Панкратова
Қазақ тарихшыларының ұстазы және қамқоршысы
Кейде кешегі кеңестік дәуірдегі өмірімізге қатқылдау қарайтынымыз бар. Күнгейінен гөрі көлеңке жағы көптеу болғандай көреміз. Сөйтсе де, шындыққа жүгінсек, қол жеткен жетістіктеріміз де айтарлықтай болды. Халқымыздың білім дәрежесі үлкен биікке көтерілді, ғылым дамыды, мәдени өміріміздегі табыстарымыз да жұртқа белгілі. Оларды елемесек, халқымызды басына түскен қиындықтың көлеңкесінде қалдырсақ, ол шындыққа қиянат болар еді.
Қазақ тарихшыларының ұстазы және қамқоршысы
Кейде кешегі кеңестік дәуірдегі өмірімізге қатқылдау қарайтынымыз бар. Күнгейінен гөрі көлеңке жағы көптеу болғандай көреміз. Сөйтсе де, шындыққа жүгінсек, қол жеткен жетістіктеріміз де айтарлықтай болды. Халқымыздың білім дәрежесі үлкен биікке көтерілді, ғылым дамыды, мәдени өміріміздегі табыстарымыз да жұртқа белгілі. Оларды елемесек, халқымызды басына түскен қиындықтың көлеңкесінде қалдырсақ, ол шындыққа қиянат болар еді.
Мен мұны өзім тарихшы болғандықтан да тарих ғылымына қатыстыра айтар едім. Сол кеңестік дәуірде тарих ғылымына үлкен қиянат жасалды, тарихымыз бұрмаланды. Соған қарамай, республикамызда бұл ғылым дамыды, қалыптасты, оның кадрлары өсіп, жетілді. Осы ретте біздер, қазақ тарихшылары, үлкен ғалым және саяси қайраткер КСРО Ғылым академиясының академигі Анна Михайловна Панкратоваға айрықша құрмет көрсетеміз, оның аруағы алдында өздерімізді борышты санаймыз. Осынау ғажайып адам біздің аға буын тарихшыларымызға ұстаз болып қана қойған жоқ, көп қамқорлық та жасаған. Биыл оның туғанына 115 жыл толды, соған орай Алматыда ғылыми-практикалық конференция өтті. Мұны үлкен ұстазға деген құрметтің көрінісі десек ләзім.
Анна Михайловна Панкратова өзінің ұстазы, Қызыл профессура институтының ректоры М.Н.Покровскиймен бірге дүниеге жаңа келген КСРО дейтін елде, сондай-ақ Қазақстанда тарих ғылымының дамуына айрықша үлес қосты. Олар кеңестік тарихшылардың алғашқы легінің басында болып, енді қалыптаса бастаған одақтық республикаларда тарихшы кадрларды даярлауға атсалысты. Айта кететін бір жай: кеңестік тарихшылардың алғашқы легі кәсіптік даярлықтан өтпеген, негізінен партия-кеңес қызметкерлерінен шыққандар еді. Олардың өзі репрессияға ұшырап, тып-типыл етілді. Қазақстанда олардың қатарында С.Асфендияров, Т.Рысқұлов, Ғ.Тоғжанов, П.Галузо және басқалар болды. 30-жылдардың аяғында олардың орны бос қалды.
