Жаңа жүйе жолаушылардан түскен қаржының нақты көлемі мен оның қайда жұмсалатынын анықтауға септігін тигізеді. Бұған дейін Алматы, Астана секілді еліміздің ірі қалаларында қолға алынған жоба қоғамдық көлік саласындағы мәселелердің күрмеуін шешуге ықпал еткен-ді.
Атырауда смарт карта сауда орталықтарында, темір жол вокзалында, шағын аудандардың соңғы аялдамаларында сатылып жатыр, автобус кондукторларынан да алуға және шотты толтыруға болады.
Бір картаның құны – 300 теңге. Оның шотын тасымалдаушылар арқылы, сату нүктелерінде, Qiwi-терминалдарда және «SmartQala» мобильді қосымшасы арқылы толықтыруға болады. Көліктегі смарт карта, банк картасы, NFC қолданбасы бар смартфон, QR коды, QR картасы, SMS хабарламалар, Bluetooth, мессенджер және жолсерікке қолма-қол төлем төлеу сынды тоғыз түрлі төлем бар.
«Ѕмart –ТКШ» ЖШС өкілі Ерлан Нұрланұлы: «SmartQala» мобильдік қосымшасы арқылы төлемнің барлық түрлерін жасауға және карта теңгерімін бақылауға болады. Енді бұл қосымшаны барлық коммуналдық төлемдерді, жол ақыларын және салықтарды төлеуге пайдалануды жоспарлап отырмыз. Жыл аяғына дейін қосымшада автобустардың келу уақытын, бақылау қызметін іске қосамыз. Жолаушы аялдамада тұрып, жақын маңдағы қоғамдық көліктің келу уақытын көре алады», дейді.
Қазір қаладағы 54 автобус мобильді терминалмен жабдықталған. Барлық 200 автобусты жабдықтап, QR-кодтар беру жұмысы жақында аяқталады.
– Атырау қаласының қоғамдық көліктерінде электронды билет жүйесін енгізу оң нәтиже береді, бұл қозғалыстың ашықтығын қамтамасыз етеді, азаматтардың әлеуметтік санаттары бойынша статистиканы жүргізуге, бюджетке салық түсімдерін арттыруға, қоғамдық көліктерді бақылауға жол ашады, – дейді Ерлан Нұрланұлы.
Бақытгүл БАБАШ,
«Егемен Қазақстан»
АТЫРАУ