Қызыл қырғында қыршын кеткен, отызыншы жылдардың ойранында опат болған ұлт арыстарының арулап жерленбеген сүйегін, туған жердің бір уыс топырағы бұйырмай, жермен-жексен болған белгісіз қабірлерін іздеп табу, олардың басына бір белгі қою – сол асылдардан туған бүгінгі ұрпақтың, халқым деген азаматтардың көп жылдар бойы жүрегін тербеген мұң екені, бұл істің бүгінгі таңда жалпыұлттық қозғалысқа айнала бастағаны жасырын емес. Қазақы ұғыммен қарасақ та, «аруақ риза болмай, тірі байымайтыны» белгілі.
Кеңес заманында Мәскеуде саяси қуғын-сүргін құрбандарын көметін бірнеше жер болыпты. 1921-1926 жылдары бұл үшін Яуз ауруханасының зираты, 1926-1935 жылдары Ваганьков зираты пайдаланылған. Қуғын көргендердің өлі денесі 1934 жылдан Дон зиратындағы крематорийге жіберіле бастапты. Ал 1936-1937 жылдары НКВД жаңа екі аумақты ажал алаңына айналдырыпты. Қысқаша «Бутово» және «Коммунарка» деп атауға болатын бұл арнайы объектілер аумағында жатқандардың аты-жөні соңғы жылдарға дейін құпия ұсталып келді. Мысалы, «Коммунарка» объектісін Ресейдің Федералдық қауіпсіздік қызметі 1999 жылы Орыс православие шіркеуінің қарауына берді, сол кезден бастап қана осы араға жерленген адамдардың аты-жөні белгілі бола бастады...
Мәскеудегі бірнеше ғасырлық тарихы бар «Дон» қорымының атауы да халқымыздың жүрегінен алыс тұра алмаса керек. Қазақтың біртуар айбынды ұлы Смағұл Сәдуақасовтың сүйегінің күлі осы жерде жетпіс сегіз жыл бойы сақталды (өмірден 33 жасында өткен Смағұлдың сүйегінің күлі салынған құты Қазақстан елшілігінің қолдауымен және ұлтжанды азаматтардың күшімен үстіміздегі жылдың қаңтарында Қазақстанға жеткізілгенінен оқырман хабардар болар).
Жалпы «Дон» зираты жаңа және ескі бөліктерден тұрады. Жаңа зират дегені – ХХ ғасырдың басында ашылған қорым, 1927 жылдан бастап мұнда колумбарийі бар крематорий жұмыс істеген. 1941-1945 жылдардағы Ұлы Отан соғысы кезінде қаза тапқандар мен ауыр жарадан Мәскеу госпитальдарында қайтыс болғандар жатқан бауырластар зираты және сталиндік қуғын-сүргін құрбандарының үш ортақ қорымы (№ 1 – 1930-1942 ж., № 2 – 1943-1944 ж. және № 3 – 1945-1953 ж.) осында. Деректерге қарағанда, мұнда отызыншы жылдары жазықсыз атылған, өртелген бес мыңнан астам адамның сүйегі не сүйегінің күлі жатыр.
«Дон» зираты басшылығының айтуынша, әсіресе отызыншы жылдары құрбан болғандардың мәйіті қай жерге көмілгенін, күлі қайда жатқанын дәл анықтау қиын әрі мүмкін емес. Өйткені, 1937-1938 жылдары атылғандардың денесі крематорийге арнаулы бланкіге жазылған тапсырма негізінде қабылданып тұрыпты, бірақ онда адамның аты-жөні жазылмай, жалпы саны көрсетіліп, «мына мәйіттерді өртеуге не жерлеуге жедел қабылдаңыз», «Өртеу үшін кезектен тыс қабылдаңыз» деген бұйрық түрінде түседі екен. 1930 жылдан бастап крематорий іргесінде тергеу кезінде өлген, азапқа шыдамай өзін өзі өлтірген адамдарды құпия көметін шұңқыр болыпты.
