Сыртқы саясат қадамдары
Қазақстанның өтіп бара жатқан жылдағы сыртқы саясаты 2010 жылғы бүкіләлемге бейбітшіл ел, ықпалды әрі беделді әріптес ретінде ЕҚЫҰ-ға төраға болуы мен оның 11 жыл бойы өтпеген саммитін өткізу арқылы үлкен табысқа қол жеткізген әсерінен арылмаған жоғары лепте жүргізілді деп айтсақ артық емес шығар. Бүкіләлемдік ынтымақ пен бейбітшілікке үлес қосқан ел ретінде Қазақстанның қадамдары 2011 жылы батыл, сөздері өтімді де салмақты, ойлары ашық, пікірлері өткір көрінгенін және оның халықаралық саясаттың беделді ойыншыларының біріне әбден айналғанын әлемнің азуын айға білеген талай саяси сарапшылары атап өтті. Олар Қазақстанның бұл санатқа ілегуі Еуропа мен Азияның орталығында, халықаралық қатынастардың аса ірі қатысушылары Қытай мен Ресейдің ортасында орналасқандығы ғана емес, әлем қауымдастығының мүддесін көздеумен танылған халықаралық белсенді істері мен бастамалары, сонымен бірге Президент Нұрсұлтан Назарбаевтың жеке беделінің үлесі екендігін атап өтуде. Дегенмен, Қазақстанның пайдалы қазбалар мен табиғи ресурстарға бай екендігінің халықаралық саяси рейтингінің артуына игі ықпал ететінін жиі айтушылар да аз емес. «Бүгінгі күні біздің еліміз ең өзекті деген әлемдік проблемаларды шешуге және әлемдік жаңа тәртіпті орнатуға белсене қатысуда. Халықаралық аренада Қазақстан тұрақтылықтың ошағы, мемлекеттің серпінді және өркенді даму үлгісі ретінде қабылданады» дейді Сыртқы істер министрі Ержан Қазыханов өзінің «Орнату, жасау және даму жолы» атты Қазақстанның сыртқы саясатына – 20 жыл толуына байланысты мақаласында. («Егемен Қазақстан», 16 қараша 2011 жыл). Айта кететін жәйт, Елбасы Нұрсұлтан Назарбаев өзінің 2011 жылғы 11 сәуірдегі Жарлығымен Ержан Қазыхановты Сыртқы істер министрі етіп тағайындаған еді. Аталмыш мақаласында Е.Қазыханов бүгінгі күні Қазақстанның 138 мемлекетпен дипломатиялық қатынас орнатқанын, соның ішінде 70-тен артық елде дипломатиялық миссия ашқанын да атап өтті. Ал Қазақстанда 107 шет мемлекет пен халықаралық ұйымдардың өкілдіктері ашылған екен. Осы уақытқа дейін Қазақстан шетелдермен мемлекетаралық, үкіметаралық және ведомствоаралық деңгейдегі 3 мыңнан астам халықаралық келісімдерге қол қойған. Соның ішінде бұл үрдіс 2011 жылы да жалғасын тапты. Сондай-ақ 2011 жылғы сыртқы саясаттағы басымдықтың бірі Қазақстанның Ислам Конференциясы Ұйымына (Астанада болған 38-ші сессиядан бастап ұйым Ислам Ынтымақтастығы ұйымы деп аталды) төрағалығына арналды. Жылдың басында-ақ Қазақстанның осы ұйымға төрағалық етуіне байланысты АҚШ президенті Б.Обаманың ИКҰ-дағы арнаулы өкілі Рашад Хусеин келіп, сол кездегі Сыртқы істер министрі Қанат Саудабаевпен келіссөздер жүргізген. БАҚ-қа белгілі болған мәліметтерге қарағанда тараптар Қазақстан төрағалығының табысты болу шараларын қарастырған. Соның ішінде Ислам әлемі мен Батыс арасындағы өзара түсіністік пен диалогты нығайтудағы ортақ талпыныстардың шеңберіндегі ынтымақтастық мәселелерін талқылаған. Қазақстан Астанада 28-30 маусым аралығында болған ИЫҰ Сыртқы істер министрлері кеңесінің 38 сессиясынан ұйымға төрағалық етуді бастады. Онда Елбасы Нұрсұлтан Назарбаев сөз сөйлеп, мұсылман үмбетінің жалпы экономикалық әлеуетінің зор екенін, енді тек ынтымақтастықтың, өзара көмектің тиімді тетіктерін қолдана түсу арқылы соны біртұтастындыру қажет екендігін атап өтті. Сонымен бірге, ол ІЖӨ орташа көрсеткіші ИЫҰ елдерінде 9,5 мың доллар болса, еуропалық елдердің орташа көрсеткіші 24 мың доллардан артық екенін айтты. ИЫҰ елдері әлемдегі энергетикалық ресурстардың 70 пайызын иемденіп отырғанына қарамай, әлемдік ІЖӨ-нің 7,5 пайызына ғана иелік етеді, деді ол. Осындай фактілерді көрсете келіп, Елбасы Н.