Ырыстың ордасын ынтымағымыз қолдасын
Бүгінде біздің сан-алуан ұлыстардың басын құраған республикамыз өткен заманда талай қайғы-қасірет пен қуғын-сүргінді бастан кешкен көптеген армяндардың да алтын бесік Отанына айналып отыр. Әуелі сәл-пәл тарихқа шегініс жасасақ, менің де ата-анам сонау бұлғақ-тауқыметке толы 1937 жылы Арменияның Мергин ауданындағы биік таулы Калер селосынан өзі тақылеттес жүздеген отбасылар қатарында алыс Қазақстанға жер аударылыпты. Сол кезде әкем Месроп Карапетян және қиыншылық тағдырмен қосақталған тағы бірнеше отбасы әрі қарайғы өмірлерін жалғастырып тұру үшін Алматы облысының Қаскелең ауданындағы «Жетісу» кеңшарын таңдаған екен.
Бүгінде біздің сан-алуан ұлыстардың басын құраған республикамыз өткен заманда талай қайғы-қасірет пен қуғын-сүргінді бастан кешкен көптеген армяндардың да алтын бесік Отанына айналып отыр. Әуелі сәл-пәл тарихқа шегініс жасасақ, менің де ата-анам сонау бұлғақ-тауқыметке толы 1937 жылы Арменияның Мергин ауданындағы биік таулы Калер селосынан өзі тақылеттес жүздеген отбасылар қатарында алыс Қазақстанға жер аударылыпты. Сол кезде әкем Месроп Карапетян және қиыншылық тағдырмен қосақталған тағы бірнеше отбасы әрі қарайғы өмірлерін жалғастырып тұру үшін Алматы облысының Қаскелең ауданындағы «Жетісу» кеңшарын таңдаған екен.
Осылайша өткен ғасырдың 37-ші және 49-шы жылдарында жер аударылғандарға алғашқы болып жергілікті қазақтар көмек қолын созыпты. Бізді Сарыбаевтардың отбасы қабылдапты. Міне, солармен бірге ата-анамыз өздерінің үрім-бұтағымен аш-жалаңаштықты да, талай мехнатты, соғысты да бірге өткерді. Сол жағдайда ешкім «Сен кімсің? Қайдансың? Неге келдің?» деп сұрамаған. Сол отбасында мен дүниеге келіп, алғаш рет қазақ мектебіне барып сауат аштым. Бүгінгі таңда мен армян және орыс тілдерімен қатар мемлекеттік тілде де еркін сөйлеймін. Осынау армяндар мен олардың ұрпақтары үшін Қазақстан үшінші және тіпті, төртінші аталарынан бері өздерінің Отаны болып табылады. Егер басқа диаспоралардың арасында өздерінің тарихи Отандарына немесе басқа елдерге кету жағдайы байқалса, ал армяндардың саны мұнда, керісінше, көбейе түсуде. Бәлкім, бұл арада республикадағы экономикалық тұрақты жағдай, ауқатты тұрмыс дәрежесі де белгілі бір рөл атқаратын шығар, бірақ мен сонда да болса, осы реттегі айқындаушы фактор тыныштық пен татулық деп ойлаймын.
Жұмыс бабы бойынша менің көптеген ТМД елдерінде болуыма тура келеді. Шынымды айтсам, солардың ешбірінде Қазақстанды мекендеген халықтардың бір-біріне деген ықылас-пейілі мен ақжарқындығын жолықтырған емеспін. Қазақстан армяндарының Достастық елдерінде бірінші болып Армяндардың үйін салуы осының айқын айғағы болып табылады. Қазір бұл үй ұлттық мәдениетіміздің ошағына, сонымен бірге тарихи Отанымыздың бір бөлшегіне айналып отырған жайы бар.
