Астанадағы «Фолиант» баспасынан белгілі журналист Ақайдар Ысымұлының «Шиелі» атты кітабы жарық көрді. «Менің – Қазақстаным» сериясымен шыққан бұл еңбек осыған дейін аталмыш баспадан өмірге жолдама алған «Ұлытау», «Ойыл», «Отырар», «Қазығұрт», «Алтай» жинақтары секілді түрлі-түсті суреттермен безендіріліп, полиграфиялық жағынан әдемі көркемделген. Төменде біз «Шиелі» кітабының беташар – алғысөзі болып табылатын академик Досмұхамед Кішібековтің мақаласын оқырмандар назарына ұсынып отырмыз.
Әркімнің туған жері өзіне жәннат. Десек те, Сыр бойында Шиеліге тең келер жер жоқ дер едім. Қашанда бұл сулы, нұрлы, егіні бітік, байлығы мол, тұрмысқа қолайлы, бау-бақшалы жер. Патша өкіметі «басыбайлылықты» жойғанда жерсіз, күнкөріссіз қалған шаруаларды қазақ даласына қоныстандырғанда таңдаған жерлерінің бірі Шиелі болғаны тегін емес. Келімсектер Шиеліде екі үлкен қоныс тұрғызды, аттарын «Свобода» (Ресейде басыбайлы болған қарашекпен қазақ жерінде өзін еркін сезінген ғой) және «Хохляцкая» (кейін «Первомайская» болып өзгерді) қойып алды. Жөлек қонысы да дәл осындай поселкеге айналды. Ол Шиелінің ескі елді мекені. Мен Шиелінің тумасы болғандықтан, оның көп өзгеріс, ерекшелігіне куәгермін. Солардың кейбіреулеріне ғана тоқталайын.
Шиелі ең әуелі әулиелі жер деп аталған. Өйткені ежелден бұл аймақта қалың жабайы шие өскен. Оның тарихи аты осыдан. Халық ұғымында шие өскен жер әулиелі саналған. Шиеліде Қорқыт ата кітабында айтылатын тарихы мың жарым жылдан кем емес «Оқшы ата» қорымы бар. Осы қорымда Есабыз әулие де жатыр. Қорымда «Асан ата» ескерткіш қабірі де бар. Кейбір авторлар оны атақты Асан қайғы қабірі дейді. Бірақ әлі нақтылы дәлелденбеген. Дегенмен, қазақ даласын аралап, «Жерұйық» іздеген Асан қайғы Сыр бойына келген болса, бұл жерді көрмеуі мүмкін емес. Сондай-ақ Шиелінің Қаратау бетінде әзірге зерттелмеген, аңызы мол «Бестам» атты «Сунақ ата» сияқты қала орны бар. Оны халық кезінде хан ордасы болған дейді. Бұл жерді бұрын ешқашан су баспаған. Халқы малмен қатар егін еккен, аштыққа ұшырамаған. Мұны да ел әулие шарапатымен байланыстырады.
Екіншіден, Шиелі Орынбор мен Тәшкен аралығында Сыр бойында орналасқан әйгілі сауда орталығы болған еді. Мұнда екі базар жұмыс жүргізді. Бірі – мал базары, екіншісі – мүлік базары. Тұтыну бұйымдарын сауда адамдары алыс-жақын жерлерден жеткізіп жүрді, қызу алыс-беріс өмір болды. Саудагерлердің ішінде Орынбордан, Тәшкеннен, Иран, Ауған жерлерінен келгендер кездесетін. Тіпті алыстағы Қытайдан аяғы кішкентай әйелдерімен келіп, қағаздан түрлі гүлдер, ойыншықтар жасап сататын қытайлықтарды да бала кезімде көзім көрді. Олардың гүлдерін қазақтар қырқыншы жылдарға дейін әсемдікке үйінде сақтайтын. Түрлі самауыр, кесе-шәйнек, құрма, өрік-мейіз, жібек, мақта мата бұйымдары, жайнамаздық иран кілемшелері, кілемдері базарда сыймайтын. Мал базарына есепсіз түйе, жылқы, қой, ешкі түсіп, өтіп жататын. Қызу сауда қашанда дамыған өмір көрсеткішіне жататыны белгілі. Базарға сондай-ақ біреулер әңгіме құруға, суретке түсуге келсе, енді біреулер серуендеп келеді екен. Сөйтіп, Шиелі базары тек сауда орны ғана емес, сонымен қатар кезінде мәдениет ошағы да болған-ды. Мұнда «ат ойын» (цирк солай аталатын, клоунды «майрампаз» дейтін), биік тартылған арқанмен жүретін ойын «дар» (орысшасы «канатоходцы»), сондай-ақ «палуандар күресі», «айтыс», «көзбайлау» (фокус көрсету) ойындары бәрі сол базарда қызып жататын. Ел көп жиналатын, билет сату жоқ, әркім ақша тастайтын.
