Форумда сөз алған Премьер-Министр Бақытжан Сағынтаев Сербия мен Қазақстан арасындағы достық қарым-қатынастың тұрақты екенін айта келіп, агроөнеркәсіптік кешен, химия, туризм, медицина, көлік, телекоммуникация сияқты салалардың даму әлеуметі жоғары екенін жеткізді.
− Экономикалық әлеуеті жоғары Сербия Қазақстанның Еуропадағы сенімді серіктесі. Біз Сербияның басты халықаралық бастамаларымызды жан-жақты қолдауын жоғары бағалаймыз. Сауда-экономикалық саладағы ынтымақтастықта нығайып келеді. Өткен жылы Қазақстан мен Сербия арасындағы тауар айналымы 59 процентке өсті. Президент мырзамен екіжақты келіссөздер барысында бизнестегі қарым-қатынастарымызды барынша жоғары деңгейге көтеруге болатын түрлі бағыттарды талқыладық, – деді Б.Сағынтаев.
Ал Сербия Президенті Александр Вучич қазақстандық кәсіпкерлерді өз еліне инвестиция құюға шақырды.
− Біз еркін сауда аймағы туралы келісімге түзету енгізу бағытында жұмыс істеп жатырмыз. Әріптестерімізден құс еті, ірімшік, темекі және өзге де тауарларды қоса алғанда ЕАЭО нарығында бірнеше тауарлық позицияда кеденсіз импортты қамтамасыз етуді сұрап отырмыз. Сонымен қатар 5 мың автомобиль квотасы жайында да айттық. Келешекте ынтымақтастық үшін үлкен кеңістік табамыз деп үміттенеміз. Ауыл шаруашылығы саласында ауқымды бастамаларды жүзеге асыруға ниеттіміз, – деді Сербия Президенті. Сонымен қатар мәртебелі мейман әскери-техникалық салада да екі ел бірлесе жұмыс істей алатындығын баса айтты.
− Қазақстандық инвесторлардың елімізге келгенін қалаймыз. Соңғы үш жылда Doing-business тізімінде біршама жоғарыладық. Үш жыл қатарынан бізде бюджеттің артылуы орын алуда. Бюджетінде профицит байқалған еуропалық елдердің саны аз, – деді Александр Вучич. Сербия Президенті қазақстандық кәсіпкерлерді туризм, қонақүй бизнесі сияқты салаларға шақырды.
− Сіздер барынша қолайлы жағдай мен мемлекеттік субсидияға ие боласыздар. Субсидияны жаңа жұмыс орындарының саны бойынша береміз, оны ұсынудың түрлі деңгейлері мен тәсілдері бар. Бірлескен кәсіпорын құру арқылы біз үлкен нарықты бағындыра аламыз. Мәселен, сіздер үшін батысеуропалық, ал біз үшін еуразиялық нарыққа шығу мүмкіндігі бар, – деді Сербия Президенті Александр Вучич.
Бизнес-форумға агроөнеркәсіптік кешен, химия, туризм, медицина, көлік, телекоммуникация секілді салалардағы сербиялық тараптың 100-ге жуық бизнес өкілдері қатысты. Серб компаниялары арасында Algotech (телекоммуникация), Chemical Agrosava (химия), Akomed (медициналық жабдықтар өндірісі), Аданко (тоқыма), Meat ING Belgrade (ауыл шаруашылығы), Ветеринарлық медицина институты, Белград әуежайы сияқты бизнес орталықтары бар.
Шара барысында 4 ведомствоаралық меморандумға қол қойылды. Олар: Қазақстан Республикасы Инвестициялар және даму министрлігі мен Сербия Республикасының Құрылыс, көлік және инфрақұрылым министрлігі арасындағы әуе тасымалы саласындағы өзара түсіністік туралы меморандум; Қазақстан Республикасы Инвестициялар және даму министрлігі мен Сербия Республикасының Құрылыс, көлік және инфрақұрылым министрлігі арасындағы құрылыс саласындағы ынтымақтастық және тәжірибе алмасу туралы меморандум; Қазақстан Республикасы Әлеуметтік даму министрлігі мен Сербия Республикасының Жастар және спорт министрлігі арасындағы Жастар саясаты саласындағы өзара түсіністік туралы меморандум; Қазақстанның «Ветеринарлық медицина ұлттық анықтамалық орталығы» РМК мен Сербияның ғылыми ветеринарлық институты арасындағы ынтымақтастық туралы меморандум.
Еркежан АЙТҚАЗЫ,
«Егемен Қазақстан»
