Бетеге мен боз жусанды Күрті өңірінде 1931 жылы Түркісіб темір жолы салынғанда Ұзынағаш стансасы деген атаумен алғашқы ауылдың іргетасы қаланыпты. Осы тұста Теміржол селолық округі құрылып, болат жол талай тарихи оқиғалардың бастауына айналған.
Әдетте, Теміржолға жақын орналасқан елді мекендердің тұрмыс-тіршілікке әкелетін өзіндік артықшылықтары болады. Мәселен, осы мекеннен 1951 жылы астық қабылдау кәсіпорны салынса, 1962 жылы «Күрті» қой кеңшары құрылған. Ауылдың көркін келтірген тұрғын үйлер, аурухана, кітапхана, пошта, тағы басқа халыққа қызмет қөрсететін орындар осы кезде салынып, халық көптеп қоныстана бастапты.
Қайта құру жылдары кеңшар нарықтың өтпелі кезеңінде басқа құрылымдар тәрізді тұралап қалмады. Жекешелендіру кезінде шаруашылықтың мал-мүлкін талан-таражға түсірмей, сақтады. Бұл шаруашылық жұмысшыларының ғана емес, жалпы елді мекен тұрғындарының әл-ауқатын төмендетпеуге, әлеуметтік, мәдени салаға жанды қолдау көрсетуге мүмкіндік жасады.
Өтпелі кезеңде елді мекендегі жалғыз ауруханаға жабылып қалу қаупі төнді. Сол кезде серіктестік медицина қызметкерлеріне шаруашылық есебінен айлық төлеп, автокөлік сатып әперді. Бұл жайлы аурухананың бас дәрігері Жанат Мұсаева бастаған ақ халатты абзал жандар сол бір қиын кезді ұмытпай ризашылықпен еске алады. Халықты имандылыққа ұйытқан Алланың үйі де шаруашылық есебінен күрделі жөндеуден өтті. Әлеуметтік жағынан жеткіліксіз қамтылған отбасылары азық-түлікпен, мал азығына қажетті жем-шөппен тұрақты қамтылды.
Қайта құру кезінде қой басы 90 мың басқа жетіп, жылына мемлекетке 150 тоннаға дейін сапалы жүн тапсырылыпты. Тұрғын үй бағдарламасымен үш жылда 130 отбасы жаңа баспаналы болған. Өмірдегі өзгерістерге байланысты «Күрті» қой кеңшарының атауы «Р-Күрті» өндірістік кооперативі, кейіннен жауапкершілігі шектеулі серіктестік болып өзгерген. Халықты жұмыспен қамту шаруашылық еншісінде болғандықтан нан пісіретін, макарон өнімдерін шығаратын, ұн тартатын диірмен салынып, тері өңдеп, тон тігетін цехтар ашылған. Қиындыққа қарамастан көшелер жөнделіп, жолдарға асфальт төселген.
Жыл өткен сайын шаруашылық экономикасы нығайып, күртіліктердің ертеңге деген сенімдері беки түсті. Егістік алқабы құнарлы, әрі төрт түлік мал өсіруге қолайлы сайын далада қызу еңбек қанат жайып, шаруашылықтың табысы дүркіреді.
Ұзынағаш стансасы кейіннен Қазыбек бек атауына ие болды. Бұл күндері шаруашылық 60127 гектар жерді тиімді пайдаланып, егістіктің берерін арттыруға көңіл бөлген. Ағымдағы жылы 1800 гектарға бидай, 2500 гектарға екпешөп, 450 гектарға жоңышқа егіліп, мол өнім алыныпты. Қазақтың биязы жүнді 30 000 бас қойын өсіруге мемлекеттен 8 млн. теңге субсидия алған. Сондай-ақ, шаруашылық жүннен 26 млн. теңге, қой сатудан 40 млн. теңге табыс тауып, ұжымдағы екі жүзден астам адамның әлеуметтік жағдайын жақсартуға мүмкіндік жасалған.