Үшіншіден, сауда дамыған жерде ел көп, ұлт араластығы мол болады. Шиелінің негізгі халқы қазақтар, сондай-ақ татарлар, өзбектер еді. Кейін оларға орыстар қосылды. Келімсектер қазақ тілін білмейді, қазақтар орыс тілінде сөйлесе алмайтын, бірақ түсіну керек болды. Сондықтан орыстар қазақ тілін тез үйреніп, судай меңгергені сонша, тіпті мақалдап сөйлейтін. Менің бала кезімде қазақша машық сөйлемейтін бірде-бір орыс жоқ еді. Кейін корейлер, одан соң соғыс жылдарында еврейлер, чешендер, ингуштар, түріктер қоныстанды. Бауырмалды қазақ халқы барлығымен тату өмір сүрді. Бірен-саран жоғалған малын басқадан көрмеді, ұлт араздығы дегенді ешкім естіген емес. Сірә, оның бір себебі – қазақтың кең қолтықтығы және молшылықтан болса керек.
Сауда базары демекші, Орынбор – Тәшкен темір жолына дейін де Шиеліде жол бекеті болған. Шиелі поселкесі мен бекет арасы төрт шақырым дейтін. Ортасын құм бөлетін. Қазір ол құм жоқ. Кезінде ол құм «Тұзақшы» деп аталатын. Өйткені жол бекеті мен сауда базары бар поселке арасында пәуеске жүретін. Жүргізушіні арбакеш дейді. Сол құмды баукеспелер жайлайтын болған бір кездерде. Олар пәуескеде бара жатқан бай саудагерлерге арқан лақтырып, тұзаққа түсіріп тонайды екен. «Тұзақшы құм» деген ат содан қалған.
Тағы бір жәйт. Бала кезімде орыстар айтатын бір өлең есімде қалыпты:
«Базар большой, полно здесь народу,
Русская барышня идет, давай, дорогу». Мұны айтатындар Ресейдің кешегі қарашекпенді «басыбайлыларының» ұрпағы еді. Бұл не сонда, үстемдік пе, әлде базардағы қуақылық па, сірә, екеуі де бар шығар-ау.
Татарлар сырнаймен айтатын бір өлең де есімде:
«Жүгіріп атқа мінген шақта көрінә Қазан қаласы
Танымасаң танысайық, біз Шиелі баласы».
Төртіншіден, ауыл шаруашылығы жағынан Шиелі қашанда өнімді мол берген жер. Бақша, егіс өнімі, мал шаруашылығы жоғары болатын. Халқы негізінен отырықшы. Шиелі поселкесін су жүретін бірнеше арық кесіп өтетін. Оларды «Тарақты», «Шегір», «Байсары», «Орыс», «Найман», «Арғын» арықтары деп атайтын. Шаруашылық суармалы. 1940 жылы республикалық құрылыс атанған «Шиелі каналы» қазылып, ауданның егіс көлемі, әсіресе, ертеден келе жатқан күріш егісі ұлғайды, жаңа тың аймақ игерілді. Жазушы Сәбит Мұқанов осы канал негізінде «Сырдария» романын жазды.
1938 жылы Қиыр Шығыстан көшіп келген корейлерден жергілікті халық көп нәрсе үйренді. Мәселен, күрішті егу, баптап өсіру технологиясы бойынша әрбір күріш егілген алқаптағы атыздар жеке адамдарға бөліп берілді, оның суын ауыстыру, арам шөптен тазарту, т.б. барлық жұмысы жалпылай емес, нақты жеке бір адамға жүктелді, іскерлік пен жауапкершілік күшейтілді. Сол тәртіппен ауданда алғаш Социалистік Еңбек Ері атағын корей Ким Ман Сам алды. Кейін сол технологияны меңгерген диқан Ыбырай Жақаев ең жоғары өнім көрсеткішіне тұрақты жететін болғаны үшін екі рет Социалистік Еңбек Ері атанып, ауданның беделін Одаққа көтерді. Ыбырай Жақаевтың бастауымен үлкен қозғалыс жүріп, облыста жақаевшылар көбейді. Ауданның өзінен қырыққа жуық еңбеккер диқан Социалистік Еңбек Ері болды. Ыбекең «Дала академигі» деп құрметтелді.
Әдетте, күріш еккен жер тез тозады. Сондықтан шиеліліктер ерте замандардан ауыспалы егіс егуді қолданған, әсіресе жоңышқамен ауыстырып отыруды. Шиеліліктер оны «жоңырышқа» деп сөйлейді. Бала кезімде көруші едім, базарға күнде арба-арба жас жоңырышқа әкеліп сататын. Жоңырышқа егілген жер мықты тыңайып, мол өнім береді. Ол кейбір химиялық тыңайтқыштардан пайдалы, таза әрі сапалы өнім береді. Тек бұл дағдылы әдіске Н. С. Хрущев қарсы болып, орасан зиян келтірді. Бірақ ол заман өтті. Енді халқы шаруашылығы жаңа технологияны және қалыптасқан әдісті қатар қолдануда. Жер иесі өзіміз, баптау, құнарландыру еркімізде.
