Береке беріктірген бірлік
Сәрсенбі, 25 сәуір 2012 7:38
Қазақстанның өркендеген өмірі, нығайған қуаты ең алдымен елдегі барлық этностардың туысқандық пен ынтымаққа ұмтылысының арқасы десек, осының дәлеліне жарқын мысалдар жетіп артылады. Бүгіннен ертеңге жалғасқан жасампаз істерді жарастырушы, жаңғыртушы құтты ұя тұрғысында тұғыры биік Қарағанды өңірі соның үлгілі ортасы деуге әбден лайық. Басы бұдан бір ғасырдан астам бұрын тамыр тартқан, одан беріде қоғам, уақыт өзгерістері сан этностарды тоғыстырып, тағдыр табыстыруы тұрғылықты жұрттың бауырмалдық құшағы әсері екені олар ұмыта қоймас ыстық сезім. Барлығы үшін Қазақтан ортақ Отан, оның бір бөлшегі – Арқа төрі мерейлі мекен.
Сәрсенбі, 25 сәуір 2012 7:38
Қазақстанның өркендеген өмірі, нығайған қуаты ең алдымен елдегі барлық этностардың туысқандық пен ынтымаққа ұмтылысының арқасы десек, осының дәлеліне жарқын мысалдар жетіп артылады. Бүгіннен ертеңге жалғасқан жасампаз істерді жарастырушы, жаңғыртушы құтты ұя тұрғысында тұғыры биік Қарағанды өңірі соның үлгілі ортасы деуге әбден лайық. Басы бұдан бір ғасырдан астам бұрын тамыр тартқан, одан беріде қоғам, уақыт өзгерістері сан этностарды тоғыстырып, тағдыр табыстыруы тұрғылықты жұрттың бауырмалдық құшағы әсері екені олар ұмыта қоймас ыстық сезім. Барлығы үшін Қазақтан ортақ Отан, оның бір бөлшегі – Арқа төрі мерейлі мекен. Аймақтағы 115-ке жуық түрлі этностардың арасында қалыптасқан түсіністік пен келісім ахуалы ұйымшылдықты ұйыстырып, әлеуметтік-экономикалық өрлеуге алтын арқау болуы көпшілік көңілін көріктендіре түскен. Кез келген, тіпті ең аз ұлттық топтың мүддесіне шынайы құрмет-сыйласымдықтың негізі. Жалпы білім беретін мектептерде неміс, корей, татар, поляк тілдері оқытылады. Этномәдени бірлестіктердің бәрінің жанында ана тілді оқып-үйрететін жексенбілік мектептер жұмыс істейді. Соған қоса, мемлекеттік тіл меңгеріледі.
Облыстық әкімдікте өткен өңірдегі этномәдени бірлестіктер жетекшілерімен кездесуде ұлтаралық қатынастарды уақыт талап-талғамына сай дамыту мәселесі алға тартылып, достық пен бірлікті қадірлеу, көздің қарашығындай сақтау мақсатындағы іс-ізденістер жөнінде келелі әңгіме қозғалды. Қазақстан халқы Ассамблеясының мүшесі, облыстық филиалы ғылыми-сараптау тобының жетекшісі Вилен Молотов-Лучанский, Қазақстан корейлері қауымдастығының өңірлік бөлімшесінің төрайымы Лилия Ким, теміртаулық гректердің «Потнас» ұйымының басшысы Деспина Касапиди өз сөздерінде қазақстандықтардың осындай бейбіт және тату-тәтті шаңырақ астында тұрып жатуы тәуелсіздік жылдарында қол жеткізілген басты байлық болып табылатындығын айтты. Қатарлары толығу үстіндегі, қазір 70-ке жуықтаған бұл бірлестіктер тек этностар үшін ғана емес, сондай-ақ бүкіл қоғамға, мемлекеттік мүддеге қажетті істерді бірлесіп жүргізуге белсене атсалысып келеді. Әр этнос тұрақты мекеніне балайтын елдің, жердің тарихын, тілін, ділін, дінін сыйлап, сонымен бірге, төл ұлтының құндылықтарын да қадірлеуді көтере алады. Осы орайда қай-қайсысы қызметіне еркіндік кең, жаңаруға мүмкіндік мол. Немістердің «Видергебурт, литвандардың «Литуаник», гректердің «Авги», армяндардың «Эребуни» сияқты жергілікті ошақтарының игі іс-шараларының жаңғырығы алысқа асып, тарихи отандарына да мәлімділері аз емес.
Осындай облыстық ұйымдар жетекшілерінің біреуі «Құрмет», төртеуі ІІ дәрежелі «Достық» орденімен, бірқатарының «Қазақстан Республикасының Тәуелсіздігіне – 20 жыл» мерейтойлық медалімен марапатталуы елдің туысқандық тамырын нәрлендірушілерге деген жоғары құрметті көрсетеді.
Кездесуде өңірдегі этностар арасындағы достықты нығайтуға, мәдени байланыстарды дамытуға қосқан үлесі үшін 30 этномәдени бірлестікке облыс әкімінің гранттары тапсырылды. Оны алушылардың бірі «Полония» поляк қоғамының төрағасы Александр Сваричевский айтқандай, мұндай қолдау мемлекеттік және ана тілді оқып-үйренуге, қазақстандық отаншылдық сезімге тәрбиелеуге, ұлттық-салт дәстүрлерді дәріптеуге серпін береді.
– Біз этностардың барлығына бірдей мақсат-мүддесіне сай жасалып келе жатқан жағдайға дән ризамыз. Мұның бәрі республикамыздың Тұңғыш Президенті Нұрсұлтан Назарбаевтың көрегендік саясатының шапағаты екенін түсінеміз. Тілегіміз қазақтармен, барша қазақстандықтармен бір. Ол – сүйікті Отанымыздың мерейі биіктеп, абыройы асқақтай беруіне үлес қосу. 17 жылда өңіріміздегі этностық бірлестіктер елеулі азаматтық күшке айналды, олардың қатысуынсыз бірде-бір маңызды қоғамдық-саяси шаралар өтпейді. Мұндай сенім мен жауапкершілікті ақтауды парыз санаймыз, – деді бізбен тілдескенде әзербайжанның «Номус» этномәдени бірлестігінің төрағасы, Қазақстан халқы Ассамблеясының мүшесі Агиф Гамилоғлы Мамедов.
Жылдар бойы көрші-қолаң, дос-жаран сыйлас-сырлас болып өмір сүріп, соған үйренген қарағандылықтар ынтымақ пен бірліктің қадірін жақсы біледі. Сондықтан да достыққа, бауырмалдыққа қашанда берік.
Айқын НЕСІПБАЙ.
Қарағанды.