Өнеге
Жұма, 4 мамыр 2012 7:47
Әдетте, жұрт жоғары қызмет пен лауазымдарға өлермендікпен ұмтылатындарға сақтана қарап жатады. Оған себеп те жоқ емес шығар. Ал сол қызмет пен лауазым жақсы адамның алдынан өзі ұшырасып, жолын ашып жатса, бұл ұжым үшін де, қоғам үшін де көбіне-көп олжа ма дейсің. Қалай болғанда да, есімі еліміздің зиялы қауымына біршама таныс Мұхамбетқасым Қойшыбайұлы Шәкенов ағамыздың өмірі мен еңбек жолына зер салсаң, осы ойға беки түсесің.
Жұма, 4 мамыр 2012 7:47
Әдетте, жұрт жоғары қызмет пен лауазымдарға өлермендікпен ұмтылатындарға сақтана қарап жатады. Оған себеп те жоқ емес шығар. Ал сол қызмет пен лауазым жақсы адамның алдынан өзі ұшырасып, жолын ашып жатса, бұл ұжым үшін де, қоғам үшін де көбіне-көп олжа ма дейсің. Қалай болғанда да, есімі еліміздің зиялы қауымына біршама таныс Мұхамбетқасым Қойшыбайұлы Шәкенов ағамыздың өмірі мен еңбек жолына зер салсаң, осы ойға беки түсесің.
Жамбыл облысының Сарысу ауданындағы малды ауылда туып-өскен, бала кезден талапты Мұхаң сонау 50-ші жылдардың аяғында мектеп қабырғасында жүргенде-ақ әр қияға ой жіберіп, көлік жүргізушілікті де, фотоға түсіруді де үйреніп алған екен. Сапалы білім алуды ойлап, облыс орталығындағы мектепке ауысып, сонда жүргенде облыстық радиода балалар бағдарламасын жүргізетін диктор болғаны да бар. Соңғы сыныпта әскери училищеге оқуға түсуге талаптанып, оның да сынағынан сүрінбей өте шыққан. Бозбаланы журналистік романтика да қызықтырған. Бүгінде біз білетін Мұхаң шындап талпынса жақсы журналист болып кетуі де мүмкін еді. Бірақ баланың көңіл қалауын «Қарағым, ауылда туып-өстің, күнкөрісіміз малдың арқасында… Лажы болса, мал маманы болғаның жақсы» деген әкенің талабы шешіпті. Қазақы тәрбиеге қанық ауыл баласы әкенің айтқанын тілек емес, заң деп қабылдайды. Мұхаң 1959 жылы Алматы зоотехникалық-малдәрігерлік институтының ветеринария факультетінің есігін ашады.
«Ветеринария – өте қадірлі мамандық. Академик Константин Иванович Скрябиннің: «Медицина адамды емдейді, ветеринария адамзатты емдейді» деген қанатты сөзі бар, – дейді Мұхаң. – Осы мамандықты меңгергеніме өкінбеймін».
Малдың еті мен сүтінсіз күніміздің екібастан қараң екені өз алдына, бұл сол жейтін етіміз бен ішетін сүтіміздің сау малдың өнімі болуы тиіс дейтіні шығар мұнысы. Ал оны қай кезде де дұрыс, сауатты малдәрігерлік қызметсіз қамтамасыз ету мүмкін емес.
Тағы бір мал маманының: «Мал дәрігері болу адам дәрігері болудан да қиын. Адам қай жері ауыратынын өзі айтады, ал малдың ауруын өзің табуың керек…» – дегенін де естідік. Бұл да жаны бар сөз шығар…
Институтта жақсы оқып қана қоймай, осы оқу орны футбол командасының құрамасында ойнаған, әрі комсомол ұйымының белсендісі болған Мұхаң дипломын алған соң, өз ауданындағы «Коммунар» кеңшарының шалғайда жатқан «Көкдала» бөлімшесіне мал маманы болып қызметке кіріседі.
Тағдыр Мұхаңа өкінбестей еңбек жолын, еліне, халқына абыроймен қызмет ету бақытын бұйыртып тұрған болып шықты. Негізгі мамандығы бойынша Свердлов (қазіргі Байзақ) ауданына ауысып, есепке тұру үшін ол комсомол комитетіне соғады. Сөйтсе, басшылық оған бос тұрған ұйымдастыру бөлімінің меңгерушісі қызметін ұсынады. Обкомкомсомолдың бірінші хатшысы Тасболат Байталиев Мұхаңның ұйымдастыру жұмыстарына бейімділігін Алматыдағы студент кезінен байқаған екен. Реті келіп жатса, Мұхаңды қоғамдық қызметке тартуды аудан басшылығына сол құлаққағыс етіп қойыпты.
