Кеш шымылдығы Мемлекеттік хатшы Гүлшара Әбдіқалықованың құттықтау хатымен ашылды. Бірінші болып сөз алған мемлекет және қоғам қайраткері, Қазақстанның Еңбек Ері Олжас Сүлейменов қаламдас досын күні кеше жазып бітірген жаңа шығармасымен құттықтады.
Алыстан ат арытып келген Әзербайжан жазушысы Эльхан Зал Карахан С.Досановтың әзербайжан тілінде жарық көрген таңдамалы шығармалар жинағының бір томдығын тарту етіп, Әзербайжанда қазақ қаламгерінің алдағы жылы 80 жасқа толатын мерейтойына әзірлік басталып кеткенін хабарлады. Түркиялықтар сәлемін Эльчин, қырғыз бауырлардың ыстық ықыласын Мархабай Ааматов, өзбек туысқандар құрметін жазушы Мехмонқұл Исламқұлов пен Өзбекстанның бас консулы Аброр Фатулаев, өзбек театрының директоры Икрам Хошимжанов, жазушының туған өңірі қостанайлықтар құттықтауын облыс әкімі Архимед Мұхамбетов пен Аманкелді ауданының әкімі Әмірхан Асанов атынан облыс әкімдігінің бөлім меңгерушісі Арман Әденов жеткізді. Алматы қаласының әкімі Бауыржан Байбектің сәлемін қала әкімінің орынбасары Сұлтанбек Мәкежанов, Оңтүстік Қазақстан халқының ақжарма ақ тілегін Наурыз-Әлі Оразымбетов, Жамбыл облысы жұртшылығы ыстық ықыласын Темірхан Әйменов білдірді. Кеш иесін Жүргенов атындағы өнер академиясының ректоры Асхат Маемиров, Мемлекеттік сыйлықтың лауреаты Өтеген Оралбайұлы, т.б. құттықтады. Ақындар Мыңбай Рәш, Қазыбек Иса, зейнеткер ұстаз Фаима Төребекова арнау өлеңдерін оқыды.
Қазақстанның еңбек сіңірген қайраткері Меруерт Түсіпбаева, әнші, Ғабит Мүсірепов атындағы театрдың актрисасы Арай Болатқызы, әншілер Ғалымжан Әбдібеков, Өктем Алтаев әсерлі кешті әсем әнмен әрледі.
Бұл әдеби кеш қаламгерді мадақтаумен емес әдебиет, өнер жайлы сырласып, өмірдің өзекті мәселелері жайлы ой өрбітумен, тәуелсіздік туралы толымды ой толғаумен ерекшеленді.
