«Бөбек» жиырмаға толды
Сәрсенбі, 2 мамыр 2012 8:06
«Бөбек» қайырымдылық қорының құрылғанына 20 жыл толуына орай Алматыда «Бөбек» ұлттық ғылыми-практикалық, білім беру және сауықтыру орталығының ұйымдастыруымен «ҚР Президентінің Қазақстан халқына жолдауы аясында ұлттық білім жүйесіндегі «Өзін-өзі тану» пәнінің рөлі мен мәні» деген тақырыпта республикалық семинар-кеңес өтті. Білім және ғылым министрлігі өкілдері, еліміздің жоо ректорлары, «Өзін-өзі тану» пәнін оқытатын кафедралар меңгерушілері мен оқытушылары, біліктілікті арттыру институттарының, облыстық, қалалық, аудандық білім беру басқармаларының басшылары, мектеп, мектепке дейінгі білім беру ұйымдарының жетекшілері қатысқан кеңестің мақсаты – білім беру жүйесінің барлық сатыларында өзін-өзі тану пәнінің рөлі мен мәнін арттыру, рухани адамгершілігі жоғары тұлға қалыптастыруда білім моделін дамыту.
Сәрсенбі, 2 мамыр 2012 8:06
«Бөбек» қайырымдылық қорының құрылғанына 20 жыл толуына орай Алматыда «Бөбек» ұлттық ғылыми-практикалық, білім беру және сауықтыру орталығының ұйымдастыруымен «ҚР Президентінің Қазақстан халқына жолдауы аясында ұлттық білім жүйесіндегі «Өзін-өзі тану» пәнінің рөлі мен мәні» деген тақырыпта республикалық семинар-кеңес өтті. Білім және ғылым министрлігі өкілдері, еліміздің жоо ректорлары, «Өзін-өзі тану» пәнін оқытатын кафедралар меңгерушілері мен оқытушылары, біліктілікті арттыру институттарының, облыстық, қалалық, аудандық білім беру басқармаларының басшылары, мектеп, мектепке дейінгі білім беру ұйымдарының жетекшілері қатысқан кеңестің мақсаты – білім беру жүйесінің барлық сатыларында өзін-өзі тану пәнінің рөлі мен мәнін арттыру, рухани адамгершілігі жоғары тұлға қалыптастыруда білім моделін дамыту. Сондай-ақ кеңес аясында «Бөбек» қайырымдылық қорының құрылғанына 20 жыл толуына орай қор Президенті Сара Назарбаева жиынға қатысушылар мен қонақтарды салтанатты түрде құттықтап, сөз сөйледі.
Уақыт деген зымыранды қойсаңшы. Жетім, қорғансыз, ата-анасының қамқорлығынан айырылған балаларға қол ұшын беріп, көмектесу ниетімен құрылған «Бөбек» қайырымдылық қорының тұсауы кесілгеніне жиырма жыл толыпты. Осы уақыттың ішінде қаншама қыруар жұмыстар атқарылды. Қаншама бейкүнә балалардың басынан сипап, қамқорлық көрсетіп, қаншама науқас балақайларға көмек қолын созды. Міне, кеңестің түске дейінгі отырысында осы жиырма жылда атқарылған шаралар жайында кеңінен сөз болып, жүрекжарды лебіздер білдірілді.
Білім және ғылым вице-министрі Махметғали Сарыбеков «Бөбектің» ұрпақ тәрбиесіне, әсіресе, қорғансыз, жетім балалардың қоғамның толыққанды бір мүшесі болуына қосқан үлесі үшін Сара Алпысқызына балалардың алғысы шексіз екенін жеткізе келе, еліміздегі білім беру мен ағарту саласында орасан еңбегін ескеріп, министр Б.Жұмағұловтың атынан «Білім және ғылымның дамуына қосқан ерекше үлесі үшін» төсбелгісін табыс етті. Сондай-ақ Сыртқы істер министрлігінің ерекше тапсырмалар бойынша елшісі Мадина Жарбосынова халықаралық қауымдастықтағы «Бөбек» қорының орнына тоқталып, оның сан-салалы жұмысына оң баға берді. «Сара Алпысқызы ең алғаш Германияға барған сапарында 60 жылдық тарихы бар жаңа үлгідегі халықаралық отбасылық Балалар ауылымен танысып, осы бағдарламаны 1994 жылы Қазақстанға әкелді. Бүгінде 300 балақай отбасында мамаларымен, бауырларымен бірге тұрып, үлкен сүйіспеншілікпен тәрбиеленуде» дей келе, Халықаралық «СОС Киндердроф Интернационал» қоры президентінің құттықтауын жеткізді.