Жалпы көптеген құжаттар мен мұрағат материалдарын, мемлекеттік органдардың хат-хабарларын байыпты саралау арқылы қуғын-сүргін құрбандарының аты-жөнін анықтап, қасіретті жылдардың шындығын, ел бастан кешкен оқиғаларды, жеке адамдарға қатысты деректер мен мәліметтерді бүгінгі заманның зердесіне салған жалпыресейлік «Мемориал» тарихи-ағарту, қайырымдылық және құқық қорғау қоғамы болды. «Мемориал» мүшелерінің ұзақ уақыттан бергі мақсатты ізденістері осы бағытта нақты нәтижелерге қол жеткізді, бұған дейін белгісіз болып келген жаппай жерлеу орындары, мыңдаған есімдер анықталды, сөйтіп табылған, мәлім болған, бұрыннан қолда бар деректер жинақталып, бір жүйеге түсірілді. Соның нәтижесінде бұрынғы КСРО жұртымен бірге, қазақ халқы да қан-қасап жылдары құрбан болған бірқатар перзенттерінің асыл сүйегі қай топырақтың астында жатқанын біле бастады...
Айталық, Әлихан Бөкейханов пен Нығмет Нұрмақовтың сүйегінің күлі «Дон» зиратындағы ортақ қорымда екендігі бұдан екі жылдай бұрын белгілі болды. Осындағы Әлихан Нұрмұхамедұлына қатысты ақпаратта оның 1866 жылы Семей облысында туғаны, ұлты қазақ, партияда жоқ, жоғары білімді, аудармашы екендігі көрсетілген. Тұрақты мекен-жайы – «Мәскеу қаласы, Большой Кисловский переулок, 4-15» деп жазылған. 1937 жылғы 26 шілдеде тұтқынға алынған, «антисоветтік контрреволюциялық ұйымға қатысушы» деп айыпталып, үкім шыққан күні, яғни 1937 жылғы 27 қыркүйекте атылған. Нығмет Нұрмақов жайында оның 1895 жылы Қарағанды облысында туғаны, қазақ, БКП(б) мүшесі, білімі орта, ВЦИК хатшысының орынбасары және ВЦИК төралқасының мүшесі екендігі жазылған. Нығмет Нұрмақұлы 1937 жылғы 3 маусымда тұтқындалыпты, «контрреволюциялық террористік ұйымға қатысушы» деп айыпталып, 1938 жылы үкім шыққан күні атылыпты. Осында Н.Нұрмақовтың «Мәскеу қаласы, Серафимович көшесі, 2-243» мекен-жайында тұрғаны туралы ақпарат бар.
«Дон» зиратындағы № 1 ортақ қабірде Әлихан мен Нығмет сынды қос арысқа арналып құлпытас-белгі қойылыпты деген хабардың ізімен таяуда осы жерде болуға тура келді. Бұл – мемлекеттік органдар не қоғамдық ұйымдар орнатқан белгі емес, қазақстандық азаматтың жеке бастамасымен жүзеге асырған ісі екен. «Ұрпақтан – тағзым» деп белгі қойған – ұлтжанды елдесіміз, белгілі заңгер ғалым, Қарағанды қаласындағы «Болашақ» университетінің ректоры Нұрлан Дулатбеков болып шықты! Белгітасқа екі арыстың суреті салынып, олардың аты-жөні, туған және қаза тапқан жылдары қазақша жазылыпты. Көрнекті ақын Қасым Аманжоловтың ескерткіш бетіне өрнектелген:
«Ей, тәкаппар дүние!
Маған да бір қарашы.
Танисың ба сен мені?
Мен – қазақтың баласы!» деген өлең жолдары алыстан көзге түседі...
Артта қалған ұрпақтың асыл арыстарын іздеп, ардақтауы биліктің пәрменінен гөрі, жүректің дәрменімен жүзеге асатын перзенттік борыш екендігі осыдан сезілсе керек. Олай болса, ортасынан оза шығып, туған жердің көктасын Мәскеуге көтеріп жеткізген, сөйтіп, иісі қазақ баласына қадірлі Әлихан мен Нығметтей айбынды ағалардың аруағына, алаштың осы жерде жатқан басқа да ұлдарының рухына қазақ болып тағзым етудің тамаша жолын көрсеткен қарағандылық Нұрлан бауырымыздың бұл ісін қалай әспеттесек те жарасатыны сөзсіз.