Сөйтіп, осындай тарихшы ғалымдардың үлкен зәрулігі туған шақта Қазақстанға А.М.Панкратова, М.П.Вяткин, Н.М.Дружинин және басқа кеңес тарихшыларының үлкен көмегі тиді. Солардың қамқорлығы арқасында тарих ғылымына қазақ жастары келді. Олар Мәскеуде, Воронежде, Ташкентте, Алматыда оқып, елдің ғылыми орталықтарында шыңдалды. Бұлар Қазақстан тарихшыларының екінші ұрпағын құрады. Олардың қатарында А.Нүсіпбеков, Б.Сүлейменов, Е.Бекмаханов, Г.Дахшлейгер, тағы басқалар болды. Өз кезегінде олар тарихшылардың үшінші буынын ҚР ҒА академиктері Р.Сүлейменов, М.Қозыбаев, К.Нұрпейісовті, тарих ғылымдарының докторлары Т.Балақаев, С.Нұрмұхамедов, Х.Арғынбаев, М.Мұқанов сияқты мамандарды тәрбиелеп шығарды деп айта аламыз. Еліміз тәуелсіздік алғаннан кейін тарихымызды түгендеуге белсене атсалысып жүрген қазіргі тарихшыларымыз тарих ғылымының докторлары М.Әбусейітова, Х.Әбжанов, Қ.Қаражанов, М.Қойгелдиев, Т.Омарбеков, Қ.Атабаев, А.Алтаев, Б.Аяған, С.Мәжитов, А.Қапаева, А.Құдайбергенова және басқалар өз еңбектерін аға ұрпақтың мағыналы жолының жалғасы санайды. Сабақтастық осылай жалғаса бермек. Қашанда оның бастауы ұмытылмайды.
Анна Михайловна Панкратова кеңестік тарих ғылымының негізін қалаушылардың бірі болды. Ол өз заманының адамы еді, тарихшы-марксист ұстанымынан айныған емес. Тарих алдында барынша адал қызмет етті. 1917 жылғы Ақпан және Қазан революцияларына белсене қатысты. 1919 жылдан СОКП мүшесі. Партиялық жұмыстан Қызыл профессура институтына жіберілді. Оқуды бітірген соң, елдің негізгі қалаларында оқытушылық және ғылыми жұмыстарды қатар алып жүрді. 1939 жылдан КСРО Ғылым академиясының Тарих институтына ауысып, сол жылы ҒА корреспондент-мүшесі, ал 1953 жылдан академигі болды. СОКП Орталық Комитетіне мүше, Жоғарғы Кеңестің депутаты болып сайланды.
Бұған мән беріп отырғанымыз, А.М. Панкратова коммунистік идеяны жүрегімен қабылдаған адам, терең интернационалистік бағытты ұстанды. Әсіресе, пролетарлық интернационализмге айрықша мән беріп, өзінің ғылыми жұмыстарының негізгі арқауларының біріне айналдырды. Оның халықаралық беделі жоғары еді. Біршама шетелдік конгрестерге, конференцияларға қатысып, баяндамалар жасады, біраз шетел ғылым академияларының құрметті академигі болып та сайланды.
Әрине, біз үшін Анна Михайловнаның республикамызға қатысты еңбегі мен қызметі маңызды. Ол Қазақстанның тарих ғылымының қалыптасуына белсене араласты. Ең алдымен, еліміз үшін жоғары білікті тарихшылар дайындауға, екіншіден, Қазақстан тарихының ауқымды да өзекті проблемаларын зерттеуге айрықша үлес қосты. Соның негізінде «Қазақ ССР тарихы ерте заманнан осы күнге дейін» деп аталатын екі қорытындылаушы еңбек жасалды. Олар 1943 жылы А.М.Панкратова мен М.Әбдіхалықовтың және 1949 жылы А.М.Панкратова мен І.Омаровтың (екі томдық) редакциялауымен жарық көрді.
Ал білікті тарихшы кадрларды даярлауға келсек, сонау 30-жылдардың басында-ақ ол Санжар Асфендияровқа көп кеңестер берсе, Ұлы Отан соғысы жылдарында, одан кейін де Е.Бекмахановқа, С.Покровскийге, Ә.Тұрсынбаевқа жетекшілік етіп, көмектесіп отырды. ҚазССР ҒА Ш.Уәлиханов атындағы Тарих, археология және этнография институтымен, әсіресе, оның басшылығымен – біздің ұстаздарымыз А.Нүсіпбеков және Г.Дахшлейгермен тығыз байланыста болды. Дахшлейгер оны «Қазақстан тарихшыларының үлкен досы» деуі тегін емес. Ал белгілі қазақ тарихшысы Е.Бекмахановқа жасаған жақсылығын халық біледі, Ерекең Анна Михайловнаны өзінің екінші анасы санаған.