Біздің «Наири» ассоциациямыз 2004 жылы құрылды. Армян мәдени орталықтары қазір республикамыздың 14 қаласында жұмыс істейді. Солардың ішінде Алматыдағы «Луйс» мәдени орталығы ерекше көзге түсуде. 2006 жылы осы орталықтың бастама көтеріп, әрі тікелей қатысуымен Қазақстанда тұңғыш рет Әулие Карапеттің армяндық апостол шіркеуі ашылды. Бұл қасиетті орынға дұға қылып, мінәжат етіп, шырақ жағып қою үшін әрбір алматылық келе алады.
Шіркеуіміз ата-ананың аялы алақан табын, жүрегінің мейірімін сездіретін туған үйіміздей десек болар. Өз Отанына айналған елдің де мәдениетін қабылдап, бойына дарытып, оның дәстүрлері мен әдет-ғұрпын құрметтей отырып, армян диаспорасы ешқашан өзінің діні мен ділін, өзінің алмағайып тарихын ұмытқан емес. Сондай шапағатты сезімдерді сақтауға Қазақстанда жағдай туғызылған, мүмкіншілік те жеткілікті екендігін ерекше атап айтуымыз керек. Біз қандай қиындықтар мен сынақтардан өтсек те, әркез үміт пен сенім жанымызда болды. Адам қиналып, күйзелген немесе, керісінше, шаттыққа бөленген сәттерінде Жаратушы иеге жалбарынады. Олай болса, Әулие Карапеттің армян апостолдық шіркеуі шоқындыру, неке қию, жаназа шығару құпияларына байланысты барлық жоралы ғұрыптарды өткізетін қасиетті ордаға айналған. Осы ретте Елбасымыздың барлық дәстүрлі діндер мен конфессиялардың үнқатысуына, өзара түсіністігін орнатуға жол ашуын қалай бағаламассың, қайтіп сүйінішпен қабылдамассың.
Басқа елдерде тек сондағы негізгі ұлттың ғана тілі мен мәдениеті дәріптелсе, біздің Қазақстандағы жағдай мүлдем басқаша. Айталық, «Луйс» мәдени орталығының негізінде армян тіліне үйрететін жексенбілік мектеп ұйымдастырылған, би және музыка үйірмелері жұмыс істейді. Сонымен бірге еліміздегі бірде-бір мемлекеттік мереке «Луйс» би тобының қатысуынсыз өтпейді. Мұны да қазақстандық армяндарға деген құрметтің көрінісі деп білеміз. Біздің құрметті ақсақалымыз Артем Сережаевич Гаспарян бастаған үлкендеріміз жастармен жиі кездесіп, өмір тағылымдарын айтып тұрады.
2007 жылы айына 5 мың дана таралыммен «Наири» атты армяндардың ұлттық газеті шыға бастады. Армян тіліндегі әліппенің шығуы да балаларға жақсы сыйлық болды. Сонымен бірге 2 мың дана таралыммен кезінде Қазақ Республикасын басқарған, қазақтар жақсы көріп «Мырзажан» деп атап кеткен Левон Мирзоян туралы кітап жарық көрді. Армян мәдени орталығы жыл сайын қайырымдылық акцияларын, мүмкіндігі шектеулі балаларға арналған арнаулы концерттер, мәдениет күндері мен «дөңгелек үстел» мәжілістерін өткізіп тұрады.
Бір сөзбен айтқанда, ежелгі қазақ жерінде армян мәдениеті де лайықты орнын тауып, өркен жайып келеді. «Наири» ассоциациясының арқасында ол мәдениет жаңа тыныс, жаңа өрнектермен жаңғырып, былайша айтқанда, кемпірқосақ шұғыласының барлық бояуларымен жайнап, жарқырай түсуде. Көп ұлтты елде тұрғанда өзімнің жеке отбасылық жағдайымды да айтпай кетпей болмас. Әйелім Анфиса Зинатқызы – татар қызы. Әуелде менің отбасым біздің түтін түтетіп, шаңырақ көтеруімізге қарсылық білдірген-ді. Бірақ жас келіншегімнің ақылдылығы сондай, аз уақытта-ақ армян тілін үйреніп алды. Әкемнің сынағына сақадай-сай болып шықты. Содан бері, міне, 42 жыл бірге өмір сүріп келеміз. Қандас болмасақ та, рухымыз бір, тілегіміз бір. Осы рухани жақындық басқа дәнекерлердің бәрінен де мықтырақ па деп ойлаймын.
