Заңға бағыну керек
Сенбі, 19 мамыр 2012 8:00
Конституцияның 1-бабының 1-тармағында: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп жазылған. Бұл адам құқығы мен бостандығы елімізде алғашқы орында тұратындығын көрсетеді. Осы тұрғыда республикамызда түрлі заңдық шаралар да өтіп келеді. Солардың бірі де бірегейі өткен республикалық Заңгерлер съезі десек, артық айтқандық емес. Осы ретте біз Заң саласы мен құқық қорғау органдарында қызмет етіп жүрген «Ішкі істер органдары медиа орталығы» ЖШС бас директоры Алмас СӘДУБАЙМЕН ой бөліскен едік.
Сенбі, 19 мамыр 2012 8:00
Конституцияның 1-бабының 1-тармағында: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп жазылған. Бұл адам құқығы мен бостандығы елімізде алғашқы орында тұратындығын көрсетеді. Осы тұрғыда республикамызда түрлі заңдық шаралар да өтіп келеді. Солардың бірі де бірегейі өткен республикалық Заңгерлер съезі десек, артық айтқандық емес. Осы ретте біз Заң саласы мен құқық қорғау органдарында қызмет етіп жүрген «Ішкі істер органдары медиа орталығы» ЖШС бас директоры Алмас СӘДУБАЙМЕН ой бөліскен едік.
– Алмас Кәдірбекұлы, республикалық Заңгерлер съезі өтті. Онда түрлі ой пікірлер мен ұсыныстар ортаға салынды. Бұл басқосудың заң саласында қалам тербеп жүрген журналистер үшін де берері мол. Ал қазақтілді журналистикада құқық саласы тақырыбына қалам тартып жүргендер кемшін екені де жасырын емес. Демек, заңгерлер съезінен не күтеміз?
– Заң – халық үшін. Заң – халықтың қорғаушысы. Заңға бағыну бар да, оған сену бар. Республикалық Заңгерлер съезі де заңды сыйлау мен оны құрметтеудің сипатын тағы бір көрсетіп берді деп ойлаймын.
Ал біздің сала сенімді бекітуге, заңды құрметтеу мен оны түсінуге, кез келген қоғамдық мәселені заң арқылы шешуге болатындығына көз жеткізуге бағытталады. Сондықтан заң саласының журналистері сұхбат алуға, репортаж жасауға барса да, мақала жазуға отырса да құқықтық нормативтерге сүйенуі керек. Себебі, сіздің барып отырған адамыңыз, яғни құқық саласының адамы заңды әліпбиді жатқа білгендей біледі. Ал өзің білмейтін тақырыпта ол адаммен қалай тіл табысуға болады? Жаңа заң шықты ма, оны оқу керек, баптар өзгерді ме, оны түртіп қою керек. Жастар көбіне жалпылама жазады. Және әлеуметтік тақырыптарға құмар. Оларды бір тақырыпқа негіздеу және жүйелеу үшін көп жұмыстар істеуге тура келеді. Аға тілшілер бала тілшілерге білгенін үйретеді, басшы ретінде өзіміз кеңес береміз. Астана да бір күнде салынған жоқ қой, ақырын жүріп, анық басып, бағыт-бағдарымызды айқындап, оң-солымызды танып келеміз.
– Халық құқық қорғау органдары қызметкерлеріне қаншалықты сенеді? Заңгерлер съезінің бұл ретте берер көмегі қандай?
– Құқық қорғау органдары қызметкерлерінің имиджін көтеру, олардың жанкешті қызметтерін, жай ғана отбасындағы адамдық бейнесін ашу, халыққа таныту біздің басылымдардың басты бағыты болып табылады. Қылмыстың орын алуы БАҚ-та сенсация болады да, оның құрықталуы көбіне көлеңкеде қалады. Қарапайым ғана мысал, 40 градус аязда жол сақшылары күні бойы жел өтінде тұрып қызмет етеді, ал біз көліктен шығып, құжат көрсетуге ерініп жатамыз. Немесе өрт сөндірушілердің бүкіл еңбегін олардың кешігіп келуімен жоққа шығара саламыз. Құдай сақтасын, бір қиындық бола қалғанда шартты түрде қолымыз солардың нөмірін тере бастайды. Ал мұның өзі – сенім. Яғни, солар ғана құтқарып я сақтап қалатынын білеміз. «Бір құмалақ бір қарын майды шірітетіні» тағы бар.
Қазір бейбіт өміріміз бен түн ұйқымыздың тыныштығы – белгілі бір дәрежеде құқық қорғау саласы қызметкерлерінің арқасы емес пе?! Жоғарғы Соттағы жаңа реформалар да көп ұзамай өз нәтижесін береді деп білеміз. Құқығымыздың қорғалатынын білгендіктен де біз қазір батыл сөйлейміз, батырлық әрекеттерге барамыз. Басты байлық – еркін өмір сүру. Демократиялық қоғам дегеніміздің өзі де сол – өз еркіндігіңді сезіну және өзгенің еркіндігіне қол сұқпау. Заңгерлер съезінің негізгі өзегі де осыған саятын болса керек.
– Әңгімеңізге рахмет.
Әңгімелескен Әбдірахман ҚЫДЫРБЕК,
«Егемен Қазақстан».