Онан соң аталмыш қорды алғаш құрушылардың бірі, бүгінде Қазақстан Республикасының Тұңғыш Президенті – Елбасы Қорының президенті, Парламент Мәжілісінің әлеуметтік- мәдени даму комитетінің төрайымы Дариға Назарбаева да естеліктер айтып, өз әсерлерімен бөлісті.
– 1992 жылы «Бөбек» қайырымдылық қорын құруға анаммен бірге атсалыстым. Ол кезде «Достық» үйінде кішкене ғана бөлмеде кеңсеміз болды. Штатта төрт-ақ адам: анам –президент, мен вице-президент, хатшы қыз бен есепшіміз болды. Ол уақыт еліміз қиын кезеңдерді бастап өткізіп жатқан кез еді. Ақша жоқ. Мен ойлаймын, анамның болашаққа деген сенімі, табандылығы мен еңбекқорлығы арқасында «Бөбегіміз» бүгінгідей жағдайға жетіп отыр. Балалар ауылы, Балалар үйі, Үміт үйі, Жасөспірімдер үйі – барлығы анамның жүрегін жарып шыққан дүниелері. Мына жаңа ғимаратта көптен бері болмаған едім, қандай керемет, таңғажайып ертегідей өзгеріп кетіпті. Мұның бәрі Сара Алпысқызының және де осы жылдары қасында жүрген серіктерінің қажырлы еңбегі. Бәрімізге «Бөбектің» елу жылдығын аман-есен тойлауға жазсын», – дей келе Дариға Нұрсұлтанқызы Парламент Мәжілісінің спикері Нұрлан Нығматулиннің құттықтау хатын оқып берді.
«Бөбек» қорының вице-президенті Әлия Назарбаева да Сара Алпысқызының қамкөңіл балаларға ата-аналары бере алмаған мейірімді, аналық махаббатты сыйлап келе жатқанын, әрі анасының осы жылдары атқарған осыншама қайырымдылық істерінің байыбын түсініп, алдағы уақытта осы іске өз үлесін қосатынын тебірене жеткізді.
«Бөбек» қоры соңғы жылдары ата-анасы жоқ және тұрмысы төмен көпбалалы отбасыларынан шыққан, сондай-ақ ата-анасының бірінің қамқорлығында қалған балаларға қолдау мақсатында Сара Алпысқызы атындағы білім грантын белгіледі. Мәселен, биыл ондай грантқа 72 баланың ие болуы – жастарға деген шынайы сүйіспеншілік пен қамқорлықтың көрінісі болса керек. Мұны Сара Алпысқызының сөзімен жеткізсек, «Адамның әр сөзі мен іс-қимылында сүйіспеншілік болуы шарт. «Білім – тек өмір сүру үшін ғана емес, ол толыққанды әрі мағыналы өмір сүру үшін керек».
Мерейтой қуанышымен бөлісуге келген «Бөбек» қорымен жиырма жыл бірге жүріп, оның қалыптасуына, өсіп-өркендеуіне, қол жеткізген жетістіктеріне жетуге бірден-бір атсалысқан серіктестері, достары – Шолпан Құлмаханова, Есетжан Қосыбаев, Әлия Нұғыманова, Алтын Көпаева, Галина Өзбекова, Тұрымтай Қонақай, Валентина Гартман, т.б. естеліктер айтып, шынайы лебіздерін білдірді.