Мұхаңның содан кейінгі еңбек жолы жөнінде аз айтуға да, көп айтуға да болады. Аз дейтініміз: сыдыртып өте шықсаң, ол жол ақ парақтың жартысына-ақ сыйып кетеді. Жоғарыда аталған қызметтен кейін ол жол бір жерде ұзаққа созылып, екінші бір жерде шолақтау қайырылып, Жамбыл аудандық комсомол комитетінің екінші хатшысы, Қазақстан комсомолы ОК нұсқаушысы, бөлім меңгерушісінің орынбасары, Мәскеудегі БЛКЖО ОК нұсқаушысы, Жезқазған облыстық комсомол комитетінің бірінші хатшысы, Ақтоғай ауаткомының төрағасы, Жаңаарқа аупарткомының бірінші хатшысы, Қазақстан компартиясы ОК инспекторы, Торғай облатком төрағасының орынбасары, Қызылқұм аупарткомының бірінші хатшысы, Қазақ тарихи және мәдениет ескерткіштерін қорғау қоғамы Орталық кеңесінің төрағасы, ҚР Президенті мен Министрлер Кеңесі Аппаратының бөлім меңгерушісі, республика Жоғарғы Кеңесі Аппаратының басшысы, ел Үкіметі, кейіннен Министрлер Кабинеті бөлім меңгерушісінің орынбасары, бас инспекторы болып жалғасты. Зейнеткерлік жасқа жеткеннен кейін де еңбектен қол үзбей, бүгінде «КEGOC» ұлттық компаниясында жауапты қызмет атқарып келеді.
Ал көп айтуға да болады дейтініміз: бұл жөнінде тұтас кітап жазсаң да артықтық етпейді. «Жадымдағы жылдар» деп аталатын ондай кітапты Мұхаңның өзі 2009 жылы жазып шығарғаны да рас.
Ол кітаптан «осыларды мен істедім» деген бір жолды да таппайсың. Бірақ кітапты оқу барысында атқарылған істердің ту сыртында іске де, адамдарға да жанашыр, ақылды басшының тұрғанын сезінесің.
Әрине, бір кітапта Мұхаң көрген-білгенінің бәрін жаза қоймаған болар. Соның өзінде де осы кітапты оқу барысында Мұхаңның талай-талай тағылымды оқиғаларды бастан өткергенінің куәсі боласың. Оның істің көзін білетін басшы, тамаша ұйымдастырушы, елжанды, ұлтжанды азамат болғанына көз жеткізесің. Түрлі жоғары лауазымды қызметтерді атқара жүріп, өз мүмкіндігінің аясында мәдениетіміз бен өнерімізге, дініміз бен ділімізге қамқор болғанын аңғарасың.
Ал олар неден көрінеді?
Бұған да Мұхаңның еңбек жолында мысал етерлік деректер аз емес.
– 1988 жылы Қызылқұм (қазіргі Отырар) ауданын басқаруға барғанымда құмдағы шопандардың осы кезге дейін киіз үйлерде қыстайтынын көргенде таңғалдым, – деп еске алады Мұхаң. – Олардың көпшілігінде электр жарығы жоқ екен. Түнде майшам жағады. Жергілікті халықтың жартысынан азы ғана таза ауыз сумен қамтылған.
Жаңа басшы ең алдымен шопандардың осы әлеуметтік жағдайын шешумен айналысуды қолға алады. Жарты мыңнан астам малшыны үш күнге жинап, дәрігерлік тексеруден өткіздіреді. Сөйтсе, олардың жартысынан көбінің денсаулығында ақау бар екен. Содан соң, барған жылдың күзінде-ақ жұртты жұмылдырып, жергілікті материалдарды пайдаландырып, екі айда 28 үй, 28 қой қора, 18 монша салдырады. Шопандардың бәрін де киіз үйде қыстаудан құтқарады. Мамандар жіберіп, өзге облыстардың озық тәжірибесін зерттетіп, соларды өздерінде қолдануға көңіл бөледі.
Діни насихатқа тыйым салынған сол кездің өзінде Арыстан баб кесенесін пайдалануға бергіздіреді. Сондай-ақ, көне Отырар топырағында мұражайды ашқызып, оның алдына әл-Фараби ғұлама бабамыздың ескерткішін орнатқызады. Отырар төбесіне бей-берекет қазба жұмыстарын жүргізуге тыйым салуға қол жеткізеді. Аудан жұртының еңсесін көтерген өзгерістер, міне, осылай бастау алады.
Айта берсең, сол ескерткішті орнатудың тарихы да қызық. Бұған дейін көне Отырарда әл-Фарабидің атында көше де, ескерткіш те жоқ екен. Сұрастырып байқаса, Алматыға орнату үшін жасалған бір ескерткіш келбеті келмейді деген сылтаумен Шымкенттің саябағында жатқан болып шығады. «Мың жыл бұрын оны қай қазақ суретке түсіріп алды дейсің?» деген уәж айтып, Мұхаң әлгіні алдыртып, ұнаған соң, Отырар топырағына орнаттырады. Сол ескерткіш қойылған жерінде жарасып-ақ тұр.
Әрине, басшы болу үшін адамға кемел білім, биік парасат керек. Осылар табылса, қажет кезінде басшының басынан дұрыс шешім, аузынан жұрт құлақ қоятын көшелі сөз шықпақ.