Жоғарыда аталған біздің еліміздің ежелгі дәуірден бүгінгі күнге дейінгі тарихына байланысты қорытындылаушы еңбектің, әсіресе, 1943 жылы жарияланған басылымының Қазақстанның тарих ғылымын дамытудағы орны ерекше. Осынау іргелі де қорытындылаушы кітаптың маңыздылығы – ол Қазақстан тарихы жөніндегі алғашқы ғылыми-зерттеулер болды. Және отандық тарихымыздың ең бір көкейкесті проблемаларын терең зерттеуге жол ашты. Өйткені, 1943 жылғы басылымның кіріспесінде көрсетілген Қазақстан тарихын кезеңдерге бөлу, деректемелерді сипаттау және қазақ халқының өміріндегі ең ірі оқиғалардың зерттелу деңгейін айқындау еліміз тарих ғылымының одан әрі дамуында айрықша рөл атқарды. Сол алғашқы томдағы ең ауқымды дәуірлік үш кезең бойынша үш бөлімнен тұратын («Тәуелсіздік кезеңіндегі Қазақстан халықтары», «Қазақстан – отарлау» және «Қазақстан – социалистік») құрылым кейіннен екі томдыққа және кеңестік кезеңдегі бес томдыққа, сондай-ақ, егемендік кезеңдегі бес томдыққа негіз болды. Біздіңше, 1943 жылғы және 1949 жылғы «Қазақстан тарихының» екі басылымы Ш.Уәлиханов атындағы Тарих және этнология институты қолға алған Қазақстанның ежелгі дәуірден бүгінге дейінгі тарихының он томдығын (20 кітап) дайындау кезінде де ескеріледі деп ойлаймыз.
Бұл еңбектердің даусыз құндылығы шыншылдығы, жан-жақтылығы, атап айтар едім, өзекті мәселелерді таптық тұрғыда көрсетумен ұштастырылған терең интернационализм. Өзекті мәселелер дегенде, сонау феодалдыққа дейінгі мемлекеттен Қазақ хандығы құрылғанға дейінгі қазақ мемлекеттігінің пайда болуы мен дамуы, қазақ халқының пайда болуы, қазақ халқының жоңғар басқыншылығына ғана емес, патшалы Ресей бодандығына да қарсы күресі, сондай-ақ, қазақтардың царизмнің отарлау саясатына қарсы ұлт-азаттық қозғалысы, Әбілқайырдың өлтірілуі, Сырым Датовтың, Қаратайдың, Исатай Таймановтың, Кенесары Қасымовтың, Жанқожа Нұрмұхамедовтің, Есет Көтібаровтың және басқалардың көтерілістері жан-жақты көрсетіледі, өз бағаларын алады.
Алғаш рет бұл еңбектерде ежелгі дәуірден 1940 жылға дейінгі қазақ мәдениеті туралы зерттеу қорытындыланған. Осы жөніндегі бөлімдерді М.Әуезов, С.Мұқанов, Ғ.Мүсірепов, Ә.Марғұлан, Б.Кенжебаев, Е.Ысмайылов сияқты Қазақстанның көрнекті қайраткерлері жазды.
Атап өтерлік бір жай, Қазақстанның Ресейге қосылу мәселесі және қазақтардың ұлт-азаттық қозғалыстары алғашқы басылымда (1943 жылғы) маркстік-лениндік таптық тұрғыда бағаланып, Ресейді өзінің Польша, Финляндия, Балтық жағалауы, Украина, Белоруссия, Кавказ, Орта Азия, Қазақстан, Сібір, Алтай сияқты шет аймақтарында орыстандыру саясатын жүргізген «халықтар түрмесі», «Еуропаның жандармы», әскери-феодалдық империалистік ел және отаршыл держава ретінде сипаттады. Содан да еңбекте қазақтардың Ресейдің отаршылдық қанауына қарсы, сондай-ақ Хиуа, Бұхара, Қоқан шапқыншылығына қарсы күресіне айрықша мән берілді.
