Бақытты шаңырақ аясында
Сенбі, 19 мамыр 2012 8:35
Даланы жайнатып, құстарды сайратқан көгілдір көктеммен әр адамның мерейін асқақтататын, қуанышқа бөлейтін, пейіл-ниеттерін біріктіретін мерекелер де бірге келеді. Осы мезгілде көктен алтын күн шапақ шашса, халық та думанды сәтті асқақ рухпен өткізіп, шат-шадыман болатыны бар. Әрине, оған – еліміздегі бейбітшілік пен тыныштық, этностар арасындағы жібек жіптей жалғасқан өзара достық пен ынтымақ алтын арқау.
Сенбі, 19 мамыр 2012 8:35
Даланы жайнатып, құстарды сайратқан көгілдір көктеммен әр адамның мерейін асқақтататын, қуанышқа бөлейтін, пейіл-ниеттерін біріктіретін мерекелер де бірге келеді. Осы мезгілде көктен алтын күн шапақ шашса, халық та думанды сәтті асқақ рухпен өткізіп, шат-шадыман болатыны бар. Әрине, оған – еліміздегі бейбітшілік пен тыныштық, этностар арасындағы жібек жіптей жалғасқан өзара достық пен ынтымақ алтын арқау.
Қазақстан халқының бірлігі күнін жетісулықтар да жыл сайын қуанышпен қарсы алатын дәстүр бар. Солардың қатарында Көксу ауданында тұратын әзербайжан ұлтының өкілдері – Кулиевтер отбасы сонау 1930-шы жылдары жер аударылып келгендердің бірі. Еліміз олар үшін құтты қонысқа айналып, бірнеше ұрпақ алмасып, отбасы өсіп-өнді. Олар халқымыздың қонақжай, достық пейіліне сай әркез егемен елдің тілеуін тілеп, болашағы бүгіннен де жарқын болуына атсалысып келеді.
Отан – отбасынан басталады. Мемлекетте береке-бірлік болуы үшін әрбір отбасында татулық, түсіністік болуы қажет деп есептейді. Олар көршілерімен тату, өкпелескен кездері болмапты. Маңайында қазақ, орыс, неміс, татар ұлтының өкілдері тұрады. Дастарқандары жиналмай, бір-бірін құттықтап, елдегі ынтымаққа сына түспесін деп тілейді.
– Қазақстанда өмірге келіп, осындағы бейбіт күндерді бастан кешіргеніме қуанамын. Әлемдегі ертеңіне сенімді, тұрақты ел екені анық. Бүгінде әлемнің бір жерінде соғыс, бір жерінде төңкеріс орын алып жатыр. Бізде тыныштық. Елбасы Нұрсұлтан Назарбаев егемен еліміздегі бейбітшілікті сақтап, ұлтына қарамастан, бір шаңырақ астына біріктіріп, тең құқылы күн кешудеміз, дейді Гүлхара Кулиева.
Өткенсіз бүгінгіні болжай алмаймыз. Бұл аксиоманы Кулиевтер отбасы жақсы түсінеді. Ата-бабаларын аш-жалаңаш келгенде құшақ жая қарсы алған қазақтардың қонақжайлылығын әлі де ертегідей айтады үлкендер. Аға буын «қазақ халқынан айналайын» деуі осыдан. Бұл әулеттің әр мүшесі тарихи отан, екінші отан деген сөз тіркестерін мүлде қолданбайды. Олар адамда бір ғана отан болуы керек, деп тұжырымдайды. Өйткені, өсіп-өнген жері Қазақстанның болашағының берік болуын қалайды. Елдің өркендеуіне өздері де үлес қосуға ұмтылып, білім алуда.
– Қазақстан – менің Отаным. Оны жүрегімде мәңгі сақтаймын. Осы халықтың кеңдігі арқасында менің аталарым осы мекенге тұрақтады. Демек, мен үшін қазақтан асқан ұлт, бұл жерден артық мекен жоқ. Міне, үй салдық, ағаш отырғыздық. Білім алдық. Қызметіміз де бар. Енді ел дамуы үшін тер төгіп, Елбасының саясатын жүзеге асыруға үлес қосамыз, – дейді Сағиб Кулиев әңгімеге араласып.
Қандай қуанышта болмасын Кулиевтер түгел қарашаңыраққа жиналады. Бірін бірі құттықтап, үлкендер бүгінгі тірліктеріне шүкірлік жасайды. Жастарға ел ішіндегі ауызбірлік пен ынтымақты насихаттауға кеңес береді. Мұндай саяси-экономикалық тұрақты ел жоқ, дегенді жиі еске салады.
Көксу ауданында 2000-нан аса әзербайжан ұлтының өкілі тұрса, олардың көңілінде елге, жерге деген риясыз көңілді көресің. Олар өзге ұлт өкілдерімен қатар тату-тәтті ғұмыр кешуде.
Күмісжан БАЙЖАН,
«Егемен Қазақстан».
Алматы облысы.