Қызыр қонған шаңырақ
Сенбі, 19 мамыр 2012 7:45
Шілік – қалың қыртысты тағдыры бар қазақтың киелі ауылдарының бірі. Шымкенттен бабтардың бабы Арыстанбабқа өтетін жұрт жолдың екі шетінде майда шіліктерден шегенделген қоршауы бар ауыл тұсынан өтіп бара жатып, шыға берістегі еңселі мектеп пен күмбезі күн көзімен ойнаған мешітке бір қарайламай өте алмайды. Жері сортаң тартып жатқан өңірдің заманында қазақтың өркендеген ауылдарының бірі болғандығын бажайлай бермес. Иранның бағындай бау-бақшасы, егіншілігі, малды, қорлы ауыл болғанын көнекөз қариялар айтқанда ғана “ой, пәлі” деп қасын керер. Сортаң далаға қарап көңілі қолаңтақсып құлазыр.
Сенбі, 19 мамыр 2012 7:45
Шілік – қалың қыртысты тағдыры бар қазақтың киелі ауылдарының бірі. Шымкенттен бабтардың бабы Арыстанбабқа өтетін жұрт жолдың екі шетінде майда шіліктерден шегенделген қоршауы бар ауыл тұсынан өтіп бара жатып, шыға берістегі еңселі мектеп пен күмбезі күн көзімен ойнаған мешітке бір қарайламай өте алмайды. Жері сортаң тартып жатқан өңірдің заманында қазақтың өркендеген ауылдарының бірі болғандығын бажайлай бермес. Иранның бағындай бау-бақшасы, егіншілігі, малды, қорлы ауыл болғанын көнекөз қариялар айтқанда ғана “ой, пәлі” деп қасын керер. Сортаң далаға қарап көңілі қолаңтақсып құлазыр.
Қалай десе де, Шілік қазақтың тарихында өзіндік орны бар тарихи ауыл екендігі белгілі. Әріге бармағанда, Тұрғанбайдай датқаның өзіне қараған ағайынын ешкімге көз түрткі етпеймін деп отырықшылыққа баулыған ата мекені. Бөген өзенін байлап, арық қаздырып, жазыққа су шығарған, егін еккен, мал баққан, базар ұстаған құт мекені.
Атадан жақсы ұл туса,
Елдің қамын жейді.
Атадан жаман ұл туса,
Елдің малын жейді.
Елдің қамын жеген Тұрғанбай датқа жұртым иманды болсын, жаратқанын танысын, адал өмір сүрсін деп мешіт те салдырған.
Тұрғанбай датқаның немересі, алты алашқа даңқы кеткен сері, балуан, әнші Иманжүсіптің ел жұтқа ұрынған ашаршылықта Шіліктен керуен шығарып, Арқадан астық алдырып, кіре тартқандығы да үлкен кісілік, жас ұрпаққа ғибрат.
Қазақтың талай заңғар азаматтарына құт мекен болған Шілік ауылы, оның өмірбаяны өрілген тарихының шетін тарқата бастасаң саф алтындай қазынаға кезігерің хақ.
Шілікте ата-баба өсиетін жалғаған тағы бір жайсаң азамат – Сейітжан Құртаев екендігін көзі көргендер аңыздай етіп айтады.
Атақты Меңлібай қажының ұрпағы Секең, Сейітжан аға 1939 жылы Ташкенттегі Орта Азия университетінің физика-математика факультетін тәмамдағаннан кейін білімді жастың алдында Алматыдай шаһардың жолы ашылып тұрған. Білімді қазақ жастарына мемлекеттің сусап тұрған шағы. Жас түлек алдында үлкен даңғыл жол жатқан. Әке кесімі тоқтатты.
“Айналайын-ай, басқа ұлдарым болса алдыңнан жарылқасын дер едім, сен жалғызымсың ғой” деген. Мұнысы кәрі әке-шешені ауылға тастап ұшпаққа жетпей-ақ қой дегені ғой.
Есті азамат түсінген. Ауылдағы мектепке мұғалім болып орналасты. Тал шыбықтай майысып өсіп келе жатқан жас өскіннің дарақ болып тамыр тартуына бойындағы бар білімін жұмсады. Ел басына күн туғанда қан майданға аттанды. Соғыстан жаралы болып елге оралып, ұстаздық қызметін жалғастырды. Әке-шешесін әлпештеп күтіп, батасын алды. Хадиша ана екеуінің отбасынан бес ұл, алты қыз өсті. Ата-ана бақыты деген осы шығар.
1960 жылдары қыс қатты болып, Бөген өзенін мұз буғанда көктемде қарғын су жүріп Шілікті су алады. Сонда жаңа мектеп құрылысы қолға алынғанда майдангер-ұстаз Сейітжан қатты қайрат көрсетіпті.