А.М.Панкратова Қазақстан тарихы туралы осынау екі жүйелі еңбектің жауапты редакторларының бір болып қана қоймай, оны тікелей жазуға да белсене қатысты. Атап айтқанда, бірінші басылымдағы (1943 жылғы) бірінші орыс революциясы, Столыпин реакциясы және жаңа революциялық өрлеу кезеңіндегі Қазақстан туралы ХХ тараудың және екінші басылымдағы (1949 жылғы) осы тақырыпты қамтыған ХҮІІІ тараудың авторы болды.
Бірақ өкінішке қарай, сол кезеңде қалыптасқан күрделі де қайшылықты жағдайға байланысты бұл еліміздің шынайы тарихы туралы құнды еңбектердің бірінші де және екінші де (түзетілген және толықтырылған) басылымдары (1943 және 1949 жылдардағы) идеологиялық репрессияға ұшырады, айналымнан алынып тасталды, кітапханалардың құпия немесе сирек қорларында ғана қалды, ал авторлары мен жауапты редакторлары жазаланды, тіпті, қылмыстық қудалануға түсті.
Аяғы қасіретке соқтырған осынау жағдайдың сыры неде? Бұған толыққанды жауап беру үшін сөз болып отырған еңбектің қалай жазылғанына, сол тұстағы идеологиялық саясатқа біршама шолу жасауға тура келеді. Аталған еңбек Алматы қаласында дайындалды. КСРО ҒА Тарих институтының бір топ ғылыми қызметкерлері Институт директорының орынбасары А.М. Панкратованың басшылығымен, КСРО ҒА Қазақ филиалының Тарих, тіл және әдебиет институты және Маркс, Энгельс, Ленин институтының қазақ филиалы қызметкерлері дайындаған еді. Оның қалай жүзеге асқанын сол еңбекті әзірлеуге тікелей қатысқан адамдардың естеліктеріне қарап, толық қалпына келтіруге болатындай. Бұл жерде, әсіресе, академик Д.Дружинин естелігінің орны ерекше. Тарих институтының үлкен бір топ қызметкерлері 1941 жылдың қазанында Алматыға келеді. Мұнда эвакуациямен келгендер көп болғандықтан, оларды Жамбыл қаласына жібермекші екен, сонда А.М.Панкратова Қазақстан басшылары алдына мұнда келгендердің күшімен Қазақ ССР тарихы туралы ғылыми оқулық әзірлеу жөнінде мәселе қояды. Бұған дейін ондай ғылыми еңбек әзірлеуге ғылыми күштің жетімсіздігінен мүмкін болмапты. Сөйтіп, А.М. Панкратованың ұсынысы қабылданып, сырттан келген ғалымдар, сондай-ақ жас қазақ тарихшылары есебінен авторлар құрамы белгіленіп, жұмысқа кіріседі.
Барлық ұйымдастыру жұмыстары, басылымның жұмыс жоспарын жасау, авторларға тарауларды бөліп беру, негізгі ұстанымдарын тұжырымдау тікелей А.М.Панкратованың басшылығымен жүргізіледі. Рас, көп ұзамай оны қайта Мәскеуге шақырып алып кетеді де, бұл еңбекті дайындаушылар тобына басшылық жасау А.Кучкинге тапсырылады. Еңбек бір жылда дайындалады. Оны аяқтаған соң да авторлық ұжым арасында айтарлықтай айтыс-тартыс болады. Соның бәрін шешуге тағы да Анна Михайловнаның өзі араласады. Мәскеуден арнайы келіп, Қазақстан Компартиясы Орталық Комитетінің хатшысы М.Әбдіхалықов екеуі кітапты түпкілікті редакциялап шығады.