Отбасын шағын мемлекет дейді екен ғой. Мен осы отбасы туралы әңгімемді бүкіл ордалы Отанымыздың, береке-бірлік орнаған байтақ еліміздің ауқымына ауыстырсам деймін. Кім-кімді болсын өз үйіндегі де, сонымен бірге жалпы еліндегі де экономикалық мәселелер, әсіресе бүгінгі таңда толғандыруы заңды. Өйткені, қазір дүниеде дағдарыс болып жатқаны туралы әңгімелерді көп естисің. Дағдарыс келді дейді, дағдарыс өтті дейді. Теледидардан анау Еуропа елдерінің дуылдап, шулап жатқанын көреміз. Оларда сол дағдарыстың дауылы шындап соғып жатқандай. Иә, біздің елімізде дағдарыс туралы айтуға болар. Кейбіреулер өзінің қарекетсіздігін ақтап алу үшін дағдарысты сылтау етуіне болар. Бірақ, мен өз басым бүгінгі күні Қазақстанда дағдарыс соншалықты сезіліп отырған жоқ деп есептеймін. Дағдарыстың болатындығы, оның айналып соққан толқыны қиындау соғатыны туралы тіпті Үкімет деңгейінде де айтылып қалуда. Жаһанды жайлаған алапаттың екпінін Еуропа мен Америка сезініп отырғанын көре тұра, бір жағынан оған мән бермеуге де болмайтын сыңайлы.
Соған қарамастан, сайып келгенде, мен Қазақстан дағдарыстан өте тыныш, қандай да бір қиындық-күйзеліссіз өте білді деп пайымдаймын. Бізде айта қаларлықтай дағдарыс дүмпулері мен ахуалдарына жол берілмеді. Нақ осы мәселеде кәсіпкерлер түйткілді жайларға ұшырай қоймағаны белгілі. Өз басым сондай кілтипандарды байқаған емеспін. Егер шарап жасаумен айналысатын біздің саламызды, жақында ғана іске қосқан «Винекс» деп аталатын жаңа зауыттағы өз жұмысымды алар болсақ, әзірге бәрі тамаша, бірқалыпты, тұрақты дей аламын. Біз теңге аймағына жұмыс істеудеміз. Еуромен де, доллармен де шатағымыз жоқ. Осыған орай бір қызық айтайын, тіпті, ашығына келсек, дағдарыс күшейген сайын, ондағы бәсеке қатаңырақ болған сайын, бізге жақсырақ болатын түрі бар. Бәсекеде ширап, шыныға түсетін сияқтымыз. Оның үстіне әрі біз өзіміздің теңге аймағында жұмыс істегендіктен, ештеңені өзгертіп, ауыстырмаймыз. Шымкенттің оңтүстік өңірінде, Сарыағаш пен Түлкібас төңірегінде 360 гектарды алып жатқан өзіміздің жүзімдігіміз және жүзім өңдейтін екі зауытымыз бар. Бұл зауыттарда жылма-жыл 2,5-3 мың тонна жүзім өңделеді. Бұған қоса ассоциация құрамындағы 257 фермермен, жеке қожалықтармен ілкімді келісім-шартқа отырғанбыз. Олармен 20 жылдан бері қоян-қолтық жұмыс істеп келе жатырмыз. Жүзімдерін қабылдап аламын, ақшасын уақытылы төлеймін, ортақ мүдде жолында бір ағзаға айналып, тұтасып кеткендейміз. Сөйтіп жүзімді де өзіміз өсіреміз, оны өңдеп, тәтті шараптар жасаймыз. Шишаларға Қазақстанның өзінде құйып, сауда нүктелеріне аттандырамыз. Бір айта кетерлігі, 2004 жылы ашылған «Виньяк» зауытымызда аққайнардың 4 түрі, шараптың 22 түрі, коньяктың 5 түрі, чача атты жүзім арағының 3 түрі және алкогольсіз ішімдіктердің 4 түрі шығарылуда. Ай сайын 30 мың шишаға жуық коньяк құямыз. Бұл сияқты берік қорғанысым болғандықтан, қаржы-экономикалық дағдарыстың менде шаруасы қайсы?