Назарбаев ИЫҰ елдерін өзара тиімді ынтымақтастықты тереңдетіп, ІЖӨ әділетті бөлінісіне қол жеткізуге тырысу қажеттігін атап көрсетті. Ал бұл істерді іске асырудың амалдары қатарында ол ИЫҰ елдерінің ішіндегі жалпы өнімнің 80 пайызын өндіретін мұсылман елдері экономикасының 10 алдыңғы қатарлы елдерінің диалог алаңын құру қажеттілігін атады. Сондай-ақ азық-түлік жүйесінде өзара көмек көрсете алатын қор құрудың, қала берді, энергетика саласында тереңдетілген ынтымақтастық орнатудың және осы салада Ұйым шеңберіндегі бірлескен іс-қимыл жоспарын жасаудың қажеттілігін атап өтті. Одан әрі Президент 2030 жылы мұсылман әлемі халықтары ғаламшар халқының төрттен бірін құрап, 2,2 млрд. адамға жететінін айта келіп, білім мен ғылымның да тиісінше өсуі қажеттігін ауызға алды. Әлемдік алдыңғы қатарлы идеялар мен жаңалықтардың тууы үшін ақша мен табиғат байлығы ғана емес, интеллектуалдық орта мен саяси-қоғамдық аужай керек, деді Елбасы. Осы сесссияда төрағалық шеңберінде өткізілетін шаралар жоспары да бекітілді. Онда ИЫҰ елдері шеңберінде Су стратегиясын құру бойынша кеңесшілер тобының кездесуі 13-14 шілдеде Алматыда, Денсаулық сақтау министрлерінің 3-ші отырысын қыркүйек айының аяғында Астанада өткізу белгіленді. Сондай-ақ Ислам әлемінің Ғылым академиясының қатысуымен қараша айында Астанада ғылыми-практикалық конференция өткізу белгіленген болатын. Осы шаралардың бәрі де өз деңгейінде орындалды. Ал бұлардан басқа, желтоқсан айының басында, Араб елдеріндегі, соның ішінде Сирияда қалыптасқан күрделі жағдайға байланысты Ұйымның штаб-пәтері орналасқан Жидда қаласында Қазақстанның төрағалық етуімен қан төгуге ұласқан күш қолдануды тоқтату, ұлттық үнқатысуды бастау, жағдайды оңтайландыруға бастайтын реформалар жүргізуді талап еткен декларация қабылдаған отырыс болды. 2011 жылғы екіжақты және көпжақты кездесулер ішінде сәуір айында Қазақстанға Үндістан Республикасы Премьер-Министрі Манмохан Сингтің ресми сапармен келгенін атап өтуге болады. Үндістан Үкіметінің басшысы Президент Н.Назарбаевпен екіжақты келіссөздер өткізіп, оның қорытындысы бойынша Бірлескен мәлімдеме қабылданды. Сондай-ақ Азаматтық істер бойынша құқықтық көмек көрсету туралы мемлекетаралық келісім-шартқа қол қойылды. Ал Үкімет басшысы К.Мәсімовпен болған кездесуде Стратегиялық әріптестікті дамытудың бірлескен іс-қимыл жоспары бекітілді. Сонымен қатар «ҚазМұнайГаз» ҰК» АҚ пен үндістандық «ONGC Mittal Energy Ltd» компаниясы «Сәтбаев» мұнай кен орнын бірлесе игеру туралы келісімге қол қойды. Мемлекет басшысы, Сыртқы істер министрі мұнан басқа да ондаған мемлекет немесе сыртқы саясат ведомствосы басшыларымен, халықаралық ұйымдар жетекшілері немесе арнайы өкілдерімен екіжақты және көпжақты кездесулер өткізіп, ынтымақтастық пен әріптестікті тереңдету бағытындағы келіссөздер жүргізді. Соның ішінде Елбасы Н.Назарбаевтың ақпан айында Бейжіңге, ал ҚХР Төрағасы Ху Цзиньтаоның маусым айында Астанаға келген сапарын атап өтуге болады. 