Облыстық Мемлекеттік кірістер департаментінің басшысы Ерлан Жанбаевтың айтуынша, бұған дейін қағаз форматында ұсынылып келген 14 қызмет электрондық үлгіге аударылып жатыр. Мемлекеттік органдардың халықпен байланысы жақсы жолға қойылған.
Сыбайлас жемқорлыққа қарсы күрес жөніндегі облыстық комиссияның кезекті отырысында аймақ басшысы Нұрлан Ноғаев департамент жұмысына оң баға берді. Оған негіз де жоқ емес. «Елбасы тапсырмасына сәйкес мемлекеттік органдардың жұртшылықпен кері байланыс орнату жұмысы жүргізілуде және барлық деңгейдегі басшылар азаматтарды жеке қабылдайды. Сонымен қатар, әлеуметтік желілерде Telegram және ACQ қосымшасы белсенді жұмыс істеп тұр. Олардың әрқайсысында 3000-нан астам адам тіркелген, барлық өтініштер жан-жақты қарастырылып, содан кейін халықпен тікелей байланысқа шығады», – деді облыс әкімі.
Бұл ретте «Цифрлы Қазақстан» бағдарламасының маңызы зор болып отыр. Сондай-ақ «Ақылды қала» тұжырымдамасы негізінде Атырауда 18 ғаламторды тегін пайдалану нүктелері іске қосылған. Әлеуметтік желі арқылы мәселе шешіп, мемлекеттік органдармен байланысуға тұрғындар да үйрене бастады. Чат-канал мен мобильді қосымшалар арқылы түскен шағымдар жергілікті атқарушы органдарға елді мекендердегі проблемалық жайттарды анықтауға септігін тигізеді. Өткен жылы Атырау облыстық әкімдігі мен ХҚКО халыққа 2,7 млн мемлекеттік қызмет көрсеткен еді.
Бақытгүл БАБАШ,
«Егемен Қазақстан»
АТЫРАУ