Қазақшаға ағып тұр
Жұма, 5 қазан 2012 7:17
Қазақ елінен, қазақ жерінен бақыт тапқан өзге ұлт өкілдерінің арасынан, әсіресе, жас буынның мемлекеттік тілді меңгеруге деген құлшынысы артып келеді. Бұған таяуда Атырауда «Достықтың алтын көпірі» атты өзге ұлт өкілдерінің көркем сөз оқу сайысында және бір рет көзіміз жете түсті. Осы сайыстың ашылу салтанатында Атырау қаласы әкімінің орынбасары Айжан Қарабаева «Қазіргі кезде көркем сөзді мәнерлеп оқуға өзге ұлт өкілдерінің де ынтасы арта түсуде»,– деді.
Жұма, 5 қазан 2012 7:17
Қазақ елінен, қазақ жерінен бақыт тапқан өзге ұлт өкілдерінің арасынан, әсіресе, жас буынның мемлекеттік тілді меңгеруге деген құлшынысы артып келеді. Бұған таяуда Атырауда «Достықтың алтын көпірі» атты өзге ұлт өкілдерінің көркем сөз оқу сайысында және бір рет көзіміз жете түсті. Осы сайыстың ашылу салтанатында Атырау қаласы әкімінің орынбасары Айжан Қарабаева «Қазіргі кезде көркем сөзді мәнерлеп оқуға өзге ұлт өкілдерінің де ынтасы арта түсуде»,– деді.
Өз тілінен жерінгендей болып жүрген кей қандастарымызға үлгі боларлық бұл сайысқа 8 үміткер қатысуға тілек білдіріпті. Бәрі де жоғары және арнаулы орта оқу орындарында білім алып жүргендер екен. Өздерінің ана тілімен бірге мемлекеттік тілді жетік меңгергендерін қазақ поэзиясын мәнерлеп оқу арқылы насихаттауда барынша таныта түсті. Олардың көркем сөзді мәнерлеп оқығанда қазақ тілінің құнарынан қанып ішкені, жан-тәнімен мемлекеттік тілдің өрісін кеңейтуге ұмтылғаны байқалып-ақ тұрған оң талабын қазылар алқасы орынды бағалады.
Нәтижесінде қазақ топырағында кіндігі кесілгенін, қазақшаны ана тіліндей меңгергенін мақтаныш тұтатын, енді Қазақстандай Отанының әлемдегі өркениетті елдер қатарынан орын алуына өз үлесін қосуды мақсат еткен түрік қызы Жан Мурадованың көркем сөзді мәнеріне келтіре оқу шеберлігі бірінші жүлдеге лайық деп табылды. Корей ұлтының аруы Вероника Лидың қазақ тіліне, қазақ поэзиясына ерекше ауған аңсары екінші жүлдемен аталып өтті. Ал орыстың талапты бойжеткені Олеся Авдеева бұл жолы үшінші жүлдені иеленді. Сонымен бірге, Владимир Радиминовичке қазақ тілін меңгеруге талпынысы үшін арнайы диплом берілді.
– Өзге ұлт өкілдері арасында да қазақ тілінің ең әдемі, оралымды қанатты сөздерін қолданып, мақалдап сөйлейтіндері аз емес. Міне, сондайларды көргенде төбем көкке жеткендей, марқайып тұрамын. Еліміздің әр түкпіріндегі өзге ұлттардың мұндай талпынысы, талабы мемлекеттік тіліміздің мәртебесін биік деңгейге жеткенінің дәлелі, – дейді ғалым, ақын Қадыр Жүсіп. – Мемлекеттік тілді білу – еліміздегі бірлікті, достықты нығайтуға да серпін береді.
Жолдасбек ШӨПЕҒҰЛ,
«Егемен Қазақстан».
Атырау облысы.