Бесіншіден, Шиелі мәдениеті жоғары аудан. Оның бір дәлелі – түрлі халықтың мекені болып, тату өмір сүруі, бірінен бірі үйренуі. «Сыр елі – жыр елі» дейді. Бұл сөз осы ауданға өте тән. «Қаратаудың басынан көш келеді» деп басталатын қазақ халқының азаттық ұранына айналған, жоңғар шапқыншылығына қарсы ашынды патриоттық өлең мен ән осы Шиелі жерінде туындаған. Авторы – Қожаберген жырау. Шиеліге келіп жау тоқтады, жұлыны үзілді.
Шиеліде ақын-жыраулар көп болды. Солардың аса дарынды өкілі – Нартай Бекежанов еді. Қазақстан ақын-жырауларының бірінші жиынын, 1958 жылы Мәскеуде өткен Қазақстан әдебиеті мен өнерінің онкүндігін сырнаймен арнау айтып ашқан «күміс таңдай» атанған Нартай болатын. Нартай суырып салма ақын әрі сазгер, дауысы керемет орындаушы болған-ды. Соғыстың ауыр жылдарында концерт ұйымдастырып, елдің көңілін көтерді. Атақты Иманжүсіп те өмірінің бірсыпыра бөлігін осы Шиеліде өткізген. Әндері әлі ел аузында.
Шиеліден шыққан қоғам қайраткерлері де аз болмаған. Солардың ішінде Мұстафа Шоқайдың орны дара бөлек. Ол шетелдерде жүріп бір өзі арыстандай айбаттылықпен, жолбарыстай жүректілікпен отаршылдық жүйеге қарсы шықты, «Түркістан азаттығын» әлемге көтерді, үлкен қоғамдық қозғалыс тудырды. Оның патриоттық дауысы көп елге жетті. Германия, Англия, Франция, АҚШ елдерінде оның бастауын қолдаған қайраткерлер, ғалымдар шықты. «Азаттық» радиосы Мұстафа жолымен дамыды. Мұстафа ғажап тұлға, бір өзі бүтін әлем. Біз оны әлі жеткізе айта алмай келеміз. Ол бүкіл Түркістан халқының теңдесі жоқ мақтанышы.
Шиеліден ірі ғалымдар, әдебиет өкілдері де шықты. Солардың ішінде Қазақстан Ғылым академиясының президенті болып сайланған, Одақтың Лениндік, Қазақстанның Мемлекеттік сыйлықтарын алған Шахмардан Есеновтің орны ерекше. Бұл жерден сондай-ақ ақын-жазушылар Қалмақан Әбдіқадыров, Әбділда Тәжібаев, Оразбек Сәрсенбаев, филология ғылымдарының докторлары – профессор Әуелбек Қоңыратбаев, академик Мұхаметжан Қаратаев, академик математик Асқар Жұмаділдаев, басқа да көптеген ғалым, ақын-жазушы, өнер адамдары шықты. Әлі де ашылатын, келешегі зор таланттар өсіп-өне беретін құнарлы өңір. Шиелі қыдыр дарыған киелі жер дейтініміз осыдан.
Шиеліге барып жүргенде байқағаным, ел заман талабына бейімделген, еңсе көтерген, тұрмысы түзелген, шаруашылық жолға қойылған. Халық қашан да сыншы. 2008 жылдың басынан аудан тізгінін қолына алған әкім жас азамат Нұрлыбек Машбекұлы Нәлібаевтың қайраткерлігіне елдің ризашылығын естисің. Іс басында жүрген адамдарды жұмылдырып, талай тірлік тындырып келе жатқаны көзге көрініп-ақ тұр. Ауданның кейінгі жылдардағы жетістігі осы кітаптың «Шырқай бер, шырайлы Шиелі!» тарауында жан-жақты айтылатындықтан, оған тоқталып жатпаймын. Табыстарың тасып, абыройға кенеле беріңдер, ел қамын жеген ерлер деген бата тілігімді білдіремін.
Шиелі туралы естелік аз емес. Олар өмірдің белгілі бір кезеңдерін қамтумен шектеліп, жекелеген тұлғалардың өмірбаяны тұрғысынан баяндалып келген еді. Ал мына кітапта көне дәуірден бүгінгі заманға дейінгі Шиелі тарихы Қазақстан тарихымен, қоғамның дамуы дара тұлғалардың өмірімен тығыз байланыста қамтылыпты. Бұл еңбек өлкетануға қосылған сүбелі үлес деп бағалауға әбден лайық.
Досмұхамед КІШІБЕКОВ, академик.
АЛМАТЫ.