Сананы тұрмыс билейді деген белгілі ойшылдың ойға қонымды сөзі еске түседі осындайда. Рас сөз. Өзінің әлеуметтік-тұрмыстық жай-күйіне алаңдамаған адам ғана өнімді еңбек етіп, өзі өмір сүріп отырған қоғамға пайдасын тигізе алады. Осы қағиданы тұтас бір ұжымға қатысты қарастырсақ, оның пайдасы тіптен жоғары болмақ. Бұл арада басты мәселе тек қаражатқа ғана емес, ең алдымен, елдегі кез келген ұжым басшысының әлеуметтің жай-күйін барлай білетін сұңғыла, сергек те сезімтал қасиетіне байланысты десек, шындықтан алшақ кетпейтін шығармыз.
Жәңгір хан атындағы Батыс Қазақстан аграрлық-техникалық университетінің ректоры Қазыбай Бозымовты дәл осы топқа қоса аламыз. Әлеуметтік жағдай жан-жақты шешілген кезде, кез келген адамның қызмет жасау қабілеті мен белсенділігі соғұрлым арта түсетіні айтпаса да белгілі емес пе? «Көп түкірсе, көл» дегендей, барша ұжым мүшелері осындай асқақ сезім ауанында болса, ғылыми термин тілімен айтқанда пайдалы әсер коэффициенті тіптен шарықтай түспек.
Міне, бүгінде республиканың батыс өңірінде бүгінгі заманғы өндіріске қажетті кадрлар әзірлеудің жетекші жоғары оқу орнына айналып отырған университет жетістіктерінің басты сыры осында. Мұнда студенттер болашақ мамандығының қыр-сырын жетік меңгеріп, бәсекеге қабілетті маман болып қалыптасуына барлық жағдай туғызылған.
Биыл студенттер жатақханамен тұңғыш рет түгелдей қамтылды. Мұндай жетістікке соңғы жеті-сегіз жыл көлемінде қосымша тұрғын-жайлардың салынуы, студенттер үйінің пайдалануға берілуі арқылы қол жеткізілді.
Осы орайда айта кетерлік тағы бір мәселе, Жәңгір хан атындағы университетте студенттердің медициналық орталығы жұмыс жасайды. Бұл нысан республикалық бюджет есебінен қаржыландырылып отыр.
Университет ректораты тұрмыс-деңгейі төмен отбасылардан шыққан, жетім немесе ата-анасының қамқорлығынсыз қалған студенттерге қаржылай көмек көрсетуге де әлеуметтік жауапкершілік тұрғысынан қарайды. Бұл орайда жоғарыда көрсетілген арнайы категориядағы студенттер тобына оқу ақысын төлеу үшін елу пайыздық жеңілдік белгіленген. Сонымен бірге, студент асханасынан ауқаттану үшін оларға қажетті қаражат бөлінген.
Біз бұған дейін газетімізге университеттің өз қаражаттары есебінен профессор-оқытушылар құрамы үшін тұрғын-үй салу тәжірибесі орныққанын өзге жоғары оқу орындарына үлгі ретінде жазған едік. Осы дәстүр үзілмей, жыл сайын жалғасын тауып келеді. Университет ректоры бізге қалашық инфрақұрылымын одан әрі жетілдіру үшін қосымша кешенді шаралар іске асқанын айтып берді. Соған сәйкес, жалпы құны 97 миллион теңге тұратын электр энергиясын тарататын қосымша станса пайдалануға берілді. Бұл студенттер қалашығын электр қуатымен толықтай әрі үздіксіз қамтуға мүмкіндік берді.
Жәңгір хан университетінің кадрлық құрамы мен әлеуеті де жылдан-жылға өсіп келеді. Мұндағы оқытушылар құрамы жас мамандармен толықтырылуда. Бұл жәйттің өзі оларды тұрғын үймен және баспанамен қамту ісін ұдайы назарда ұстау қажеттілігін туғызады. Солай болып та жүр.
Таяуда Орал қаласы әкімінің шешіміне сәйкес, профессор-оқытушылар құрамының тұрғын үй жағдайларын одан әрі жақсарту үшін тұрғын үйлер мен коттедждер салуға жер бөлінгені алдыңғы пікіріміздің дәлелі. Аймақтық университетте ғалымдар үйі – ғылыми-зерттеу орталығы жұмыс істейді. Бұл ұжым өткен жылы министрлікте белгіленген базалық грантты жеңіп алып, ғылым мен өндірістің арасын жақындата түсуге сүбелі үлес қосып жүр.
Өнімді қызмет жасаған адам, алаңсыз демала да білуі қажет. Ұжымда мәселенің бұл жағы да жан-жақты ескерілген. Жоғары оқу орны базасындағы «Нива» демалыс және сауықтыру кешені жылдың төрт мезгілінде үздіксіз жүмыс істейді. Мұнда жылына мыңға жуық адам демалып, денелерін шынықтыра алады. Бұл кешен бюджеттен тыс көздер есебінен қызмет атқарады.
Біз мұның бәрін неге тәптіштеп, түп-тұқиянымен түгендеп отырмыз. Әрине, тектен-тек емес. Театр киім ілгіштен басталады дегендей, оқу орнындағы әлеуметтік-тұрмыстық мәселелердің шешімін табуы осындай өрелі істерден бастау алып жүр. Жоғарыда айтылған тұрғын үйлер мен әкімшілік ғимараттарға, ғылыми зерттеу орталығы, 1200 орындық машина жасау факультетіне, «Нива» демалыс кешеніне қызмет көрсету үшін жүздеген жаңа жұмыс орындары ашылған. Мұның өзі университеттің тұтастай Орал өңіріндегі және Орал қаласындағы жұмыссыздық деңгейін төмендетуге қосқан қомақты үлесі болып табылады. Міне, мәселенің мәнісі осында.
Бұған қоса айтарымыз, ұқыпты да үнемшіл, қаржыны жұмсай білудің тәртібін жетік меңгерген оқу орны басшысы орнықтырған үрдіске сай мұнда қаражатты үнемдей білудің оң тәжірибелері қалыптасқан. Ең басты айтайын дегеніміз, осы үнемделген қаражат бірінші кезекте университет қызметкерлері мен студенттердің әлеуметтік мәселелерін шешуге бағытталған. Біз әңгіме барысында, ауыл шаруашылығы ғылымының докторы, профессор Қазыбай Бозымовқа бірінші кезекте ұжымдағы әлеуметтік мәселелерге баса көңіл бөлуіңіздің басты сыры неде деген сауал тастаған едік. Бұл сауалға ол:
– Университеттің болашағы – жастар мен кәсіби деңгейі жоғары білікті мамандар. Олар алаңсыз қызмет атқаруы үшін ең алдымен алдағы күндер мен келешекке деген сенімдері болуы керек. Әлеуметтік және материалдық-тұрмыстық жағдайының шешімі табылатынына көздері жетулері тиіс. Тек сонда ғана олар өз қабілеттерін толықтай көрсетіп, өздері қызмет жасап жүрген ортаға, тұтас елге пайдасын тигізе алады. Бұл ретте ректораттың басты міндеті – оларды баспанамен, жылумен, жарықпен және өзге де тұрмысқа қажетті материалдық игіліктермен қамту деп есептейміз. Осы бағытымыз дұрыс екеніне жыл сайын айқын көз жеткізіп келеміз деп, жауап қайтарды.
Университет басшысының ойға қонымды осы пікіріне басқа бір тұжырым қосудың қажеті жоқ деп білеміз.
Темір ҚҰСАЙЫН.
Батыс Қазақстан облысы.