Жоғарыда айтқанымдай, біздің фермерлік шаруашылықтарымызда 257 отбасы бар дедік. Оңтүстік өңір болғасын әрбір отбасында 5-7 баладан болуы да табиғи жай. Міне, осы отбасылар біздің арқамызда өздерін күнкөріспен қамтамасыз етуде. Ауылдық жердегі зауытымыздың өзінде 200 адам жұмыс істейді. Оған Алматыдағы зауытымызды қосайық. Сонда біз шамамен жыл сайын 500-700 адамды жұмыспен қамтамасыз етудеміз. Басты нәрсе бұл ғана емес, біз бүгінімізге ырзамыз, болашағымызға сенімдіміз.
Еңбекақы мәселесіне келер болсақ, айталық, Сайрам ауданында оның орташа деңгейі 30 мыңның үстінде, ал Алматыда 60 мың теңгеге жуық. Басқа да табыс көздері жоқ емес. Мен осынау адамдар үшін біздің зауыттарымызда жұмыс істеу абырой, мәртебе екендігін байқаймын. Өйткені біз жалақыны уақытында төлейміз. Салықтарды кейінге қалдырмаймыз. Осы ретте бір түйткілді жайды да айта кетейін. Рас, қазір кейде бағалар шарықтап та кетеді. Айталық, осы жаңа жылдан бастап, біздің салығымыз көтерілді. Әне, соның кеселі бағаға тиеді.
Біздің Президентіміз әркез жергілікті отандық өнім өндірушілерге көмектесу керектігін, олардың неғұрлым жеңілдетілген жағдайды сезінуі қажеттігін жалықпай айтуда. Демек, жаңағыдай жөнсіз салықтардың біздің диқан шаруаларымызға да келеңсіз әсері тиетінін ұмытпағанымыз абзал. Олар ауылда тұрады. Олар қаладағыдай игіліктерді пайдаланып отырған жоқ.
Жоғарыда айтып өткенімдей, біздің «Виньяк» зауытымыз жаңадан ашылған табысты кәсіпорын. Біз оны ел Президентінің нұсқауы бойынша салып, жаңа технологияларды игергенімізді мақтанышпен айтамыз. Бұл арада біз кез келген елдің премьерлерін, канцлерлерін жоғары дәрежеде қабылдай аламыз. Сөйтіп, Қазақстанда да Еуропадағыдан бір кем емес осындай зауыт бар екендігін көрсете аламыз. Осы құрылыста француздардың жобасы пайдаланылды. Мұндағы осы заманғы италиялық техника мен технология әлемдік стандарттарға сай келеді. Барлық спирттер 80-100 жылдық емен бөшкелер мен емен шегендерде сақталады. Осы заманғы құю торабының қуаттылығы сағатына 6 мың шишаға дейін жетеді. Біз Қазақстанда тұңғыш рет чача деп аталатын жүзім арағын шығара бастадық. Бұл спирттен немесе бидайдан жасалған арақ емес, бұл дегеніңіз нағыз жүзім глюкозасы. Жүзім тек біздің зауытта ғана италиялық жабдықтарда өңделеді. Мұның өзі еуропалық стандарттағы ғажап сапалы шарап алуға және экономикалық тиімділік тұрғысынан да алғы шептен көрінуге мүмкіндіктер беруде. Осындай жақсы шараптарымыз бен коньяктарымыз халықаралық бәсекелерде 11 алтын және 7 күміс медаль жеңіп алғанын айтуға тиіспін. Ал бұл медальдар ең алдымен әлемге Қазақстан атын танытуда.
