Медицина • 13 Мамыр, 2019

Қатерлі ісікке шалдыққандарды дәрі-дәрмекпен уақытында қамтамасыз ету тапсырылды

797 рет
көрсетілді
1 мин
оқу үшін

Денсаулық сақтау министрі Елжан Біртанов Алматы қаласындағы жұмыс сапары кезінде бірінші кезекте қатерлі ісікке шалдыққан науқастарды дәрі-дәрмектермен уақтылы қамтамасыз етуді тапсырған болатын.

Қатерлі ісікке шалдыққандарды дәрі-дәрмекпен уақытында қамтамасыз ету тапсырылды

Сондай-ақ Алматы қаласындағы Қазақ онкология және радиология ғылыми-зерттеу институтында Денсаулық сақтау министрінің төрағалығымен өткен селекторлық отырыста республика бойынша онкологиялық науқастарға медициналық көмек көрсету сапасы туралы, дәрі-дәрмекпен қамтамасыз ету мәселелері талқыланды.

«Қазақ онкология және радиология ғылыми-зерттеу институты» АҚ басқарма төрайымы міндетін атқарушы Диляра Қайдарова  2016-2019 жылдарға арналған мемлекеттік денсаулық сақтауды дамыту «Денсаулық» бағдарламасы бойынша және Қазақстан Республикасындағы онкологиялық ауруларға қарсы күрес жөніндегі 2018-2022 жылдарға арналған Кешенді жоспар іс-шараларының орындалғаны туралы баяндама жасады.  

Диляра Қайдарованың айтуынша, 2018 жылдың қорытындысы бойынша барлық онкологиялық бағдарламалар бойынша көрсеткіштерге қол жеткізілді, 0-1 сатылардағы ерте анықтау диагностикасы 26,2% -ға дейін өсті, 5 жыл өмір сүру деңгейі 51,0%-ға дейін өсті. Сонымен бірге, 2019 жылдың бірінші тоқсанының қорытындысы бойынша бірқатар аймақтарда (Алматы, Қызылорда, Атырау, Түркістан облыстары мен Шымкент қаласында) көрсеткіштердің жоспарлы мәніне қол жеткізілмеу қаупі орын алған.

Сондай-ақ, Министр Алматы, Атырау және Қызылорда облыстарының денсаулық сақтау басқарма жетекшілеріне онкологиялық ұйымдарда бас дәрігер лауазымында отырған тұлғалардың лауазымдық орынға сәйкестігін көтеру туралы тапсырма берді.