2011 жылдың 21 қыркүйегінде Елбасы Нұрсұлтан Назарбаев БҰҰ Бас Ассамблеясының 66-сессиясына қатысып, сөз сөйледі. Айта кету керек, бұдан бірнеше жылдар бұрын ғана Қазақстанның үніне ешкім құлақ аса қоймаса, бұл жолы Елбасының сөзі ыждаһатпен тыңдалып, онда айтылған ұсыныстар әлем назарын өзіне аударды. Елбасы ядролық қаруды таратпау және оған бақылауды күшейту жөніндегі маңызды бастамалардың жаңа пакетін ұсынды. Қазақстан Президенті ядросыз әлемге балама жоқ екенін айта отырып, ядролық қаруы бар державаларды оны қолданудан бас тарту жөнінде конвенция қабылдауға шақырды. Сонымен бірге Жапониядағы АЭС апатын ауызға ала отырып, атом қуатын қауіпсіз қолданудың әмбебап және міндетті қағидаттарын әзірлеуді ұсынды. Астанада осы бастамалардың іс жүзіне асуын жақтайтын «Ядросыз әлем үшін» атты халықаралық форумның өтетінін де атап өтті. Қазақстан сыртқы саясаты ведомствосының басты міндеті Елбасының жаһандық қауіпсіздікті сақтау жолында көтерген бастамаларын іс жүзіне асыруға бағытталды. Осы мақсатты жүзеге асырудың бір жолы ретінде қазір Қазақстанның 2017 жылға БҰҰ Қауіпсіздік Кеңесі тұрақты емес мүшелігіне сайлануын қамтамасыз етуге бағытталған жұмыстар жүргізілуде. Осы және басқа мәселелер бойынша қазір сыртқы саясат ведомствосы еліміздің стратегиялық әріптестері Ресей, Қытай, АҚШ және Еуропа одағымен жаңа әрі бұрынғыдан жоғары сападағы қарым-қатынастар орнатуда. Сыртқы саясаттағы Ресей тармағының маңыздылығы Кеден одағының табысты іске асырылғандығынан және оның 2012 жылдың 1 қаңтарынан бастап Біртұтас экономикалық кеңістікке (БЭК) ұласқанынан көруге болады. Желтоқсан айында Елбасы Н.Назарбаевтың қатысуымен Мәскеуде ЕурАзЭҚ саммиті шеңберінде БЭК-тің жұмысын нақты жүргізуге арналған Еуразиялық экономикалық комиссия құрылды. Оның төралқасына қатысушы үш мемлекеттен бір-бір өкіл енгізілді. Сондай-ақ осы кездесуде ҰҚШҰ мен ТМД-ның 20 жылдығына арналған саммиттер де өтті. Қазақстан мен АҚШ арасындағы стратегиялық әріптестіктің басымдығы Ауғанстандағы жағдайды тұрақтандыруға бағытталған. ЕҚЫҰ Іс басындағы Төрағасы болған кезінде Қазақстанның осы елдегі тұрақтылықты қалпына келтіруге бағытталған әрекеттері әлем қауымдастығы тарапынан қолдау тапты. 2012 жылы бұл елден АҚШ пен коалиция әскерлерінің негізгі бөлігі кетеді. Осыған байланысты ондағы экономикалық тұрақтылық пен бейбіт өмірдің сақталу мәселесі өткен жылғы үлкен форумдардың басты мәселелеріне айналды. Соның ішінде Ыстамбұлда Түркия, Пәкстан және Ауғанстан лидерлерінің кездесуі болып, оған Қазақстан да шақырылды. Ал 15 қарашада Астанада Ауғанстан жөніндегі 50 мемлекет пен халықаралық ұйымдар өкілдерінен тұратын Байланыс тобының отырысы, ал 5 желтоқсанда сыртқы істер министрлері деңгейінде 70-тен артық мемлекеттің өкілдері Бонн қаласында бас қосты. Бәрінде де Қазақстан бұл істе өзіндік ұстанымы бар ел ретінде жұрттың назарын аударды. Қазақстанның тағы бір стратегиялық әріптесі Еуроодақ болса, маусым айының соңында бұл ұйыммен оның штаб-пәтері орналасқан Брюссель қаласында Кеңейтілген әріптестік және ынтымақтастық жөніндегі жаңа келісім жасау туралы келіссөздер ресми түрде басталды. Қазақстан Еуроодақпен осындай сападағы диалогқа шыққан Орталық Азиядағы жалғыз мемлекет. Қазір Қазақстан мен Еуроодақ арасындағы сауда айналымы 40 млрд. долларға жетіп отыр. Мұндай табысқа жетуге Елбасының үшжылдық «Еуропаға жол» бағдарламасының қабылданғаны да игі әсер етті. Қазақстанның аймақтық халықаралық ұйымдардағы белсенділіктері де өткен жылы жоғары деңгейде болды деп айтуға болады. Соның ішінде негізінен экономикалық интеграцияны ғана көздеген жоғары айтылғандардан басқа Шанхай ынтымақтастық ұйымындағы 2010-2011 жылдардағы төрағалығы табысты аяқталды. Оның Мемлекет басшылары кеңесінің мерейтойлық отырысы 15 маусымда Астана қаласында өтті. Саммит қорытындысы Қазақстанның жаһандық және аймақтық проблемаларды шешудегі рөлі мен орнының арта түскендігін көрсетті.Міне, қысқаша айтқанда Қазақстанның өткен жылдағы сыртқы саясаттағы қадамдары осындай болды.
Жақсыбай САМРАТ.