Жетімдерді жылатпайық
Орыстың атақты ұстазы Макаренконың «Ұстаздық дастан» деген тамаша кітабы бар. Шығармаға Кеңес өкіметінің алғашқы кезеңіндегі жетім қалған балалардың тағдыры арқау болған. Жеңіл оқылады. Түйіні – тәрбиешілер тағдыры қиын, мінездері жаман, бұзақылық жолға түкен жасөспірімдердің жүрегіне жол тауып, сегіз қырлы, бір сырлы адам етіп шығарады. Бәрі қоғамның толыққанды азаматы болып қалыптасады. Жақсы қызметтер атқарып, Отанына адалдық танытып, Ұлы Отан соғысында ерлік жасайды, елі, халқы үшін кеудесін оққа тосып, отқа күйеді. Нағыз батырлар!
Орыстың атақты ұстазы Макаренконың «Ұстаздық дастан» деген тамаша кітабы бар. Шығармаға Кеңес өкіметінің алғашқы кезеңіндегі жетім қалған балалардың тағдыры арқау болған. Жеңіл оқылады. Түйіні – тәрбиешілер тағдыры қиын, мінездері жаман, бұзақылық жолға түкен жасөспірімдердің жүрегіне жол тауып, сегіз қырлы, бір сырлы адам етіп шығарады. Бәрі қоғамның толыққанды азаматы болып қалыптасады. Жақсы қызметтер атқарып, Отанына адалдық танытып, Ұлы Отан соғысында ерлік жасайды, елі, халқы үшін кеудесін оққа тосып, отқа күйеді. Нағыз батырлар! Бірақ солар тәрбиеленген мекемені ешкім де Жетім балалар үйі деп атамаған. Олар – интернат түлектері. Осының өзі-ақ жетім балаларды тәрбиелеуде интернат деп аталатын мекеменің маңызды рөл атқаратынына мысал бола алады. Интернат деген сөздің атынан кісі үрікпейді. Қайта оның қабырғасында тәрбие алғандар алтын ұяларын сағынышпен еске алады. Оған таза жетімдер емес, соғыс жесірлерінің, тұрмысы тапшы отбасыларының да балалары қабылданған ғой.
Қазір Алматы облысында үш Жетім балалар үйі бар. Бірі облыс орталығы Талдықорғанда, екіншісі Үштөбеде, үшіншісі Сарқандта. Басқаларын білмеймін, біздің қаламыздағы Балалар үйін Кеңес өкіметінің тұсындағы интернат жағдайымен салыстыра алмайсыз. Арасы жер мен көктей.
Соңғы жиырма жылда бәрі өзгерді. Қазір заман да, адам да басқа. Аштық жоқ, тоқтық бар. Соғыс жоқ, бейбітшілік бар. Қазақстан жеке мемлекет болып, қой үстіне бозторғай жұмыртқалайтын заман орнап, демократиялық даму жолына түсті. Адамдарға өз бойындағы қабілеттерін дамытып, кез келген кәсіппен шұғылдануға мүмкіндік туғызылды. Құдай-ау, ата-бабамыз армандаған осындай өмірде, ел аман, жұрт тынышта жетімдік неге жойылудың орнына өршіп отыр? Балалар үйі деген бүркеншік аты бар мекеме де, жетімдер де болмауы тиіс еді ғой. Олай болмады. Жетімдік күн өткен сайын асқынып барады. Тоқтайтын емес. Жетім болғанда қандай жетімдер десеңізші. Тірі жетімдер… Туғызған әкесі де, құрсағында тоғыз ай, тоғыз күн құндақтаған шешесі де бар. Бірақ бала жетім…
– Бізде тұл жетімдер жоқтың қасы. Көбінің әкесі де, шешесі де бар. Бірақ олар заңға сәйкес бала тәрбиелеу құқықтарынан айырылған. Кейбір ата-аналар тұрмыстың ауыртпалығын сылтау етіп, әрқилы айла-тәсілмен балаларын мемлекетке тапсырып, сайрандап жүр. Ондайлар айында-жылында балаларымен жүздесуге де келмейді. Сондай-ақ, тастанды сәбилер де азаймай отыр, – дейді Үштөбе балалар үйінің директоры Закира Шопатова ханым.
– Мемлекет тарапынан қамқорлық қандай?
– Екі жүзден астам балаларға жан-жақты әлеуметтік және тұрмыстық жағдай жасалған. Тамақ тоқ, көйлек көк. Мектепке қамтылған. Бәрі тегін. Тек қосалқы шаруашылық та, кәсіпке баулитын шеберхана да жоқ.
Міне, гәп қайда? «Жұмысы жоқтық, тамағы тоқтық, аздырар адам баласын» деп ұлы Абай айтқандай, оқуға барып, тамақ ішуден басқа ермегі жоқ тәрбиеленушілердің көбі дайын асқа тік қасық болып өседі. Араларында басқа өмірді аңсайтындар да бар. Олар барды бағаламай, жаңа өмірдің қызығын іздеп, қашып кетуге құмар екен. Неге? Бұл сауалға жауап зерттеу барысында анықталды.
Мұнда балалар толық мемлекет қамқорлығына алынған. Екі жүз елуден астам балаларға сексеннен астам жоғары және арнаулы білімді мамандар қызмет көрсетеді. Республикалық бюджеттен жеткілікті мөлшерде қаржы да бөлінген. Оның үстіне демеушілерден де сый-сыяпат молынан келіп жатады. Тек балалардың білімін еңбекпен ұштастыру жағы ескерілмеген. Мектеп бітіргенше ештеңеден тарықпайды. Дайын үй, дайын тамақ, дайын төсек, кір-қоңын да біреу жуады, бөлмесін де біреу тазалайды. Ыдыс-аяғын да… Бір таңданарлығы, шаруа қожалықтарының басшылары жазғы каникулда жоғары сыныптардың оқушыларын келісім-шарт бойынша көмекшілікке сұрап алады екен.
