Облыстың шеткері өңірінде орналасқан ауданның негізгі саласы – ауыл шаруашылығы, оның ішінде егіншілік жақсы қарқынмен дамып келеді. Соңғы 10 жыл ішінде тың және тыңайған жерлерді игеру есебінен егістік көлемі 2 еседен астам өсіп, 327 мың гектар алқапты құрады. Тәуелсіздік мерекесі жылы Отан қамбасына бұрын-соңды болмаған мол астық құйылды. Гектар өнімділігі 17,3 центнерден айналып, 600 мың тоннаға жуық астық жиналды. Үкіметтің аграрлық саланы қаржылық қолдауы, жаңа ғылыми жетістіктер мен технологияларды енгізу, тұқым сапасын жақсарту, мамандарды қайта даярлау шаралары өз жемісін берді. Әсіресе, техникалық қайта жарақтандыру жұмыстары қарқынды жүргізіліп, машина-трактор паркінің 85 пайызы жаңартылды. Соңғы жылдары 6 млрд. 447 млн. теңгеге 400-ден астам заманауи ауылшаруашылық техникалары сатып алынды.
Елбасы Нұрсұлтан Назарбаевтың биылғы Жолдауындағы етті мал шаруашылығын дамыту тапсырмаларын орындаудың жолдары да жан-жақты қарастырылған. 1997 жылы барлық түліктің саны 40 мыңнан сәл ғана асатын. Содан бергі уақытта жеке сектордағы және агроқұрылымдардағы мал басының саны 19 мың басқа көбейді. Биыл мал өсіруге арнайы бағытталған “Сыбаға” бағдарламасы арқылы 16 жоба іске асырылып, 1500-ден астам ірі қара мал сатып алынды.
Ауданның өнеркәсіп саласын өркендетуге баса назар аударылып, бірқатар бағдарламалар іске қосылды. “Диорит ЛТД” ЖШС-інде қиыршық тас өндіретін кәсіпорын пайдалануға берілгелі физикалық көлем индексі артты. Бағдарлама аясында сағатына 140 тонна қиыршық тас өндіретін құны 874,8 миллион теңгенің шетелдік құрал-жабдықтары орнатылды Былтыр индустриялық-инновациялық бағдарламаға сәйкес 3 ірі жоба жүзеге асырылды. Оларға құйылған инвестициялардың жалпы көлемі 2,5 миллиард теңгені құрады. 140 жұмыс орны ашылды. Қуатты жобалардың бірі Ленинград ауылында орналасқан қиыршық тас өндіретін “Шунгит” ЖШС толық қуатында жұмыс істеуге көшті. “Ақтөбе Гласс” ЖШС 1 миллриард 200 миллон теңге инвестицияны кварц құмын өндіруге арналған кен байыту фабрикасын салып, технологиялық желі пайдалануға берілді. Жергілікті жердің табиғат жағдайы ескеріліп, кәсіпорынның жобалау-сметалық құжаты қайта жасалды. Сөйтіп, құмды кептіруге арналған цехтың жұмысы дизель отынынан газға ауыстырылды. Фабрика экологиялық таза байытылған кварц құмын өндіреді. 50-ден астам адам жұмыспен қамтылды. “Еңбек нан” ЖШС-ның қаржылық қолдауымен сыйымдылығы 60 мың тонналық элеватор бой көтерді. Мұнда астық өнімдерін қайта өңдейтін канадалық құрал-жабдықтар орнатылған. Жобаның жалпы құны – 745 млн. теңге. Алда атқарылатын маңызды шаруалардың бірі– мал өнімдерін ұқсату өнеркәсібі саласын жандандыру. 3 ірі жоба бойынша әзірленген сметалық құжаттар қаржыландыру институттарына сараптама жасауға тапсырылды.
Президент жыл сайынғы дәстүрлі Жолдауында әлеуметтік саланы дамытуға ерекше қолдау көрсетіп келеді. Аудандағы барлық елді мекендер білім беру және денсаулық сақтау мекемелерімен қамтамасыз етілген. Жылына 4-5 мектепке күрделі жөндеу жұмыстары жүргізіледі. Мектептер мен медициналық қосындардың материалдық-техникалық базасын нығайтуға бөлінетін қаражат көлемі артып, көрсетілетін қызмет сапасы анағұрлым жақсарды. Компьютер сыныптары “Интернет” және “Оkу.Net” жүйесіне қосылған. Талшық, Ленинград ауылдарында балабақшалар есігін айқара ашты. “100 мектеп, 100 аурухана” бағдарламасы аясында аудан орталығы – Талшық ауылында 100 төсектік 200 адамды қабылдайтын емхана пайдалануға берілді. 400 орындық жаңа стадион саламатты өмір салтын серік еткен тұрғындардың жиі баратын орындарының бірі деуге болады. “Ауыз су” бағдарламасы шеңберінде жергілікті бюджеттен қарастырылған 213,6 млн. теңге қаражатқа Талшық, Ленинград және Совхоз ауылдарына тораптық су құбырлары, Горький, Ұялы, Май, Алқатерек, Восход ауылдарына жергілікті сумен қамтамасыз ету жүйелері тартылды. Республикалық бюджеттен бөлінген 500 млн. теңгеге Бостандық, Киев ауылдарына су мұнарасы құрылысымен бірге су құбырлары жеткізілді.
Құрылыс жұмыстарының негізгі бөлігі жеке адамдардың қаражатына да, жергілікті бюджет есебінен де салынды.
Бұрынғы білім бөлімінің екі қабатты бос тұрған ғимараты қайта жөндеуден өткізіліп, жас отбасылар үшін шағын жатақханаға лайықталды. Бір коммуналдық үй пайдалануға берілді. “Жұмыспен қамту-2020” бағдарламасы аясында тағы 8 тұрғын үй пайдалануға беріледі.
Соңғы бес жыл ішінде мәдениет нысандарының саны 4 есеге өсіп, 18 клубты, 13 мемлекеттік кітапхананы құрап отыр. «Жол картасы» шеңберінде аудандық мәдениет үйі, Кеңащы ауылдық клубы қалпына келтірілді. Олардың жөндеу жұмыстарына 27 миллион теңге жұмсалды.
Елбасының салиқалы саясаты мен жарқын бастамаларының нәтижесінде жиырма жылдың ішінде әлем мойындаған Қазақстан мемлекеті құрылды, елдің жағдайы, экономикасы түзелді. Біз Президент белгілеп берген міндеттерді орындау мақсатында және ауданның әлеуметтік-экономикалық дамуы жолында қол жеткен табысымызды нығайтуға барлық күш-қуатымыз бен тәжірибемізді жұмсай беретін боламыз.
Ағзам ТАСТЕМІРОВ, Ақжар ауданының әкімі.
Солтүстік Қазақстан облысы.