Қазақстан басшылары А.М.Панкратованың осынау еңбегін жоғары бағалады. Оған «Қазақ ССР ғылымының еңбегі сіңген қайраткері» атағы берілді. Арнайы банкетте үлкен ғылымға да, жалпы еңбекті дайындауға қатысқан барлық ғалымдарға да марапат сөздер көп айтылады. Ал ғылыми ортада «Қазақ ССР тарихы» КСРО құрамына кіретін республикалардың ішіндегі біреуінің түбегейлі әрі ғылыми негізделген тарихын жазудағы кеңес ғалымдарының сүбелі еңбегі ретінде қабылданады. Сөйтсе де, оның бұдан кейінгі жолы аса ауыр болды.
Оған басты себеп, сол Ұлы Отан соғысы жылдарында КСРО тарихына байланысты көзқарастың түбегейлі өзгеруі, орыстық-центристік бағыттың белең алуы еді. Бұл өзі 30-жылдарда-ақ басталған-тын. Сонда кеңестік идеологтар орыстық-центристік позицияға ойысып, орыс патшалары мен әскербасыларының бейнесін үгіт-насихат жұмысына пайдалануды күшейтті. 1937 жылы І Петрді, Александр Невскийді мадақтауды бастады. 1938 жылдан ұлттық мектептерде орыс тілін оқыту міндетке айналды. 1941 жылғы қазанда И.Сталин халық пен Қызыл Армияға қаратып, өткендегі ұлылардың рухы қолдасын дегенде, тек орыстардың қайраткерлерін ауызға алды. Суворов, Невский және Кутузовтың құрметіне ордендер белгіленді. Осылайша соғыс жылдарында, одан кейін де орыстық-центристік большевизм компартия идеологиялық жұмысының өзегіне айналды, ал орыс халқы басқа халықтардың ортасында ұлы халыққа айналды. Мұның өзі Ресей империясы мен Кеңес Одағының айырмашылығын өшірді десе де болғандай еді.
Орыс тарихындағы реакцияшыл тұлғалар дәріптеліп, отаршыл саясатты ұстанғандар ақталып жатты. Осынау орыстық-центристік бағытты сол кездегі белгілі де беделді тарихшы ғалымдар А.Ефимов. А.Яковлев, С.Бушуев ұстанып, белсенді жұмыс жүргізді. 1944 жылы-ақ А.Яковлев жалпы білім беретін мектептерге арналған КСРО тарихы бойынша оқулықтарды орыстың ұлыдержавалық шовинизм рухында жазылуын талап етті. Ол былай деді: «Меніңше, бірінші кезекке орыс ұлтшылдығын қою керек… Қырғыздардың (қазақтардың ред.) кезінде орыстарды бауыздап қырғанына немесе Шәмілдің Николай біріншіге қарсы тұра алғанына қуанудың реті жоқ, олардың оқулықтарда болғаны ыңғайсыз».
Егер С.Бушуев пен А.Яковлев ашық түрде ұлыдержавалық шовинизмді немесе орыстық-центризмді насихаттаса, П.Смирнов пен Е.Тарле патшалық Ресейдің аумақтық экспансиясын ақтап еңбектер жазды. Оларша, революцияға дейін отаршылық саясатты ұстанып, жаңа жерлерді басып алғандығы Ресейді асқан державаға айналдырып, бүгінгі күндері фашистік Германияға қарсы тұруға мүмкіндік берген. Демек, патшалық Ресейдің отаршылық саясаты да, оны жүзеге асырғандар да құптауға, мақтауға тұрарлық. Мұндай тұжырым ВК(б)П ОК үгіт-насихат басқармасының, оның басшылары Александров, Федосеев, Поспеловтің қолдауымен қалыптасты. Патшалық Ресейдің империалистік, отаршылық, ұлыдержавалық саясатын сынау осылайша кідіріс тауып қана қойған жоқ, кейінірек сынаған адамдар қуғынға да ұшырады. Патшалық отаршылдық саясатты және орыс халқының ұлыдержавалық шовинизмін сынауда айрықша көзге түскен М.Н. Покровский мен оның шәкірттері қатты әшкереленді. Олардың қатарында А.М. Панкратова да болды.