– Биыл оған да тыйым салынды, – дейді директор.
Сонда қалай болғаны? Үй жұмысынан қол үзеді, дала еңбегіне де жіберілмейді. Үш ай демалыс. Күнұзақ уақытты қалай өткізеді деген ой оралады. Оның үстіне тәрбиеленушілердің дені – маскүнем әке мен ішкілікке бой ұрған отбасының ұрыс-керісін көріп өскендер. Осы арада оларды еңбекке баулудың тәрбие ісінде зор маңызы бар екені ескерілмей отырғанын ашық айтуымыз керек. Оның тиімді жолы өткен тарихымызда жатыр.
Кеңес өкіметі алғашқы қадамынан-ақ жетімдердің оқуын еңбекпен ұштастырған. Мал бақтырған, шөп шаптырған, балалар бау-бақшаны арамшөптен тазалауға атсалысқан. Асханаға кезекшілік жасаған. Кәсіби мамандыққа жастайынан баулыған. Осылай тәрбиеленушілерді зеріктірмеген екен. Еңбекпен шыңдалып өскен бала далада қалмайды, өмірден өз орындарын табады. Ал қазір ше?
Барлық балалар үйінен орта мектепті бітіріп шыққандар ертеңгі күніне үрейлене қарайды. Жалпы, білім беретін мектептердің түлектері той жасап, арманға құлаш ұрып жүргенде, жетімдер тұйыққа тіреледі. Оларды алда не күтіп тұрғаны белгісіз. Кәсіптік білім алмаған соң жұмыс қайдан табылсын? Нарықтық экономика жағдайында үй балаларын ата-анасы мейрамханаларға, басқа да тұрмыстық құрылыс жөндеу жұмыстарына жіберіп, қаржы жинатады. Ал балалар үйіндегі тәрбиеленушілер үй шаруасына немесе дала жұмыстарына жалданса, оны «құлдық» деп жұмыс берушіні де, жасөспірімдерді де қудалайды. Осыдан үлкен өмірге өз бетінше жіберілгендер, дәлірек айтсақ, үкіметке арқа сүйеп өскендер тіршілікте күнкөрістік табыс та таба алмайды. Өйткені, олар еңбектің әліппесін де меңгермеген.
Қазір өткен заманды ауызға алсаң, кейбіреулердің төбе шашы тік тұрады. «Қылышынан қан тамған, тоталитарлық жүйе» деп. Солай да шығар. Бірақ сол жүйенің де үлгі алардай жақсы тәжірибесі бар еді ғой. Мәселен, мектеп оқушылары екі тоқсанға жуық ауданда қызылшаға шығатын. Мектептің қасындағы бау-бақшаны күтетін. Шөп маялайтын. Сенбілікке атсалысатын. Қаладағы Ұлы Отан соғысында қаза болғандарға арналған ескерткіштерді күту, мектеп маңын тазалау да оқушылар мойнында болатын. Тимуршылар командасы жалғыз-жарым соғыс жесірлерінің үй шаруасын жасап беретін. Ол ол ма, әр мектепте оқу шеберханаларында ағаш жону, сылақшы, бояушы, әрлеуші және сантехник сияқты кәсіби мамандыққа баулынатын. Оқуға түсе алмағандар тұрмыстық кәсіби мамандар дайындайтын училищелерге емтихансыз түсетін. Жатақхана беріледі. Үш мезгіл тегін тамақ. Оның үстіне стипендия…
Қазір де бар осындай оқу орындары. Бірақ бәрі-бәрі ақылы. Ал менің мақаламның арқауы – жетімдер өмірі. Олар туғаннан анасына, әкесіне керексіз болып, тағдыр тәлкегіне ұшырағандар оқуға ақыны қайдан тапсын.
Қағаз жүзінде Балалар үйі жақсы болғанымен, ақиқатында білім мен тәрбие еңбекпен ұштастырылмаған жабық мекеме казармаға ұқсайды. Тұйық шеңбердің аты – тұйық шеңбер. Мына қатал өмір ешкімнің маңдайынан сыйпамайды. Әзәзіл ақша үстемдік құрып, дүниенің бәрі есеп-қисапқа бағынып жатқанда тірек-таянышы жоқ жетімдер кімге керек? Жоғары білімді мамандар орын таба алмай жүргенде жетімдерге кім қолын созып жұмысқа тұрғызады?
– Кейде мектеп бітіріп, кәмелеттік аттестат алғандар тұрақ таба алмай, қайта айналып, Балалар үйіне келіп қонып жүреді. Бірақ қашанғы заңсыз бас сауғалайды? – дейді ұзақ жыл осындай мекемені басқарған ардагер ұстаз Жамал Төлеубайқызы бізбен әңгімесінде.
Көп кешікпей мектеп бітірушілер қауырсыны қатайып, өмірге жолдама алады. Алда арман күтіп тұр көбін. Есейіп кетсе де, әке-шешеге өмір бойы бала олар. Тірегі де, таянышы да бар. Ал туа тастандыларды кім күтіп тұр? Сондықтан да жетімдерден «Қайда барасың?» деп сұраудан да қорқасың.
Мәкен ӨСЕРБАЕВА, Қазақстанның құрметті журналисі.
Алматы облысы.