Оңтүстіктің футболдан өз біріншілігі басталды
Сейсенбі, 8 мамыр 2012 7:12
Елбасымыз елімізде бұқаралық спортты өрістету жайлы жиі айтып жүр. “Шынықсаң шымыр боласың” деген қанатты сөз бар. Кеңес Одағы кезінде ГТО-ға норматив тапсыру секілді мектеп оқушыларынан бастап, ересектерге дейін қамтитын спорттық шаралар “сен салар да мен салар, атқа жемді кім салармен” ұмытылыңқырап кетті. Соның кесірінен мойны ырғайдай, денесінде қырым артық еті жоқ, сүйегі сүйегіне әрең ілініп тұрған жастар көбейді. Салмақ жетіспеушілік әскер қатарына алу мәселесінде де қиындық туғызады.
Сейсенбі, 8 мамыр 2012 7:12
Елбасымыз елімізде бұқаралық спортты өрістету жайлы жиі айтып жүр. “Шынықсаң шымыр боласың” деген қанатты сөз бар. Кеңес Одағы кезінде ГТО-ға норматив тапсыру секілді мектеп оқушыларынан бастап, ересектерге дейін қамтитын спорттық шаралар “сен салар да мен салар, атқа жемді кім салармен” ұмытылыңқырап кетті. Соның кесірінен мойны ырғайдай, денесінде қырым артық еті жоқ, сүйегі сүйегіне әрең ілініп тұрған жастар көбейді. Салмақ жетіспеушілік әскер қатарына алу мәселесінде де қиындық туғызады.
Осындай жағдайда не істеу керек? Елбасымыз бен Спорт агенттігі бастама көтермесе, өңірлер “сен тимесең мен тимен” деп қарекетсіз отыра бермек пе? Оңтүстік осы сеңді бұзды. Жұртты бұқаралық спортқа тартудың ең үлкен көзі – футбол. Дүние жүзінде көрермендері де басқа спорт түрлерінен көп футбол өскелең ұрпақтың дене бітімін жетілдіріп, күшін молайтуға, денсаулығын нығайтуға көмектеседі.
Облыс әкімінің ұйытқы болуымен екі-үш жылдан бері аудандар мен қалаларда мыңға тарта спорт алаңшалары жөндеуден өтіп, спорт орталықтары жоқ ауылдарда жаңалары пайдалануға берілген болатын.
Жақында Шымкенттегі, Қажымұқан атындағы Орталық стадионда футболдан әуесқойлар арасында ашық біріншілік жалауын көтерді. Ұйымдастырушысы – облыс әкімдігі мен облыстық спорт, денешынықтыру және туризм басқармасы. Ереже бойынша облыстағы 14 аудан мен қалаларды қамтыған біріншілікке жасы 21-ге дейінгі жастар тартылады.Чемпионат екі айналымнан тұрады. 14 команда өзара екіден кездесу өткізеді. Жұмыс ырғағына көлеңке түсірмес үшін ойындарды тек жексенбі күндері ғана өткізуге шешім қабылданған. Ұпай санымен дараланған қос команда қараша айында Шымкенттегі стадионда кездесіп, жеңімпазды анықтайды.
Жарыстың ашылу салтанатында облыс әкімі Асқар Мырзахметов сөз сөйледі. Оңтүстік футболындағы ауыз толтырып айтарлықтай жеңістерді айтты. “Ордабасы” футбол клубы Супер кубокты жеңіп алды. Қыздар арасындағы ел чемпионатында облыс намысын қорғаған “БИИК-Қазығұрт” клубы мәреге шашасына шаң жұқпай келді. Яғни, жастар алар жақсы үлгі бар. Бүгін тұсауы кесіліп отырған облыс біріншілігі Елбасымыздың бұқаралық спортты өрістетуге берген тапсырмасын жүзеге асыру, деді облыс басшысы. Қазақстан Футбол федерациясының вице-президенті Михаил Гурман осындай тамаша бастамаға ұйытқы болған облыс әкімдігіне алғысын айтып, федерация атынан естелік ретінде “Алтын доп” тарту етті.
Турнирдің алғашқы ойынын Созақ және Сайрам аудандарының футболшылары ашты. Шынтуайтына келсек, Сайрам ауданы Созақтың халқын саны жағынан үш-төрт есе орайды. Соған қарап, Сайрам ауданының футболшылары жеңіске жетеді-ау деп топшылағандар көп болып еді. Бірақ, ен даласы Арқамен шектесетін, облыс орталығынан қиыс жатқан теріскейдің жігіттері жеңісті қолдан бере салатын бозымбайлар санатынан болмай шықты.