Орыстық центризмнің жеңісін, КСРО халықтарының басында орыс халқының тұруы жағдайын И.Сталиннің 1945 жылғы Кеңес Армиясы басшылығын Кремльдегі қабылдауында орыстар үшін тост көтеруі біржола заңдастырғандай еді. Сол сөзден үзінді келтірейік: «… Орыс халқының денсаулығы үшін ішетінім, Кеңес Одағының құрамына кіретін барлық халықтардың ішінде ол ең көрнекті ұлт болып саналады. Орыс халқының денсаулығы үшін тост көтеретінім, ол осынау соғыста біздің еліміздің барлық халықтары арасында Кеңес Одағының басқарушы күші ретінде кеңінен танылуға лайық. Мен орыс халқының денсаулығы үшін тост көтеруім ол басқарушы халық қана емес, оның ақылы зерек, мінезі қайсар және шыдамы күшті…»
Дәл осындай жағдайда, партиялық-кеңестік идеологияның орыстық-центристік идеологияға ауысуы кезеңінде, Ұлы Отан соғысы кезінде ерекше күшейген орыс халқының ұлыдержавалық шовинизмінің белең алған жағдайында 1943 жылы «Қазақ ССР тарихы» жарық көрді. Көп кешікпей ол Сталиндік сыйлыққа да ұсынылған. Оған КСРО ҒА мүше-корреспонденті А.Яковлев рецензент болды. Жалпы алғанда бұл еңбекке оң баға бергенімен, «бір қарын майға құмалақ салып» жібергені бар. Қазақстан мен Орта Азиядағы Ресейдің жаугершілік әрекеттері мен отаршыл саясатына сын айтылғанын құптамайтынын білдірді. Бұл саясатты ол қорғаныстық, заңды және прогрессивті деп сипаттады. Әсіресе, Е.Бекмаханов жазған Кенесары Қасымовтың басшылығымен болған қазақ халқының ұлт-азаттық күресіне арналған бөліміне қатты шүйлікті. Рецензент қазақтардың ұлт-азаттық күресін көрсетудің қажеттілігіне күмән келтіре отырып, авторлық Ресей империясының саясатына ғана емес, жалпы, орыс халқына оң ықыластың жоқтығын сынады.
Мұндай жаңсақ пікірмен келіспеген А.М. Панкратова ВКП (б) Орталық Комитеті үгіт-насихат басқармасына шағым жасап, қайталап рецензиялауды өтінді. Оған Александровтан сорақы жауап алды. Партияның бас идеологы бұл орыстарға қарсы еңбек, онда Қазақстан бұған дейін тарихтан тыс болған екені, тек Ресей ғана оны тарихи ұлттардың қатарына қосқаны ескерілмегенін алға тосты. Бұл шын мәнінде орыс шовинизмінің барынша асқынғанына айқын мысал еді.
Осылайша Қазақ елінің тарихына байланысты еңбек, оған берілген баға кеңес тарихы ғылымындағы екі бағыттың арасындағы күресті жаңа биікке көтерді. Интернационалистік, шын мәніндегі таптық ұстаным бағытындағы тарихшылар А.М.Панкратова, М.Вяткин, Н.Дружинин және басқалар орыстық-центристік, ұлыдержавалық-шовинистік бағыттағы А.Яковлев, А.Ефимов, С.Бушуев, Е.Тарле, П.Смирнов және басқалар бітіспес күреске қосылды. Бұл күрес үлкен ауқымда жүрді. Мәскеуде, Ленинградта, КСРО Ғылым академиясында ғана емес, Қазақстанда, Татарияда, Башқұртстанда, Кавказда орын алды. Ресей империясын, оның саясатын айыптаған, оған қарсы ұлт-азаттық күресті жазған жергілікті ғалымдар сыннан көз ашпады. Едіге, Шәміл сияқты ұлт батырларына теріс баға берілді.
