Ел сенімі ақталса
Сенбі, 5 мамыр 2012 7:36
Құқық қорғау қызметі ел тыныштығының кепілі болумен қатар, қарапайым халықтың сенім артар тірегі де. Себебі, адамдар арасында қандай да бір түсінбеушілік жағдай туындай қалса, міндетті түрде құқық қорғау қызметіне жүгінетіні ақиқат. Тіпті, ауылдық жерлердің өзінде бұзақылар бір-бірімен қағысып қалса, учаскелік полицияға барып, мәселені шешеді. Сондықтан, әрбір құқық қорғаушы өте сауатты, мәдениетті және елмен дұрыс тіл табыса алатын білікті де білімді маман болуы тиіс.
Сенбі, 5 мамыр 2012 7:36
Құқық қорғау қызметі ел тыныштығының кепілі болумен қатар, қарапайым халықтың сенім артар тірегі де. Себебі, адамдар арасында қандай да бір түсінбеушілік жағдай туындай қалса, міндетті түрде құқық қорғау қызметіне жүгінетіні ақиқат. Тіпті, ауылдық жерлердің өзінде бұзақылар бір-бірімен қағысып қалса, учаскелік полицияға барып, мәселені шешеді. Сондықтан, әрбір құқық қорғаушы өте сауатты, мәдениетті және елмен дұрыс тіл табыса алатын білікті де білімді маман болуы тиіс. Осыған байланысты ел Президенті «Әлеуметтік-экономикалық жаңғырту – Қазақстан дамуының басты бағыты» атты Жолдауында еліміздегі құқық қорғау органдарының қызметкерлерін кезектен тыс аттестаттаудан өткізу туралы айтқан болатын. Елбасының бұл сөзі шынымен-ақ қоғам дамуы үшін, құқық қорғау органдары үшін шешімін табу керек мәселе болып келген. Мұны талдаған зиялы қауым да аттестаттаудан өткізуді жеделдетіп қолға алу керек екенін де айтып жүрген болатын. «Халық сұраса, хан түйесін сояды» демекші, Елбасы айтып, елі қолдаған бұл сынақ күшіне енді. «Қазақстан Республикасы құқық қорғау органдарының қызметкерлерін кезектен тыс аттестаттаудан өткізу туралы» Жарлыққа қол қойылды.
Бұл кезектен тыс аттестаттаудың мақсаты қандай дегенге тоқталатын болсақ, бұл бизнес пен қоғамның қолдауына жауап беретін қазіргі заманғы құқық қорғау жүйесін құруға арналған кадрлық әлеуетті қалыптастыру болып табылады. Сөйтіп, құқық қорғау саласының атына жаманат келтіріп, күйе жақтырып алып, беделін түсіріп жүрген кейбір қызметкерлердің қызметіне сай еместігін анықтап, мамандар арасын тазарту. Сонымен бірге, адал және кәсіби қызметкерлерді іріктеудің тиімді тетіктерін құру, құқық қорғау органдарының кадр саясатын сапалы түрде өзгерту және оған халықтың сенімін арттыру.
Осыған байланысты жарлықпен Жоғары аттестаттау комиссиясы туралы ереже, оның құрамы, Кезектен тыс аттестаттауды өткізу қағидасы және тиісті іс-шаралардың жоспары бекітілді. Құқық қорғау органдарының қызметкерлеріне кезектен тыс аттестаттауды өткізу кезінде аттестаттаудан өтушінің қызметіне, оның сыбайлас жемқорлыққа қарсы заңнаманы сақтауына баға берілетін болады. Аттестатталатын қызметкердің адами бет-бейнесін айқындайтын оның кәсіби және жеке бас ерекшеліктерін бағалауға ерекше назар аударылатындығы қатаң тапсырылды. Сондықтан, бұл нағыз білімділер мен біліктілердің сынағына айналмақ. Кезінде бұқпантайлап өтіп кеткен қызметкерлер қақпа сыртына шығарылады. Өйткені, осы сынақты алу үшін сай тасындай жасақталған Жоғары аттестаттау комиссиясы, орталық және өңірлік аттестаттау комиссиялары құрылып отыр.
Аттестаттаудың жүйесі де жеңіл-желпі өтем деушілерге ерік бермейді. Себебі, сыннан өткен әрбір құқық қорғаушы Қазақстан Республикасының заңнамасын білумен қатар және логикалық ойлау қабілетін компьютерлік тестілеуді, тиісті құқық қорғау органы қызметінің ерекшелігін ескере отырып дене шынықтыру, әскери және қызметтік даярлық бойынша белгіленген нормативтерді тапсыруды, сондай-ақ психологпен әңгімелесуді бастан өткереді. Онымен қоса, қызметкермен Президент жанындағы Жоғары аттестаттау комиссиясы, не тиісті аттестаттау комиссиясы өткізетін әңгімелесу болып, тиісті шешім шығаруын қамтиды.
Сыбайлас жемқорлықпен табанды күресуді темірдей тәртіпке айналдырған Елбасы бұл комиссия жұмысының да аяғын шалыс баспауын қатаң ескертті. Президент жанындағы құқық қорғау органдарының қызметкерлерін кезектен тыс аттестаттаудан өткізу жөніндегі жоғары аттестаттау комиссиясы туралы ережеде міндеттер айқындалды.
Мәселен, комиссияның міндеттерінде кезектен тыс аттестаттаудан құқық қорғау органдары бірінші басшыларының бірінші орынбасарларын және орынбасарларын, құқық қорғау органдары ведомстволары басшыларын және олардың орынбасарларын, құқық қорғау органдары орталық аппараттарының департаменттері бастықтарын (Бас прокуратураның және Қаржы полициясының құзыретіне тіл саясаты, ақпараттық және құжаттамалық қамтамасыз ету, мемлекеттік құпияларды қорғау мәселелері кіретін департаменттерінен, сондай-ақ тылдық және қаржылық қамтамасыз ету департаменттерінен басқа), құқық қорғау органдарының аумақтық немесе оларға теңестірілген мамандандырылған бөліністерінің басшыларын және олардың орынбасарларын, құқық қорғау органдарының ведомстволық жоғары оқу орындарының басшыларын және құқық қорғау органдарының орталық аппараттарының республикалық аттестаттау комиссияларының құрамына кандидаттарды өткізу тапсырылған.
Міне, осылайша ең әуелі құқық қорғау саласын басқарып отырған басшылардан бастап, бүкіл қатардағы қызметкер де осы сүзгіден өтіп, өз біліктіліктері мен білімін іс жүзінде дәлелдейді. Сонымен қатар, бұл сынақ құқық қорғау саласын тазартып қана қоймай, кәсіби шеберліктерін шыңдап, білімдерін көтеріп, жауапкершіліктерін арттырары сөзсіз. Бәрінен бұрын елімізде сол сыннан сүрінбей өткен мықты да кәсіби мамандар ел ертеңі үшін аянбай еңбек етіп, сауатты да адал жұмыс жасайтынына халық сенім артып отыр. Осы сенім ақталса екен дейміз.
Ал бүгінгі таңда Қызылорда облыстық прокуратурасы органдарының 127 жедел қызметкерін аттестаттаудан өткізуге дайындық жұмыстары жүргізілуде. Оның ішінде прокуратура органдарында жиырма жыл қызмет өтілі бар 9, сондай-ақ жаңа лауазымға кемінде бір жыл бұрын тағайындалған 11 қызметкер бар.
Сапарбек НҰРПЕЙІСОВ, Қызылорда облысының прокуроры, аға әділет кеңесшісі.