Құрылысы қырық құрау кардиохирургия орталығы
Бейсенбі, 19 сәуір 2012 7:39
Павлодарда кардиохирургия орталығының құрылысы басталғанда жергілікті тұрғындар бір серпіліп қалған еді. «100 мектеп, 100 аурухана» бағдарламасына сәйкес еліміздің Денсаулық сақтау министрлігінің тапсырысы бойынша қолға алынған. Жобалық-сметалық құны 7,6 млрд.теңге тұратын орталық 50 төсектік. Мұнда жылына 700-дей күрделі операция жасалуы тиіс. 2010 жылдың мамыр айында іске қосылуға тиіс орталықтың құрылысы әлі аяқталған жоқ.
Бейсенбі, 19 сәуір 2012 7:39
Павлодарда кардиохирургия орталығының құрылысы басталғанда жергілікті тұрғындар бір серпіліп қалған еді. «100 мектеп, 100 аурухана» бағдарламасына сәйкес еліміздің Денсаулық сақтау министрлігінің тапсырысы бойынша қолға алынған. Жобалық-сметалық құны 7,6 млрд.теңге тұратын орталық 50 төсектік. Мұнда жылына 700-дей күрделі операция жасалуы тиіс. 2010 жылдың мамыр айында іске қосылуға тиіс орталықтың құрылысы әлі аяқталған жоқ.
Үстіміздегі жылдың қаңтар айында Мемлекет басшысы Нұрсұлтан Назарбаевтың төрағалығымен Үкіметтің кеңейтілген отырысы өткені белгілі. Осы жиында елімізде қабылданған «100 мектеп, 100 аурухана» бағдарламасы бойынша жоспарланған 103 емдеу нысанының 57-сі ғана пайдалануға берілгені мәлім болды. Сол пайдалануға берілмей қалған 46 емдеу орнының қатарында Павлодардағы кардиохирургиялық орталық та бар. Біз сылақ, сырлау, ағарту жұмыстары жүріп жатқан орталықты аралап көрдік. Қасымызда осы құрылысты жүргізіп жатқан астаналық «Жаңа құрылыс СПК» серіктестігінің жауапты өкілі Қанат Ибраев бар, жертөлеге де түстік.
Сөз реті келгенде айта кетейік, Денсаулық сақтау министрлігінің өкілі Серік Мусин Астанаға кетіп барамын деп бізбен сұхбаттасудан ат-тонын ала қашты. Мердігерлер 80-90 пайызға дайын десе де, 6 бірдей бөлімше-блок корпустарын аралап шыққанда байқағанымыз – әлі кезегін күтіп тұрған жұмыс бастан асады. Жоғары жақтағылар «Алдағы мамыр айында қайтсеңдер де тапсыруларың керек» – дегенмен төрт-бес жыл ішінде бітпеген қырық құрау, мың бұрау құрылыс жұмыстарының басын қосып реттеп, енді қалған екі айдың ішінде бітіріп, сақадай-сай етіп шығару мүмкін емес сияқты. Мұның себебі, Қанат Ибраевтың айтуынша, мәселе тағы да қаржыға кеп тіреліп тұр. Бұл не деген сонда бітпейтін, түбіне жетіп болмайтын қаражат, 7 млрд. теңге! Жетпеді ме деп таңғаласың. Бөлінген қаражатқа құрылыс та жүргізілді, шетелдік жабдықтар, қондырғылар да алынды дейді. Құрылысы әлі бітпеген орталық бөлімшелерінің ішінде үстінің шаңы бес елі қымбат шетелдік медициналық құрал-жабдықтарды көргенде жағамызды ұстағандай болдық. Тіпті, осыдан екі жыл бұрын әкелінген бағасы аса қымбат шетелдік магнитті резонанстық компьютерлік тамограф құрылғысы электр қуатына қосылып қойылыпты. Оның мәнін сұрағанымызда, мамандар бұл құрылғылар сәл уақыт электр қуатынан ажыратылған жағдайда қолданысқа мүлдем жарамсыз болып қалатынын айтты. Айнала құрылыс жұмыстары жүріп жатыр. Сонда ертеңгі күні бұл құрылғылардың дұрыс жұмыс жасайтынына кім кепіл.
