Бірліктің берекелі бесігі ұрпақ жалғастығына көңіл бөлінді
Жұма, 4 мамыр 2012 8:27
Елімізде Президент Нұрсұлтан Назарбаевтың бастамасымен Қазақстан халқы Ассамблеясының бірегей институты құрылды. Міне, биыл сол Ассамблеяға он жеті жыл толып отыр. Осы жылдары Ассамблея елімізде тұрып жатқан түрлі ұлттар мен ұлыстар өкілдерін бір адамның баласындай біріктіріп, ұйытып отыратын үлкен күшке айналуда.
Жұма, 4 мамыр 2012 8:27
Елімізде Президент Нұрсұлтан Назарбаевтың бастамасымен Қазақстан халқы Ассамблеясының бірегей институты құрылды. Міне, биыл сол Ассамблеяға он жеті жыл толып отыр. Осы жылдары Ассамблея елімізде тұрып жатқан түрлі ұлттар мен ұлыстар өкілдерін бір адамның баласындай біріктіріп, ұйытып отыратын үлкен күшке айналуда.
Мен Ассамблея құрылған күннен, яғни 1995 жылдан Ассамблея Кеңесінің мүшесімін. ҚХА-ның жыл сайынғы сессиясына қатысқанымдағы көзімнің жеткені, Қазақстанда тұрып жатқан ұлттардың ақылмандығы. Өйткені, олар егемендігін алған жас мемлекеттің, оның басшысының төңірегіне топтасып, бейбітшілік идеясын жалғастыруда және Елбасының сара саясатын іске асырып келеді.
Жақында өткен ҚХА-ның ХІХ сессиясы да еліміздегі бірлік пен келісімді, берік ынтымақтастықты, сондай-ақ әр азаматтың өзінің туған жеріне, еліне, отбасына деген адалдығын айғақтай түсті. Міне, осы айтылғандардың ең басында жастардың тәрбиесі мен отбасы мәселесі тұрды. Әсіресе, Мемлекет басшысының сөйлеген сөзінен менің жадымда жастарға, өсіп келе жатқан ұрпаққа деген қамқорлығы туралы айтқандары ерекше сақталып қалды. Шынында да, еліміздің жарқын болашағы сол жастарға байланысты.
Әсіресе, маған акушер-гинеколог дәрігер ретінде Президенттің жастарға ерекше көңіл бөлуі жаныма жылы тиеді. Өйткені, бүгінде елімізде дүниеге ұрпақ әкелетін буын – 20-24 жастағы жастар. Міне, солар ең алдымен мемлекеттен қолдау күтеді. Олай дейтінім, біздер еліміздегі бес ірі жоғары оқу орнында әлеуметтік зерттеу жүргізгенімізде, жастардың барлығы жұмыс істегісі келетіні әрі бірнеше буын ұрпақ жалғастыруды, яғни 30 пайыздан астамы отбасында үш және одан да көп баланың болуын қалайтынын білдірді. Меніңше, біздер осындай оң ықылас-пейілді қолдауымыз керек. «Отан отбасынан басталады» деген, сонда ғана отбасымызда беріктік, тұрақтылық көрініс тауып, олар мемлекетіміздің нығаюына, өркендеп гүлденуіне қызмет етпек.
Бірде Швецияда өткен халықаралық конференцияға қатысқаным бар. Онда күн тәртібінде аз ұлттар әйелдерінің жағдайы деген мәселе көтерілді. Сонда мен тұрып мұндай күн тәртібіндегі мәселені түсінбейтінімді айттым. Өйткені, Қазақстанда ондай проблема жоқ. Біздің елімізде тұратын барлық этностардың мүддесін бөлмей қарайтын Қазақстан халқы Ассамблеясы бар екенін, біз сонымызбен мақтанатынымызды әрі әрбір адам өзінің еңбекке қабілеттілігімен, білімімен мемлекеттің дамуына үлес қосып жатқанын жеткіздім.
Тағы бір айтарым, Президентіміздің өткен сессиядағы баяндамасы соншалықты рухани жағынан байыпты болып, этностардың адамгершілік құндылықтарына бағытталды. Мемлекет басшысының сондағы айтқан бастамалары, ұсыныстары мен міндеттері еліміздің саяси және әлеуметтік-экономикалық өркендеп, тұрақты дамуының тұғырнамасы ретінде қабылданды. Мен ҚХА сессиясына қатысқанымды мәртебе көремін. Сондай-ақ мемлекетіміздің нығаюына өз еңбегіммен үлес қосып келе жатқанымды мақтан тұтамын.
Нина ҚАЮПОВА, Бейбітшілік және келісім сыйлығының иегері, медицина ғылымдарының докторы, профессор.