Елбасының Қазақстан халқына арнаған жолдауларындағы жас ұрпаққа бәсекеге қабілетті білім беру ісіне де серіктестік өзіндік үлесін қосуда. Қазақ Ұлттық агроуниверситетінде шаруашылыққа қажетті мамандықтарға 4 шопан баласы тегін оқытылып, өз есептерінен 2 млн. теңге төлеп келеді. Мәселен, Ә.Құдайбергенов малдәрігері, А.Тәтібаев экономист, Е.Әбдікерімов зоотехник, Е.Балапанов инженер-механик мамандығына оқытылса, Жамбыл аудандық кәсіби лицейде 8 жас механизатор мамандығына тегін оқытылуда. Сондай-ақ, жұмысқа келген жас мамандарды тұрғын үймен қамтамасыз ету мәселесі оң шешілуде. Атап айтқанда, К.Аташев, А.Әбдікерімов, А.Өміралиев, Т.Мақайға үй сатып алынса, Т.Жантасов пен Т.Ескеловке тұрғын үй салынып, тұрмыстық қажеттіліктері шешімін тапқан.
Биылғы қараша айында серіктестік 50 жылдық мерейтойын кең көлемде атап өтті. Осы күні шаруашылық демеушілігімен жүзеге асқан көптеген шаралар жалғасын тапты. Орталық көшедегі тұрғын үйлер күрделі жөндеуден өтсе, басқа да жұмыстардың тиянағы келтірілгеніне көпшілік риза. Ұжым тасқын кезінде қиналған қызылағаштықтарға да қаржылай көмек көрсетті. Кейбір отбасыларының алдына жылқы, сиыр, қой салды. Мұндай демеушілік шаралары үнемі жалғасуда.
Оқырман қауым Қазыбек бек Тауасарұлының халқымыздың басынан өткен қиын-қыстау сәттерін баяндайтын «Түп-тұқияннан өзіме шейін» кітабындағы Тауасар би Матайұлын да, жаужүрек ұрпақтары Қасқары мен Молдабай батырмен де жақсы таныс болуы тиіс. Қасқары батырдың туғанына 300 жыл толуына орай құрылған «Тауасар» қоғамдық комитетінің төрағасы Асқар Нұғыманов бастаған Тұрсынхан, Алматбек, тағы басқа ұрпақтары тәуелсіздігіміздің белгісі ретінде күртіліктерге төрт тарапқа қараған ескерткішті сыйға тартты. Оның әр қырында Тауасар би мен ұрпақтары – Қазыбек бек, Қасқары, Молдабай батырлардың бейнесі кескінделген.
Қазыбек бек бекетінде ауыл азаматтарының атсалысуымен абыз ата Құртқа тәуіп атындағы айшықты күмбезі көк тіреген Алланың үйі де ашылды. Мұның өзі халқымыздың дәстүрлі дінін ұстанып, жастардың теріс ағымдарға ермеуінің алдын алуға негіз болғанын айта кеткеннің артықтығы жоқ.
Елу жылда жаңарған ұжымның табысы тасып, ынтымағы жараса түсуде. Және бір айта кететін мәселе шаруашылықтың табысы тасыған сайын әлеуметтік, мәдени салаға, жеткіліксіз қамтылған отбасыларына көрсететін демеушілігі де қомақты болып отыр. Бұл жомарттық әлі де жалғасады, дейді асыл тұқымды қой зауытының басшысы С.Еркінбайұлы.
Қараша айында Қазыбек бек бекетінде «Балауса» балалар бақшасы тағы да бүлдіршіндер игілігіне берілді. Ал, күрделі жөндеуден өткен мәдениет үйінде ауылшаруашылық өнімдерін өндіруде жақсы табыстарға жеткен «Р-Күрті» асыл тұқымды қой зауыты атанған ұжымның толағай табысы әңгімеге арқау болды. Іргелі шаруашылық бүгінгі ғылымның дамуына сүйеніп, Қазақ мал шаруашылығы институты ғалымдарымен жанды байланыс орнатқан. Осылайша төрт түлікті асылдандыру арқылы оның өнімділігін арттыру көзделуде. Демек, табыс тасыған сайын халықтың әлеуметтік жағдайына назар аударуға тың бетбұрыс жасалатын болады.
Күмісжан БАЙЖАН.
Алматы облысы.