Айта берсек, осындай сорақылықтар толып жатыр. Сонымен, орталық уақытында құрылысы бітіп, неге ашылмады? Бұл сұраққа жаңа орталыққа қызметке келмекші дәрігерлердің де, облыстық денсаулық сақтау басқармасының да жауабы бір, қаржыға байланысты болар, жоба құрылысында күтпеген мәселелер туындаған ба, ол жағы бізге белгісіз,– дейді. Ол қандай мәселелер? Жалпы, бұл жобаны әуелде 2007 жылы орталықтың құрылысын салу жөнінде жарияланған конкурста немістің бір компаниясы жеңіп алған көрінеді. Еуропада салынатын түрлі медициналық мекемелердің құрылысын жобалайтын бұл компания үш қабатты орталық салмақшы болады. Кейін Денсаулық сақтау министрлігі жобаға өзгерістер енгізіп, орталықты 2 қабатты етіп тұрғызу жөнінде шешім шығарған көрінеді. Ал, 3-ші қабат алынсын деген шешім шыққан соң, жеке-жеке салынған орталықтың блок-корпус-бөлімшелерінің үшінші қабаттары және олардың ортасын әйнекті жабындымен қосып тұратын галереяаралық бөлігі алынып тасталыпты. Өзіңіз ойлап қараңыз, қаншама шығын жасалды, қаншама тер текке төгілді.
– Бөлімшелер ортасын қосатын әйнектер солтүстіктің аязына шыдамауы мүмкін, жобаның өзгертілуіне, қайтадан жасалуына осы себеп болған сияқты, – дейді бізбен әңгімесінде Қанат Ибраев. Мүмкін, солай да шығар. Оны министрлік неге ерте ойластырмаған. Жоғарыда жертөлеге де түскенімізді айттық. Әдетте, мұнда су-жылу жүйелері, ғимараттың жұмысын қамтамасыз ететін қондырғылар орналасатыны белгілі. Солай десек те, мұнда жертөледе де халықтың сапырылысып жүретін түрі бар. Өйткені, қоймалар, киім ілгіш, кір жуатын жер, зертхана – бәрі осында. Бір таңғаларлық жағдай – бұл нысанның құрылысы жобалау-сметалық құжаттары мемлекеттік сараптаудан өтпей тұрып-ақ басталып кеткен. Бұдан Павлодар қаласындағы кардиохирургиялық орталықтың жалпы неміс жобасымен салынуына кезінде келісім берілмеді ме екен деген ой келеді, бірақ, сол қарсылыққа қарамай, құрылыс бастауға құжаты болмаса да, жоғары қызмет бабын пайдаланған шенеуніктер қол қойған мәселенің бүгін мынадай мипалау жағдайға түскені өкінішті. Ал, құжатты 2011 жылы желтоқсан айында ғана алыпты. Сонда, оған дейін үш жыл бойы бұл құрылыс заңсыз, құжатсыз салынған болып шыққаны ма?..
Ал, жергілікті билік, денсаулық сақтау басқармасы министрлік өздері тапсырыс берді, өздері жауапты деп бойларын аулақ салғанға ұқсайды. Әйтпегенде, осы орындардың облыс орталығында қолға алынған маңызды әлеуметтік нысанға бақылау жасап, министрлікті мұндағы келеңсіздіктерден дер кезінде хабардар етулеріне, сөйтіп, құжатсыз салынып жатқан күмәнді құрылысты тоқтатуларына болатын еді ғой.
Тоқсан ауыз сөздің тобықтай түйіні – бұл іске жауапты лауазымды басшылардың елімізде қабылданған «100 мектеп, 100 аурухана» мемлекеттік бағдарламасын орындауда талап пен тәртіп, жауапкершілік үдесінен шыға алмағандары айдан анық.
Фарида БЫҚАЙ,
Павлодар.
