Аймақтар • 20 Ақпан, 2019

Кітапқұмар адам миллионер бола алады

361 реткөрсетілді

Бүгінде әсіресе жастар арасында әдеби кітаптардың оқылмайтындығы жиі айтылады. Шынында да қазіргі кезде жастардың әдеби кітаптардан гөрі әлеуметтік желіге көп әуестігі бай­қалады. 

Әрбір адам өз мамандығына, жалпы өзі қызығатын тақырыбына орай, талғамы мен қабілетіне қарай толассыз жарық көріп жатқан қыруар өнімдер тізбегінен қажетті кітаптарын таңдай білуінің өзі де – өнер. Мүмкін­дігінше кітапты талғаммен әрі көп оқу парыз, әрине. Бірақ қазіргі қоғамдағы пікір жастардың кітап оқымауына біріншіден, әлеуметтік желілер кедер­гісін келтіруде десе, екіншіден, қазір сапалы шығарманың аз екендігін алға тартады. 

Жолымыз түсіп кітапханаға бар­ған­да жастардың көбі оқу залын­дағы кітаптардан қажетті мағ­лұ­мат­тарын көшіріп алып, жөндеріне жүре беретінін байқаймыз. Көшеден кітап құшақтап жүрген жастарды да кездестіру қиын. Оған қоса бүгін кітаптарды интернет желісіне енгізу де заман талабына сай құбылыс болып отыр. Қазіргі кезде небір кітаптардың ғаламтордағы нұсқалары да бар. Бірақ мұқабасын қолыңмен ұстап, парақтап еркін оқи беретін кітаптан артық ешнәрсенің жоқтығын ашық мойындауымыз керек. Қанша дегенмен, бүгінде уақыты өте тығыз халық үшін интернет желісі оңай болып тұр. Алайда оқуға ниеттенген адам өзіне қажетті кітапты дүниенің қай бұрышынан, қандай бағаға болсын тауып алады. 

Бірақ кітапқұмар адамның мил­лионер болуы да мүмкін екен. Жас­тар­ды кітап оқуға ынталандыру мақ­са­тында Тараз қалалық «Жамбыл-Тараз» газеті жыл басында жалпы жүл­де қоры 3 миллион теңге бола­тын кітап оқу байқауын жарияла­ды. Иә, бұл бастама да жастарды­ кітап оқу­ға баулитын жақсы амалдың бірі.­ Арнайы ақылдастар алқасы құрылып, алқа төрағасы болып жазушы, Қазақстанның еңбек сіңірген қайраткері Несіпбек Дәутайұлы бекі­тілді. «Ақылдастар алқасы бірлесіп отырып, 100 кітаптан тұратын тізім жасадық. Оның тең жартысы қазақ, қалғаны орыс тілінде ұсынылады. Ал байқауға қатысушы 5-7 сынып оқушылары кемінде 15, 8-11 сынып оқушылары 20 кітапты оқу жылының соңына дейін оқып шығуы тиіс. Бұл межеден асқан адам байқау жеңімпазы атанып, миллион теңге иеленеді. Жеңімпаз оқылған кітаптар бойынша сұрақ қою әдісімен анықталады», дейді газеттің бас редакторы Эльмира Мырза-Ғали.

Әрине  Әулиеата өңірінде мұндай мазмұнды бастаманың көтерілгені құптарлық. Нәтижесінде Тараз өлке­сін­де мектеп оқушылары арасында кітап­құмарлар ортасы қалыптасып ке­леді. Мәселен, Тараз қаласындағы Бауыр­жан Момышұлы атындағы №45 гимназияның 9-сынып оқушысы Қазына Әбдісейіт Төлен Әбдіктің «Оң қол» шығармасының әсерімен бөлісті. Оқушы Алманың тағдыры өзін қатты ойлантқанын айтады. «Жалпы, бір тәннің ішінде екі жанның қатар өмір сүруін алғаш естуім. Оқыған қызықты әңгімелерімнің ішіне «Оң қол» шығармасын да жатқыза аламын», дейді ол. Сонымен қатар №46 орта мектептің 10-сынып оқушысы Нұрлыбағым Құдайберген Уильям Шекспирдің «Ромео мен Джульетта» кітабын әлемдегі ең әдемі махаббат хикаясына жатқызады. «Менің ойымша, Ромеоның тағдырына Капулетти әулетінің қыздарына ғашық болу жазылған секілді. Неге десеңіз, Ромео Джульеттаға ғашық болмас бұрын Розалина атты қызға ғашық болады. Алайда бұл махаббат тек ойда ғана болады. Ал Джульеттаның орны мүлде бөлек», дейді аталған байқауға қатысушы Нұрлыбағым.

Бүгінде елімізде әдебиетті дамыту бағытында ұйымдастырылып жатқан шаралар көп. Бірақ кітап оқу үшін қыруар қаражат тігіп, жастарды кітаптың қасиетіне баулу да бір ғанибет. Нәтижесінде оқушылардың кітапқа деген қызығушылығы артып, жастар арасында оқырмандар ортасы қалыптасады. Бұл да бүгінгідей кітап оқылмайды деген уақытта жастарға кітап оқытудың таптырмас әдісі.

Хамит ЕСАМАН, 

«Egemen Qazaqstan»

Жамбыл облысы

Соңғы жаңалықтар

Ғарыштағы қоқыс (видео)

Видео • Бүгін, 13:08

Жарқын жобалар

Аймақтар • Бүгін, 10:00

Сөз сойыл №88

Руханият • Бүгін, 09:42

Трактормен келген фельдшер

Аймақтар • Бүгін, 07:00

Сабақ тоқтады, жолдар жабылды

Аймақтар • Бүгін, 06:53

Қар қалың, қауіп көп

Аймақтар • Бүгін, 06:51

Ырғын қар ырық берер емес

Аймақтар • Бүгін, 06:50

143 жолаушы құтқарылды

Аймақтар • Бүгін, 06:47

Жырақтағы жұлдыздар

Қоғам • Бүгін, 06:43

Такси және тойымсыздық

Қоғам • Бүгін, 06:14

Балабақша бос тұр

Қоғам • Бүгін, 06:00

АӘК: жаңа тәртіп тиімді ме?

Медицина • Бүгін, 05:56

Ұқсас жаңалықтар