Шәмшінің музейі қайда?
Қайталанбас ғажайып таланттың рухани құндылықтарына ие болар бір мәдени-ағарту мекемесі керек. Ол мәдени ошақ Шәмші Қалдаяқовтың сазды-мемориалдық музейі деп аталуы тиіс.
«Табиғатының шыңы да, шатқалы да орасан» Шәмші адамзатқа теңдессіз сарқылмас рухани қазына қалдырды. Енді Алланың осы сыйын келешек ұрпаққа аманаттау – қазіргі ұрпақтың міндеті мен парызы. Оның бір жолы – мемлекеттік негізде Шәмші Қалдаяқовтың сазды-мемориалдық музейін ашу. Бұл – мемлекеттің, Үкіметтің, нақтылай айтқанда, Мәдениет және ақпарат министрлігінің құзырындағы іс. Осы салада біз белгілі мемлекет, қоғам қайраткері, этнограф ғалым, музейтанушы Өзбекәлі Жәнібеков айтқандай, жолайрықта тұрмыз.
Қайталанбас ғажайып таланттың рухани құндылықтарына ие болар бір мәдени-ағарту мекемесі керек. Ол мәдени ошақ Шәмші Қалдаяқовтың сазды-мемориалдық музейі деп аталуы тиіс.
«Табиғатының шыңы да, шатқалы да орасан» Шәмші адамзатқа теңдессіз сарқылмас рухани қазына қалдырды. Енді Алланың осы сыйын келешек ұрпаққа аманаттау – қазіргі ұрпақтың міндеті мен парызы. Оның бір жолы – мемлекеттік негізде Шәмші Қалдаяқовтың сазды-мемориалдық музейін ашу. Бұл – мемлекеттің, Үкіметтің, нақтылай айтқанда, Мәдениет және ақпарат министрлігінің құзырындағы іс. Осы салада біз белгілі мемлекет, қоғам қайраткері, этнограф ғалым, музейтанушы Өзбекәлі Жәнібеков айтқандай, жолайрықта тұрмыз. Олай дейтініміз, кеңестік кезеңде де, Тұңғыш Президентіміз Нұрсұлтан Назарбаевтың тікелей пәрменімен қабылданған «Мәдени мұра» мемлекеттік бағдарламасының арғы-бергі аясында да Шәмшінің де мұрасы жинақталып зерделенді, жеке басы мен шығармашылығына көптеген адамдардың шапағаты тиді. Мәселен, кезінде Шәмшінің жай-күйін Нұрғиса Тілендиевтен сұрап-білген Дінмұхамед Ахметұлы Қонаев оған үш бөлмелі пәтер бергізсе, Жәнібеков әр облысқа телефон соғып, Шәмшінің елмен жүздесуіне барынша жағдай жасап, шығармаларының жинақталып, Қазақ радиосының қорына жазылып алынуына, әндер жинағының шығуына, насихатталуына көп көмек көрсетті. Кейін оның жерлестері – отырарлықтар Қазақстанның халық ақыны Әселхан Қалыбекованың ұсынысымен Үкімет тарапынан оған ресми көңіл бөлінуін, қамқорлық көрсетілуін өтініп, Елбасына хат жолдаған.
Осыдан кейін журналист Асхан Майлыбаева Шәмші ағасы туралы естелік-эссе жазып, сазгердің мерейтой фестивалі туралы тамаша ой-пікір айтты. Онда автор: «Шәмші десе, оның мерейтойын тек туған жері ғана өткізуге тиіс деген дүбәра ой қалыптасып қалған секілді. Жайшылықта Қалдаяқовты халықтың Қалдаяқовы деп көлгірситіндер оның рухын көтеруге келгенде көлеңкеде қалып қояды. Олай емес, ұлы сазгердің ұлан-асыр тойы, фестивалі республикалық деңгейде, халықаралық, кәсіби деңгейде өтуі керек», деп қадап айтқан.
1992 жылы Шымкент қаласының сол кездегі әкімі Амалбек Тшановтың ұйымдастыруымен өткен тұңғыш Шәмші Қалдаяқов атындағы «Менің Қазақстаным» халықаралық ән байқауы 2010 жылдан бастап сенатор Қуаныш Айтаханов пен қазіргі Мәдениет және ақпарат министрі Дархан Мыңбайдың ықпалымен Астана қаласында тұрақты өтетін болды. Сазгердің «Менің Қазақстаным» әні Н.Ә.Назарбаевтың ел Президенті ретінде Парламентке арнаулы ұсыныс жасауымен 2006 жылғы 7 қаңтардан бастап мемлекеттік әнұранға айналды. Оңтүстік Қазақстан облысының әкімі Асқар Мырзахметовтің, әкімнің орынбасары Әли Бектаевтың, мәдениет басқармасының бастығы Күлия Айдарбекованың ұсынысымен облыс музейлерінің экспозицияларында Шәмшіге арналған бөлім ашылып, талай іс-шаралар өткізіліп, өнері мерзімді баспасөзде, телехабарларда, әдебиеттерде насихатталып келеді. Серік Үмбетовтің қолдауымен қаламгер Көпен Әмірбек «Шәмші» атты кітап шығарды. Композитор Қалдыбек Құрманәлі 1992 жылдан бастап Шәмші әндерінің кешін өткізіп, 2008 жылдан ғылыми-танымдық «Шәмші» журналын шығарып келеді. Жалпы, Шәмшінің композиторлық құдіретін тұңғыш танып, шығармашылығын жоғары бағалаған ұлы жазушы Мұхтар Әуезовтен («Аңыз адам») бастау алатын шәмшітану ғылымын қалыптастыруда мемлекет, қоғам қайраткерлері мен облыс, аудан әкімдері, Парламент депутаттары, ғылым мен мәдениет қайраткерлері, ақын-жазушылар, журналистер атсалысты және атсалысуда.
Қазақстан музейлерінің саласында Шәмші мен әкесі Қалдаяқ ұстаға қатысты жәдігерлерді алғаш ғылыми негізде жүйелі жинастырып зерттеп, зерделеп, ғылыми сипаттамасын жазып, музей қорында сақтап, экспозициялаған Отырар мемлекеттік археологиялық қорық-музейінің негізін қалаған Қазақстан Республикасына еңбек сіңірген қызметкері Асантай Әлімов еді. Асекең ХХ ғасырдың 60-70-жылдары өз оқушыларымен тау-тасты, елді мекенді аралап жинаған мыңдаған жәдігерлерінің қатарында Қалдаяқ ұстаның металды, ағашты өңдейтін құрал-саймандары, басқа да тұрмыстық заттары, құжаттары, фотосуреттері, қолжазбалары болған. Шәмшіге қатысты дүниелерді өнер иелерінің отбасыларынан, ел ішінен тауып, музейге жинақтаған. Кейін Қазақстанның халық ақыны Әселхан Қалыбекова бас болып музей қызметкерлері Асантай ағасының жұмысын әрі қарай жалғастырды.
Біз Қалдаяқтан қалған жәдігерлерді іздестіру, жинастыру жұмыстарын өткен ғасырдың 80-жылдарынан бастадық. Ал негізінен бұл жұмыс сол кезде қоғамдық негізде жұмыс істеп тұрған қазіргі «Руханият – Әбу Нәсір әл-Фараби мұражайы» МКҚК-на Шәмші Қалдаяқовтың келуінен бастау алған. Бұл туралы біз «Қалдаяқ ұста – Шәмшінің әкесі» атты альбом-кітапшамызда былай деп жазыппыз:
«Бірде, 1990 жылдың маусымында музейге Шәмші Қалдаяқов келді. Қасында досы, жазушы-драматург Оразбек Бодықов бар. Оларды ауданға Шәмші ағамыздың 60 жылдық мерейтойын өткізуге байланысты іс-шаралар жайын ақылдасуға аупарткомның бірінші хатшысы М.Шәкенов пен ауатком төрағасы Қ.Сыздықов арнайы шақыртыпты. Біз ол кезде Оңтүстік Қазақстан кешенді археологиялық экспедициясының Шәуілдірдегі базасынан әдебиетші Әдіһам Шілтерханов арқылы экспедиция бастығы Кемел Ақышевтан бір зертханалық залды, бірнеше бөлмелерді сұрап, қоғамдық негізде Отырар руханият – Әбу Нәсір әл-Фараби музей-кітапханасын ұйымдастырып жатқан болатынбыз.
Жұмыс жоспарымыздағы күнтізбе бойынша Шәмші 1990 жылдың 17 тамызында 60 жасқа толатын еді. Осы мерейтойға орай музейде көрме ашқан едік. Шәмші музей экспозициясын аралап, сол көрменің тұсына келгенде менен темекі тартуға рұқсат сұрап, қалтасынан мүштігін алды. Ол темекісін тартып болып, мүштігін бет орамалына орап қалтасына қайта салып жатқанда мен: «Шәке, мына мүштігіңізді музейге қалдырыңызшы, экспонат болсын, Сталин мен Черчилльдің қорқорындай екен», дедім. Шәкең күліп: «О, Әбеке, бұл менің шер тарқатар құралым ғой, мүштігімнен айырылсам, темекі тарта алмай қаламын», деді. Осы кезде Оразбек: «Шәке, темекіңді қоятын кезің келді-ау деймін. Бер мүштігіңді Абдуллаға, мына көрмеңе – музейге қойсын. Сен темекіні қой», деді. Сонда Шәмші ағамыз үн – түнсіз мүштігін маған беріп тұрып: «Абдулла, мүштігім саған аманат, темекі қою маған аманат», деді! Шәмші кетерінде: «Әбеке, музейлеріңіз Әбу Нәсір әл-Фараби бабамыздың атында болса, болашағы зор екен. Менің 60 жылдығыма, маған арнаған тұңғыш мына көрмелеріңіз үшін үлкен рахмет. Бірақ менің әндерімді ел Шәмшінің әні деп, ал атымды ұмытса, халықтың әні деп шырқай жүрер. Әкем Қалдаяқ дүкен ұстаған үлкен ұста еді. Менің жүрісім болса мынау, әйтеуір басына сағана тұрғызғаным ғана болмаса, сол жарықтықтың қолөнері көмескіленіп бара жатқаны жаныма қатты батады, саған музей қызметкері ретінде айтар өтінішім – әкемнің мұрасына бас-көз бола жүр. Сарысудан Сарыкөлге дейінгі қалың елде қалды ғой», деген еді.
Бұл өтінішін отырарлық досы Келдебек Жабатаев ағайға да айтқан көрінеді. Келдекеңнің айтуынша, 1988 жылы Шәмші Оразбек Бодықов екеуі Келдебек ағайдың үйіне келіп қонады. Таңертең шай алдында таза ауада серуендеп жүріп Шәмші: «Келдебек, шалдың дүкені қайда? Сондағы әкемнің дүниелерін құртпашы, оны іздейтіндер кейін табылады», депті.
Біз қанша қат-қабат музей ісімен жүрсек те, Шәмші ағаның осы аманатын ешқашан ұмытқан емеспіз. Оның үстіне, Отырар мемлекеттік археологиялық-этнографиялық қорық-музейінің негізін қалаушы, ұлы ұстазым Асантай Әлімов ағамыз Қалдаяқтан қалған жәдігерлерді бөле-жара жинастыруды үнемі еске салып, өзінің Қалдаяқтың үйінен үлкен төсті музейге алғандығын айтатын. Шәмші ағаның сол аманатымен жүріп, Қалдаяқ ұста жасаған бір құралды (шапа шотты) 1990 жылдың желтоқсанында Қаратау мен Сыр өңіріне белгілі ақын Айтбай Белгібайұлының зайыбы Қаншайым әжейден алдық. Әжейдің айтуынша, 1946 жылы Қалдаяқ ұста бір мал сойып, ішінде Айтбай да бар – барлығы бес молданы шақырып: «Арқадан ауған Жағалбайлы едім, өнеріммен Сыр еліне сіңісіп кеттім. Мына бір шот пен пышақты сіздерге сыйлаймын. Қасиетті ислам жолындағы ілімді кісілерсіздер ғой, маған Құраннан тілектес болып жүрерсіздер», деген екен.
Шаппа шот (шапашот) – ағашқа түскіштігі жағынан, еңкіштігі, қайқылығы, салмағы, суы мүмкіндігінше дәлдікпен ескеріліп, классикалық үлгіде жасалынған құрал.
Дәл осындай үлгідегі шаппа шот (шапашот) пен дәнүккішін, қолтөсін, шалғы орақтың мойын темірін, балта шотын Келдебек ағайдан алдық. Келдекең қария 1947-1948 жылдары жазғы демалысында «Қызыл Түркістан» колхозында Қалдаяқ ұстаның балғашысы болған екен. Бейнетқор, сезімтал, тіл алғыш, еп-септі баланың еңбегіне риза болған атақты ұста оған шәкіртім бол деп керекті құрал-саймандарын жасап берген. Әдетте зауытта жасалған шалғы орақтың мойыны қалың, шөпте тез сынатын осал болған. Сондықтан Қалдаяқ ұста шалғы ораққа беріктік үшін мойын темір салған.
Қалдаяқтың Арыс қаласында, Шәмші ауылында тұратын ұрпақтарынан бірталай заттарын алдық. Мәселен, Қалдаяқтың Арыс қаласында тұратын келіні Сағдия Гафанқызы Минуллинадан (Қалдаяқтың Қадір деген баласының әйелі) ши барқыт шапанын, ағаш балғасын, Шәмші ауылында тұратын кенже баласы Бақыттан қобдишасын, үлкен қол шарығын, білік төсін, зергерлік әшекей заттарын, немере келіні Аманкүл Мәуленқызынан қырғыш пен қант шаққышын алдық. Қалдаяқтың көршісі болған Пернекүл Бақжанова апай қысқашын тапсырды.
Шәуілдір қыстағында тұратын ерлі-зайыпты ардагер ұстаздар, Шәмшінің досы Әлшериев Құрманбай ағай мен Мұғжанова Алма апай отбасында қасиеттеп, көздерінің қарашығындай сақтап келген Қалдаяқ дүкенінің терезесіне қойылған айрықша темір торын, кезінде жасатып алған кепсерін, әкесі Смайылов Әлшеріге арнап жасап берген ұстарасын қимастықтан берді. Ал мәдениет жанашыры, Шәмшінің рухани досы, еңбек ардагері Сағындық Қыдыров ұлы сазгердің қол табы қалған мандолинасын тапсырды.
Қалдаяқ Домбаев ақын, дінтанушы Шәдітөре Жаһангерұлының жақын шәкірттерінің бірі еді. Оның зайыбы Жұмаш әжей мен кенже баласы Бақыт Қалдаяқұлы тапсырған араб әрпімен жазылған діни кітаптарға қарағанда Қалдаяқ хақ жолындағы, өз бетінше көп оқыған өте діни сауатты кісі болған. Бұл оның кеңестік пролетарлық атеизмге байқатпаған, замандастары білмеген жан дүниесі.
Біз, музей қызметкерлері, Шәмшінің аманатымен оның аяулы әкесі Қалдаяқ ұстаның құндылықтарын мүмкін болғанша жинастырып сақтадық, қайта жаңғырттық, экспозицияладық, ғылыми сипаттамасын жазып құжаттадық. Ғылыми баспа жұмыстары бойынша жоғарыда аталған «Қалдаяқ ұста – Шәмшінің әкесі» атты альбом-кітапшаны шығардық. Ұлы композитор өмірден озған соң бұл аманат оған да қатысты болып қалды. Сондықтан музейдің сан-салалы жұмыстарының қат-қабатында Шәмшіге қатысты экспонаттарды да ыждағаттылықпен іздестірдік. Сол құндылықтардың бір парасы Шәмшінің соңғы әні «Отырардағы той» әніне қатысты. Қазіргі Шәуілдір қыстағындағы Шәмші Қалдаяқов атындағы саз мектебінің бұрынғы директоры, марқұм Жақсылық Әбуовтің «Отырардағы рухани мәдениет музейіне Шәмші Қалдаяқовтың өз қолымен жазған «Отырардағы той» әнінің нота текстін сыйлаймын. Мектеп директоры Ж.Әбу, 25.07.1997 ж.» деген нұсқадағы қолхат таңбасымен тапсырған «Отырардағы той» әнінің нота парақшасы. Шәмшінің: «Ана туралы ән шығарған едім. Әл-Фараби елінің жігітімін ғой, әке туралы, жерлестерім туралы ән шығарамын, қыздарым, інілерім. Я родился в Шаульдере. Не забуду Шаульдер. Ш.Калдаяқов» деген қолтаңба жазуы бар фотосуреттері, Шәмшінің үлкен қарындасы таяуда өмірден озған аяулы Раушан апамыздың «Ағам Шәмші Қалдаяқовтың мандолинасын Отырардағы «Руханият – Әбу Нәсір әл-Фараби мұражайына» сыйлаймын… Абитова (Қалдаяқова) Раушан. 28.08. 2010 ж.» деп қол қойған қолхатпен тапсырған мандолині, пальтосы, парсыша кітабы, інісі Қадыр Қалдаяқовтың «1988 жылы ағам Шәмші сыйға тартқан осы «Унисон-3» баянын Отырардағы «Руханият – Әбу Нәсір әл-Фараби мұражайына» – әкем Қалдаяқ пен ағам Шәмшінің музейіне сыйлаймын. Қалдаяқтың баласы Қадыр. Шымкент. 2011 жыл, 28 тамыз» – деген қолхатпен тапсырған баяны, т.б. Шәмшінің өзі, отбасы тұтынған бұйымдары, шығармашылығы туралы әдебиеттер, құжаттар, фотоқұжаттар…
Шәмшіге қатысты құндылықтардың дені Отырар ауданының орталығы Шәуілдір кентіндегі Шәмші Қалдаяқов атындағы орта мектепте ашылған сазгердің музейінде сақтаулы. Кезінде бұл жәдігерлерді мектептің сол кездегі директоры, қазіргі Отырар мемлекеттік археологиялық қорық-музейінің директоры Пердехан Жаппарқұловтың тікелей ұйымдастыруымен Оңтүстік астанамыз Алматыға дейін барып тірнектеп жинап, Қазақстан мектептерінде алғаш Шәмші музейін ашқан, мектептің мұғалимасы, білікті ұстаз Қыдырова Күләш қарындасымыз болатын. Музей қорында Шәмшінің әндер жинағы түсірілген әдебиеттер, күйтабақтар, үнтаспалар, сазгердің қолжазба қойын дәптерлері, пианиносы, фотосуреттері, бөркі, т.б. киімдері басқа да жәдігерлері бар.
Бұл Оңтүстік Қазақстан облыстық өлкетану музейіне, сондай-ақ республикамыздың басқа да музейлеріне, мектеп музейлеріне қатысты жәйт. Ал жеке кісілердің қолында сақталғаны қаншама… Мәселен, Төлеген Айбергеновтің қызы Салтанат Айбергенованың үйінде Шәмшінің саусағының табы қалған пианиносы («Аңыз адам»), дүнген ауылының тұрғыны Илья Гашизовта шахматы («Аңыз адам»), Сарыағаш қаласының тұрғыны Арслан Асановтың үйінде орындығы («Аңыз адам»), Қабылбай қолында шаппасы («Аңыз адам»), сыйлас інісі Қасымбек Нұрбековтің қалтасында тағы бір мүштігі («Аңыз адам»), Кендебай Ахатта галстугі («Аңыз адам»), Нұрғали Нүсіпжановта «Талдықорған – әнім менің» әнінің нота парақшалары («Аңыз адам»), достарының зайыбы Рахима Мамбаталиева мен Мағрипа Ералиевада көйлегі мен қайшысы («Аңыз адам»), т.б. сақтаулы. Жоғарыда аталған мемлекет, қоғам және ғылым, мәдениет қайраткерлеріне, мемлекеттік, қоғамдық ұйымдарға, жеке азаматтарға, музей ұжымдарына Шәмші мұрасын ата мұрам деп сақтағаны үшін шексіз алғыс айта отырып, ұлы сазгердің тарыдай шашылған осы дүниелерін ғылыми негізде жинастырып, оның мемориалдық музейін ашу мемлекеттік маңызы бар іс екенін еске саламыз.
Өйткені, музей ісінде көрнекті оқиғаны немесе адамды мемориалдық музейлерсіз есте қалдыру мүмкін емес. Мәселен, Жидебайдағы Абайдың музей-қыстауы, Алматы қаласындағы М.Әуезовтің, Астана қаласындағы С.Сейфуллиннің, Қарасаздағы М.Мақатаевтың әдеби-мемориалдық музейлері осы мақсатта құрылған. Ал ұлы сазгер, мемлекеттік Әнұранның авторы Шәмші Қалдаяқовтың шығармашылық өмірін баяндайтын толық экспозициясы бар мемориалдық музей Қазақстанда жоқ. Егер Шәмші музейі ашылса, онда композитордың жәдігерлерін сақтайтын, қайта жаңғыртатын, зерттейтін, қор сақтау, қайта жаңғырту, өнертану – шәмшітану бөлімдері ашылып, шығармаларын насихаттайтын фольклорлық-этнографиялық сазды ансамбль құрылар еді. Тіпті, сенатор Қуаныш Айтаханов пен Мәдениет және ақпарат министрі Дархан Мыңбайдың ықпалымен жыл сайын өтіп жүрген халықаралық Шәмші ән байқауын осы музейдің ғылыми-көпшілік, ғылыми-ағарту іс-шаралары аясында өткізуге болады. Турасын айтқанда, Шәмшідей қайталанбас ғажайып дара таланттың рухани құндылықтарына ие болар мемлекеттік бір мәдени ағарту мекеме керек. Ол мәдени ошақ – Шәмшінің сазды-мемориалдық музейі. Бұл ғылыми, мәдени құрылымсыз Шәмшінің мәдени мұрасын келешек ұрпаққа толықтай сақтап жеткізу мүмкін емес. Жалпы, Шәмші Қалдаяқовқа көрермендерге қызықты экспозиция мен көрмелерді ғана көрсете алатын тұрғыда ғана емес, қабатында кездесулер мен мәдени форумдар және білім беретін бағдарламалар өтетін, функционалдық және техникалық жағынан бүгінгі музейлік мекемелерге қойылатын талаптарға сай музей ашылуы керек.
Музейдің орны қай жер дегенде, әрине, ғылым мен мәдениет орталығы Астана қаласын, Шәмшінің шығармашылық өмірі өткен Оңтүстік астанамыз Алматыны немесе туған өлкесі Шымкентті, туған жері, туризмнің орталығы Отырарды атауға болады. Осы орайда Шәмшінің Таразда да ізі қалғанын ұмытпауымыз керек.
Композитор Шәмші Қалдаяқовтың түркі әлеміндегі рухани ұлылығы – ұлы түркі империясын құрған ата-бабаларымыздың жан-дүние болмысымызда қалған ән әуендерін тауып, оны жан тербетер ғажайып әуезбен халық жүрегіне жеткізе білуінде. Осы орайда ежелгі түркі қағанатының қарашаңырағының иесі, мұрагері ретінде біз Шәмші музейін мемлекеттік мәртебесімен ашуға міндеттіміз.
Абдулла ЖҰМАШЕВ, «Руханият – Әбу Нәсір әл-Фараби мұражайы» МКҚК директоры, мәдениет қайраткері.
Оңтүстік Қазақстан облысы, Отырар ауданы.
Суреттерде: Шәуілдір кентінің мұражайларындағы Ш.Қалдаяқовқа арналған бөлімдер.