Тамырластық тіні
Астана қаласының Қазіргі заманғы өнер мұражайында Қазақстан-Венгрия дипломатиялық байланыстарының 20 жылдығына орайластырылған шара өтті. Шара аясында Марат Тұқсайытовтың, Жұмахмет Мырзахметовтің, Қабдыл-Ғалым Қаржасовтың көрмесі ұйымдастырылды. Венгрияның Қазақстандағы Елшілігі ұйытқы болған бұл көрмеге Венгрия Республикасының еліміздегі Төтенше және өкілетті елшісі Имре Ласлоцки, тәуелсіз Қазақстанның тұңғыш Сыртқы істер министрі, Қазақстанның Венгриядағы бұрынғы елшісі Төлеутай Сүлейменов, мұражайдың директоры Нелли Шиврина қатысты.
Астана қаласының Қазіргі заманғы өнер мұражайында Қазақстан-Венгрия дипломатиялық байланыстарының 20 жылдығына орайластырылған шара өтті. Шара аясында Марат Тұқсайытовтың, Жұмахмет Мырзахметовтің, Қабдыл-Ғалым Қаржасовтың көрмесі ұйымдастырылды. Венгрияның Қазақстандағы Елшілігі ұйытқы болған бұл көрмеге Венгрия Республикасының еліміздегі Төтенше және өкілетті елшісі Имре Ласлоцки, тәуелсіз Қазақстанның тұңғыш Сыртқы істер министрі, Қазақстанның Венгриядағы бұрынғы елшісі Төлеутай Сүлейменов, мұражайдың директоры Нелли Шиврина қатысты.
Көрме аясында сөз алған Венгрияның Қазақстандағы Төтенше және өкілетті елшісі Имре Ласлоцки екі елді жақындастыратын тарихи тамырластыққа тоқтала келе, бүгінде Венгрияның Қазақстанды аймақтағы тұрақты мемлекет деп танитынын атап өтті. «Біздің халықтарымызды, ең біріншіден, қыпшақтар байланыстырады. ХІІІ ғасырда қыпшақ тайпаларының бір бөлігі Қазақстаннан Венгрияға келіп, Еуропаның қақ ортасын мекендегені белгілі. Яғни, Венгрияда қыпшақтардың, ал Қазақстанда мадиярлардың ұрпақтары тұрады. Қазіргі таңда Венгрияда қыпшақтардың 200 мыңға жуық ұрпағы бар. Олар ежелгі қазақ руы – қыпшақтармен мәдени және этностық тұрғыдан жақын екендіктерін сезінеді. Бұл Қазақстан-Венгрия арасындағы тарихи тамырластығымыз уақыт өте келе тіпті де тереңдей түсетінін айғақтайды», деген елші ғасырлар бойы қалыптасқан тарихи және мәдени байланыстарды үзбей дамыту қос мемлекет арасындағы дипломатияның ең басым міндеті мен межесі екенін тілге тиек етті. Тәуелсіз Қазақстанның тұңғыш Сыртқы істер министрі Төлеутай Сүлейменов те әңгіме ауанын екі елді біріктіретін туыстық, тарихи байланыстарға, Венгрия мен Қазақстанның дипломатиялық әріптестігіне бұрды. «Екі халықтың сындарлы саяси үнқатысуының арқасында екіжақты ынтымақтастық жоғары деңгейге көтерілді», деді Т.Сүлейменов.
Ал көрмені ұйымдастыру идеясын ұсынған өнертанушы Мария Жұмағұлова өз ойын: «Венгр халқы мен қазақ халқының арасында туысқандық байланыс бар. Сол себепті, біз бүгін үш қыпшақ-суретшінің көрмесін ұйымдастырдық. Сол арқылы қазақ суретшілерінің өнерін танытуды, олардың әрқайсысының өзіне тән ерекшеліктерін көрсетуді мақсат тұттық», деп түйіндеді.
Көрмеге туындылары қойылған қылқалам шеберлерінің ізденіс-иірімі, суретшілік мәнері әр түрлі. Мәселен, Қазақстанның еңбек сіңірген қайраткері Марат Тұқсайытов – фигуралық композициялардың, пейзаж бен портреттің, натюрморттың шебері ретінде танылған суретші-монументалист. Ол Қазіргі заманғы өнер мұражайына «Басталуы және соңы», «Ескі үйдің жанында», «Месхетинка», «Ауыл әуені», «Күн батар алдында», «Ошаған», «Жазғы күн» сынды жеті картинасын сыйға тартқан екен. Бүгінде оның шығармашылық жұмыстары Германия, Венгрия, Ресей, АҚШ, Норвегияның жеке коллекцияларында сақталыпты.
Алматы қаласынан келген Жұмахмет Мырзахметов Отанға сүйіспеншілігін, туған өлке табиғатының сан алуандығы мен сұлулығын кескіндемелік туындылары арқылы жеткізуді мақсат тұтатын танымал суретшілердің қатарынан. Бұл орайда, Қазақстан Суретшілер одағының мүшесі, өнертанушы Гүлнәр Жұбаниязованың: «Ол өзінің шығармаларындағы нәзік табиғат әуендері арқылы туған жерінің тыныс-тіршілігін дәлме-дәл жеткізеді, осылай туған халқының жай-күй сезімдерін, оның тарихы мен бүгінін жырлайды. Суретші табиғатқа сәйкес келетін және туындыларына жаңа өң беретін түс-бояуларды пайдалануда асқан шеберлік танытады. Оның барлық жұмыстарына еркін ойлау мәнері мен қырағы бақылаулық қасиеттері тән», деген пікірі суретші шығармашылығына оның шын шеберлігін мойындау арқылы берілген баға болса керек.
Ал Павлодар өңірінен келген Қабдыл-Ғалым Қаржасовтың туындыларынан көшпелі мәдениеттің тарихы мен ұлттық мәдени дәстүрлердің қазіргі заманғы жаңа үні сезілетіндей көрінді. «Менің көрмеге қойылған суреттерімнің негізгі өзегі – қазақы, дәстүрлі тақырыптар. Бұл «Парыз», «Сонар», «Сарын», «Толғау», «Күй», «Әсем әуен», «Барып қайт» сынды шығармаларымнан көрінеді. Осындай туындыларым арқылы өзіміздің тарихымыздан, өмір салтымыздан сыр шерткім келді», дейді Қабдыл-Ғалым Қаржасов бізбен әңгімесінде.
Қазіргі заманғы өнер мұражайындағы суретшілер көрмесінде үш қылқалам шеберінің жеке жинақтарынан және мұражай қорынан 30-дан астам кескіндемелік туынды қойылыпты.
Ләйла ЕДІЛҚЫЗЫ.
Суреттерді түсірген Орынбай БАЛМҰРАТ.