Шын мәнінде азаттығымыздың алтын тәжіндей жарқыраған ару Астана бүгінде инфрақұрылымы дамыған, мәдени ошақтары көп, қалалық қызмет көрсетуі тұрғындар мен қонақтар үшін қолайлы, ел экономикасының бас қайнары ретінде әлемнің үздік қалаларының біріне айналды.
Мемлекет басшысы Нұрсұлтан Назарбаев әр сөзінде Астана тек еліміздің бас шаһары емес, экономика локомотиві, республикалық бюджеттің негізгі доноры екенін үнемі айтып отырады.
Ең алдымен Астананың – Еуразия құрлығының кіндігінде орналасуы қаланың экономикалық тұрғыдан тиімді дамуына, оның көлік, қатынас және логистика орталығына айналуына кең жол ашты. Одан бөлек тәуелсіздік жылдарында елімізде өткен түрлі халықаралық іс-шаралар да Астананың экономикалық дамуына қуатты серпін берді.
Мемлекетіміздің атын әлемге паш еткен халықаралық ЭКСПО-2017 көрмесін өткізу барысында Президент «Бүгінде Астанада шетелдік 2700 компания жұмыс істейді. Олар қала экономикасына 3,2 миллиард АҚШ доллары көлемінде инвестиция салып отыр», деген болатын. Сәйкесінше, қала экономикасының қарқынды дамуы көптеген инвестор үшін де қолайлы болып отыр.
Сондай-ақ бас шаһардың ірі бизнес орталығының біріне айналуы экономикалық тұрғыдан жайлы ахуал қалыптастыруда. Елордада кәсіпкерлік жаңашыл көзқарастар дамып келе жатқаны анық байқалуда. Айталық, Астанада 128 мыңнан астам шағын және орта кәсіпкерлік нысандары жұмыс істейтінінің өзі көп жайтты аңғартады.
Бүгінде Астанамыздың экономикалық әлеуеті еселеп артып, донор қалаға айналды. Мұны былтыр қаланың экс-әкімі Әсет Исекешев атап көрсетті. «20 жыл бойы бюджет Астанаға шын мәнінде 2,3 триллион көлемінде үлкен ақша инвестициялады. Бірақ қазірдің өзінде Астана салықтарының өзі 6 трлн теңге көлемінде қайтарылды, яғни алғашқы соманы 2,5 есе өтеді», деген болатын Ә.Исекешев. Оның айтуынша, елордалық капитал жыл сайын республикалық қазынаға 750 млрд теңге аударады.
Қала экономикасының негізі – сауда, өнеркәсіп өндірісі, көлік, байланыс және құрылыс салалары. Шаһардың өнеркәсіп өндірісі негізінен құрылыс заттарын, азық-түлік өнімдерін шығару мен машина жасау ісі төңірегіне шоғырландырылғанын айта кеткеніміз жөн. Астана Қазақстанда құрылыс металл бұйымдарын, пайдалануға дайын бетон және бетоннан жасалған құрылыс заттарын шығару жөнінен бүгінде алдыңғы орынды иеленеді.
Қаланың ірі кәсіпорындары қатарында вагон жөндеу зауытын, «Цесна-Астық» концернін, «Тұлпар-Тальго» ЖШС жолаушылар вагонын құрастыру зауытын, «Еурокоптер Казахстан инжиниринг» ЖШС тікұшақ құрастыру зауытын айтуға болады.
Бүгінде елордадағы халық саны 1 миллионнан асқаны белгілі. Астананы одан әрі қарқынды дамыту барысында урбанизация үрдісін ескерсек, Елбасы айтқандай, 2030 жылға қарай қала тұрғындарының саны тағы 1 миллион адамға өсуі мүмкін. Бұл қала үнемі жаңа жұмыс орындарын ашу арқылы ел-жұртты еңбекпен, тұрғын үймен қамтамасыз ету міндетін алға қояды.
Елорда құрылыс ауқымы жөнінен елімізде көш бастап тұр. Астана мәртебесін алғалы бері қалада миллиондаған шаршы метр тұрғын үй салынып, Астана құрылысына жүздеген отандық және шетелдік құрылыс компаниялары қатысқан. Алдағы жоспар аясында 2023 жылға дейін Астанада 9,5 миллион шаршы метр тұрғын үй салынып, 500 мың адамға арналған 156 мың пәтер берілмек. 2027 жылға дейін 800 мың адамға арналған 16 миллион шаршы метр тұрғын үй салынады деп күтілуде.
Қысқаша айтқанда, Қазақстанның Тұңғыш Президентінің идеясымен іргесі қаланған жаңа елорда қысқа мерзім ішінде жалпыұлттық идея мәртебесіне ие болып, жас мемлекет тәуелсіздігінің символына және еліміздің зор табыс көзіне айналып отыр.
Мирас АСАН,
«Егемен Қазақстан»
