Елбасы биылғы Жолдауында «Бай табиғатымыз бен мәдени әлеуетімізді пайдалану үшін сырттан келетін және ішкі туризмді дамытуға ерекше көңіл бөлу қажет. Үкімет қысқа мерзімде салалық мемлекеттік бағдарлама қабылдауға тиіс» деген болатын. Батыс Қазақстан облысында ашылған этнотуристік орталық дәл осы мақсат үдесінен шыққан.
– Президент өңірлерді дамытудың бір жолы ішкі және сыртқы туризмді дамыту екендігін жиі айтып келеді. Әлемдегі 10 жұмыс орнының біреуі дәл осы салаға тиесілі. Біз бүгін өңіріміз үшін ерекше оиғаға – этно-туристік орталықтың ашылу салтанатына тап келдік. Бүгіннен бастап біздің өңірдің ішкі туризм саласы жаңа белеске шықты деп айтуға болады. Шынын айтсақ, біздің өңірде тарихи орындар, ерекше ескерткіштер өте көп. Алыс-жақын шетелден келген меймандарға, өз еліміздің өзге өңірлерінен келетін қонақтарға көрсетуге лайық сәулет және табиғат ескерткіштері, тарихи маңызы бар орындар аз емес. Айта кетейін, осы орталықтың аумағында Қазақстан халқы Ассамблеясының «Менің Елім» атты этноауылын ашу жоспарда тұр. Ол жерде біздің өңірді мекендейтін барлық ұлттың мәдениеті көрініс табады. Шетелдіктер үшін бұл өте қызықты, сондықтан туристер көп тартылады деп ойлаймын, – деді өңір басшысы Алтай Көлгінов.
Жаңа этнотуристік орталық спорттық, емдік-сауықтыру және танымдық бағытта қызмет көрсетпек. Бұл жерде атқа салт міну дағдысына үйренуге, ат спортының олимпиадалық түрлеріне жаттығуға, танымдық экскурсиялар жасауға болады. Сондай-ақ ұлттық ат спорты түрлері мен иппотерапия да «Sayat» орталығының ерекшелігінің бірі. Жақын арада бұл жерде суда қайықпен қыдыру, жаяу серуен, велотуризм мен қыста шаңғы тебу жолға қойылмақ. Өзеннің жағасы, тоғайдың ішінде орналасқан этнотуристік орталықтың жағрапиялық жағдайының өзі жоғарыда аталған демалыс түрлерін дамытуға қолайлы мүмкіндік беріп тұр.
Орал қаласының іргесінде, 12-ақ шақырым жерде, табиғаттың әсем мүйісінде орналасқан «Sayat» орталығында 22 жылқыға арналған атқора, жабық манеж бар. Келушілер демалатын қонақ бөлмелері, душ, кір жуатын орын, асхана және оқыту класы да қарастырылған.
– Біздің мақсатымыз – өлкеміздің туристік әлеуетін ашып көрсетіп, заманауи стандарттар негізінде белсенді демалысты қалайтын азаматтарға қызмет көрсету, мемлекет-жекеменшік серіктестігі аясында еліміздің туристік кластерін дамыту. Бұл жерде сәбиден қарияға дейінгі келушілерге қызықты бағдарламалар ойластырылған, – дейді осы кешен идеясының авторы, кәсіпкер Мұрат Жәкібаев. «Бизнестің жол картасы-2020» бағдарламасы аясында салынған кешен құрылысына 300 млн теңге қаржы кетіпті.
– Аумағы 5 га жерді алып жатқан этно-туристік орталықта қазірдің өзінде түрлі жарыстар өткізуге болады, оған қажетті әртүрлі алаңдар, құрал-жабдықтар бар. Жылқыларға керемет жағдай жасалған. Кешен жарыстар өткізуге, белсенді демалыс ұйымдастыруға және иппотерапия жүргізуге толық сәйкес келеді, – дейді кешеннің ашылу салтанатына арнайы келген алматылық маман, Қазақстан ат спорты федерациясының өкілі Яна Каменская.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы
