Бір халықпыз, бір тағдырмыз!
Сейсенбі, 24 сәуір 2012 7:23
Бүгінде Қазақ еліон сан ұлттар менұлыстардыңордалы ұйығына, шадыман күлкілібақыт ордасынаайналыпотырғандығыбелгілі. Мұнданәсілге бөлу, дінгебөлу, ұлтқа бөлужоқ. Ала қойдыбөле қырықпағанәділетті де салиқалы саясат ұстанғанҚазақстандататулық пен тұрақтылық орнағаны да сондықтан деп білуіміз керек. Алынтымақты жерге ырыс пен бақ қонақтап, әмсе баяндылықпен тұрақтайтынын халқымыздың ғасырлар бойғы даналығы дәріптеп келеді.
Сейсенбі, 24 сәуір 2012 7:23
Бүгінде Қазақ еліон сан ұлттар менұлыстардыңордалы ұйығына, шадыман күлкілібақыт ордасынаайналыпотырғандығыбелгілі. Мұнданәсілге бөлу, дінгебөлу, ұлтқа бөлужоқ. Ала қойдыбөле қырықпағанәділетті де салиқалы саясат ұстанғанҚазақстандататулық пен тұрақтылық орнағаны да сондықтан деп білуіміз керек. Алынтымақты жерге ырыс пен бақ қонақтап, әмсе баяндылықпен тұрақтайтынын халқымыздың ғасырлар бойғы даналығы дәріптеп келеді.
Міне, бізбен әңгімесінде нақ осы орайдағы өрелі ойларын Қазақстанхалқы Ассамблеясының мүшесі, Қазақстанның еңбек сіңірген қайраткері, «Корей мемлекеттік республикалық музыкалық комедия театры» қазыналық кәсіпорнының директоры, «Қазақстан халқы Ассамблеясыәлеуметтік консорциумы» қоғамдық қорының бас директоры, Қазақстанның «Самұрық» ұлт театрының бас директоры Любовь НИортаға салып еді:
Біз қазірде Қазақстан халқының ордалы да ортақ, тату-тәтті де өнегелі отбасында, керегесі кеңінен тартылған шапағатты шаңырағының астында өмір кешудеміз. Тек парасатқа ғана жүгінген, мейірім мен махаббат лебізіне ғана құлақ асатын бұл ордада ешкім де адамдарды ұлтына қарап бөлмейді. Бұл жерде бәрінен бұрын ізгілік пен адалдық, шынайы шыншылдық пен достық жоғары бағаланады. Мен өзім ана ретінде, әже ретінде әрбір қазақстандық үшін бейбітшілік пен тыныштықтан, өз балаларымыздың болашағы мен өз шаңырағымыздың беріктігіне деген сенімділіктен маңызды ештеңе жоқ деп есептеймін. Бұл сенімге баратын жол бағзы замандардан бері белгілі. Барлық уақыттарда мейірімділік пен даналық, өзара құрмет пен сыйластық, адамдардың ынтымағы мен ақыл-парасат, бір-бірін тыңдап, түсіне білуі бейбітшілік пен тыныштыққа бастайтын болған.
Мен он жылдан астам уақыт бойы Қазақстан халқы Ассамблеясының мүшесі болып келемін. Соның арқасында көп этносты Қазақстан халқының мәдениетаралық және этносаралық үйлесімді үндесуіне белсенді қатысып келе жатқанымды мақтан тұтамын. Ал осынау игілікті іс, ізгі ниетімді мен Қазақстанның «Самұрық» ұлт театры және «Қазақстан халқы Ассамблеясы әлеуметтік консорциумы» әлеуметтік қоры арқылы іске асырудамын.
Қазақстанның «Самұрық» ұлт театры Қазақстан халқы Ассамблеясының XVI сессиясында айтылған Елбасы тапсырмасы бойынша құрылған болатын. Бұл театрдың ерекшелігі сол, ол бір мезгілде бірнеше тілде жұмыс істейді. Театр сахнасында арнайы шақырылған шығармашыл, дарынды, қазақстандық қоғамның бірлігін өнер тілінде бейнелеуге қабілетті дара тұлғалар қызмет етпек. Сөйтіп, олар көркемдік құралдар арқылы Қазақстан халқы Ассамблеясының елдегі біртұтас рухани кеңістікті нығайту орайындағы міндеттерін шешуге септігін тигізбек.
