Әке таланты жұққан қыз талантын барлық жанрда танытқан шығармашылық диапазоны кең композитор ретінде ғана емес, Алмас Серкебаев, Төлеген Мұхамеджанов, Қуат Шілдебаев, Ақтоты Райымқұлова сынды саңлақ шәкірттерімен де есте қалады. Музыка саласында ұлттық кадрлар легін даярлап қана қоймай, Жұбанованың ықпалымен музыкалық мектептер құрылғанын, фольклор мен композиторлық шығармашылық мәселелері бойынша диссертациялар қорғала бастағанын атап өту парыз.
Өнертанушылар Ғазиза Ахметқызының музыкалық ойлау жүйесінің біртұтастығын, вокалды орындаудан аспапты орындауға ауысу, сезім көрнекілігін, тақырыптық материалдың ашықтығын, ұлттық бояу, ауқымдылық, эпикалық кеңдік пен музыкалық образдардың қарама-қайшылықты мінездерін біріктіре алатынын мойындаған.
Сонымен бұл сурет қалай түсіріліп еді?
– Ғазиза Ахметқызы 1975-1987 жылдар аралығында Алматы консерваториясында (қазіргі Қазақ ұлттық консерваториясы) ректор болды. 80-ші жылдардың басы болу керек, КазТАГ фототілшісі ретінде консерватория ректорын суретке түсіріп келуге тапсырма алдым. Ол кісіні қолға түсіру өте қиын болды. Қабылдау бөлмесінде көп күтуге тура келді. Қарбалас жұмыстарының арасында ретін туып, арнайы тапсырмамен келгенімді айтып едім, ректор КазТАГ сияқты салиқалы агенттік үшін фотоға түсуге мүлде дайын еместігін, макияжсыз отырғанын, шашын жөндемегенін, тағысын тағыны айтып үзілді-кесілді қарсы болды. Бірақ аздап болса да сөйлесе бастадық. Сәлден кейін ол кісі жібіп, «жарайды» осы күйімде түсіріп көр, деп рұқсатын берді. Ал мен де өтеуіне алдымен осы суретті өзіне көрсетіп алуға келісімін алдым.
Көп күттірмей қағазға басылған кадрды өзіне алып келгенімде, керісінше табиғи қалпында отырған осы суреті Ғазиза Ахметқызына өте ұнады. Араға аздаған уақыт салып, сурет орталық басылымдардың бірінде жарияланды, – дейді фото авторы Юрий Беккер.
Айнаш ЕСАЛИ,
«Егемен Қазақстан»
Алматы