Талапқа сай технологияны игерген мамандар жайына келер болсақ, бұл орайда менің тәжірибем үлкен. Себебі, осы кәсіппен өзім де 40 жылдан бері айналысып келемін. Сондықтан, мені Шарап жасаушылар одағының президенті, Жүзім өсірушілердің халықаралық академиясының академигі етіп сайлауы да тегін емес болар. Біздің шарап жасау ісін дамытуға қосқан үлесіміз Қазақстаннан тысқары жерлерге де мәлім екендігін айтсам, асыра мақтанды деп ойламассыздар. 1999 жылы Қырым шарап жасаушылар одағы «Л.С.Голицын алтын медалімен», бәсекелес рыноктағы стратегиялық бағдарлама үшін 2001 жылы Франция Ұлттық өнеркәсібіне жәрдемдесу ассоциациясы «Алтын медальмен», ал 2003 жылы «Наполеон медалі» құрметті сыйлығымен марапаттауы еліміздің мерейін асырғаны анық. Ендігі жерде өз тәжірибемді кейінгі жастарға үйретудемін.
Меніңше, Қазақстанда осындай экологиялық тұрғыдағы таза өндірісті одан әрі кеңінен өрістетіп жолға қоюға мүмкіндік жеткілікті. Елбасымыз айтып жүргендей, жергілікті, отандық өндірушіге көңіл бөлу керек деп есептеймін. Сайып келгенде, Қазақстанда бұл үшін барлық алғышарттар бар. Шикізат аймақтары жетіп артылады, кадр мәселесі шешілген, ресурстар, басқа мәселелер де шешімін тапқан. Демек, біздің зауыттағыдай жақсы сапалы өнімді шығаруға болады.
Менен осындай атақ-абыройға, табысқа қалай жеткенімді сұрап жатады. Соның барлығы қазақ халқының арқасы, қазақ жерінің шапағаты деп айтар едім. Мен ең алдымен Қазақстанға қызмет етемін. Біздің әулет қазақтың елі мен жеріне тамыр тартып қосылып кетті. Менің атам, әкем осында жерленді. Өзім осындамын. Ұлым осында. Немерем желкілдеп өсіп келеді. Демек, алты атадан бері туыстасып, бауырласып келеміз. Өзім қазақ жерінде туғандықтан да, Қазақстанды барлық жан-тәніммен шынайы түрде туған Отаным деп есептеймін. Балаларыма да осыны өсиет етудемін. Өйткені, қазақ халқы нағыз сабырлы, салиқалы, аңқылдаған адал халық. Өз басым соншалықты құрметтеймін.
Әрине, кемшілік пен келеңсіздіктер әрбір ұлт өкілдерінде кездесіп жатады. Біздің Президентіміздің Қазақстан халқы Ассамблеясы сияқты сарабдал институт құрып, оны заңдастырып бергені үшін мың рахмет. Елбасымыздың «Ең алдымен экономика, содан кейін саясат» дейтін тамаша қағидасы бар. Өте дұрыс. Тіпті кез келген отбасын алайықшы. Онда да ең алдымен тамақ тоқ, көйлек көк болуы керек қой. Қарым-қатынас содан кейін. Ақша болмаса, жүйке де жұқарады, ұрыс-керіс те шығып кететін жағдайлар болады. Сондықтан, бүкіл елдің саясатында да Президенттің экономиканы алғы шепке шығаруы көрегендік дер едім. Бір ғана мысал. Армяндар Қазақстанда бұрын 25 мың болатын, қазір 43 мыңнан асып жығылады. Бұл ненің белгісі? Демек, мұнда тұрмыс жақсы. Береке мен бірлік бар. Сонымен бірге армяндар да, қазақтар сияқты, бір-біріне көмектесуге әзір тұратын халық. Тоқшылық мекеніне алыстан бір-бірін тартады. Көпшілігі мамандық игеріп келеді. Барлығы дерлік жақсы құрылысшылар. Қазақтармен шүйіркелесіп, тіл табысуға да шебер. Жасыратыны жоқ, мен осындағы бас армянмын. Әртүрлі жағдай болып тұрады, көре алмаушылар, қызғаншақтар біздің арамызда да бар. Армяндар ассоциациясының төрағасы бола жүріп, кейбір ішкі түйткілдер бар екенін де білемін. Бір айтарлығы, осындай түйткіл тудыратындардың көбі біздің Қазақстанның армяндары емес, Арменияның армяндары. Өзіміз осында тұрып, тарихи Отанымызға қарлығаштың қанатымен су сепкендей септігімізді тигізе алсақ, ол да Қазақстанның жақсылығынан, Елбасымыздың шарапатынан деп білемін.
