Домбырашылар Амангелді ауданындағы мектеп оқушыларынан, ауыл жастарынан, ұстаздардан құралды. Бес-он емес, 500 домбыраның құлақ күйін келтіріп, талаптыларды дирижер таяқшасына бағынуға үйрету оңай шаруа емес. Осы міндетті Амангелді ауданының перзенті, Мәдениет саласының үздігі Сапарғали Ахметжанов мойнына алыпты. Мәдениет саласында халық шағармашылығы бойынша жарты ғасырға жуық еңбек етіп келе жатқан 73 жастағы өнерпаз сахна жауапкершілігіне адалдық танытып, осында өзі тұратын Нұр-Сұлтан қаласынан арнайы төрт-бес рет келіпті.
– Мен «Амангелді ауданының құрметті азаматы» ғана емеспін, туған жерімнің патриотымын. Ауыл балаларының барлығы да домбыраны еркін тартады. Олар ойнаған күйдің әсері дуылдатып, жұрттың рухын көтеріп жіберген жоқ па, – дейді Сапарғали аға ұшатын қырандай қомданып.
Бір қызығы, аппақ шағаладай болып киініп, домбырасын баптап ұстап отырған күйшілерді фестивальға сырттан келген туристер арасынан «расында, саны 500 бе?» деп, сырттай санап та шыққандар болды. Ал Амангелді ауданының әкімі Әмірхан Асанов енді сахнаға мың домбырашы шығаруды ойластырып та қойыпты. Сапарғали аға әкім бастамасын құп алып, білек сыбанып отыр.
– Шілде айында «Домбыра күні» құрметіне сахнаға мың күйші шығатын болады. Олардың барлығын да ауылдардан жинаймыз. Ауылда домбыра шертпейтін қазақ жоқ, оларға он шақты күй үйретіп, сахнаға дайындау өз қолымда! – дейді Сапарғали Ахметжанов.
Мың амангелділік бір сәтте сахнаға шыққанда бүкіл қазақ даласына домбыра шанағынан күй шашылғандай болар, бәлкім.
Қостанай облысы,
Амангелді ауданы