Бұл күреске белсенді қатысып қана қоймай, Анна Михайловна үлкен азаматтық тұлғасын да көрсетті. Ол жеке тарихшылармен ғана айтысып қойған жоқ, сол кезде қалыптасқан ұлыдержавалық-шовинистік саясатпен де күресті. 1944 жылы елдің, партияның басшылары Сталинге, Ждановқа, Маленковқа, Щербаковқа әлденеше рет хат жазып, ақыры ВКП(б) ОК сол жылдың жазында тарихшылардың кеңесін өткізуге мәжбүр болды. Бірақ бұл кеңес те тарих ғылымындағы екі бағытты «татуластыра» алмады. Әрине, адал тарихшылар үшін ұлыдержавалық шовинизммен ымыраға бару, бір халықтың басқалардан жоғары тұруын мойындау қиын еді.
Сол кеңесте А.Яковлев Ресей империясының отаршыл саясатының нағыз апологеті ретінде көрінді. Және онысын біздің елімізге қатысты көрсетті. Ол 1916 жылы қазақтардың Амангелді Имановтың басшылығымен болған көтерілісін көрсетуге қарсы шықты. Сөйтсек, бұл көтеріліс патша әскерінің Оңтүстік-шығыс майданындағы шабуылына кедергі жасапты. Өйткені, екі орыс корпусы қазақтармен соғысуға мәжбүр болған екен. Яковлевтің: «Амангелді қазақтар үшін батыр шығар, ал оның ерліктерін біздің, орыстардың мадақтауы ыңғайлы бола қояр ма екен» деген сөзінен-ақ көп нәрсені ұғасың. Міне, сондай адам 1943 жылы шыққан «Қазақ ССР тарихының» тағдырын шешкеніне таңданасың да, ызаланасың.
Александров басқарған ВКП(б) Орталық Комитеті үгіт-насихат басқармасы А.М. Панкратованың соңына түсуін бұрынғыдан да үдетті. Ғылыми жолмен, саяси күреспен жеңе алмаған соң, тарихшылар кеңесінің құпия материалдарын жария етті, топ құрды деген айып тақты. Ақыры оны партия басшылары Жданов пен Щербаковтың алдына апарып, институт директоры қызметінен босаттырды.
Тарихшылар тайталасының жаңғырығы Қазақстанда ерекше қатты естілді. Жұрт өз халқының, өз ұлтының мерейі жоғары болуын ойласа, одан басқа халықтардың биік тұрғанын қалайтындар да табылады екен. 1950 жылғы 26 желтоқсанда «Правда» газетінде «Қазақстан тарихының мәселелері маркстік-лениндік тұрғыда көрсетілсін» деген Х.Айдарова, Т.Шойынбаев және А.Якуниннің мақаласы жарық көрді. Бұл біздің республикадағы саяси репрессияның басы болды. 1943 жылы шыққан «Қазақ ССР тарихын» дайындаудағы ұйымдастырушылардың бірі және ондағы Кенесары Қасымов басшылық еткен қазақтар көтерілісі туралы тарау авторы болған Е.Бекмаханов «контрреволюциялық қызметі» үшін 25 жылға сотталды. Оның бұдан кейінгі тағдырына А.М. Панкратова белсене араласып, И.Сталин қайтыс болғаннан кейін, оның босап шығуына атсалысты.