Екі елді егіз еткен – «Тамыры бір бәйтерек»
Қазақстан халқы Ассамблеясының басшылық етуімен қазақ жеріндегі қырғыз этномәдени бірлестіктері елімізде «Тамыры бір бәйтерек» атты тарихи-мәдени жобаны жүзеге асыруды қолға алды.
Алматыдағы М.Әуезов атындағы мұражай-үйдің мәслихат залында «Мұхтар Әуезов, Шыңғыс Айтматов. Қазақ-қырғыз тарихи-мәдени байланыстарының ажырамас бірлігі туралы» атты дөңгелек үстел отырысы болып өтті. Онда бауырлас екі елдің ұлттық ғылым академияларының мүшелері, ғалымдар мен қоғам қайраткерлері бас қосып, тағдырлары тамырлас қазақ пен қырғыздың өзара тарихи-мәдени, рухани һәм ғылыми ортақ қазынасына қатысты келелі әңгіме қозғады.
Бұл – 2011 жылдың 20 маусымында Қазақстан халқы Ассамблеясы мен Қырғызстан халқы Ассамблеясының арасында жасасқан әріптестік келісім-шартқа орай және де «Түркі халықтарының өзара мәдени үндестігі: тарих пен замана» атты игі шара аясында түбі бір түркі жұртының мемлекет және қоғам қайраткерлері, ғалымдары мен мәдени қызметкерлері, сондай-ақ жазушылары мен журналистері арасында тығыз қарым-қатынас орнату және рухани ортақ құндылықтарымызды күллі әлемге паш ету мақсатында Алматы қаласында өткізіліп отырған алғашқы басқосу.
Ағымдағы жылдың 27-28 наурызында Қырғызстанның астанасы Бішкекте халықаралық семинар болып, онда Қазақстан Республикасының Президенті Нұрсұлтан Назарбаевтың бастамасымен дүниеге келген ұлтаралық түсіністік пен қоғамдық келісімнің қазақстандық жарқын үлгісі – Қазақстан халқы Ассамблеясының келешегі мен әріптестік байланыс жасау тәжірибесін талқылаған үлкен жиын өткен еді. Сол жиында қазақ жеріндегі татулық пен ұлтаралық және діни ауызбірліктің мызғымас модуліне қызығушылық танытқан көршілес республикалардың өкілдері бұл тақырыпты қызу қолдап, Қазақстан халқы Ассамблеясының бүгінгі күнге дейін атқарған шараларын өз мемлекеттерінде бейбіт өмірдің кепілі ретінде жүзеге асыруға ниет білдіріскен болатын. Міне, сол ізгі мақсатты жүзеге асыру жолында бауырлас елдің өкілдері қазақ жерінде «Тамыры бір бәйтерек» деген атпен тарихи-мәдени жобаны жүзеге асыруды қолға алып отыр. Бұл жоба мамыр айының соңына дейін еліміздің 9 өңірінде Қазақстан халқы Ассамблеясының қолдауымен атқарылмақ.
Дөңгелек үстелге Қырғыз Республикасының Қазақстандағы Бас консулы С.Убукеев, Қырғыз Республикасы Ұлттық академиясы жанындағы Философия институтының директоры О.Тогузаков, И.Арабаев атындағы Қырғыз мемлекеттік университетінің ректоры Т.Абдрахманов, Қазақ елі тарапынан Қазақстан халқы Ассамблеясы Төрағасының орынбасары А.Карапетян, М.Әуезов атындағы Әдебиет және өнер институтының директоры У.Қалижан, «М.Әуезов қорының» президенті М.Әуезов, Алматы қалалық тілдерді дамыту басқармасының бастығы М.Ахетов және өзге де ғалымдар қатысты.
Аталмыш жобаның мақсаты ұлттар арасындағы түсіністік пен бейбіт қатынасты нығайту, жас ұрпақты екі елдің заңғар жазушылары Әуезов пен Айтматов шығармашылығын насихаттай отырып бауырмашылықта, өзара туыстық қатынаста тәрбиелеу және қазақ пен қырғыздың мәдениетін, салт-дәстүрі мен рухани құндылықтарын қастерлеп, әлемдік мәдениеттің көгіне шығаруды көздейді.
Дөңгелек үстел отырысынан кейін бауырлас қазақ-қырғыз мемлекеттері арасындағы ынтымақтастықты, рухани-мәдени қатынасты одан әрі дамыту мақсатында екіжақты меморандумға қол қойылды.
Қанат ЕСКЕНДІР,
Алматы.
Суретті түсірген Берсінбек СӘРСЕНОВ.