Тағдыр тәлкегімен шетел асқан
Сенбі, 14 сәуір 2012 7:57
ОТАНДАСТАРЫМЫЗ ҚАЗАҚСТАНҒА ҚАЙТА ОРАЛҒАНДА ТАҢДАУДАН ҚАТЕЛЕСПЕГЕНДЕРІН РИЗАШЫЛЫҚПЕН ӘҢГІМЕЛЕЙДІ
Солтүстік Қазақстан облыстық көші-қон полициясы басқармасының мәліметтері бойынша, соңғы 5 жылда Қызылжар өңіріне Германиядан –196, Польшадан – 15, Израильден – 7 адам қайта оралған екен. Біз мақаламызда тағдырдың тәлкегімен шетел асып, кейін Қазақстанға қайтып келген түрлі буын өкілдеріне жолығып, не себепті деген бір ғана сауал қойған едік. Ондағы мақсат мәселенің мән-жайын өз ауыздарынан естіп, түп тамырына терең бойлауға тырысушылықтан туған болатын.
_________________________
Сенбі, 14 сәуір 2012 7:57
ОТАНДАСТАРЫМЫЗ ҚАЗАҚСТАНҒА ҚАЙТА ОРАЛҒАНДА ТАҢДАУДАН ҚАТЕЛЕСПЕГЕНДЕРІН РИЗАШЫЛЫҚПЕН ӘҢГІМЕЛЕЙДІ
Солтүстік Қазақстан облыстық көші-қон полициясы басқармасының мәліметтері бойынша, соңғы 5 жылда Қызылжар өңіріне Германиядан –196, Польшадан – 15, Израильден – 7 адам қайта оралған екен. Біз мақаламызда тағдырдың тәлкегімен шетел асып, кейін Қазақстанға қайтып келген түрлі буын өкілдеріне жолығып, не себепті деген бір ғана сауал қойған едік. Ондағы мақсат мәселенің мән-жайын өз ауыздарынан естіп, түп тамырына терең бойлауға тырысушылықтан туған болатын.
Карл ДЕДЕРЕР, Қызылжар ауданы:
– 90-жылдардың шырғалаңы әлі күнге дейін көз алдымда. Кей кездері түсіме кіріп, елес кезіп жүргендей күй кешемін. Жер шарының алтыдан бірін иеленген КСРО секілді алып державаның күйреп түсетінін кім біліпті? Бір шаңырақ астында мамыражай өмір сүріп келген республикалар арасындағы саяси-экономикалық, мәдени байланыстардың үзілуі, тұрмыс-тіршіліктің күрт төмендеуі, келешекке деген сенімнің жоғалуы – осының бәрі адамдардың бойына қорқыныш ұялатып, жан-жаққа сабылтып жіберді.
Өзгелер секілді бала-шағаның қамын ойлап, күйзеліске түскен күндерді ойласам, денем мұздап сала береді. Еш нәрсені болжап болмайтын сол бір аласапыран кезеңнің жүйкеге ауыр тиетін таусылмас күйбең тірлігі Қазақстанды мекендейтін немістердің Германияға үдере көшуіне соқтырды. Қу тұрмыстың тауқыметімен алғашқы көшке ілесіп, ата-бабамыздың тарихи отанына отбасымды алып мен де жол тарттым. Имандай шыным, басқа бөтен ой болған жоқ. Туған жермен, құлын-тайдай тебісіп өскен достармен қоштасу өзегімді суырып алғандай қатты әсер етті.Талай түндерді ұйқысыз атырдым.