Мұхаң осы Қызылқұм ауданын басқарып тұрғанда, өзінің туған топырағына Монғолияның ғарышкері Гуррагча досын ертіп ақын Мұхтар Шаханов келе қалады. Отырар халқы өзінің қадірлі перзентін қошеметтеп қарсы алып, «Ауданның құрметті азаматы» атағын береді. Ал Гуррагчаның иығына шапан жабумен шектеледі. Ақын Мұхаң алғашында соңғы шешімге қатысты «тарынудың» себебін түсінбей қалады.
Сонда аудан басшысы ақынға: «Мұха, басқа жақта ондай құрмет көрсете берсін. Ал бізде болмайды, өйткені, мына тұрған Отырарды оның бабалары 1219 жылы жермен жексен еткен» деп, мәселенің мән-жайын есіне салады. «Мен бұл жағдайды қалай ойламағанмын?» деп, орынды уәжге, әрине, ақын да тоқтайды.
Мұхаңның өміріндегі мына бір оқиға 1981 жылдың сәуірінде Жаңаарқа ауданын басқарып жүргенде болыпты. «Дружба» кеңшарының Рахметжан Салжанов есімді қызметкері әйелінің толғағы ұстап, мейірбикені ертіп алып аудан орталығын бетке алып шығады. Бірақ жолда мінген көліктері бұзылып тұрғанда, оларға өзінің қызмет көлігімен келе жатқан аудан басшысы Мұхаң жолыға кетеді. Жағдайды білген соң, ол көлігін соларға беріп, өзі үйіне жаяу қайтады. Ертеңіне перзентханада дүниеге ұл келеді де, Мұхаңның адамгершілігіне сүйсінген ата-ана нәрестесіне оның есімін бермек болады. Алайда, сол арада көрші әйел түнде түс көргенін, түсінде осы Салжановтың Ауғанстанда соғыста жүрген ұлы Нұрлан қасына Ерлан деген баланы ертіп келгенін айтады. Сөйтіп, ырымшыл қазақ енді нәрестені Ерлан деп атайды.
2009 жылы осы Ерланға түсінде біреу: «Мынаны саған бір адам беріп жіберді», – деп жас нәрестені ұсынады. Ол таңертең көрген түсін әке-шешесіне айтады. Салжановтар сол кезде Ерланның өзі дүниеге келерде болған оқиғаны естеріне алады. Сөйтіп, 19 ақпанда Айгүл келіндері босанғанда, немерелеріне Мұхамбетқасым деген ат береді. Астанада тұратын үлкен ұлы Нұрланға: «Сол кісі бар ма екен, табыңдаршы, өзіне айтайық», – деп тапсырады. Ол Мұхаңды елордада өткен бір той дастарқанында ұшыратып, танысып, онысын әке-шешесіне хабарлап, қуантады.
Мұхаң содан кейін жолдастарын ертіп бір кезде өзі қызмет атқарған Жаңаарқаға барып, кішкентай аттасына батасын беріп қайтады. Иә, адамға жасалған бір жақсылық кейіннен осылайша «кино оқиғасына» бергісіз болып жалғасқаны да бар. Адамға үлкен абырой осындай үлкенді-кішілі іс-әрекеттеріңмен де келеді екен.
Әрине, осыларға қарап, Мұхаңның алдынан ұдайы ақ таң атып тұрды екен деуге де болмас. Өмір болған соң, тағдырдың теперіші мен адамдар арасындағы күрделі қарым-қатынастардың сан алуан шырғалаңын ол да бір кісідей бастан өткерді. Әсіресе, ақылды да аяулы, ұлдан жалғыз Асқарынан қапыда көз жазып қалуы сөзбен айтып жеткісіз ауыр қасірет еді. Бірақ өмірде көпті көрген Мұхаң тағдырдың бұл сынағын да сабыр мен төзім сақтап, көтере білді. «Қайтейін, халқым аман болса, жалғыз болмаспын» деп жұбатты өзін. Институтта бірге оқып жүріп, тағдырын қосқан жары Шекер тәтемізді де жұбатып, жанына сүйеу бола алды. Бүгінде олар үлкен қызы Гүлнара мен күйеу баласы Нұртуғанның, Асқар ұлының жары Мәдина келінінің, немерелері Жандос, Нұргүл, Есеттің және Ұлыбританияда магистратурада оқитын қыздары Айгүлдің тілеуін тілеп, тіршілік кешуде.
…Талабымен де, талпынысымен де жастай көзге түскенімен, Мұхаң жоғары қызмет атқаруды ешқашан жалаң мақсат тұтпапты. Жастар одағының Жамбыл аудандық ұйымынан Алматыдағы комсомолдың орталық комитетіне қызметке шақырылғанда да, бірінші хатшы Өзбекәлі Жәнібеков марқұмның «партиядан шығартқызбақ болған қысымынан кейін» ғана келіскен екен. Ол қызметті – әрдайым азаматтың халық алдындағы міндетін абыроймен өтеу мүмкіндігі деп ұқты. Көріп отырғанымыздай, осы қарапайым да ұлы мақсат оны жолынан жаңылдырған емес. Түсінгенге одан алатын өнеге де аз емес сияқты.
Әбдімүтәл ӘЛІБЕКОВ.
Астана.