Ал осы біртұтас рухани кеңістік дегеніміз байырғы парасатты қазақ ділінде тиянақ табады. Сөйтіп, ол толеранттылыққа, ынтымаққа, өзара сенімге және бүгін таңда 130-дан астам этностардың бесігіне айналған ел мен жерге деген отаншылдыққа, яғни патриотизмге жол ашпақ. Біздің мәдениетіміз қазақстандық қоғамның моральдық-адамгершілік негіздерін өз бойына дарыта отырып, әрі соның соны сипатты көрсеткіші де болып табылады. Сондықтан өнер арқылы ортақ еліміздің бірегей даралығын сақтап, әрі қарай дамытуымыз заңды. Осы жағдайда көпұлтты Қазақстан халқы мәдениеттерінің өзара сіңісіп, терең тамыр жайып баюы оның руханиятына да игі ықпал етеді. Осылайша толерантты, бірнеше тілді меңгерген, оң өзгерістерді ашық қабылдауға икемді және бабалар дәстүрлерін көздің қарашығындай сақтайтын Қазақстан азаматының қайталанбас бейнесі қалыптаспақ.
«Самұрық» ұлт театры белгілі жазушы, драматург, Мемлекеттік сыйлықтың лауреаты Дулат Исабековтің пьесасы бойынша қойылған өзінің алғашқы «Бақыт құсы» атты спектаклін Қазақстан Тәуелсіздігінің 20 жылдығына арнады. Ұлт театры – осындай үлгідегі тұңғыш театр. Қазақстан бойынша оның әзірге баламасы жоқ.
Соңғы бес жыл бойында Ассамблея аясында «Қазақстан халқы Ассамблеясы әлеуметтік консорциумы» қоғамдық қоры мен Мұхтар Әуезов қоры бірлесе отырып, жүйелі де мақсатты жұмыс жүргізіп келеді. Еліміздің біртұтас рухани кеңістігін құру жолында «Жібек жолы бойындағы әңгімелер» форматын пайдаланудамыз. Бұл орайда Қазақстанмен ғана шектеліп қалмай, ізгілікті мұрат-ниетімізге Орталық Азияның басқа да республикаларын тартудамыз. Сөйтіп, үнқатысу өрісі кеңейе түсуде. Бұл дегеніңіз, қазақстандық отансүйгіштік пен патриотизмді, толеранттылықты және әрбір азаматтың ел мен отбасы алдындағы жауапкершілігін тәрбиелеуге бағытталған тағы бір ілкімді жоба болып отыр.
Айта кетерлік бір жағдай, осы әлеуметтік консорциум Қазақстан халқы Ассамблеясы мүшелерінің бастамасы бойынша құрылған еді. Олар бизнестің әлеуметтік жауапкершілігін жақсы түсініп, осы ретте сөзден іске көшудің тәуір үлгісін көрсете білді. Дүние жүзінің көптеген елдерін қаржылық дағдарыс жайлап, тұрмыс дәрежесі төмендеп жатқан кезде біздің Қазақстанымызда көйлек көк, тамақ тоқ дегендей берекелі барқадар жағдай қалыптасып отырғанына шүкіршілік етеміз. Бұл да елімізде жүргізіліп отырған салиқалы да сарабдал саясаттың арқасында мүмкін болған біздің бір бақытымыз шығар. Біздің Ұлт театрымыз еліміздегі Ұлттық әл-ауқат қорымен аттас болып, «Самұрық» деп аталғанын да бір ерекше жақсылық нышанына балаймын. Дулат Исабековтің спектаклінде айғақталғандай, осы «Бақыт құсы» біздің басымыздан мәңгі кетпесін демекпін.
Қорытындылай келе айтарым, Мемлекет басшысының бастамасымен құрылған Қазақстан халқы Ассамблеясы мәдениетаралық және этносаралық үнқатысудың бірегей тетігіне, мемлекет пен азаматтық қоғамның бірлесе іс-қимыл жасауының серпінді құралына һәм дәнекеріне айналды. Біз, Қазақстанның ата- жұртында ыстықтай елжіреп бауыр басып, тереңнен тамыр тартып мекендеген сан алуан этностардың өкілдері өзіміздің ортақ Отанымыздың бірлік-берекесін сақтау орайындағы жоғары парыз жауапкершілігін барша жан-дүниемізбен саналы түрде ұғынып сезінеміз. Себебі, біз Тәуелсіздіктің 20 жылында бір халық, бір тағдыр болып сомдалып үлгердік.
Жазып алған Қорғанбек АМАНЖОЛ.
