқа пенде жоқ екенін байқап: – Жеңгем қайда? – деп қалды. – Жеңгеңнің барынан жоғы! Қолына тиын-тебен тиді бітті, түгесілмей тынышталмайды. Базар аралап кеткен! – деп кідіріп: – Не боп қалып еді? – деп інісіне сауал тастады. – Ұрыс-керіс, айғай-шу түбімізге жетті. Өзіңіз секілді ашу-ызамды іркімей ағыл-тегіл ағытамын кеп... Ол да осал емес, есе жібермейді – ақ ит кіргізіп, көк ит шығарады... Осы сіз де сөйтесіз, бірақ былқ етер – «кетем де кетем!» деген жеңгемді көрмеппін. – Тартпасаң тумағыр... Ана алғашқы жеңгеңмен шат-шәлекейіміз тура сенікіндей болған... е, ол кезде ақыл айтар ақылман болмай ажырасып тындық емес пе... – Қазір ше?! Қазір де айғай-шуларыңыз бар. Мен білетін ағамның арыны басылған емес. Сол баяғы былапыт сөз, сол баяғы боғауызды қардай боратасыз кеп...? – Ал тыңда! Мәселе айта білуде... Ашулысың делік. Айтар сөзің ащы-тұщы, төбеден түсердей дөрекі... «Ауызға келген түкірік – қайта жұтса мәкүрік» дей ме, тоқтап қалма, іркіме, айтып қал... Тек, мынау есте болсын: осы мезет езуің ыржиып, көзің күлімдеп, бет-пішінің бейпілдіктен жұрдай болып, үнің үлбіреп шықсын... Ретін келтіріп, айғайың аспандап тұрса да, ара-арасында «жаным, айым» деген тіркесті кірістір де отыр. Әсіресе, сөз аяғын сүмірейте, айтар ащы-тұщы біткен жерден мүләйімсіп мүдіріп қал. Бұл – ортада ешкім болмай екеуара ғана жекпе-жектегі айғай-сүрең. Ал арада көлденең көк аттылы болғандағы ұрыс-керіс тәсілі басқаша, – деп ақыр-тақыр ақылын сәл кідіртіп, інісіне, – соңғы ырың-жырың неден шықты? – деді. – Дүкен-мүкен деп кеткен. Бір інім келіп, ары отырдық, бері отырдық... Тостырып шыдам біткенде келіп тұр... Айда кеп ақырдым кеп... Ол да іркілмеді... інім кетті безіп... Айтар таусылып, осында келіп отырғаным, – деген мезетте есік шырылдап, базардан көтерген көп жүгі бар жеңгесі келіп кірді. Қилыбай ағасы бұған желкесін берген қалпы: – Қайда жүрсің-ей, қаңғып! Біз отырмыз омалып! Кергімей келетін мезгіліңді айтсаң қайтеді! – деп іркес-тіркес тікенек сөздерін төндіре бастағанда інісі сытылып шығып, жөніне кетті. Інісі кете сала Қилыбай: – Сөйдеп әкіреңдемесем қайның бүгін қонатын түрі бар. Баяғы келінмен ырың-жырың, бағанадан бері сонысын айтып миымды шірітті... Пәлі, көп зат әкепсің ғой. Айтпаймысың, аялдамадан тосып алар едім. Жаурап та қалған шығарсың, шәй қойып жіберейін, – деп апыл-тапыл ас үйден табылды.Кенже ЕРКІН.
Алматы облысы.
_____________
ПОЛИЦИЯДАҒЫ «ПАЙ-ПАЙ!»
Көлік инспекторлары бекетінің жанында жол қарап тұрған маишниктің дәл жанына сиырын жетектеген бір кемпір келіп, оны арқандайтын қазығын қаға бастайды. Маишниктің көзі бақырайып: – Апа-ау, мұныңыз қалай, бұл жер жайылым емес қой! – демей ме. – Ой, балам-ай, қайдан білейін. Былтыр сен осында тұрғанда жіптіктей арық едің, – депті апасы.* * *
– Алло, айықтырғыш па? Менің күйеуім мас болып жатыр, алып кетсеңіздер еді! – Қайда, Бөгенбай батыр көшесінде ме? – Жоқ, Достық даңғылында. – Кешіріңіз, ол көше бізге қарамайды. Шамалы уақыт өткеннен кейін телефон тағы шырылдайды. – Алло, айықтырғыш па? Менің күйеуім удай мас, құдай үшін алып кетіңдерші. – Қай көшеде, Бөгенбай батыр көшесінде ме? – Иә, мен осы көшеге жаңа ғана сүйреп әкелдім.* * *
Жүргінші көшеде тұрған көлік инспекторына: – Сіз осы бірнәрседен үркіп-қорқып жүрсіз-ау деймін, – дейді. – Е, жоғ-а! Олай деуіңізге не себеп?! – Әй, осы сен бірнәрсе бүлдіргенсің-ау шамасы! Әйтпесе көшеде бұғынып, жасырынып, қайтадан қуыстан атып шығып адыраңдамас едің-ау!..* * *
Газет тілшісі таныс жол полициясына: – Айтшы осы, сендердің қолдарыңдағы таяқтарың неге ақ пен қара кезек алмасқан бояумен сырланған? – деп қалжыңдағанда, таныс полицей: – Шопырларда үнемі біз талап етер ақша бола бермейді емес пе... – деп әзілмен жауап беріпті. ___________________________ Мүйісті жүргізген Берік САДЫР.