Жақында ауданға әкім болып бұған дейін аудан әкімінің орынбасары, аудандық мәслихаттың хатшысы болған Аманғали Аймұрзаев тағайындалған болатын. Осы Аманғалиыңыз кешегі Одақ жастары арасында өткен жарыстарда халықаралық аренада доп тепкен жігіт. Созақты он жылдан астам басқарып, облыстағы көшбасшы аудандардың қатарына қосып кеткен Созақбай Әбдіқұлов та көкөрім шағында сол командада ойнап, Одақ жарыстарына қатысқан. Алдында осындай бай тарихы бар, бүгінгі футболға Таңат Нөсербаевтай жайсаң жігітті берген Созақ өңірінің жастары ілкімді шықты. Алғашқы голды Сайрам қақпасына Ұлан Аймурзаев соқты.
– Бұл біріншілік жастарды спортқа тарту, саламатты өмір салтын насихаттауда айрықша мәнге ие, – деді облыстық спорт, денешынықтыру және туризм басқармасының бастығы Болат Қырықбаев. – Бүгінде жастар арасында маскүнемдік, нашақорлық мәселесі жиі көтеріліп жүр. Аға буын олардың істерге іс жоқ, бос жүргендіктен осындай жолға баратынын айтады. Ал, футбол – нағыз бұқаралық спорт. Әр аудан өз ішінде іріктеу өткізіп, мықтыларын даралайды. Тынымсыз жаттығулар өтеді. Ел ішінде байқалмай жүрген таланттардың өзін көрсетуіне мүмкіндік беріледі. Мұның тағы бір жақсы жағы, сол дараланған жастарды облыс намысын қорғап жүрген “Ордабасы” және “Қыран” футбол клубтарына алуға мүмкіндік бар.
Болат Наурызбайұлы осылай дейді. Осындайда ойға келеді. Қазақстан футболы шетелдің ойдан-қырдан қашқан, футболшы ретінде өз елінің керегіне жарамайтын, екінші, үшінші дивизионында ойнайтын футболшыларына толып кетті. Трансферлер арқылы күреп ақша тауып отырғандар бар. Сол орташа ойыны бар футболшылар қай клуб көп ақша берсе, өз клубын оңай тастап кете береді. Мұның екінші аты – сатқындық. Сатқындығыңыз намыссыздыққа әкеледі. Қазақ футболында осындай алмасулар немқұрайлылыққа, дағдыға, әдетке айналып бара жатқандығы қорқытады. Месси, Роналду секілді әлемдік ауқымдағы дарабоздарды Қазақстанға ойнауға шақырту құр қиял болып көрінгенімен, Қазақстан футболына үйретері бар ортаңқол ойыншыларды саудалауға әбден болады ғой.
Қазақстан футболын көтеру үшін үлкен жұмыстар жүріп жатыр. Бразилияға да жастар жіберіп жатырмыз. Қыруар ақшаны шығындап, жастарды жібергенше, сол жақтан білікті бапкерлер шақыртқан ел үшін арзан әрі тиімді болар еді. Қалай дегенде де, сырттың ойыншысы ақшасы көп елдерге елеңдеп тұрады. Шақырту алса алды-артына қарамайды. Өз ұлың өзегінен тепсең де кетпейді. Қазақстан басқа олимпиялық спорт түрлеріне қарағанда, футболға үлкен қаржы бөліп отыр. Оның сыртында әр облыс басшылары облыстың маңдайға басқан командасы арқылы өзара бәсекеге түсетіндей көрінеді. Солай болған екен, ендеше, өзге елде тамыр тартқан дарақты жерсіндірем демей, өз көшеттерін отырғызсын.
Ол – баяғы “былғары доп” сияқты аула клубтарын құру, ол – қазақ жастарын бұқаралық спортқа тарту, тұла бойы намысқа суырылған дарабоздарды тәрбиелеу. Бұл іске мемлекет үлкен жәрдем беріп отыр. Қаржы да, мүмкіндік те бар. Оңтүстік үлгі алатын осы жақсы істі бастап кетті.
Бақтияр ТАЙЖАН.
Оңтүстік Қазақстан облысы.