Нұрсұлтан Әбішұлымен, біз, бизнесмендер, жылына бір, кейде екі мәрте кездесіп тұрамыз. Сол кезде өзіміздің мұң-мұқтажымызды, шешілмей жатқан мәселелерімізді айтып қаламыз. Бір жолы біздің салаларға ақша неге салынбай жатқандығы, кейбір салалардың неліктен баяу жұмыс істеп жатқандығы туралы әңгіме қозғады. Қатаң талап қойылды. Тіпті сұрақтың бірі тікелей маған бағытталды. Президент: «Сен неге колхоздар мен совхоздарды қайта құрып жатырсың?» деп сұрады. Мен Нұрсұлтан Әбішұлына ұжымшарлар мен кеңшарлар құрмағанымды, оның есіне барлық жеке шаруа қожалықтарын, фермерлер шаруашылықтарын ассоциацияға біріктіргенімді айттым. Осы жағдайда бүгінде жүзімді 20 күн ішінде ғана жинап аламыз. Ал Кеңес кезінде студенттерді жауып жіберіп, 4 ай бойы жинайтынбыз. Сонымен қатар оларға техника, тыңайтқыш беріп көмектесеміз. Біз бүгінгі таңда құрғақ шарап материалдары бойынша Францияның өзінде төртінші орынға шықтық. Кеңестік уақытта Қазақстан осындай мәртебелі тұғырдан қашан көрініп еді?
Президент бұл сөзімді ұнатып қалды, тіпті мені мақтап та жіберді. Карапетян барлық жұмысын бір минуттың ішіне сыйғызып айтты, деді. Менің мерейімді өсірген осындай оқиғалар болып та тұрады. Иә, Елбасымыз адал кәсіпкерлерді қолдайды. Бірақ, өкінішке орай, кейбіреулер жалпыға бірдей заңды бұзады, күмәнді жолмен ақша табады, сөйтіп, Ресейде, тағы бір жерлерде тізбектелген виллалар, тұтас қалалар салады. Нақ осыны, енді, дұрыс деп есептемеймін.
Президентіміздің қатысуымен Қазақстан халқы Ассамблеясының XIX сессиясы болып, көкейкесті мәселелерді сөз етпекші. Бұдан былай Төрағаның тағы да екі орынбасары сайланып тұрмақшы. Бұл дұрыс әрі әділ шешім болады деп пайымдаймын. Ассамблеяда әр этнос толыққанды көрініс табады. Президент Әкімшілігіне, Парламенттегі депутаттарымызға бұдан былай біздің көкейкесті мәселелеріміз барынша кең түрде жеткізіліп тұрмақ. Ассамблеяның өзінен сайланған 9 депутат та үлкен күш. Ал енді депутаттық тобымыз құрылмақ. Бұл топқа барлық партиялардың өкілдері кіретін болады.