«Мемориал» қоғамы жинақтаған құжаттарды қарай отырып, «Дон» зиратындағы осы ортақ қорымда басқа да қандастарымыздың сүйегі не сүйегінің күлі жатқанын жадымыздан шығара алмаймыз. Солардың бірі – Садық Нұрпейісов есімді белгілі қайраткер. Ол 1904 жылы Қостанай облысында туған, 1925 жылдан партия мүшесі, кезінде Қазақстан компартиясы Орталық комитетінің екіншісі хатшысы болып істеген. 1938 жылғы 1 қарашада «контрреволюциялық террористік ұйымға қатысушы» деген айыппен тұтқындалған кезінде партияның Орталық комитетінің қарамағында жүрген екен, «Мәскеу» қонақүйінде тұрақты тұрыпты. Оған да сол заманның дәстүрлі айыбымен үкім шығып, 1939 жылғы 25 ақпанда атылыпты. Ал тағы бір қандасымыз – Абай Қасымов 1896 жылы Батыс Қытайда дүниеге келген. Білімі жоғары, Моңғолияның халық-революциялық партиясының мүшесі болған. Ол Қытайдың Баркөл провинциясы губернаторының көмекшісі қызметін атқарған, бірақ 1938 жылғы 25 шілдеде тұтқындалып, «тыңшылық жасады» деген айыппен 1939 жылы атылған.
Аталмыш қаралы қабірдің 14-інші колумбарийінің үшінші қатарында Ескендір Тұрарұлы Рысқұловтың (24.11.1920 – 3.10.1940) сүйегінің күлі тұр. Әкесі ұсталған соң, отбасына түскен төтенше ауыртпалықты Ескендір де басынан өткерген. Баспасөзде жазылып жүргеніндей, ол он жеті жасында «халық жауының» баласы ретінде қуғын-сүргінге ұшырайды, Ақ теңіз маңына, Онега лагеріне жер аударылады. Сонда жүріп айықпас дертке ұшырайды. Сол себепті 1939 жылы айдаудан босап, Мәскеуге келеді. Бірақ Тұрардың жалғыз ұлы Ескендір (Александр, Шура, Шурик) бостандықта ұзақ жүре алмайды, жасы жиырмаға жетер-жетпесте ауыр науқастан қайтыс болады.
«Дон» зиратының меңгерушісі Анатолий Трифоновтың жәрдемімен қолымызға тиген анықтамада 20 жасар «Рыскулов Александр Турановичтің» өлігі 1940 жылы өртелгені, ал күл салынған қабырғадағы қуыс текшені пайдалануға құқығы бар адам – Колосовская деп көрсетілген екен. Анықтамада «Ескендірдің» – «Александр», «Тураровичтің» – «Туранович» деп бұрмаланғанын айтпағанда, колумбарий сөресіндегі күл салынған қуыстың бет тақтасына «Шура Рыскулов» деп жазылғаны тағы бар. 1963 жылы Ескендірдің сүйегінің күлі тұрған қуысқа және бір азамат жерленіпті. Бұл туралы крематорий кеңсесіне жазған өтінішінде азаматша Варвара Колосовская 1940 жылы немересі Рысқұлов Шурик жерленген қуыс текшеге күйеуі Иван Чижиковтің күлін қоюға рұқсат сұрапты.
Өмір кезеңдерінде Тұрар атамызбен байланысты болған әйел заты ішінен Наталья Алексеевна Колосовская деген есім де баспасөз бетінен әредік көрініп қалып жүретін. Тұрардың бұл әйелмен ресми түрде үйленгені туралы нақты дерек кездеспесе де, кейінгі тағдыры белгісіз осы Наталья Колосовская оның Майя деген қызының және Ескендір есімді ұлының туған анасы деп айтылатын. Демек, 1940 жылы Рысқұловтың ұлын жерлеу ісімен айналысқан Варвара Колосовскаяны – Ескендірдің нағашы әжесі еді деп айтуға болатын сияқты (Деректерге қарағанда, Майяны Тұрардың бірінші әйелі Надежда Константиновна Пушкарева тәрбиелеп өсірген. «Халық жауының» қызы Майя Рысқұлова 1949 жылы қауіпті элемент ретінде 5 жылға сотталған. Майя Тұрарқызының біз білетін немересі Владимир Рысқұловтың айтуынша, әжесі қазір Мәскеу маңында тұрады, бірақ ешкімді қабылдап, сөйлеспейді екен).