– «Ер – елдің иесі, ана – елдің киесі». Сіз елдің киесісіз. Нұрсұлтан Әбішұлының жанында жүріп, ол кісіге сүйеніш, тірек бола білдіңіз. Есіңізде ме, «Сіз осы жасап отырған ісіңізбен тарихта қаласыз» дегенімде: «Мен тарих үшін, елге белгілі болу үшін қызмет істемеймін. Мен ана ретінде өзімнің ақ жүрегіммен, өзімнің махаббатыммен, сүйіспеншілігіммен қызмет жасаймын» деген едіңіз. Бүгін сол сөзіңізді дәлелдеп отырсыз. Осы жасаған жақсылығыңыз Алладан қайтсын, – деді Алтын Мәмбетқызы риза көңілмен.
Ал Есетжан Қосыбаев «Бөбектің» жаңадан қалыптасқан кезеңінде жұмыс атқарып, ол кезде жауаптан гөрі, сұрақтардың көп болғанын, сонда Сара Алпысқызының адамдарды жақсы көретін қасиетін, тек жақсылық егетін жүрегіне тәнті болғанын жеткізсе, ұзақ жылдар БАҚ-пен тығыз жұмыс жасаған Әлия Нұғыманова балаларға, Отанға қызмет етудің үлгісін көрсеткенін атап өте келе: «Нұрсұлтан Әбішұлының бір айтқаны бар, Сара Алпысқызының ең басты қасиеті – өте шынайы адам. Ол өтірік те, көлгірсіп те сөйлей алмайды. Не жасаса да ақ жүрегімен беріле жасайды деп». Ол рас. Міне, сіз сол қасиеттеріңіз арқылы өз мақсатыңызға қол жеткіздіңіз. Мен соған куә адамның бірімін» деді. Сара Алпысқызына жасалған ең үлкен сыйлық балалар үйінде бірге тәрбиеленген бүгінде жоо бітіріп, отбасылы, үлкен азаматтар болған Саша мен Диманың өздері сияқты тағдыры қиын мыңдаған қорғансыз балалар атынан қорды мерейлі мерекесімен құттықтап, аналарына мықты денсаулық тілеп, гүл шоқтарын сыйлауы болды. Сондай-ақ, Білім және ғылым министрлігінің Балалар құқығын қорғау комитетінің төрайымы Р.Шер әр ана өзінің жүрегінен жаралған баласын бөбегім деп еркелететін болса, Сара Алпысқызы да бөбектеріне аналық қамқорлығын, жүрегін арнағанын, оларды қиын-қыстау шақта «қарлығаштың қанатымен су сепкендей» қанатының астына алып, қолынан келген бар көмегін аямай, ұрпақ тәрбиесіне соншалықты үлкен жауапкершілікпен қарап, нағыз бақытты балалық патшалығын орнатқанын айтты.
Бүгінде «Бөбек» қорының президенті С.Назарбаеваның тікелей бастамасымен құрылған көп салалы «Бөбек» ұлттық орталығы табысты еңбек етуде. Оның құрылымына «Өзін-өзі тану» балалар бақшасы, «Өзін-өзі тану» гимназиясы, «Өзін-өзі тану» гуманитарлық колледжі, Адамның үйлесімді дамуы институты, обсерватория, балаларды сауықтыру қызметі кіреді. Ұлттық орталықтың мақсаты – балаларды жалпыадамзаттық құндылықтармен сусындата отырып, оның негізгі қағидалары шынайылыққа, сүйіспеншілікке, адалдыққа тәрбиелеу.