Обалы не керек, ол жақта бар жағдайды жасап бақты. Штутгард қаласының түбіне қоныстанып, жұмысқа орналастым. Баспана тұрғызып, шаруамды дөңгелетіп әкеттім. Жастар емес пе, ұл-қыздарым тез орнығып кетті. Ал маған сіңісу өте ауыр тиді. Сарыарқадай кең далада туып, еркін өскен, қазақ халқының бауырмал, қонақжай қасиеттерімен тәрбиеленген мен Еуропаның салт-дәстүрін, әдет-ғұрпын, шыны керек, қабылдай алмадым. Қазақстанның орны ерекше, бөлек, айырмашылық жер мен көктей екенін, туған жердің бір жұтым ауасына еш нәрсе тең келмейтінін ұғындым. Содан бір күні «Қазақстан, қайдасың!» деп кері тартып отырдым.
Қазір бұрынғы қонысым – Петерфельд ауылында тұрып жатырмын. Тұрмысым шетелдіктерден кем емес. Мал ұстаймын, құс өсіремін. Еркінмін, Азатпын. Тағдырдың туған жермен қайта қауыштырғанына қуанамын. Жыл санап қарышты дамып келе жатқан елдің азаматы болғанымды мақтан етемін. Бүкіләлемдік қоғамдастық алдында өз орны, өз беделі бар абыройлы Қазақстанда Елбасы ұлтаралық татулық пен дінаралық келісімнің өзіндік үлгісін қалыптастырып, бейбітшілік аймағы ретінде де әлем танитын биікке жетті. Осының бәрі – өзара түсіністіктің арқасы.
Ирина ФОЛЕНВЕЙДЕР, Мамлют ауданы:
– Біздің Германияға атбасын бұруымыз өзгешелеу. Ол жақта туыстарымыз тұратын. Солар шақырып қоймағаннан кейін, жастықтың әсері ме екен, қалай көніп қалғанымызды білмей қалдық. Бірақ баруымыздан қайтуымыз тез болды. Жұбайым екеуміздің Баварияда жарты жылдай ғана тұруға шыдамымыз жетті. Балаларымыз да елге оралу туралы ойымызды қуана қолдады.
Иә, шетелде бәрі жақсы, тамаша сияқты. Астарына үңіле қарап, шын мәнінде, олай емес екеніне көз жеткіздік. Бөтен ортаның біздің қалыбымызға келе бермейтін ерекшеліктері көп болып шықты. Жастайымыздан бойымызға дарыған бауырмалдық, кеңпейілдік, Отан мен жеріңе деген перзенттік сүйіспеншілік, тарихы мен мәдениетіне деген зор құрмет байыз таптырмады.
Жерлестеріміз оралуымызды түсіністікпен қабылдады. Келешегі кемел ел алдындағы тарихи жауапкершілігімізді ортақ мақсат-мүддеге жұмылдырып, еселі еңбек етіп жатырмыз. Өзім ағылшын тілі пәнінен сабақ беремін. Жұбайым Владимир кәсіпкерлікпен айналысады. Ұлым спортшы, қызым студент. Айрандай ұйып отырған отбасымызға жазылмас жара, сынық сызат түсіріп алмай, қателікті орнымен түзей білгенімізге шүкіршілік дейміз.
Екі отбасы. Бір тағдыр. Әрқайсысы небір қилы өткелекті бастан өткерсе де, тоғыстыратын ортақ мүдде-мақсат бар. Ол – Қазақстанға деген биік сенім, жоғары рух. Қазақстандық патриотизмді, Отанға, жерге деген махаббатты барша қоғамның күш-қуаты жолында жұмыс істеу, еңбек ету деген табанды қасиет, берік түсінік! Мақаланы әзірлеп бола бергенімізде Көші-қон полициясы басқармасының қызметкерлері Марина Кузьменко (қызы екеуі) деген Грекияда тұрған бұрынғы отандасымыздың Қызылжар өңіріне орныққанын жеткізді. Ондағы терең экономикалық дағдарыс салдарынан ықылас Қазақстанға ауса керек. Петропавлда көңілі қалаған жұмысқа орналасып, жаны жай тапқан. Тұрғылықты жер таңдауда қателеспегеніне бек қуанышты.
Өмір ЕСҚАЛИ.
Солтүстік Қазақстан облысы.