«Молпродукт» зауыты 1997 жылы құрылғанымен дәл осындай биіктіктерді бағындыруға бірден жете қойған жоқ. Осы уақыт аралығында табыстың тайқазанын тасытуға қанша ұмтылса да бірқатар кедергілер қолбайлау болды. Әсіресе шикізат тапшылығынан тұралап, тығырыққа тірелген сәттер жиі кездесті. Оған қаражаттың жетімсіздігі, кеңес кезінен қалған ескі құрал-жабдықтарды ауыстыру мүмкіндіктерінің шектеулігі секілді қиындықтар қосылып, «шықпа жаным шықпаның» тірлігін бастан өткеруге тура келді. Жалақының уақтылы берілмеуі, өндіріс цехтарының тоқтап қалуы салдарынан білікті мамандардың, тәжірибелі кадрлардың өзге өңірлерге, Ресейге қоныс аударуы онсыз да сиқы кеткен ортаның да, әлеуметтік мәселелерді де тым күрделендіріп жіберді. 2012 жыл зауыт үшін бетбұрыс кезеңі ретінде есте қалды. Басшылық тізгіні еңбек жолын сүт комбинатынан бастап, осы саланың қыр-сырын жетік білетін Роза Сүлейменоваға сеніп тапсырылды. Ол жұмысқа кірісе салысымен кәсіпорынды қайтсе де сақтап қалудың, сауықтырудың нақты жолдарын ойластырып, ұсыныстар әзірлеп, республикалық ведомстволар алдына бірнеше мәрте мәселе етіп қойды. Содан «Бизнестің жол картасы-2020» бағдарламасы шеңберінде 3,5 миллиард теңге мөлшерінде мемлекеттің қолдау несиесіне қол жеткізілді. Бұл қаражатқа цехтар жаңартылып, Еуропадан әкелінген «Тетра Пак» заманауи қондырғылары орнатылды. Осылайша өнімнің ондаған түрі шығарылып, сақтау мерзімі 40 күннен 1 жылға дейін ұзартылды. Бұрын тәулігіне тұтынушыларға 20 тонна ғана өнім жөнелтілсе, бұл көрсеткіш 350 тоннаға дейін ұлғайтылды. Жұмыс үрдісі толық автоматтандырылып, еңбек өнімділігі артты. Германиядан, Швециядан, Франциядан инновациялық жобаларға негізделген құрылғылар, тоңазытқыш агрегаты бар көліктер, сүт сақтауға арналған танкерлер жеткізілді. Осы жылы облысқа іссапармен келген Елбасы зауытқа арнайы соғып, Орталық Азияда баламасы жоқ бірегей сүт өндіру алаңының автоматтандырылған өндіріс әлеуетіне жоғары баға берді.
Содан бергі кезеңде қазақстандық экспорттық даму перспективаларына бағдарланған бірқатар озық жобаларды сәтті жүзеге асыра білген «Молпродукт» ЖШС бүгінде сүт өнімдерін заманауи технологиямен өңдейтін сүт нарығының бірегей көшбасшысы саналады. Дайын өнім шығарудың барлық сатыларында өнім сапасына бақылау жүйесі орныққан. Халықаралық ISO 22000:2005 /НАССР/ стандарт сертификаты бойынша жұмыс істейді. Роза Әбдіғалымқызы ұжымның күш-жігерін ортақ мақсатқа жұмылдыра отырып тұрақты еңбек ететін 250 жұмысшы-қызметкердің өмір сапасына көңіл бөлуді басты мақсат санайды.
– Кәсіпорын үкіметтің қаржылық қолдауына сүйеніп келсе, ендігі кезектегі міндет – ұжым мүшелерінің әлеуметтік-тұрмыстық жағдайын ұдайы жақсарту. Бәсекеге қабылеттілігіміз нығая түскен сайын кіріс те молайып келеді. Өнімді өндіру өз алдына, басты мәселенің бірі – өткізу, сату, қолайлы нарық көздерін іздестіру, табу. Күндік сүт өңдеу қуатты 500 тоннаға лайықталған зауыттың экологиялық таза өнімдері үлкен сұранысқа ие. Қаймақ-сүт өнімдерінің 60-тан астам аталымы шығарылады. Еліміздің барлық өңірімен қатар Ресейге де экспортталады.Түскен табыстың бір бөлігін материалдық-техникалық базаны нығайтуға, еңбеккерлердің игілігіне жұмсайтын боламыз. 100 мың теңгеден айналатын орташа жалақы одан әрі өсіріледі, – дейді Р. Сүлейменова.
Оның айтуынша, «Қазақстан даму банкі» АҚ-ы арқылы сүт өнімдерін өндіру және оны одан әрі экспортқа шығару мақсатымен үш жылға дейінгі мерзімге екі миллиард теңге мөлшерінде жаңартылмалы кредиттік желі ашылыпты. Мұның өзі сыртқы нарыққа жеткізу көлемін арттыруға зор ықпал етеді. Шекаралас аймақтардағы Ресей облыстарында сүт тұтынудың жылдық мөлшері 1,3 миллион тонна екенін ескерсек, білікті басшының бұл бағыттағы ұстанымы өте құптарлық. Сату географиясын кеңейту үшін шикізат сатып алуға, басқа да өндірістік шығындарды жабуға қосымша ресрустар қажет болғандықтан, мұндай қадамдарға бару қалыпты жайт. Осында өндірілетін сүт өнімдерінің 13 мың тоннасын көрші ел сатып алып келсе, енді оның мөлшерін екі есеге дейін көбейтіп, жылдық түсімі 4,3 миллиард теңгеге жеткізілмек. Экспорттық үлес 30 пайызға дейін артады. Үлкен қызығушылық танытып отырған Қытай еліне қарай жол ашылса, табыс еселене түсеріне күмән жоқ.
Біз білетін Роза Әбдіғалымқызы осындай білікті басшы, істің адамы.
Өмір ЕСҚАЛИ,
«Еgemen Qazaqstan»
Солтүстік Қазақстан облысы