Осы жерде тағы бір үлкен тарихшымыз Бекежан Сүлейменовтің де тағдыры еске түседі. Ол керісінше, Ермұқан Бекмахановтың сыншысы болған еді. Бұл кісі Кенесары Қасымовты көтермелеуге қарсы болып, сол үшін Қазақстан Компартиясының басшысы Жұмабай Шаяхметовті де сынаған. Сірә, сол үшін де шығар, ол да «халықаралық империализмнің агенті» болғаны үшін жазаға ұшырады да, Ермұқан Бекмахановтан бұрынырақ түрмеге түсіп (1952 жылғы шілдеде), одан кейінірек босады (1954 жылғы қарашада). Бізді осынау тұлғалы ғалымдарымыздың пендешілік пиғылдан жоғары тұрғаны сүйсіндіреді. Кеше мені сынап едің демей, Ермұқан ағамыз Бекежан ағамыздың докторлық диссертациясына ресми оппонент болғаны бар. Оған өзіміз куәміз.
Қазақтың «өткір пышақ қап түбінде жатпайды» дейтініндей, қанша қарсыластары қандарын ішіне тартып қарсы тұрғанына қарамастан, Анна Михайловна Панкратова 1953 жылы КСРО Ғылым академиясының толық мүшесі болып сайланды және «Вопросы истории» журналының бас редакторы болып тағайындалды. Бірақ көп кешікпей тарихшылар арасында күрес қайта өршіді. Көпшілігі А.М.Панкратованың өзіне тісі батпағанымен, ол басқарған журналға тиісті. Ең қиыны – қарсыластарын партия басшылығы қолдады. Оның ақыры журналдың жұмысын СОКП ОК талқылауға әкеліп соқтырды. 1957 жылғы наурызда «Вопросы истории» журналы туралы» белгілі қаулы қабылданды. Ал 1957 жылғы 21 мамырда А.М.Панкратова журналдың үшінші нөміріне қол қойса, төрт күннен кейін үлкен ғалымның жүрегі тоқтады. Зорлық-зомбылыққа шыдамаса керек.
Сол жылы ғылыми қауым оның 60 жылдығын атап өткен еді. Соған орай КСРО Ғылым академиясының салтанатты мәжілісі болды. А.М. Панкратованың сонда сөйлеген сөзі де жұрттың есінде қалған: «Бір ұлттың адамдарын екінші ұлт адамдарының үздіксіз түрткілей беруі әрқашан менің жаныма тиеді, ұлттың азшылық құқын азғантай да болса, қиянат жасағанға өзімді Владимир Ильич Лениннің шәкірті санайтын мен қашанда зығырданым қайнап қарсы шығамын. Біздің көпұлтты Отанымыздың кейбір халықтарының тарихына байланысты кітаптар шығаруға қатысқаным, ең бастысы, осында атап көрсеткендей, Белоруссия, Қазақстан, Тәжікстан, Украина және басқа кеңестік республикалардың жас ғалымдарын дайындауға көмек жасағаным мені үлкен қанағаттану сезіміне бөлейді…»
Осы сөзден аңғарылатын бір жай – Анна Михайловна Панкратованың шапағаты тек біздің еліміздің ғалымдарына ғана емес, басқаларға да тиген екен. Ал біздің Қазақстанның ғылымына, әсіресе, тарих ғылымының қаз тұрып, қалыптасуына оның қосқан үлесі орасан. Ол біздің ұстаздарымызға ұстаз болды. Оның ғылым саласындағы ерлігі өз алдына, азаматтық келбеті ерекшеленіп тұрады. Егер Анна Михайловнаның қамқорлығы болмаса, Ермұқан Бекмахановтай тұлғалы ғалымымыздың тағдыры қалай болар еді деген сұрақ әркез көңілде тұрады. Ерекеңдей ғалымды еліне қайта қауыштырған сол кісі еді.
Біздер, қазақ тарихшылары, академик Анна Михайловна Панкратованың жарқын бейнесіне әрқашан құрметпен қараймыз. Оның қазақ халқына жасаған еңбегі ешқашан ұмытылмақ емес.
Мәлікайдар АСЫЛБЕКОВ, БҒМ Ш.Уәлиханов атындағы Тарих және этнология институтының бас ғылыми қызметкері, академик.
Алматы.