Бір айта кететін жай, Ассамблея біздің Қазақстанның біртұтас халқын шын мәнінде біріктіріп отырған жұмылдырушы институт болып табылады. Халқымыз қаншама жылдардан бері тату-тәтті достықпен өмір сүріп келеді. Басқа елдерді алайықшы. Жақын көршілеріміз Өзбекстан мен Қырғызстанға, Кавказ елдеріне зер салып көріңізші. Не айтатыны бар? Салыстырып байқасаңыз, қай тұрғыдан да біздің артықшылығымыз айқын көрініп тұрған жоқ па. Тыныштық та, татулық та, достық та, бірлік пен береке де, экономикалық тұрақтылық та, саяси сарабдалдық та – бәрі біздің Қазақстанда. Осының өзі біздің құрметті Елбасының, оның көреген саясатының арқасында мүмкін болып отырғандығы және белгілі. Ең бастысы, сол ақылман саясаттың арқасында Қазақстанды мекендеген барлық халықтар, этностар мен диаспоралар бір жұдырыққа тас түйін болып біріккен.
Нақ осы арада біздің ел экономикалық және қаржылық дағдарыстан неліктен күйзеліссіз желе-жортып майпаңдап өте шыққанын ұққандаймыз. Дағдарыстан дертсіз өткен себебіміз сол, өйткені барлық ресурстар бір орталықта, мемлекеттің қолында шоғырланған. Қай салада, қандай да бір күйзеліс туындаса, қаражат та, ресурс та ретіне қарай соған бөлінеді. Жер сілкіністері, су тасқындары сияқты табиғи апаттар кезінде сондай қорланудың есебінен елдік көмегімізді таныта білдік. Құрылыста үлескерлер дағдарысы орын алған кезде де, осындай көмектің арқасында бұл проблема да қалпына келді, іс-жүзінде барлық мәселелері шешімін тапты. Үлескерлердің де мемлекет тарапына өкпе-назы қалмады. Банктеріміз тақырға отыра жаздағанда да, мемлекеттік саясат, мемлекеттік қазыналы қор қол ұшын берді. Сөйтіп, халықтың қаншама жиналымдарын сақтап қалды. Бұл жайлар жұрттың бәріне белгілі. Сондықтан мен орталық билік, орталық қаржы жүйесі қажет деп есептеймін.
Кеңес Одағы құлап, тарағаннан кейін, мұраға қалған барлық қиыншылықтар мен проблемалық мәселелердің бәрі біздің Қазақстанда қазір толықтай шешімін тапты деп мәлімдеп айтуға әбден болады. Мәскеу де бірден салына қоймаған ғой. Төңірегімізге көзімізді ашып қарайықшы. Еліміз өз автомобильдерін, өз тепловоздарын шығара бастады. Мұны қашан көріп едік? Осылай болады деп қайсымыз ойлар едік? Ауыл, селоларымызға газ келіп жатыр. Алматының төңірегі, Алматы облысының ауылдары көгілдір отынның игілігін көріп, шуағына бөленген. Солтүстіктен келе жатқан Қытайға өтетін магистраль арқылы Алматы атырабы, бүкіл оңтүстік өңірі Өзбекстанға иек артпай, өз газымызбен қамтамасыз етілмек. Егер Кеңес уақыты болса, мұндай болар ма еді, жабулы қазан жабулы күйінде қала берер еді ғой. Сондықтан, азырақ өткенімізді шолып, өмірге көзімізді ашыңқырап қарауымыз керек. Бүгін таңда елімізде жаһандық экономикалық мәселелер емін-еркін шешімін табуда. Сол себептен де мен бүгінгі таңда Қазақстанды мекендеген халықтың маңдайының бағы бар деп білемін. Ең бастысы, біздің еліміз ынтымағы жарасқан құтты мекенге, ырыс-берекесі шалқыған бақыт ордасына айналған. Біздің бүгініміз бақуатты. Біз өзіміздің жарқын болашағымызды көрудеміз. Немерелеріміздің болашағы үшін сенімдіміз. Адамға одан артық не керек? Алдағы уақытта да ырысымыздың ордасын Елбасымыз сомдаған ынтымақ-бірлігіміз қолдай берсін.
Артуш КАРАПЕТЯН, Қазақстан Республикасындағы «Наири» армян мәдени орталықтары ассоциациясының төрағасы, ҚХА мүшесі, «Виньяк» ЖШС директоры.
Суреттерді түсірген Берсінбек СӘРСЕНОВ.