– Өмірде ешнәрсе кездейсоқ болмайды. Мәселен, мен өзін-өзі тануға қалай келдім? Адам мына өмірге неге келгенін, міндеті қандай, өзінен не күтетінін білу үшін – алдымен өзінің кім екенін білуі тиіс. Жиырма жыл бұрын осы шаруаны қолға алып, бастаған кезде соншалықты ауқымды, адамға да, Аллаға да жағатын іс екенін білгенім жоқ. Ол кезде Әлиямыз кішкене, баламен үйде отырғанмын. Осындай бір істі бастау керек дегенімде: «Өзімнің де жұмысым бастан асып жатыр…» деп ерім қолдай қоймады. Еліміз қиындықты бастан кешірген тәуелсіздіктің алғашқы жылдары. Бірде Нұрсұлтан Әбішұлы жұмыстан сондай қобалжып оралды. Жетім балалар үйінде болғанда, бір баланың басынан сипаса, ол іші-бауырына кіріп, жанынан шықпай айналшықтап, құшақтап қоймаса керек. Мұны көрген тәрбиеші: «Сіз енді барлық баланың басынан сипап шығыңызшы. Олар мейірімді, жылы алақанды сағынады» депті. Содан осы көгенкөз балаларды қолға аларсың деп қолқа салғаны бар. Осылайша, «Бөбек» дүниеге келді, – деп сөз бастаған «Бөбек» қорының төрайымы, «Өзін-өзі тану» бағдарламасының авторы Сара Алпысқызы кішкене «Бөбегінің» қалай ержеткенін, оның тарихына, көмек қолын созған, қайырымдылық, демеушілік жасаған қолы ашық жандар, үлкен жұмысты бірге атқарған серіктестері жайлы жылы пікірлер айтып, шын жүрегінен ризашылығын білдірді. Сонымен қатар 2000-шы жылдары қордың бағытын өзгертіп, ағартушылық жұмысқа қалай келгенін, оның жеткен жетістіктері мен кейбір қызықты сәттерін де әңгімелеп берді.
– 2000-шы жылдары еліміздің экономикалық жағдайы жақсарып, әлеуметтік мәселелер шешілгенмен, жетім, қорғансыз балалардың саны азаюдың орнына көбейе түсті. Менің жасаған көмегім біріне жетсе, біріне жетпеді. Бұл қалай? Ендеше, оның өзімен емес, себеп-салдарын тауып, сонымен күресу керек. Ал оны қалай шешуге болады? Әрине, оны сананы өзгерту, жалпы, адамзаттық құндылықтарды білім беру, ағартушылық саласы арқылы егіп жетуге болатынына көзім жетті. Сонда аналар балаларын тастамайтын, адамдар бір-біріне дос, бауыр болуға, ата-аналарының қателіктерін қайталамауға тырысады. Яғни, қоғамды жақсылық жасау, адамгершілік арқылы да өзгертуге болатынын түсіндім. Соның негізінде өзін-өзі тану бағдарламасы дүниеге келген еді. Иншалла, бұл ісіміз жаман басталып жатқан жоқ, – деді қор төрайымы.
Түстен кейін семинар-кеңеске қатысушылар Елбасының Қазақстан халқына жолдауы аясында балалар мен жастарға рухани-адамгершілік білім берудің міндеттері, еліміздегі үздіксіз білім беру жүйесіне «Өзін-өзі тану» пәнін енгізудің барысы және жарқын болашағы, әлеуметтік педагогика және өзін-өзі тану мамандығы бойынша техникалық және кәсіби білім беру жүйесі мұғалімдері мен бакалаврлар даярлаудың барысы, сондай-ақ өскелең ұрпаққа рухани-адамгершілік білім берудегі отбасы, мектеп және қоғамның өзара ынтымақтастығы жайлы мәселелер талқылады.
Күймен көмкеріліп, әннен шашу шашылған семинар-кеңестің қатысушылары жиын соңында оқыту үдерісінің тәрбиелік бағытын нығайтудың стратегиялық басымдықтарының бірі ретінде аталып өткен «Өзін-өзі тану» білім бағдарламасын одан әрі дамыту бойынша білім беру ұйымдарының ұйымдастыру-басқару және ғылыми-әдістемелік іс-шараларын жетілдіруге бағытталған қарар қабылдады.
Гүлзейнеп СӘДІРҚЫЗЫ,
Алматы.