Бауырластық баурайы
Жұма, 8 маусым 2012 7:44
ӘСЕМ ӘЛЕМ – ӘЗЕРБАЙЖАН!
Кеше Бейбітшілік және келісім сарайында өткен Әзербайжанның Қазақстандағы мәдениет күндерінің ашылу салтанатына ҚР Мәдениет және ақпарат вице-министрі Асқар Бөрібаев пен Әзербайжанның Мәдениет және туризм вице-министрі Севда Мәмедәлиева қатысып, сөз сөйледі. Арқа төсінде басталып, Алатаудың баурайында жалғасатын думанды шеру маусымның 9-ы күні Жамбыл атындағы Қазақ мемлекеттік филармониясының Орталық концерт залында өтетін гала-концертпен түйінделеді.
Жұма, 8 маусым 2012 7:44
ӘСЕМ ӘЛЕМ – ӘЗЕРБАЙЖАН!
Кеше Бейбітшілік және келісім сарайында өткен Әзербайжанның Қазақстандағы мәдениет күндерінің ашылу салтанатына ҚР Мәдениет және ақпарат вице-министрі Асқар Бөрібаев пен Әзербайжанның Мәдениет және туризм вице-министрі Севда Мәмедәлиева қатысып, сөз сөйледі. Арқа төсінде басталып, Алатаудың баурайында жалғасатын думанды шеру маусымның 9-ы күні Жамбыл атындағы Қазақ мемлекеттік филармониясының Орталық концерт залында өтетін гала-концертпен түйінделеді.
«Менің бүгін Астанаға бірінші рет келуім. Астананың түркі әлемінің мәдени астанасы болып жариялануы тегін емес. Себебі, Астана – арман қала, деді Әзербайжан Мәдениет және туризм вице-министрі С.Мәмедәлиева БАҚ өкілдеріне берген сұхбатында, – Менің тағы бір байқағаным, қалада құрылыс жұмыстары өте қарқынды жүріп жатыр екен. Адам қызығарлық тамаша сәулет нысандары тұрғызылыпты. Біраз жерді аралап көрдім. Қазақтар еңбекқор халық екен. Жаңадан салынған қала болғанмен заманауи мегаполистердің ешбірінен қалыспайды. Мұндай астанада өмір сүрудің өзі адам үшін зор мәртебе. Осының бәрі Қазақ елінің Тұңғыш Президенті Нұрсұлтан Назарбаевтың идеясымен жүзеге асып жатқан жобалар екені даусыз.
Әзербайжан мен Қазақстанның арасындағы бауырмалдық байланыстың тамыры тереңде жатыр. Бұл ұлт көсемі Гейдар Әлиевтің тұсында басталған туыстық қарым-қатынас дер едім, өйткені екі ел басшыларының бір-біріне деген құрметі керемет болатын. Қазір де сол баяғы достық қарым-қатынас ойдағыдай жалғасын тауып келеді. Қазақстан Әзербайжанның халықаралық жобаларына қашанда қолдау көрсетуден танған емес. Әсіресе, мәдени салада барыс-келіс дамып келеді. Сіздер біздердің жобаларымызға, біз сіздерде өтетін халықаралық фестивальдар мен вокальдық байқауларға қатысып тұрамыз. Кітапханалар мен музейаралық тәжірибе алмасулар ұдайы тоқтаған емес. Қарағанды облыстық театрында әзербайжан драматургының шығармасы сахналанды. Мұны ТҮРКСОЙ Халықаралық ұйымының Бас хатшысы Дүйсен Қасейінов тамашалады. Осының өзі қазақтардың әзербайжан өнеріне көрсеткен үлкен құрметі деп есептеймін».
Биыл елорда келбеті өзгеше нақышқа бөленіп, «Астана – түркі әлемінің мәдени астанасы» атанды. Ақпандағы салтанатты жиынға түбі бір түркі жұртынан қонақтар келіп қатысты. Жалпы, түркі өркениетін қалыптастыруда шығармашылық топтардың қатысуымен өтетін халықаралық фестиваль сынды шаралардың өзі үлкен рөл атқарып, түбі түркі жұртының ежелден тамырлас, рухтас екені сезілуде. Ел Президенті Нұрсұлтан Назарбаев Қазақстан халқына Жолдауында: «Астана 2012 жылы түркі әлемінің мәдени Астанасы болып жарияланды. Осы халықаралық іс-шараларды лайықты өткізуіміз керек» деген болатын. Әзербайжанның Қазақстандағы мәдениет күндері осы мақсаттың өмірдегі айқын көрінісі іспетті әсер қалдырады. Тар, нагара, канон сынды дәстүрлі музыкалық аспаптарда ойнайтын ансамбль «Сары гәлин» әнін, Әзербайжан Мемлекеттік би ансамблі «Ялла» биін, сондай-ақ Симара Иманова, Сабухи Ибаев сынды өнер шеберлері «Дилькәш», «Ай, Дильбәр», «Олмасайды», «Карабах шикестеси» сияқты таңдаулы шығармаларды жоғары деңгейде орындап берді. Меймандардың жаныңды жаһұтқа бөлейтін жайдары өнері Астанаға түркі өркениетінің орталығы деуге лайықты тұрпат беріп, Бейбітшілік және келісім сарайы шығыстық мақамға малынды.
Түркі жұрты бір-бірін не үшін іздеп жатыр, мұрат-мүддесін біріктіруіне не себеп деген сауал туады. Ең алдымен айтарымыз, бүгінгідей жаһандану заманында кім-кімге де туған тілдің толғағы басты мәселеге айналып отыр. Әдет-ғұрып пен салт-дәстүрде, дәстүрлі музыка мен тіл мәселесінде өзара бірлесіп, ойласып шешетін жәйттер баршылық. Халықтық игілікті, ортақ қазынаны корғап, сақтау үшін де түбі түркі жұртының бірлігіне көп нәрсе байланысты болып отыр. Тарих сабағы рухани қанаты қайырылған халықтың қалыбы бұзыларын ақаусыз жеткізеді. Бұл ретте әзербайжан мәдениеті мен өнерінен қаймағы бұзылмаған өнегені, тұнығы шайқалмаған бұлақты байқадық. Танымал өнер шеберлері мерекелік кеште ұлттық музыканың інжу-маржандарын орындап, өнердің қай саласында болсын өздерінің халықтық кәусардан қанып ішкен ұрпақтың жалғасы екендіктерін аңғартты. Қай шығарма да шынайы рухында шырқалды. Әзербайжанның Мемлекеттік би ансамблі, ұлт-аспаптар ансамблі, Ф.Амиров атындағы Мемлекеттік ән-би ансамблінің балет тобы әзербайжан халқының бұрынғы дәстүрлі мәдениеті мен жаңғырған кейінгі кейпінің тұтас бейнесін қамтыған бағдарлама ұсынды. Жалпы, әзербайжан музыкасы мен сахналық өнері дегенде, қазақ көрермені алдымен У. Гаджибековтің есімін айтары сөзсіз. «Аршын мал алан» спектаклі күні бүгінге дейін көрерменнің сүйіп тамашалайтын бірден-бір сахналық қойылымы десек, кеңестік заманның өзінде-ақ зор құрметке ие, эстрада жұлдызы Полад Бюль-Бюльоглының есімін білмейтін бірде-бір қазақстандық жоқ шығар. Айта берсек, екі халық руханиятына ортақ мұндай қымбат тұлғалар баршылық. Мәдени жақындасулар сол өнегені әрмен қарай жалғастырарына сенеміз.
Қарашаш ТОҚСАНБАЙ,
«Егемен Қазақстан».
