Байлықтың өркеуделігі, өзімшілдігі мен өнердің кіршіксіз келбетінің ғасырлардан бері бір қазанға басы сыйған емес. Әйтпесе, ХІХ ғасырда Біржан сал байлықтың буына малданған шонжарларға арнап ашу-ызаға толы «Жанбота», «Адасқақ» әндерін шырқар ма еді. Мұндай мысалдарды жіпке тізе беруге болады. Бірақ өркениеттің өріне шыққан қазіргі заманда да одан сабақ алмайтынымыз неліктен деген ойға қаласыз. Ал әділетсіздіктің балалар арасындағы бәсекеге көшуі тіпті де көз жұма қарайтын дүние емес екенін қалың көрерменнің осы бір жан жабырқатар жөнсіздікке бейжай қарамағанынан білуге болар.
Ресейдің «Бала дауысы» ән байқауының финалына дейін жеткен қазақстандық Ержан Мақсым (Ержанның анасы Гүлмира Әлібек ұлының «Максим» тегін бұрынғы құжаттардың орысша бұрмаланып толтырылуымен түсіндірген болатын, ал біз ана тіліміздегі бастапқы нұсқасы бойынша жаздық) бүгінде барша отандастарымыздың, тіпті ресейлік тыңдармандардың ілтипатына бөленді. Екінші орынға ие болған 12 жасар Ержан – Орал қаласының тумасы. Бұл байқауда Ержан ресейлік белгілі кәсіпкер Ян Абрамов пен танымал әнші Алсу Сафинаның қызы Микеллаға жол берді. Алайда шоудың қорытынды шешімінің әділдігіне көптеген көрерменмен бірге Ресей шоу-бизнесінің атақты жұлдыздары да күмәнмен қарады.
Осылайша, ТМД кеңістігіне тез танылып үлгерген балақайды елімізде еркелетіп «бауырсақ бала» деп те атай бастады. Жуырда Мәдениет және спорт министрі А.Мұхамедиұлы жеңімпаз баланы қабылдап қошемет көрсетсе, бірқатар телеарналар мен интернет арналар тікелей сұхбатқа да шақырып үлгерді. Сондай-ақ Мәскеуде жазда өтетін Муз-ТВ арнасының концертінде ән айтпақ. Яғни, Ержан екінші орын алғанымен, ерлеп тұр. Бұл туралы ақпарат құралдарында кеңінен жазылып жатыр.
Иә, аталған байқаудың қорытындысына, әлеуметтік желілердегі әлеуметтің әр алуан пікіріне зер сала отырып, қазіргі қоғамның тамырын тап басуға болады.
Ең бастысы, бұл жерде ата-ананың махаббаты мен амбициясының арасы бір-ақ қадам екенін байқағандаймыз. «Бала дауысы» байқауының жеңімпазы атанған қыздың ата-анасына қалың бұқара өткір сынды қарша боратып жатыр. Бұл орынды да. Себебі барша көрермен бәйгеде балалардың өнерімен бірге ата-ананың амбициясы да жарысқа түскенін көрді. Ал бала әлемі – кіршіксіз әлем. Осы байқауда оза шапқанымен көпшіліктің көңіл төрінен орын алмаған соң бәрі бекер болмақ. Яки бала көңіліне қылау түсті деуге болады. Бұл балаға қандай сабақ?..
Рас, өмір – жылтыр журналдардың мұқабасындағыдай жарқыраған мерейлі сәттерден де тұра бермейтінін Микелланың ата-анасы кеш аңдаған болуы кәдік. Әйтпесе бір кезде өзі де ата-ананың қаржылық капиталымен шоу-бизнестің шымылдығын еркін түрген Алсу баласының өнер жолында дәл сондай қадамды қайталауға бармас па еді, кім білсін?.. Бірақ қазақта «Ұяда не көрсең, ұшқанда соны ілесің» деген де тәмсіл барын танымал отбасының тарихынан көреміз. Алма ағашынан алысқа түспейді. Әлеуметтік желіде пікір қалдырушылар ресейлік сахнада әжептәуір орны бар әншінің 20 жыл бұрын «Евровидение» байқауында жүлдегер болуына ықпал еткен дауыстың да қолдан жасалғанын еске салады. Енді соңғы даулы оқиғадан кейін Алсудың биылғы «Евровидение» байқауына қатысушылардың жинаған ұпайын мәлімдейтін «Россия-1» телеарнасындағы миссиясына шектеу қойылды.
Міне, «өтіріктің құйрығы бір-ақ тұтам» деген осы. Шындықтың бар екеніне көз жеткізген шулы оқиға оның әрдайым кешігіп жүретінін де көрсеткендей... Десе де, бұл байқау бұдан кейін қампайған қалтасына сенген қайсыбір қауымның алшаң басқан аяғын аңдап басуына алып келеді деген үмітті оятты. Бұл арадағы басты жеңіс те осы болса керек.
Әлбетте, барлық ата-ана баласының қатарынан кем болғанын қаламайды. Қолы жеткенше құрбы-құрдастарының алды болуына қам қылады. Алайда, бір мезет баланың да өз мүмкіндігін өзіне қалдыру керек сияқты...
Ал Ержанымыз елдің ері болар күн алда!