Республикалық «Айғақ» газетінің бас редакторы Дулат Әбіш бастаған шығармашылық топ жақында Мәскеудегі «Дон» зиратына атбасын тіреп, Ескендір Тұрарұлының сүйегінің күлі қойылған қуыс текшенің жанында болды. Төле би ауданының бас имамы А.Тортаев осында жатқан жалпы қуғын-сүргін құрбандарының, соның ішінде жас кеткен Ескендір Тұрарұлының рухына құран бағыштады. Халқымыздың біртуар қайсар ұлы Тұрар Рысқұловтың ұрпағы Ескендірдің есімін елеусіз қалдырмай, оның бір уыс күлі жатқан жерді атажұртының есіне салып, бүгінгі ұрпаққа таныстыру үшін алыстан ат арылтып жеткен Дулат Әбіш бастаған оңтүстікқазақстандық отандастарымыздың осынау халықшыл ісіне тәңір жарылқасын деген тілек қана жарасса керек.
Мәскеуде 1935 жылдың орта шенінде, Варшава тас жолының төртінші шақырымына таяу жерден ату полигоны ұйымдастырылады. Алғашқыда бұл шынында да әртүрлі ату қаруларын сынайтын алаң болады, бірақ қуғын-сүргін заманы туған кезде сотталған адамдарды әрі ататын, әрі жерлейтін орынға айналады. Осы полигонда сол жылдары күн сайын орта есеппен 100-200 адам атылып тұрған екен. Бір ғана 1938 жылғы 28 ақпанда 562 адам атылыпты (1938 жылдың ақпан айы – бұрынғы КСРО-ның барлық жерінде қызыл қырғынның ең шырқау шегіне жеткен мезгілі. Қазақстанда да дәл осы айда «халық жаулары» өте көп атылғаны мәлім). Бутово полигонында көп жылдар бойы арнаулы қызмет органының саяжайлары болған, соған сәйкес бұл қоршалған жерлерге, адам сүйегі жатқан алаңқайға ешкім жіберілмеген әрі 1995 жылға дейін тұтас аумақ күзетіліп келген. Қуғын-сүргін құрбандары жатқан «Бутово» зиратының сыры, міне, соңғы он-он бес жылдан бері ғана белгілі бола бастады. Онда жерленген адамдардың аты-жөні әлі де анықталып, нақтылану үстінде.
Отыз жетінің жаппай қанды қасабы басталғанша, соған дейін жалған саяси айыппен ұсталып, атылғандар негізінен Мәскеудің Ваганьков зиратына жерленіп келген. Отызыншы жылы осындай жазаға ұшыраған қазақтың төрт баласының сүйегі қазір Ваганьков зиратында жатқанын құжаттар да айғақтайды. Бұлардың үшеуі – 1928-1929 жылдары «контреволюциялық ұйымға мүше болғаны және кеңеске қарсы үгіт жүргізгені үшін» деген ортақ айыппен тұтқындалып, 1930 жылғы 21 сәуірде атылған Жүсіпбек Аймауытов, Ахметсапа Жүсіпов және Дінмұхамед Әділов.
Құжаттарда Аймауытов Жүсіпбектің 1895 жылы Семей губерниясы Қызылтау болысы Павлодар уезінің бірінші ауылында туғаны, орта білімді, партияда жоқ қазақ екені жазылған. Шымкент педагогика техникумының оқытушысы болып істеген Жүсіпбек ол кезде осы қалада Пушкин көшесіндегі 5-інші үйде тұрыпты. Жүсіпбектің ұлы Бектұр да 37-нің отына шалынды. Ақпарат көздері 1916 жылы Семей қаласында туған Виктор Юрьевич (Бектұр Жүсіпбекұлы) Аймауытовтың 1937 жылғы 29 желтоқсанда Татарстандағы НКВД үштігінің шешімімен он жылға бас бостандығынан айырылғаны жөніндегі деректі алға тартады.
