Театр • 23 Қазан, 2018

Севильдік шаштараз шаш қимайды...

241 реткөрсетілді

...Себебі Дж.Россинидің әйгілі шытырман оқиғалы комедиялық операсы кейіпкерлерінің көрер­меніне ұсынар жаңалығы мен­ жарқын өнері одан да қы­зық. Жақында «Астана Опе­ра»­ сахнасында Мәдениет жә­не спорт министрлігінің қол­дауымен елорданың 20 жыл­дығына орай әлемдік музыка өнерінің жауһары – Дж.Россинидің «Севильдік шаш­т­араз» операсының тұсауы кесілді. 

Адамзат жүрегінен орын алған теңдессіз бедел мен абыройға ие осынау үздік опера бас шаһар көрермендеріне айрықша көтеріңкі көңіл күй сыйлады. Жаһан мойындаған жауһардың Астана төрін­де лайықты деңгейде қойы­луына тер төккен шығар­ма­шылық иелерінің қатарын: опе­раның қоюшы дирижері – Қазақстанның еңбек сіңірген қайраткері, «Астана Опера» театрының бас дирижері, әлемге әйгілі маэстро Алан Бөрібаев, режиссер – атақты италиялық қоюшы суреткер Альфонсо Антониоцци, сценограф – Эцио Фриджерио (Италия), костюм бойын­ша суретші – «Оскар» сый­лы­ғы­ның иегері Франка Скуар­чапино (Италия) және проек­циялар бойынша дизайнер Серджио Металли (Италия) бастаған опера өнерінің кіл мықтылары толықтырды. 

– «Севильдік шашта­раз» әрбір театрдың репер­туа­рында болуы тиіс үз­дік опералардың санатын­да. «Астана Опера» ұжы­мы Дж.Россини шығарма­­шы­лығымен тұңғыш рет жұ­мыс істеп отыр. Менің ойым­ша, осынау ғаламат музыка туындысы біздің білікті де талантты вокалдық ансамблімізге дәл келеді. Әрине қай жа­ғынан да күрделі шығарма болғаннан кейін, әртістерге, әсіресе басты рөл­дегі актерлерге жіті іздену мен шебер орындаушылық мін­деті қатар жүктеліп отыр, – дейді қоюшы дирижер Алан Бөрі­баев. 

Маэстро Алан Асқар­ұлы­­ның аталған туындымен бұған дейін Германия театрында жұмыс істеген тәжірибесі мол. Енді міне араға жылдар салып сол тәжірибесін «Астана Операға» алып келген музыка маманы қойылым премьерасының алғашқы күні-ақ сахна төрін шын мәніндегі өнердің мерекесіне айналдырды. 

Ал қоюшы режиссер Аль­фонсо Антониоцци бол­са ке­­зек­ті жұмысының ерек­ше­лігін де, кілтін де негізінен клас­сикалық дәстүрлі стильден іздепті. Шығармашылық иесі қойылымда бірінші кезекте музыка мен либреттоға басым­дық береді. Сол арқылы көңілді комедияның бояуына бояу үстеп, операны барынша классикалық сараптауға екпін түсіреді. Дегенмен, аталған қолтаңба жарқындық пен заманауилықтан ада деп қорытынды түюге тіпті де не­гіз жоқ. 

– Мен бұл музыканы­ естіп өстім, сондықтан оны­­ еш өз­герткім келмеді. Кө­біне­се режиссерлер театр бюд­жетінің XVIII ғасырдағы бар­лық сән-салтанатты көрсетуге мүм­­кіндігі болмағандықтан, оп­е­раның көрінісін басқа заманға ауыстырады. «Астана Операда» біз өзгеше костюмдер мен декорацияларды пай­далана отырып, Россини стилін барлық көркемдігімен ұсындық. Либреттода коме­диялық сәттер өте көп, мен әзіл­дің шынайы болғанын қа­лаймын. Қойылымда жапсырма іш, мұрын мен мұрт пайдаланылмайды, осынау күлкілі әсерді жасау үшін әртістер шын мәнінде тамаша ойнап шығуы тиіс, – дейді қоюшы-режис­сер.

Куә болғанымыздай, режиссер қойған бұл талапты «Астана Опера» әртістері кә­сіби жоғары деңгейде ең­серіп шықты. Басты пария­ларды орындаған Фигаро – Сүндет Байғожин, Граф Альмавива – Фредерико Бутацци (Италия), Бартоло – Бауыржан Әндержанов, Розина – Салтанат Ахметова өз рөлдерінде жарқырай кө­рін­ді.

«Астана Опера» қойылым­дарының назар аудартып, жанар­ға қуаныш сыйлайтын тағы бір ерекшелігі – декора­ция. Көркемсуреттегі тех­но­ло­гияның озық жетістік­тері мен үздік үлгілерін өз жұ­мысында шебер пайда­ланған италиялық сценограф Эцио Фриджерио сахнада негізінен көк, ақ, алтын түстес сары және солғын сұр түс­терге басымдық беріпті. Ауқымды декорациялар салтанатын қала көріністері, қақпалар бейнеленген 4D және 3D проекциялар, сонымен қатар әсерлі анимациялар толықтырады. Қойылымда сондай-ақ сәнді күймеге жегілген аттардың ортаға шығуы да көремендер үшін күтпеген тосын сый болды. Мұны сахна суретшісі: «Көрермендерді операның басынан-ақ таңғалдырып, «театр ішіндегі театр» әсе­ріне бөле­гіміз келді», деп түсін­діреді. 

Ал сахнаның осынау салтанатты декорациясы мен бай реквизитіне сай үйлесімді киім тігу жұмыстары «Оскар» сыйлығының иегері Франка Скуарчапиноның (Италия) жетекшілігімен жүзеге ас­ты. Тігіншінің айтуынша, қо­йылымға барлығы 100-ден аса костюм  дайындалған.  XVIII ғасыр­­дың стиліне сай тігілген киім­дер сәнімен, нәзіктігімен, талғам­паздығымен көрушісіне ерекше эстетикалық ләззат сыйлады. 

«Астана Опера» театры­ның шығармашылық ұжымы ұзақ уақыттан бері жіті да­йындалып, бабына келтіріп барып ұсынған «Севильдік шаштараз» операсы осылайша комедия элементтеріне құрылған жеңіл, ойнақы сюжетімен ғана емес, актерлік шебер ойын, бай декорация һәм көркем-эстетикалық талғамымен де көрерменін нағыз өнердің қуанышына кенелтті. 

Назерке ЖҰМАБАЙ,

«Егемен Қазақстан»

Баннер
Соңғы жаңалықтар

Жаңа аялдамаға жаны қас

Аймақтар • Бүгін, 08:31

Жаңаөзенде жаңа жоба басталды

Аймақтар • Бүгін, 08:24

Тағзым мен тағылым тоғысқан той

Руханият • Бүгін, 08:19

Экономикада тұрақты өсім бар

Экономика • Бүгін, 08:06

Краудфандинг қазаққа да жат емес

Қазақстан • Бүгін, 08:00

Ең қысқа әңгіме. Данияр Саламат

Ең қысқа әңгіме • Кеше

Ең қысқа әңгіме. Нұрболат Аманжол

Ең қысқа әңгіме • Кеше

Ең қысқа әңгіме. Ерболат Қуатбек

Ең қысқа әңгіме • Кеше

Нұрлыбектің домбырасы

Руханият • Кеше

«ХАТ ҚОРЖЫН»

Қазақстан • Кеше

Күлкі керуені

Руханият • Кеше

Ұқсас жаңалықтар