Қыз-келіншектерге арналған өнер тартуы «Пәк сезім» атты махаббат пен құштарлық сезімін сипаттайтын үздік жұмыстардан құралған. Амарантенің бұл туындысы әйелге ғана тән нәзік әрі романтикалық сезімнен бастап, ойнақылық пен құштарлықты оятар көңіл күйдің қайталанбас ғажайып өрнектерін қамтиды. «Махаббат сезімі әрқилы: құштарлық пен тамсану, табандылық, нәзіктік әрі жылулық сезімдерінің жиынтығы бұл. Оны түсіну немесе ұстап көру мүмкін емес. Алайда, оны жүрегіңізге қондырып, бойыңыздағы ішкі әрі сыртқы өзгерістерге тәнті болуға болады. Сосын махаббат жайлы айтсақ, ең әуелі нәзік жандыларды сөз еткеніміз жөн. Себебі бұл олардың бойында туа біткен қасиет. Әйел заты болмаса, ерлер бұл сезімнен мақұрым қалған болар еді. Менің балеттерім тап осы туралы», дейді әйгілі Рикардо Амаранте.
Бекзат өнерді бағалайтын көрермен үшін кеш бағдарламасына екі нәзік әрі сезімге бай қойылым еніп отыр: «A Fuego Lento» (Баяу жалын) және «Love Fear Loss» (Махаббат. Айырылу. Үрей).
Ендігі жерде «Астана балет» театрының репертуарынан орын алған аталмыш шығармалардың премьерасы 2016 жылдың соңында заманауи хореографияны ұнатушылардың қошеметіне бөленген болатын.
«A Fuego Lento» қойылымында хореограф адам баласының махаббат пен құштарлық сезіміне алғаш еліткен тұста, бойын кернеген жалын жайлы баяндайды. Рикардо Амарантенің айтуынша, бұл балеттің әр қимылы сезімтал танго ырғағына тербелген эмоциялық қуатты ұлықтайды.
Хореографтың екінші туындысы да, алдыңғысынан еш кем емес. Яғни, «Love Fear Loss» француз әншісі Эдит Пиафтың махаббат сезіміне шомылып үлгермей жатып, сүйіктісінен қапияда айырылып қалған қасіретті тағдырын суреттейді.
Рикардо Амарантенің айтуынша, «Пәк сезім» бағдарламасының басты тартуы – аустриялық композитор Франц Шуберттің №14 Ішекті аспаптар квартеті, ре минор «Ажал мен ару» атты музыкасына қойылған «Silent Voices» («Ұяң дауыстар») атты тың неоклассикалық қойылым.
«Пластика тілінің құдіретімен өз басым, адам баласының ішіндегі дауыстар жайлы баяндағым келді. Орындаушылардың келбеті мен тәнінің көркем үйлесімін қолдана отырып, біз, адамзаттың көзге көрінбейтін, құлаққа естілмейтін сұхбаттастары жайлы айтып беруге тырыстық. Сол арқылы адамның ішкі күйін, бойын билеген үрей мен қорқыныш, үміт пен күмән сезімін жеткізбекші болдық», – дейді, хореограф.
Сондай-ақ бағдарламаға қосымша, Арманд Амардың музыкасына қойылған «Әлем» спектаклінің үзіндісі көрсетілмек. Ресейлік хореограф Никита Дмитриевский қойған бұл спектакль «Астана балет» театрының сахнасында 2014 жылы көрсетілген болатын.
Айнаш ЕСАЛИ,
«Egemen Qazaqstan»