Ал Ахметсапа Жүсіповтің (құжаттарда – Юсупов Ахмет Сафа) 1895 жылы Қостанай облысының Бетпаққара ауданында туғаны, партияда жоқ, білімі төмен, «Еңбекші қазақ» газетінің қызметшісі екендігі жазылған. Ол 1929 жылы 29 қаңтарда ұсталған кезде Қызылорда қаласы Сельверстов көшесіндегі 28-інші үйде тұрған екен (Басқа бір жарияланымда Ахметсапаны 1931 жылғы 18 қаңтарда Қазақстанның ОГПУ-ы 10 жылға соттағаны жөнінде айтылыпты).
1900 жылы Сырдария округінде (бір жарияланымда – Жамбыл облысының Шу аймағында) дүниеге келген, орта білімді, партияда жоқ Дінмұхамед Әділев 1928 жылғы желтоқсан айында тұтқындалғанда Қызылордадағы ұлттық театрдың директоры болып істейтін еді (бұрынғы баспасөз материалдарынан оның есімінің «Дінше» деп қысқартылып жазылатыны кездеседі). Дінмұхамедтің (Діншенің) ұсталған кезде көрсетілген мекенжайы – Сырдария округі Сарысу ауданының 3-ші ауылы екен.
Бірге ажал құшқан төртеудің бірі – Әбдірахман Байділдин. Ол 1929 жылғы 5 шілдеде «кеңеске қарсы үгіт жүргізгені үшін» деген айыппен тұтқындалған. Орта білімді, БКП(б) мүшесі, Қазақ мемлекеттік университетінде ғылыми қызметкер болып істеп жүрген көпшілікке танымал қаламгер Әбдірахман Байділдин (жиырмасыншы жылдары «Еңбекші қазаққа» ізашар болған мерзімдік басылымдарға жетекшілік жасаған) 1897 жылы Солтүстік Қазақстан облысының Совет ауданында дүниеге келген, Алматы қаласының Іле көшесіндегі 6-шы үйде тұрған.
1928 жылы – 440 адамды, 1929 жылы – 1383, ал 1930 жылы 1229 адамды ату жазасына кескен Бас саяси басқарма (ГПУ) алқасының 1934 жылы НКВД құрылғанға дейін елдің басқа өңірлерінде тұтқындалғандарды Мәскеуге этаппен алдырғанын өткен заманның кейбір жарияланымдарынан кездестіруге болады. Жүсіпбек, Ахметсапа, Дінмұхамед және Әбдірахман төртеуіне үкім шығарған ГПУ алқасы, демек бұлардың Мәскеуде атылуының сыры осында болса керек.
Алпыс жылдан бері Мәскеуде тұратын ардагер ақсақал Қайдар Құмарбекұлы сексенінші жылдары Ваганьков қорымынан Ғани Мұратбаевтың зиратын іздеп жүргенде Аймауытовқа ұқсас бір фамилияны көзі шалып қалғанын есіне алған-ды. Әрине, ол заман Жүсіпбек Аймауытовты елдегі ағайынның өзі де жете біліңкіремейтін кез, сондықтан Қайдар ақсақал текше тастағы жазуды қазақтың баласының аты-жөні екен деп қана есінде сақтаған тәрізді. Орайы келген соң айта кетейік, кезінде Ваганьков зиратында қазақтың Ғани Мұратбаев сынды бір боздағының сүйегі жатқаны туралы хабарды кейінгі жастарға жеткізіп, оларды сонда бастап апарған осы кісі еді. Содан бері жыл сайын туған күнінде Ғани зиратына тағзым етіп, рухына арнап құран оқыту мәскеулік қазақтардың қалыптасқан дәстүріне айналды, тіпті Ғани зиратының шырақшысы іспетті, оған ұдайы күтім жасап тұратын қазақ отбасылары бар.
Жазықсыз жазалы болған бұл адамдардың, әсіресе Жүсіпбек Аймауытов сынды классик жазушының, соңына салиқалы сөз мұрасын қалдырған даңқты қаламгердің, кеңестік заңнан кеселін тапқан қайран азаматтың жамбасы тиген жер, оның бөгде елдің топырағы астындағы сүйегі һәм ойда жоқта осындай тағдырдың тәлкегіне тап болған өзге де арыстарымыз жалпы ел-жұрты тарапынан елеусіз, ескерусіз қалмайтынын келешекке жүгініп қана елестете аламыз.
Серікқали БАЙМЕНШЕ, «Егемен Қазақстан» – Мәскеуден.