Қазақ “әке көрген оқ жонар” дейді. Жауынгершілік ыңғайында айтылғанымен, көргенді ата-ана тәрбиесін көріп өскен ұл мен қыз арман-мақсатыңа жеткізеді деген пайымдаудан туған ой ғой.
Сейітжан аға мен Хадиша ана тәрбиелеген балалар ел-жұрт қызығып қарайтындай өнегелі болып өсті.
Сейітжан аға қазақтың айтулы ақындарының бірі Айтбай молда Белгібаевпен туған бажа. Отырарға келгенде сол кездегі студент, бүгінгі академик Өмірзақ Айтбаевты үйірсектеп, оқуы, тоқуы жайында сұрастырады екен. “Кейін аңғарып байқасам, әке көкірегінде “менің де балаларым студент атанатын күн қашан туар екен” деген арман жатады екен ғой” деп еске алады Өмекең.
Сол Керімжан, сол Серікжан, сол Әлімжан студент атанып, бір-бір жоғары оқу орнын тәмамдап қана қоймай, білімнің биік белестерін бағындырды. Үшеуі де техника ғылымдарының докторы. Алып серіктестік, компания, ордалы оқу орны, аудан мен қала басқарып, абырой биігін төмендетпей жүрген де осылар. Олар туралы, басқа балалары жайлы әңгіме бөлек.
Ал, кәсіпкерлікке бой ұрған Серікжан Сейітжановтың елді индустрияландыру бағдарламаларына Елбасымыздың өзі қолдау көрсетіп, ақ тілеу айтып жүретіндігі елдің көз алдында.
Сол Серікжан аға Шілікте өз қаржысына туған еліне көмегім болсын деп атты кісі түсіп қарайтындай мектеп салды. Мектеп салған жалғыз Сейітжанов емес қой дерсіз, келісерміз. Бірақ… Сейітжан Құртаев атындағы орта мектептің ішкі ауласына кірген жанның жүрегін баурайтындай ескерткіш асқақтап тұрады.
Сол кездегі заман үлгісімен иінінде китель, саптама етік киген қою қасты, бүркіт қабақ, сұсты жүзді майдангер мұғалімге орнатылған ескерткіш жанындай жақсы көретін әкеге ғана емес, барлық ұстаздар қауымына, оның ішінде алғашқы мұғалімдерге орнатылған ескерткіштердің жиынтық образындай көңіл баурайды.
Биыл көктемде қазақтың тарихқа бай, көне ауылдарының бірі Шілікте жұрт айта жүрерліктей той өтті. Асқар тау әке мен аялы алақан ана құрметі үшін. Сейітжан әке бүгінде тірі болғанда 100 жасқа толар екен. Ал, Оңтүстіктің ел ардақтайтын аналарының қатарына жеткен Хадиша шешей 90 жасқа толған.
Адам құдайдан бала тілегенде саналы, ағайынға ғана емес, елге пайдасы тиетін ұрпақ бер дейді. Сондай ұрпағымен мың жасайды.
Бүгінде жұрт Сейітжановтар әулетін ата-ана арманын орындаған, қазақша қайырып айтқанда, ұшпаққа жеткізген әулет деп атайды.
Ұлы той 100-ге толған әкеге, 90-ды еңсерген анаға арналды. Ұлағатты ұстаз, 11 ұл-қызға әке, тамырын тереңге жіберген алып бәйтерек Сейітжан ата қабірінде бір аунап түскен шығар, ал қосағының көре алмай кеткен қызығын көріп, шөберелерінің қолынан май жалап жүрген Хадиша шеше батасын беріп, жұрттың алқауында жүрді.
Ескі Шіліктегі Сейітжан Құртаев атындағы мектептің акт залында қазақтың таңдаулы ақындары жиылған айтулы айтыс өтті.
Ал, ескі Шіліктің қыр жағындағы тепсеңде мың қаралы көкпаршы қатысқан көкпар өтті.
Салым салғандар оншақты жеңіл көлікті болды. Ақшалай бәйгелер тігілді.
Қазақтың Мұхтар Шахановтай жақсы-жайсаңдары бас қосқан той даңғазаның, әке атын бұлдап атақ шығарудың емес, өнегенің тойы болды. Біз бұл тойдан тәрбиелі ұл-қыздың өздерін өмірге әкелген, биікке көтерген ата-анасына деген құрметін көрдік, ыстық махаббатын жүрекпен сезіндік.
Сейітжан атаның ұрпақтары ата-бабаны қастерлеудің үлгісін осылай көрсетіп жатыр.
Бақтияр ТАЙЖАН,
“Егемен Қазақстан”.
Оңтүстік Қазақстан облысы.